पाचोरा – शहरातील शैक्षणिक क्षेत्रात आपल्या साधेपणाने, कर्तव्यनिष्ठेने आणि विद्यार्थ्यांप्रती असलेल्या अपार प्रेमामुळे वेगळी ओळख निर्माण करणारे आर. बी. तडवी सर दिनांक 31 मार्च 2026 रोजी सेवानिवृत्त होत आहेत. त्यानिमित्त दिनांक 30 मार्च 2026 रोजी सकाळी 10 वाजता पाचोरा तालुका सहकारी शिक्षण संस्था संचलित श्री गो से हायस्कूल पाचोरा येथे त्यांचा सेवापूर्ती समारंभ अत्यंत भावनिक वातावरणात पार पडणार आहे. या समारंभासाठी पाचोरा-भडगावचे माजी आमदार दिलीप भाऊ वाघ, पी.टी.सी. चेअरमन नानासाहेब संजय वाघ, व्हाईस चेअरमन नानासाहेब व्ही. टी. जोशी, सचिव ॲड. महेश देशमुख, शालेय समितीचे चेअरमन खालील देशमुख, तांत्रिक विभागाचे चेअरमन वासुदेव महाजन, संचालक योगेश पाटील, ज्येष्ठ संचालक दगाजीअण्णा वाघ, अर्जुनदास पंजाबी, मधुकर पाटील, सुनील पाटील, सतीश चौधरी, जिजाबाई पाटील, प्रकाश पाटील, राकेश थेपडे यांसह अनेक मान्यवरांची उपस्थिती लाभणार आहे. आर. बी. तडवी सरांचा जीवनप्रवास हा अत्यंत साधा, पण प्रेरणादायी आहे. 10 मार्च 1968 रोजी भुसावळ येथे जन्मलेल्या तडवी सरांचे बालपण पाचोऱ्यातील मित्राटाईप रेल्वे कॉलनीत गेले. त्यांच्या वडिलांनी रेल्वेत पॉइसमन म्हणून काम करत कुटुंबाची जबाबदारी सांभाळली. साध्या परिस्थितीत वाढलेल्या तडवी सरांनी शिक्षणाला कधीही दुय्यम स्थान दिले नाही. प्राथमिक शिक्षण जी. प. मराठी शाळा क्रमांक 2 पाचोरा येथे झाले, तर माध्यमिक शिक्षण श्री गो. से. हायस्कूल पाचोरा येथे पूर्ण झाले. पुढे एम. एम. कॉलेज पाचोरा येथे अकरावी ते बी. ए. पर्यंत शिक्षण घेत त्यांनी आपली शैक्षणिक वाटचाल पुढे चालू ठेवली. बी. एड. शिक्षण शहादा येथील लोणखेडा येथे पूर्ण करून त्यांनी शिक्षक होण्याचे स्वप्न साकार केले. नोकरी करत असतानाही त्यांनी शिक्षणाची ओढ कायम ठेवत मुक्त विद्यापीठातून एम. ए. पूर्ण केले. हे त्यांच्या जिद्दीचे आणि आत्मविकासाच्या वृत्तीचे उत्तम उदाहरण आहे. 1 ऑगस्ट 1996 रोजी श्री गो से हायस्कूल पाचोरा येथे उपशिक्षक म्हणून त्यांनी सेवेत प्रवेश केला आणि तब्बल 30 वर्षे अखंड, निष्ठेने आणि प्रामाणिकपणे सेवा बजावली. विशेष म्हणजे ज्या संस्थेत त्यांनी शिक्षण घेतले, त्याच संस्थेत शिक्षक म्हणून काम करण्याचा मान त्यांना लाभला. सेवाकाळात त्यांनी विविध जबाबदाऱ्या अत्यंत समर्थपणे पार पाडल्या. 