पाचोरा येथे जिल्हास्तरीय भव्य रोजगार मेळावा; शेकडो युवकांना नोकरीची सुवर्णसंधी

पाचोरा तालुक्यातील युवक-युवतींसाठी करिअर घडविण्याची मोठी संधी उपलब्ध करून देणारा जिल्हास्तरीय रोजगार व शिकाऊ उमेदवारी मेळावा शुक्रवार दिनांक 27 मार्च 2026 रोजी आयोजित करण्यात आला आहे. पाचोरा तालुका सहकारी शिक्षण संस्था संचालित श्री गो.से. हायस्कूल, पाचोरा (MCVC/HSC व्होकेशनल विभाग) तसेच Team Plus HR Services Pvt. Ltd., छत्रपती संभाजीनगर यांच्या संयुक्त विद्यमाने हा भव्य मेळावा पार पडणार असून परिसरातील हजारो विद्यार्थ्यांमध्ये या मेळाव्याबाबत उत्सुकता निर्माण झाली आहे. या रोजगार मेळाव्याचे आयोजन श्री गो.से. हायस्कूलच्या मुख्य इमारतीत करण्यात आले असून नोंदणी प्रक्रिया MCVC विभागामध्ये पार पडणार आहे. उद्घाटन समारंभ व प्रत्यक्ष मुलाखती ड्रॉईंग हॉलमध्ये होणार असून सकाळी नेमक्या 8 वाजता उमेदवारांनी उपस्थित राहणे अपेक्षित आहे. ‘Reporting Time 08:00 A.M. Sharp’ असे स्पष्टपणे नमूद करण्यात आले आहे, जेणेकरून संपूर्ण प्रक्रिया वेळेत व शिस्तबद्ध पद्धतीने पार पाडता येईल. या मेळाव्याचे उद्घाटन आमदार दिलीप वाघ यांच्या शुभहस्ते होणार आहे. तसेच कार्यक्रमाला प्रमुख उपस्थिती म्हणून नानासाहेब संजय वाघ (चेअरमन, पाचोरा तालुका सहकारी शिक्षण संस्था), दादासाहेब अँड. महेश एस. देशमुख (सेक्रेटरी, पाचोरा तालुका सहकारी शिक्षण संस्था), नानासाहेब व्ही.टी. जोशी (व्हॉईस चेअरमन), दादासाहेब खलिल देशमुख (चेअरमन शालेय समिती), अण्णासाहेब वासुदेव महाजन (चेअरमन तांत्रिक विभाग समिती) आणि बाळकृष्ण मुळे (संचालक, Team Plus HR Services Pvt. Ltd.) उपस्थित राहणार आहेत. या मान्यवरांच्या उपस्थितीमुळे कार्यक्रमाचे महत्त्व अधिक वाढले आहे. या रोजगार मेळाव्यात विविध क्षेत्रातील नामांकित कंपन्यांचा सहभाग राहणार असून विशेषतः ‘K-Drive’ सोबत तीन आघाडीच्या कंपन्या सहभागी होत आहेत. यामध्ये इलेक्ट्रिक बस निर्मिती करणाऱ्या कंपनीसह एक्सेल निर्मिती करणाऱ्या उद्योगांचा समावेश आहे. उमेदवारांना 17,000 ते 19,600 रुपये पर्यंत स्टायपेंड मिळण्याची संधी उपलब्ध होणार आहे. तसेच ‘कमवा आणि शिका’ योजनेअंतर्गत BVoc/DVoc अभ्यासक्रम विद्यापीठाच्या माध्यमातून पूर्ण करण्याची सुवर्णसंधी देखील मिळणार आहे. उमेदवारांसाठी बस सुविधा, कँटीन, गणवेश, बूट तसेच विमा संरक्षण यांसारख्या सुविधा कंपन्यांकडून दिल्या जाणार आहेत. या कंपन्यांचे कार्यक्षेत्र सूपा, अहिल्यानगर आणि पुणे परिसरात असल्यामुळे उमेदवारांना औद्योगिक क्षेत्रात प्रत्यक्ष अनुभव घेण्याची संधी मिळणार आहे. विशेष म्हणजे या मेळाव्यात 200 पेक्षा अधिक नोकरीच्या संधी उपलब्ध करून देण्यात येणार आहेत, ज्यामुळे ग्रामीण व शहरी भागातील युवकांना रोजगाराच्या दृष्टीने मोठा आधार मिळणार आहे. या मेळाव्यासाठी पात्रता निकष स्पष्टपणे ठरविण्यात आले आहेत. MCVC (कोणत्याही ट्रेड) 12वी उत्तीर्ण, ITI, डिप्लोमा, पदवीधर तसेच पदव्युत्तर शिक्षण पूर्ण केलेले उमेदवार या मेळाव्यासाठी पात्र राहतील. वयाची अट 18 ते 35 वर्षे ठेवण्यात आली असून सर्व पात्र उमेदवारांना या संधीचा लाभ घेण्याचे आवाहन आयोजकांनी केले आहे. सहभाग पूर्णपणे मोफत असून इच्छुक उमेदवारांनी वेळेपूर्वी नोंदणी करणे आवश्यक आहे. उमेदवारांनी मुलाखतीसाठी येताना आवश्यक कागदपत्रांची पूर्तता करणे बंधनकारक आहे. यामध्ये बायोडाटा (Resume), आधार किंवा पॅन कार्ड, बारावीचे गुणपत्रक, शेवटच्या शिक्षणाचे गुणपत्रक, दोन पासपोर्ट फोटो, बँक तपशील (पहिल्या पानाची झेरॉक्स किंवा रद्द केलेला चेक) तसेच शाळा सोडल्याचा दाखला (LC) यांचा समावेश आहे. योग्य कागदपत्रांसह उपस्थित राहिल्यास निवड प्रक्रिया अधिक सुलभ होणार आहे. या मेळाव्याचे समन्वयक म्हणून मनिष भा. बाविस्कर (MCVC विभाग प्रमुख), बाळकृष्ण मुळे (संचालक, Team Plus HR Services Pvt. Ltd.) आणि शरद अ. माथुरवैश्य यांची नियुक्ती करण्यात आली आहे. तसेच कार्यक्रमाचे मार्गदर्शन प्राचार्य एन.आर. ठाकरे आणि उपमुख्याध्यापक आर.एल. पाटील यांच्या नेतृत्वाखाली होत आहे. ग्रामीण भागातील युवकांना योग्य मार्गदर्शन, रोजगाराच्या संधी आणि कौशल्य विकासाची दिशा मिळावी या उद्देशाने हा मेळावा आयोजित करण्यात आला आहे. आजच्या स्पर्धात्मक युगात केवळ शैक्षणिक पात्रता पुरेशी नसून प्रत्यक्ष उद्योग क्षेत्रातील अनुभव आणि कौशल्य अत्यंत महत्त्वाचे ठरत आहे. याच पार्श्वभूमीवर हा मेळावा युवकांसाठी अत्यंत उपयुक्त ठरणार आहे. पाचोरा व परिसरातील सर्व पात्र उमेदवारांनी या सुवर्णसंधीचा लाभ घ्यावा, असे आवाहन आयोजकांच्या वतीने करण्यात आले आहे. रोजगाराच्या शोधात असलेल्या तरुणांसाठी हा मेळावा म्हणजे एक नवीन दिशा देणारा आणि उज्ज्वल भविष्यासाठी पहिले पाऊल ठरणारा उपक्रम असल्याचे मत व्यक्त होत आहे.