पाचोरा : यावर्षी पाचोरा शहरात भव्य उंचीच्या गणरायाच्या मूर्तीचे आगमन झाले असून जय मल्हार गणेश मित्र मंडळ, देशमुखवाडी यांची २२ फूट उंचीची गणेश मूर्ती भक्तांच्या दर्शनासाठी विराजमान झाली आहे. मात्र विसर्जन मिरवणुकीदरम्यान रस्त्यावरील विद्युत तारा, इंटरनेट केबल्स व डिक्स वायर यांचा गंभीर अडथळा निर्माण होणार असल्याने दुर्घटनेची शक्यता व्यक्त केली जात आहे. मंडळाने दिलेल्या निवेदनानुसार विसर्जन मिरवणुकीचा मार्ग देशमुखवाडी → गजानन हॉस्पिटल → जुने कोर्ट → हिंद ऑईल मिल रोड → जामनेर रोड → छत्रपती शिवाजी महाराज चौक → वी.पी. रोड → आठवडे बाजार असा निश्चित करण्यात आला आहे. या मार्गांवर विविध ठिकाणी विद्युत तारा व केबल्स खाली झुकलेल्या स्थितीत असल्याने उंच मूर्तीला स्पर्श होण्याचा धोका निर्माण झाला आहे. जर विसर्जन मिरवणुकीदरम्यान तारेला धक्का लागला तर अपघात होण्याची दाट शक्यता असून यामुळे मिरवणुकीत गोंधळ उडू शकतो, असेही निवेदनात नमूद करण्यात आले आहे.
याबाबत पाचोरा येथील शांतता समितीच्या बैठकीत अप्पर पोलीस अधीक्षक सौ. नेरकर मॅडम व आमदार किशोर आप्पा पाटील यांच्या प्रमुख उपस्थितीत महावितरण विभागाने तारा अडथळा ठरणार नाही, असे आश्वासन दिले होते. तथापि, 20 जुलै रोजी अर्ज दिल्यानंतरही अद्याप कोणतीही ठोस हालचाल झालेली नाही, अशी खंत मंडळाने व्यक्त केली आहे.
जय मल्हार गणेश मित्र मंडळाने याबाबत महावितरण विभाग प्रमुख अभियंत्यांना स्मरण-विनंती पत्र दिले असून त्यात तातडीने विद्युत तारा व वायरिंग योग्यरित्या व्यवस्थित करून अडथळामुक्त मार्ग उपलब्ध करून द्यावा, अशी मागणी करण्यात आली आहे. प्रशासनाने या विषयाची गांभीर्याने दखल घेऊन आवश्यक ती कार्यवाही केल्यास विसर्जन मिरवणूक निर्विघ्नपणे व सुरक्षितरीत्या पार पडेल, असा विश्वास मंडळाने व्यक्त केला आहे.
शहरातील नागरिकांनी देखील याबाबत प्रशासनाने तातडीने लक्ष घालून विद्युत तारा, इंटरनेट व डिक्स वायर यांची योग्य ती सोय करून मिरवणुकीत अडथळा होणार नाही याची दक्षता घ्यावी, अशी मागणी केली आहे.
प्रत माहितीसाठी हे पत्र आमदार किशोरआप्पा पाटील, उपविभागीय अधिकारी पाचोरा, उपविभागीय पोलीस अधिकारी पाचोरा, तहसीलदार पाचोरा, पोलीस निरीक्षक पाचोरा पोलीस स्टेशन तसेच नगरपालिका मुख्याधिकारी यांना पाठविण्यात आले आहे.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