2022 ते 2024 या कालावधीत त्यांनी सांस्कृतिक विभाग प्रमुख म्हणून विद्यार्थ्यांच्या कलागुणांना वाव दिला. त्यांच्या मार्गदर्शनाखाली अनेक सांस्कृतिक कार्यक्रम यशस्वी झाले. त्यानंतर 1 सप्टेंबर 2024 ते 31 मार्च 2026 या कालावधीत त्यांनी पर्यवेक्षक म्हणून शाळेच्या शैक्षणिक आणि प्रशासकीय कामकाजात महत्त्वाची भूमिका निभावली. तडवी सर हे फक्त शिक्षक नव्हते, तर ते विद्यार्थ्यांचे मार्गदर्शक, मित्र आणि प्रेरणास्थान होते. त्यांच्या अध्यापनशैलीत साधेपणा आणि प्रभावीपणा होता. विशेषतः इयत्ता दहावीच्या विद्यार्थ्यांना त्यांनी दिलेले मार्गदर्शन विद्यार्थ्यांच्या आयुष्यात मोलाचे ठरले. अनेक विद्यार्थ्यांनी त्यांच्या मार्गदर्शनामुळे यश मिळवले. त्यांच्या व्यक्तिमत्त्वाचा आणखी एक महत्त्वाचा पैलू म्हणजे त्यांचे उत्कृष्ट सूत्रसंचालन आणि शेरोशायरी. शाळेतील प्रत्येक कार्यक्रम त्यांच्या उपस्थितीने रंगतदार होत असे. त्यांच्या आवाजातला आत्मविश्वास आणि शब्दांमधील भावनांची ताकद प्रत्येकाच्या मनाला भिडणारी होती. तसेच त्यांनी हिंदी विषयाच्या प्रचार-प्रसारासाठीही मोठे योगदान दिले. तालुकास्तरावर शिक्षकांना हिंदी विषयाचे प्रशिक्षण देणे, विद्यार्थ्यांसाठी परीक्षा आयोजित करणे अशा विविध उपक्रमांत त्यांनी सक्रिय सहभाग घेतला. राष्ट्रभाषा हिंदीच्या प्रसारासाठी त्यांनी केलेले कार्य निश्चितच कौतुकास्पद आहे. कुटुंबीयांच्या बाबतीतही ते तितकेच जबाबदार आणि प्रेमळ आहेत. त्यांच्या पत्नीचे शिक्षण बी. ए. झाले असून त्या कुटुंबाची योग्य प्रकारे जबाबदारी सांभाळत आहेत. त्यांचा मुलगा बी. एस्सी., बी. एड. शिक्षण पूर्ण करून शिक्षण क्षेत्रात पुढे जाण्याच्या मार्गावर आहे, तर मुलगी बी. एस्सी. कॉम्प्युटरचे शिक्षण घेत आहे. तडवी सरांचा स्वभाव अत्यंत नम्र, संयमी आणि जिव्हाळ्याचा आहे. सहकारी शिक्षकांशी त्यांनी नेहमी स्नेहपूर्ण संबंध ठेवले. कोणालाही मदतीची गरज भासली तर ते नेहमी पुढाकार घेत. त्यामुळेच शाळेत त्यांना सर्वांचा आदर आणि प्रेम मिळाले. आज त्यांच्या सेवानिवृत्तीच्या निमित्ताने संपूर्ण शैक्षणिक क्षेत्रात एक भावनिक वातावरण निर्माण झाले आहे. तीस वर्षे एका संस्थेसाठी दिलेली सेवा ही केवळ नोकरी नसून ती एक साधना आहे. तडवी सरांनी ही साधना अत्यंत प्रामाणिकपणे पार पाडली. त्यांच्या निवृत्तीनंतर शाळेतील एक प्रेमळ शिक्षक, उत्कृष्ट सूत्रसंचालक आणि मार्गदर्शक यांची उणीव नक्कीच जाणवेल. मात्र त्यांनी घडवलेले विद्यार्थी, त्यांनी दिलेले संस्कार आणि त्यांनी निर्माण केलेली परंपरा ही कायम स्मरणात राहील. आर. बी. तडवी सरांच्या पुढील आयुष्यासाठी झुंज वृत्तपत्र व ध्येय न्यूज संपादक संदीप महाजन & परिवारातर्फे उत्तम आरोग्य, आनंद आणि समाधान लाभो, हीच सर्वांची मनापासून इच्छा आहे. त्यांच्या सेवेला सलाम आणि त्यांच्या व्यक्तिमत्त्वाला मानाचा मुजरा!
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
