पाचोरा – दि. ७ मार्च २०२६ रोजी ग्राम पंचायत गाळणा बु., ता. पाचोरा येथे छत्रपती शिवाजी महाराज महाराजस्व समाधान शिबिराचे आयोजन उत्साहात पार पडले. शासनाच्या विविध योजनांचा लाभ थेट नागरिकांपर्यंत पोहोचविणे तसेच स्थानिक स्तरावर नागरिकांच्या अडचणी आणि तक्रारींचे तत्काळ निराकरण करणे या उद्देशाने आयोजित करण्यात आलेल्या या शिबिराला परिसरातील नागरिकांचा मोठा प्रतिसाद लाभला. कार्यक्रमाच्या प्रारंभी भारताचे आराध्य दैवत छत्रपती शिवाजी महाराज यांच्या प्रतिमेचे पूजन व दीपप्रज्वलन करून कार्यक्रमाचे उद्घाटन करण्यात आले. या कार्यक्रमाचे उद्घाटन आदरणीय उपविभागीय अधिकारी भूषण अहिरे यांच्या हस्ते संपन्न झाले. या वेळी उपस्थित मान्यवरांनी छत्रपती शिवाजी महाराज यांच्या कार्याचा गौरवपूर्ण उल्लेख करत त्यांच्या प्रशासनशैलीचा आदर्श आजही शासन व्यवस्थेसाठी प्रेरणादायी असल्याचे मत व्यक्त केले. शिबिराच्या प्रस्तावनेत पाचोरा तहसिलदार विजय बनसोडे यांनी या उपक्रमामागील उद्देश स्पष्ट केला. नागरिकांच्या समस्या स्थानिक पातळीवर जलद गतीने सोडविणे, विविध विभागांशी संबंधित कामे एका ठिकाणी पूर्ण करणे आणि शासन व प्रशासन यांच्यातील दुवा अधिक सक्षम करणे हे या शिबिराचे प्रमुख ध्येय असल्याचे त्यांनी सांगितले. शासनाने नागरिकांच्या दारी जाऊन त्यांच्या अडचणी समजून घेण्याचा आणि त्यांचे निराकरण करण्याचा जो उपक्रम हाती घेतला आहे, तो अत्यंत लोकाभिमुख आणि परिणामकारक असल्याचेही त्यांनी नमूद केले. कार्यक्रमाचे सूत्रसंचालन मंडळ अधिकारी सचिन मोरे यांनी केले. त्यांनी आपल्या सूत्रसंचालनातून शिबिराच्या विविध उपक्रमांची माहिती देताना छत्रपती शिवाजी महाराजांनी आपल्या स्वराज्यात प्रजेच्या अडचणी तत्काळ सोडविण्याची परंपरा निर्माण केली होती, याचा संदर्भ देत शासनानेही त्याच विचारातून नागरिकांच्या समस्या सोडविण्यासाठी हा अभिनव उपक्रम सुरू केला असल्याचे सांगितले. या शिबिराच्या माध्यमातून महसूल, ग्रामपंचायत, कृषी, सामाजिक न्याय, आरोग्य, पाणीपुरवठा, एस.टी. महामंडळ तसेच इतर विविध शासकीय विभागांशी संबंधित तक्रारी आणि अर्ज स्वीकारून त्यांचे तत्काळ निराकरण करण्याचा प्रयत्न करण्यात आला. अनेक नागरिकांनी या शिबिरात उपस्थित राहून आपल्या समस्या मांडल्या तसेच विविध योजनांविषयी सविस्तर माहिती घेतली. प्रशासनातील विविध विभागांचे अधिकारी आणि कर्मचारी नागरिकांना मार्गदर्शन करत होते. शिबिरात आलेल्या नागरिकांना शासनाच्या विविध योजनांची माहिती देण्यात आली. अनेक नागरिकांनी विविध योजनांसाठी अर्ज भरले. प्रशासनाने अर्जांची तपासणी करून शक्य तितक्या तातडीने निर्णय घेण्याचा प्रयत्न केला. नागरिकांच्या अडचणी समजून घेत त्यांचे समाधान करण्यासाठी प्रशासनातील अधिकारी आणि कर्मचारी विशेष प्रयत्न करताना दिसून आले. या शिबिरात संजय गांधी योजनेचे लाभार्थी, कृषी विभागांतर्गत विविध शेतकरी उपयोगी अवजारे वाटप, पाणीपुरवठा विभागाच्या ई-शिधापत्रिका वाटपाचा कार्यक्रम, एस.