पाचोरा – शहरातील सिटी सर्व्हे कार्यालयाच्या कामकाजाबाबत एक वेगळाच प्रकार समोर येत असून, नागरिकांच्या मालमत्तेच्या मोजणीसाठी ऑनलाइन पद्धतीने तारीख निश्चित झाल्यानंतरही त्या दिवशी प्रत्यक्ष मोजणी होत नसल्याच्या तक्रारी पुढे येत आहेत. यापेक्षाही गंभीर बाब म्हणजे ऑनलाइन प्रक्रियेत निश्चित झालेल्या तारखांमध्ये नंतर बदल झाल्याचे दर्शविणारे कागदोपत्री तसेच ऑनलाइन स्वरूपातील पुरावे झुंज वृत्तपत्र व ध्येय न्यूजच्या हाती लागले आहेत. सिटी सर्व्हे कार्यालयामार्फत मालमत्तेची मोजणी, हद्द निश्चिती आणि संबंधित अभिलेख अद्ययावत करण्याची प्रक्रिया केली जाते. या कामासाठी नागरिक ऑनलाइन अर्ज करतात आणि त्यानंतर प्रणालीद्वारे मोजणीची तारीख निश्चित केली जाते. त्यामुळे संबंधित अर्जदार निश्चित दिवसाची माहिती घेऊन पुढील प्रक्रिया पूर्ण करण्यासाठी उपस्थित राहण्याची तयारी करतो. मात्र, निश्चित केलेल्या दिवशी कामकाज झाले नाही किंवा त्यानंतर प्रणालीमध्ये वेगळी तारीख नोंदविण्यात आली, तर या प्रक्रियेतील पारदर्शकतेबाबत स्वाभाविकपणे प्रश्न उपस्थित होतात. ऑनलाइन प्रणालीमध्ये प्रथम कोणती तारीख निश्चित करण्यात आली होती आणि त्यानंतर ती बदलण्यात आली असल्यास त्या बदलाची अधिकृत नोंद कुठे आहे, बदल करण्याचा अधिकार कोणाकडे आहे, तसेच संबंधित अर्जदाराला त्याची माहिती देण्यात आली होती का, हे स्पष्ट होणे आवश्यक आहे. जमीन आणि मालमत्तेशी संबंधित मोजणीच्या प्रक्रियेत प्रत्येक तारीख, प्रत्येक नोंद आणि प्रत्येक आदेशाला महत्त्व असते. त्यामुळे ऑनलाइन नोंद आणि प्रत्यक्ष कार्यालयीन कार्यवाही यामध्ये तफावत आढळल्यास त्याची चौकशी होणे गरजेचे आहे. विशेष म्हणजे, उपलब्ध पुराव्यांमधून तारखांच्या नोंदीबाबत काही प्रश्न निर्माण होत असून, यामागील नेमकी प्रशासकीय प्रक्रिया काय होती, याचा शोध घेणे आवश्यक ठरत आहे. एखाद्या नागरिकाने ऑनलाइन पद्धतीने अर्ज करून निश्चित तारखेवर मोजणीची अपेक्षा ठेवली आणि त्यानंतर तारीख बदलली गेली, तर त्या बदलाची कारणमीमांसा अर्जदाराला देण्यात आली का, हाही महत्त्वाचा मुद्दा आहे. या सर्व बाबींची पडताळणी करण्यासाठी झुंज वृत्तपत्र आणि ध्येय न्यूज यांनी उपलब्ध कागदपत्रे व ऑनलाइन नोंदींच्या आधारे तपास सुरू केला आहे. या प्रकरणात कोणत्याही व्यक्तीवर निष्कर्षापूर्वी आरोप करण्याचा हेतू नसून, शासकीय यंत्रणेतील प्रक्रिया पारदर्शक आहे का आणि नागरिकांच्या कामकाजात नियमांचे पालन होते आहे का, हा मुख्य प्रश्न आहे. संबंधित अधिकाऱ्यांनी या प्रकरणातील वस्तुस्थिती स्पष्ट करून नागरिकांच्या मनातील संभ्रम दूर करणे अपेक्षित आहे. मात्र, उपलब्ध नोंदींमुळे काही गंभीर प्रश्न अनुत्तरित राहतात. मूळ तारीख कोणती होती? ती बदलली असल्यास बदल कोणी केला? त्यामागचे कारण काय? आणि ऑनलाइन प्रणालीतील या संपूर्ण प्रक्रियेची अधिकृत नोंद उपलब्ध आहे का? या प्रश्नांची उत्तरे पुढील तपासात समोर आणली जाणार आहेत. पाचोरा सिटी सर्व्हेतील या अजब प्रकाराचा पुढील भाग लवकरच…
