पाचोरा : ग्रामीण भागातील युवक-युवतींना रोजगाराच्या संधी उपलब्ध करून देण्यासाठी पाचोरा तालुका सहकारी शिक्षण संस्था संचलित श्री. गो.से. हायस्कूल (MCVC) पाचोरा येथे दिनांक 27 मार्च 2026 रोजी सकाळी ठीक 8 वाजता जिल्हास्तरीय महारोजगार भरती मेळाव्याचे आयोजन करण्यात आले आहे. या मेळाव्याच्या माध्यमातून विविध कंपन्यांकडून पात्र विद्यार्थ्यांच्या मुलाखती घेऊन त्यांना थेट रोजगाराची संधी उपलब्ध करून दिली जाणार असल्याने परिसरातील बेरोजगार तरुणांसाठी ही मोठी संधी ठरणार आहे. छत्रपती संभाजीनगर येथील टीम प्लस एच.आर. सर्व्हिसेस प्रायव्हेट लिमिटेड, छत्रपती संभाजीनगर यांच्या संयुक्त विद्यमाने हा महारोजगार भरती मेळावा आयोजित करण्यात आला असून या मेळाव्यात विविध औद्योगिक क्षेत्रातील कंपन्यांचा सहभाग असणार आहे. विशेष म्हणजे अहिल्यानगर, पुणे आणि छत्रपती संभाजीनगर परिसरातील इलेक्ट्रिकल बस तयार करणाऱ्या नामांकित कंपनीसह इतर तीन कंपन्या या रोजगार मेळाव्यात सहभागी होणार आहेत. या कंपन्यांमार्फत पात्र विद्यार्थ्यांची थेट मुलाखत घेऊन त्यांची निवड करण्यात येणार आहे. या रोजगार मेळाव्यात निवड झालेल्या विद्यार्थ्यांना दरमहा सुमारे 17 हजार ते 19 हजार रुपयांपर्यंत स्टायपेंड देण्यात येणार आहे. त्याचबरोबर कॅन्टीन सुविधा, कंपनीची बस सुविधा, इन्शुरन्ससह इतर विविध कंपनीकडून दिले जाणारे लाभ देखील उपलब्ध करून दिले जाणार आहेत. त्यामुळे विद्यार्थ्यांना केवळ रोजगाराची संधीच नव्हे तर सुरक्षित आणि सुसज्ज कामाचे वातावरणही मिळणार आहे. याशिवाय विद्यार्थ्यांसाठी ‘कमवा व शिका’ या संकल्पनेअंतर्गत शिक्षण आणि रोजगार या दोन्ही संधी एकत्रितपणे उपलब्ध करून देण्याचा प्रयत्न या उपक्रमातून करण्यात आला आहे. या योजनेच्या माध्यमातून विद्यार्थ्यांना बी. होकेशनल तसेच डी. ओकेशनल डिग्री मिळवण्याची संधी देखील उपलब्ध होणार आहे. त्यामुळे रोजगारासोबतच शैक्षणिक प्रगतीही साधता येणार असल्याने विद्यार्थ्यांसाठी हा उपक्रम अत्यंत उपयुक्त ठरणार आहे. या महारोजगार भरती मेळाव्यासाठी पात्रता निकष देखील निश्चित करण्यात आले आहेत. किमान कौशल्य विभागातील कोणत्याही ट्रेडमधून उत्तीर्ण झालेले विद्यार्थी, आयटीआयच्या कोणत्याही ट्रेडचे उत्तीर्ण विद्यार्थी, तसेच डिप्लोमा किंवा इंजिनिअरिंग शिक्षण घेतलेले विद्यार्थी या मेळाव्यात सहभागी होऊ शकतात. यासाठी उमेदवारांचे वय किमान 18 वर्षे ते कमाल 35 वर्षे असणे आवश्यक आहे. मुलाखतीसाठी येताना उमेदवारांनी काही आवश्यक कागदपत्रे सोबत आणणे अनिवार्य करण्यात आले आहे. यात शैक्षणिक मार्कशीटची झेरॉक्स प्रत, संबंधित प्रमाणपत्रे, शाळा सोडल्याचा दाखला, आधार कार्डची झेरॉक्स प्रत, तीन पासपोर्ट साइज फोटो तसेच बँक खात्याची झेरॉक्स प्रत किंवा कॅन्सल चेकची प्रत सोबत आणणे आवश्यक आहे. ही कागदपत्रे पूर्ण असल्यास उमेदवारांची नोंदणी प्रक्रिया सुलभ होणार असून मुलाखतीसाठी त्यांना संधी मिळू शकणार आहे. या जिल्हास्तरीय महारोजगार भरती मेळाव्याचे उद्घाटन पाचोरा भडगाव तालुक्याचे माजी आमदार तथा पीटीसी संस्थेचे अध्यक्ष भाऊसाहेब दिलीप वाघ यांच्या हस्ते होणार आहे. यावेळी संस्थेचे चेअरमन नानासाहेब संजय वाघ, संस्थेचे सचिव ॲड. दादासाहेब महेश एस. देशमुख, संस्थेचे व्हाईस चेअरमन नानासो व्हि. टी. जोशी, शालेय समितीचे चेअरमन दादासाहेब खलील देशमुख, शालेय तांत्रिक विभाग चेअरमन अण्णासाहेब वासुदेव महाजन, बाळकृष्ण मुळे संचालक, टीम प्लस एच. आर. प्रायव्हेट सर्व्हिसेस लिमिटेड, प्राचार्य एन. आर. पाटील तसेच उपप्राचार्य आर. एल. पाटील यांची प्रमुख उपस्थिती लाभणार आहे. ग्रामीण भागातील युवकांना रोजगाराच्या संधी उपलब्ध करून देण्यासाठी शिक्षण संस्था आणि औद्योगिक क्षेत्र यांच्यातील समन्वयातून हा उपक्रम राबविण्यात येत आहे. त्यामुळे विद्यार्थ्यांना शिक्षणानंतर रोजगारासाठी मोठ्या शहरांकडे धाव घेण्याची गरज कमी होऊन स्थानिक पातळीवरच रोजगार मिळण्याचा मार्ग खुला होणार आहे. या महारोजगार भरती मेळाव्यासाठी मुलाखत नोंदणी करण्यासाठी प्रा. मनीष बाविस्कर (किमान कौशल्य विभाग प्रमुख) – 8275270554 तसेच शरद माथुरवैश्य – 7972770106 यांच्याशी संपर्क साधावा, असे आवाहन आयोजकांकडून करण्यात आले आहे. परिसरातील जास्तीत जास्त युवकांनी या रोजगार मेळाव्याचा लाभ घेऊन आपल्या उज्ज्वल भविष्यासाठी ही संधी साधावी, असे आवाहन देखील करण्यात आले आहे.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
