पाचोरा – नगरपरिषदेच्या वतीने 26 जानेवारी 2025 रोजी प्रजासत्ताक दिनाचे औचित्य साधून विविध विकासात्मक कार्यक्रमांचे आयोजन करण्यात आले आहे. शहराच्या सर्वांगीण विकासाच्या दृष्टीने महत्वाचे ठरणारे हे कार्यक्रम नागरिकांसाठी नव्या सुविधा आणि संधी निर्माण करणारे ठरणार आहेत.
या विशेष दिवशी सकाळी 10 वाजता महाराजा सयाजीराव गायकवाड बालोद्यानाच्या नूतनीकरणाचे लोकार्पण करण्यात येणार आहे. बालोद्यान हे लहान मुलांसाठी आनंदाचे ठिकाण असून त्याचा पुर्ननिर्मितीसाठी विशेष लक्ष देण्यात आले आहे. बालोद्यानामध्ये आधुनिक खेळणी, हिरवळ, वॉकींग ट्रॅक यांसारख्या सुविधा उभारण्यात आल्या आहेत. सुरक्षितता आणि पर्यावरणपूरकता यांचा विचार करून हा प्रकल्प साकारण्यात आला आहे.
यानंतर सकाळी 10.15 वाजता लीलावती हॉस्पिटल समोरील ज्येष्ठ नागरिक विरंगुळा केंद्राचे लोकार्पण होणार आहे. पाचोरा शहरातील ज्येष्ठ नागरिकांसाठी हा केंद्र उपयुक्त ठरणार असून येथे त्यांच्यासाठी आरामदायी वातावरण, वाचनालय, योगा आणि ध्यानधारणा कक्ष, तसेच सामूहिक चर्चासत्रांसाठी स्वतंत्र जागा उपलब्ध करून देण्यात आली आहे. निवृत्तीनंतरच्या जीवनाला उभारी देण्यासाठी ही सुविधा लाभदायक ठरेल.
यानंतर विघ्नहर्ता हॉस्पिटल समोर पाचोरा नगरपरिषदेच्या दीनदयाळ अंत्योदय योजना – राष्ट्रीय नागरी उपजीविका अभियान अंतर्गत पाचोरा शहर उपजीविका केंद्राचे उद्घाटन होणार आहे. आर्थिकदृष्ट्या दुर्बल घटकांसाठी रोजगार आणि स्वयंरोजगाराच्या संधी निर्माण करण्यासाठी हे केंद्र महत्वपूर्ण भूमिका बजावेल. महिलांसाठी स्वावलंबनाचे उपक्रम, युवकांसाठी व्यावसायिक प्रशिक्षण, आणि लघुउद्योगांना चालना देण्यासाठी अर्थसहाय्याची सुविधा या केंद्राद्वारे देण्यात येईल.
या कार्यक्रमांचे उद्घाटन मा. आमदार श्री किशोर आप्पा पाटील यांच्या शुभहस्ते होणार आहे. प्रमुख पाहुणे म्हणून मा. आयुष प्रसाद साहेब, जिल्हाधिकारी, जळगाव उपस्थित राहणार आहेत. पाचोरा नगरपरिषद नागरिकांसाठी नवीन सुविधा उपलब्ध करून देण्याच्या दृष्टीने सातत्याने प्रयत्नशील आहे.
पाचोरा नगरपरिषदेचे मुख्याधिकारी तथा प्रशासक मंगेश देवरे यांनी या कार्यक्रमांना मोठ्या संख्येने उपस्थित राहण्याचे आवाहन केले आहे. या लोकार्पण सोहळ्यांमुळे पाचोरा शहराच्या विकासात एक नवा अध्याय लिहिला जाणार असून, नागरिकांना या सर्व सुविधांचा लाभ घ्यावा, असेही त्यांनी नमूद केले आहे.
या उपक्रमांमुळे पाचोरा शहराच्या विकासाला नवी दिशा मिळेल आणि नागरी सुविधांच्या क्षेत्रात एक आदर्श प्रस्थापित होईल.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
