पाचोरा नगरपरिषद : सविस्तर मतदान चित्र (झुंज वृत्तपत्र आणि ध्येय न्यूज विशेष विश्लेषण)

पाचोरा – शहरातील नगरपरिषद निवडणुकीचे मतदान यंदा शांत, सुटसुटीत आणि शिस्तबद्ध पद्धतीने पार पडले. सकाळपासूनच नागरिकांनी उत्साहाने मतदान केंद्रांकडे धाव घेतली. कुठेही गोंधळ नाही, पोलिस आणि कर्मचारी यांनी उत्तम समन्वय ठेवला, आणि नागरिकांनी लोकशाहीचा हक्क व्यक्त करण्यासाठी मोठ्या प्रमाणात पुढे येत मताधिक्याची नोंद केली. ध्येय न्यूज आणि झुंज वृत्तपत्रच्या प्रत्यक्ष पाहणीत शहरातील सर्वसामान्य मतदार यंदा मतदानाबाबत अधिक सजग आणि जबाबदार दिसून आला. “आपल्या शहराचा कारभार आपणच ठरवायचा” ही भावना सतत प्रकर्षाने जाणवत होती. पाचोरा शहरातील एकूण 59,084 मतदारांपैकी पुरुष 30,049, महिला 29,037 आणि इतर गटातील 6 मतदार आहेत. हे तिन्ही गट मिळून शहराचे लोकशाहीचे भक्कम आधारस्तंभ आहेत. पुरुष आणि महिलांचे प्रमाण जवळपास समान असल्याने निवडणुकीचा तोलही दोन्हीकडून सारखाच राखला जातो. यंदाच्या निवडणुकीत 40,660 मतदारांनी मतदानाचा हक्क बजावला. त्यात पुरुषांनी 20,990, महिलांनी 19,664 तर इतर गटातील सर्व 6 मतदारांनी 100 टक्के सहभाग नोंदवला. पुरुषांचे मतदान किंचित जास्त असले तरी महिलांचा सहभागही महत्त्वाचा व निर्णायक राहिला. दुपारनंतर महिलांचे गटाने घराबाहेर पडणे दिसल्याने शेवटच्या दोन तासांत मतदानाचा वेग वाढल्याचे ध्येय न्यूजच्या पाहणीत स्पष्ट दिसून आले. निवडणुकीत 14 प्रभागांमध्ये मतदानाचे वेगवेगळे स्वरूप दिसले. काही भागांत सकाळीच मोठ्या रांगा दिसल्या, तर काही प्रभागांत दुपारनंतर अचानक वाढ झाल्याचे जाणवले. काही ठिकाणी वातावरण शांत, तर काही प्रभागात अत्यंत उत्साही होते—झुंज वृत्तपत्र आणि ध्येय न्यूजच्या टीमने या सर्व प्रक्रियेचे बारकाईने निरीक्षण केले. प्रभाग 1 मध्ये 65.06 टक्के मतदान झाले. मंद गतीने सुरू झालेला मतदानाचा टप्पा 11 नंतर वाढला. प्रभाग 2 मध्ये 71.31 टक्के मतदान झाले आणि हा प्रभाग शहरातील टॉप-5 मध्ये गणला गेला. प्रभाग 3 मध्ये 70.68 टक्के मतदान झाले आणि महिलांचा उत्साह विशेषत: उल्लेखनीय होता. प्रभाग 4 व 5 मध्ये अनुक्रमे 68.55 व 71.13 टक्के मतदान दिसले, तर प्रभाग 6 मध्ये केवळ 63.55 टक्के मतदान झाले. प्रभाग 7 मध्ये 68.19 टक्के मतदान आणि ‘इतर’ गटातील 4 मतदारांचे 100 टक्के मतदान नोंदले गेले. प्रभाग 8 मध्ये 68.69 टक्के मतदान, प्रभाग 9 मध्ये शहरातील सर्वात कमी म्हणजे 62.34 टक्के मतदान झाले. प्रभाग 10 मध्ये 68.25 टक्के मतदान शांततेत पार पडले, तर प्रभाग 11 मध्ये 69.41 टक्के मतदान झाले. प्रभाग 12 मध्ये 68.09 टक्के, प्रभाग 13 मध्ये तब्बल 79.88 टक्के—हा शहरातील सर्वाधिक मतदान झालेला उत्साही प्रभाग ठरला. प्रभाग 14 मध्ये 72.03 टक्के मतदान नोंदले गेले आणि विशेष म्हणजे येथे महिलांनी पुरुषांपेक्षा अधिक मतदान केले. संपूर्ण शहरात 68.82 टक्के मतदान नोंदले गेले. प्रभाग 13 सर्वाधिक तर प्रभाग 9 सर्वात कमी मतदानाचा प्रभाग ठरला. पुरुषांच्या तुलनेत महिलांचे मतदान किंचित कमी असले तरी महिलांची मतदानातील जागरूकता आणि सक्रियता निवडणुकीतील निर्णायक घटक ठरणार आहे. इतर गटातील मतदारांनीही 100 टक्के मतदान करून लोकशाहीतील परिपक्वतेचा दाखला