पाचोरा – तालुका सहकारी शिक्षण संस्था संचलित गो. से. हायस्कूल, पाचोरा येथे दीर्घकाळापासून शैक्षणिक क्षेत्रात उल्लेखनीय कार्य करणारे ज्येष्ठ शिक्षक एम.टी. कौंडीण्य सर यांची पर्यवेक्षकपदी नियुक्ती करण्यात आल्याने शाळेच्या प्रगतीला नवी चालना मिळणार असल्याची भावना व्यक्त केली जात आहे. त्यांच्या या नियुक्तीमुळे शाळेतील शैक्षणिक गुणवत्ता, प्रशासनिक कार्यपद्धती आणि विद्यार्थ्यांच्या सर्वांगीण विकासासाठी अधिक प्रभावी दिशा मिळेल, असा विश्वास व्यक्त केला जात आहे. एम.टी. कौंडीण्य सर यांनी आपल्या प्रदीर्घ सेवाकाळात अध्यापनासोबतच विद्यार्थ्यांच्या बौद्धिक, नैतिक आणि सामाजिक जडणघडणीत मोलाचे योगदान दिले आहे. त्यांच्या शांत, संयमी आणि अभ्यासू स्वभावामुळे ते विद्यार्थी, शिक्षक आणि पालकांमध्ये लोकप्रिय आहेत. शैक्षणिक गुणवत्ता वाढविणे, विद्यार्थ्यांमध्ये शिस्त व आत्मविश्वास निर्माण करणे आणि विविध शैक्षणिक उपक्रमांमध्ये सक्रिय सहभाग घेणे या त्यांच्या कार्यशैलीमुळे त्यांना पर्यवेक्षक पदासाठी योग्य मानण्यात आले आहे. या नियुक्तीच्या निमित्ताने संस्थेचे व्हॉ. चेअरमन मा. नानासाहेब व्ही.टी. जोशी यांच्या हस्ते एम.टी. कौंडीण्य सर यांचा सत्कार करून त्यांचे अभिनंदन करण्यात आले. यावेळी त्यांच्या कार्याचा गौरव करताना मा. नानासाहेब व्ही.टी. जोशी यांनी सांगितले की, “शाळेच्या प्रगतीमध्ये शिक्षकांची भूमिका अत्यंत महत्त्वाची असते. कौंडीण्य सरांनी आजपर्यंत प्रामाणिकपणे व निष्ठेने काम केले आहे. त्यांच्या अनुभवाचा आणि नेतृत्वगुणांचा लाभ पर्यवेक्षक म्हणून निश्चितच शाळेला होईल.” कार्यक्रमास संस्थेचे चेअरमन मा. नानासाहेब संजय वाघ, ज्येष्ठ संचालक मा. दादासाहेब अर्जुनदास पंजाबी, मा. बापूसाहेब प्रकाश पाटील यांची उपस्थिती लाभली. या सर्व मान्यवरांनीही कौंडीण्य सरांच्या नियुक्तीचे स्वागत करत त्यांना पुढील कार्यासाठी शुभेच्छा दिल्या. शाळेचे मुख्याध्यापक एन.आर. ठाकरे सर यांनी आपल्या मनोगतात कौंडीण्य सरांच्या कार्याचा आढावा घेताना सांगितले की, “कौंडीण्य सर हे केवळ एक उत्तम शिक्षकच नाहीत, तर ते एक उत्तम मार्गदर्शक आणि समन्वयक देखील आहेत. त्यांच्या नेतृत्वामुळे शाळेतील शैक्षणिक उपक्रम अधिक सुसंगत आणि प्रभावी होतील.” तसेच उपमुख्याध्यापक आर.एल. पाटील सर यांनीही त्यांच्या सहकार्यपूर्ण वृत्तीचे आणि कामातील काटेकोरपणाचे कौतुक केले. याप्रसंगी शाळेतील सर्व पर्यवेक्षक, विभाग प्रमुख, शिक्षक व शिक्षकेतर कर्मचारी बंधु-भगिनी मोठ्या संख्येने उपस्थित होते. सर्वांनी एकमुखाने कौंडीण्य सरांचे अभिनंदन करून त्यांच्या पुढील वाटचालीस मनःपूर्वक शुभेच्छा दिल्या. शाळेतील अनेक शिक्षकांनी आपल्या भावना व्यक्त करताना सांगितले की, कौंडीण्य सर यांचे मार्गदर्शन मिळणे ही शाळेसाठी एक सकारात्मक बाब असून त्यामुळे शैक्षणिक वातावरण अधिक सक्षम आणि प्रेरणादायी बनेल. एम.टी. कौंडीण्य सर यांनीही आपल्या मनोगतात सर्वांचे आभार मानताना सांगितले की, “संस्थेने माझ्यावर ठेवलेला विश्वास मी नक्कीच सार्थ ठरविण्याचा प्रयत्न करीन. शाळेतील शिक्षक, विद्यार्थी आणि कर्मचारी यांच्या सहकार्याने आपण शाळेला अधिक प्रगतीच्या दिशेने नेऊ.” त्यांनी शैक्षणिक गुणवत्ता वृद्धिंगत करण्यासाठी आणि विद्यार्थ्यांच्या सर्वांगीण विकासासाठी सातत्याने प्रयत्न करण्याचा निर्धार व्यक्त केला. या नियुक्तीमुळे गो. से. हायस्कूलमध्ये शैक्षणिक नेतृत्वाला बळकटी मिळणार असून, विद्यार्थ्यांच्या उज्ज्वल भविष्यासाठी अधिक प्रभावी उपक्रम राबवले जातील, अशी अपेक्षा व्यक्त होत आहे. संस्थेच्या कार्यपद्धतीत पारदर्शकता, शिस्त आणि गुणवत्ता यांचा समतोल राखत शाळा प्रगतीच्या नव्या उंचीवर पोहोचेल, असा विश्वास सर्व स्तरांतून व्यक्त होत आहे.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