टी. महामंडळाच्या NCMC कार्ड नोंदणी, वारस दाखले ७/१२, दुरुस्त सातबारा, उत्पन्न दाखले, घरकुल लाभार्थ्यांना प्रमाणपत्र यांसारख्या विविध सेवा आणि योजनांचे वितरण करण्यात आले. यामुळे अनेक नागरिकांना आपल्या कामासाठी वेगवेगळ्या कार्यालयात जाण्याची गरज भासली नाही. या शिबिरात विविध विभागांमार्फत नागरिकांना लाभांचे वितरण पाचोरा उपविभागीय अधिकारी भूषण अहिरे, पाचोरा तहसिलदार विजय बनसोडे, कृषी अधिकारी सुधाकर कराड तसेच प्रमुख पाहुणे पाचोरा नगरपालिका चे उपनगराध्यक्ष किशोर बारवकर यांच्या हस्ते करण्यात आले. या प्रसंगी उपस्थित मान्यवरांनी नागरिकांना शासनाच्या योजनांचा जास्तीत जास्त लाभ घेण्याचे आवाहन केले. कार्यक्रमाच्या वेळी मंचावर राजेंद्र रामभाऊ पाटील, सतीश प्रकाश जाधव, रमेश हिरामण राठोड, आत्माराम हरी राठोड, डॉ. बी. बी. राजपूत, लीलाधर मुकुंद पाटील, डॉ. पी. एन. पाटील, अनिल धनु पाटील तसेच ग्रामपंचायत सदस्य उपस्थित होते. त्यांच्या उपस्थितीमुळे कार्यक्रमाला अधिक प्रतिष्ठा प्राप्त झाली. तसेच तहसिल कार्यालयाचे नायब तहसीलदार विनोद कुमावत, प्रमोद मोरे, प्रतिभा राजपूत, सुपमा उखडे, मंडळ अधिकारी आर. डी. पाटील, सचिन मोरे, ग्राम महसूल अधिकारी राजेंद्र शिरसाठ, अतुल पाटील, सागर बागुल, योगेश पाटील, बबन मंडळे, तात्याराव सपकाळ, प्रीती पाटील, महसूल सेवक, पोलीस पाटील तसेच रेशन दुकानदार उपस्थित होते. विविध विभागांचे अधिकारी आणि कर्मचारी यांनी शिबिराच्या यशस्वी आयोजनासाठी महत्त्वपूर्ण योगदान दिले. या शिबिराला गाळणा मंडळातील तसेच परिसरातील हजारो नागरिकांनी भेट देऊन शासनाच्या विविध योजनांचा लाभ घेतला. अनेक नागरिकांनी आपल्या समस्या मांडल्या आणि प्रशासनाने त्या समस्यांचे तातडीने निराकरण करण्याचा प्रयत्न केला. त्यामुळे नागरिकांमध्ये समाधानाचे वातावरण निर्माण झाले. नागरिकांनी या उपक्रमाबद्दल समाधान व्यक्त करत सांगितले की, शासन आणि प्रशासन जर अशा प्रकारे नागरिकांच्या दारी येऊन त्यांच्या अडचणी सोडवित असेल, तर सामान्य लोकांची अनेक कामे सोपी आणि जलदगतीने पूर्ण होऊ शकतात. शासनाच्या लोकाभिमुख धोरणांचे हे उत्तम उदाहरण असल्याचेही त्यांनी नमूद केले. सदर शिबिराच्या माध्यमातून विविध विभागांनी मिळून एकूण १०२३ लाभार्थ्यांना विविध योजनांचा लाभ देण्यात आला. त्यामुळे शासनाच्या योजनांचा लाभ खऱ्या अर्थाने सर्वसामान्य नागरिकांपर्यंत पोहोचत असल्याचे चित्र या शिबिरातून स्पष्ट झाले. अशा प्रकारचे उपक्रम प्रशासन आणि नागरिक यांच्यातील विश्वास अधिक दृढ करणारे ठरत असून भविष्यातही अशा शिबिरांचे आयोजन नियमितपणे करण्यात यावे, अशी अपेक्षा नागरिकांनी व्यक्त केली.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