दिला. ध्येय न्यूज आणि झुंज वृत्तपत्र यांच्या संयुक्त पाहणीनुसार यंदा पाचोऱ्यातील नागरिकांनी मतदानाकडे केवळ राजकीय नव्हे तर आर्थिक आणि सामाजिक दृष्टिकोनातूनही गंभीरतेने पाहिले. अनेक प्रभागांमध्ये मतदारांचे प्रमुख लक्ष स्थानिक विकास, व्यवहार्य आश्वासने आणि उमेदवारांच्या उपस्थितीवर केंद्रित होते. आर्थिक गोष्टींचा प्रभाव जाणवत असला तरी शहरातील मुस्लिम मतदारांचे मतप्रवाह हे संपूर्ण निवडणुकीचे अंतिम समीकरण ठरवणारा सर्वात निर्णायक घटक राहील, असे प्रत्यक्ष निरीक्षणात प्रकर्षाने दिसून आले. अनेक प्रभागांमध्ये मुस्लिम मतदारसंख्या प्रभावी असल्याने त्यांची दिशानिर्देशित पसंती अंतिम निकालाकडे कलता तोल बदलू शकते—हे यंदाच्या निवडणुकीचे सर्वात महत्त्वाचे राजकीय वास्तव ठरले आहे. या सर्व सामाजिक आणि राजकीय घडामोडींच्या पार्श्वभूमीवर आणखी एक महत्त्वपूर्ण प्रवृत्ती यंदा ठळकपणे जाणवली—निकाल कोणाच्याही बाजूने असला तरी मतदार मात्र गुंडगिरी, दादागिरी आणि अवैध धंद्यांच्या आधारावर दबाव निर्माण करणाऱ्या घटकांविरोधात स्पष्टपणे मतदान करण्याच्या मनस्थितीत होते. दहशतीमुळे अनेक नागरिक हे उघडपणे बोलत नसले तरी प्रत्यक्ष बुथपातळीवरील पाहणीत ते दबक्या आवाजातही “यावेळी गुंडगिरीला मत नाही” असे सांगताना ऐकायला मिळाले. स्वच्छ, सुरक्षित आणि निर्भय वातावरण शहरात निर्माण व्हावे, ही भावना यंदा अनेक मतदारांच्या मनात आतून पेटलेली दिसली. निवडणुकीतील आणखी एक महत्त्वाचा पैलू म्हणजे महिलांचा निर्णायक सहभाग. घरात अंतिम निर्णय प्रामुख्याने महिलाच घेत असल्याने त्यांच्या अपेक्षा, अनुभव, निष्ठा आणि उमेदवारांबाबतचा विश्वास हा अंतिम निकालावर मोठा परिणाम घडवणारा घटक ठरणार आहे. “कोण रोज दिसतंय, कोण काम करतं, कोण मुद्द्याला मुद्दा देते, कोण हाताशी येतं आणि कोण आर्थिकदृष्ट्या अधिक मदत करतं” या निकषांवर महिलांनी मतदानाचा वापर केल्याचे स्पष्ट आढळले. पाचोरा नगरपरिषद निवडणूक 2025 मध्ये सुनिता ताई (शिवसेना) आणि सुचिता ताई (भाजप) यांच्यात रोमहर्षक टक्कर पाहायला मिळत आहे.  सुनीता ताई पाटील यांच्या बाजूने प्रचारातील सुबोध मांडणी दिसली, तर सुचिता ताई वाघ यांच्या प्रभाग निहाय मुद्द्यांना जोरकस प्रत्युत्तर देणारी टीम काही प्रमाणात मागे पडल्याचेही राजकीय वर्तुळात बोलले जात आहे. माध्यमांचा पूरक आधार नसल्याने त्यांच्यावर काही मर्यादा जाणवल्या. एकंदर पाहता पाचोरा शहरातील मतदानाची टक्केवारी, महिलांचा उत्साह, मुस्लिम मतदारांचा प्रभावी हस्तक्षेप, गुंडगिरीविरोधातील मतदारांचा उभा राहिलेला विरोध, आर्थिक मुद्द्यांचे राजकारण, इतर गटाची जागरूकता आणि प्रभागनिहाय मतदानाचे वेगवेगळे उतार-चढाव—या सर्वांमुळे यंदाची निवडणूक अत्यंत गुंतागुंतीची आणि निकालाच्या दृष्टीने अनिश्चित ठरली आहे. लोकशाहीची परिपक्वता आणि शहराच्या भविष्यासाठीचा दृष्टिकोन या निवडणुकीत स्पष्ट दिसून येतो. अंतिम निकालात या सर्व घटकांचा प्रभाव ठळकपणे उमटणार असून कोणत्या बाजूला लोकांचा निर्णायक कल आहे हे पाहणे आता सर्वांसाठीच उत्सुकतेचे ठरणार आहे.
“हे सगळं विश्लेषण जरी खरं असलं, तरी शेवटी राजकीय तोल संकट मोचक ‘जामनेरच्या जादुगारच्या हातातच’ आहे—असा संदेश मतदारांच्या पातळीवर स्पष्ट ऐकू येतो.”