पाचोरा-भडगाव परिसरात अवैध वाळू वाहतुकीविरोधात महसूल प्रशासनाने उघडलेल्या मोहिमेला अधिक गती मिळाली असून प्रांताधिकारी भुषण अहिरे यांच्या मार्गदर्शनाखाली महसूल विभागाने एका दिवसात सलग कारवाया करत अवैध वाळू वाहतूक करणारी चार वाहने जप्त केली आहेत. या धडक कारवाईमुळे वाळू माफियांचे धाबे दणाणले असून महसूल विभागाच्या सतर्क आणि परिणामकारक कार्यपद्धतीची पुन्हा एकदा प्रचिती आली आहे. नदीपात्रांची होणारी हानी, शासनाच्या महसुलाचे होणारे नुकसान आणि पर्यावरणीय समतोल बिघडविणाऱ्या अवैध वाळू व्यवसायावर आळा घालण्यासाठी प्रांताधिकारी भुषण अहिरे यांनी महसूल यंत्रणेला अधिक सक्रिय राहण्याच्या सूचना दिल्या आहेत. त्यानुसार विविध भागांमध्ये विशेष पथके कार्यरत असून संशयित वाहतुकीवर सातत्याने लक्ष ठेवण्यात येत आहे. याच मोहिमेअंतर्गत १० जून रोजी विविध ठिकाणी कारवाई करून अवैध वाळू वाहतुकीत वापरण्यात येणारी वाहने ताब्यात घेण्यात आली. मौजे कोठली परिसरात महसूल विभागाच्या पथकाने छापा टाकून अवैध वाळूची वाहतूक करणारे दोन ट्रॅक्टर पकडले. ही कारवाई दिनेश येंडे मंडळ अधिकारी (पथक प्रमुख) यांच्या नेतृत्वाखाली पार पडली. त्यांच्या समवेत समाधान हूल्लूळे ग्राम महसूल अधिकारी कोठली, गीतेश महाजन ग्राम महसूल अधिकारी कजगाव, विवेक महाजन ग्राम महसूल अधिकारी, योगेश पाटील ग्राम महसूल अधिकारी, प्रशांत कुंभारे ग्राम महसूल अधिकारी टोणगाव, लोकेश महाजन ग्राम महसूल अधिकारी आंचळगाव, करण कुलकर्णी ग्राम महसूल अधिकारी तांदूळवाडी, महादू कोळी महसूल सहायक तसेच किरण मोरे महसूल सेवक टोनगाव यांनी प्रभावीपणे सहभाग नोंदविला. पकडण्यात आलेले दोन्ही ट्रॅक्टर पुढील कार्यवाहीसाठी तहसील कार्यालय भडगाव येथे जमा करण्यात आले. याच दिवशी मौजे परधाडे परिसरात देखील महसूल विभागाने मोठी कारवाई करत अवैध वाळू वाहतूक करणारा एक डंपर ताब्यात घेतला. या मोहिमेत तहसीलदार विजय बनसोडे, नायब तहसीलदार विनोद कुमावत, मंडळ अधिकारी आर डी पाटील आणि ग्राम महसूल अधिकारी अविनाश जंजाळे यांनी महत्त्वपूर्ण भूमिका बजावली. प्रशासनाच्या काटेकोर नियोजनामुळे वाहन चालकांना कारवाईपासून बचाव करण्याची संधी मिळाली नाही आणि डंपर थेट महसूल विभागाच्या ताब्यात घेण्यात आला. दरम्यान, मौजे टोणगाव परिसरातही महसूल विभागाचे पथक सतर्क होते. या भागात अवैध वाळू वाहतूक करणारा आणखी एक ट्रॅक्टर पकडून तहसील कार्यालय भडगाव येथे जमा करण्यात आला. या कारवाईचे नेतृत्व दिनेश येंडे मंडळ अधिकारी यांनी केले. त्यांच्या सोबत एस. के. मांडोळे ग्राम महसूल अधिकारी अंजन विहिरे, व्ही. पी. शिंदे ग्राम महसूल अधिकारी कोळगाव, लोकेश महाजन ग्राम महसूल अधिकारी आंचळगाव, करण कुलकर्णी ग्राम महसूल अधिकारी तांदूळवाडी, प्रसाद दुदुस्कर ग्राम महसूल अधिकारी वाक, गौरव पगारे ग्राम महसूल अधिकारी पिंप्रीहाट आणि किरण मोरे महसूल सेवक टोनगाव यांनी सक्रिय सहभाग घेतला. विशेष म्हणजे, या सर्व कारवाया अत्यंत समन्वयाने आणि नियोजनपूर्वक पार पडल्या. महसूल विभागातील अधिकारी व कर्मचाऱ्यांनी दिवस-रात्र मेहनत घेत अवैध वाळू वाहतुकीच्या मार्गांवर लक्ष ठेवले. त्यामुळे बेकायदेशीररित्या नैसर्गिक संपत्तीची लूट करणाऱ्यांवर मोठा आघात झाला आहे. प्रांताधिकारी भुषण अहिरे यांनी अवैध उत्खनन आणि वाहतुकीविरोधात शून्य सहनशीलतेचे धोरण अवलंबले असून महसूल विभागातील अधिकारी व कर्मचाऱ्यांना दिलेल्या स्पष्ट सूचनांमुळे अशा कारवायांची तीव्रता वाढताना दिसत आहे. अवैध वाळू उत्खननामुळे नदीपात्रांचे मोठे नुकसान होत असून भूजल पातळीवरही विपरीत परिणाम होतो. त्यामुळे शासनाकडून अशा प्रकारांविरोधात कठोर भूमिका घेतली जात आहे. महसूल विभागाच्या या सलग कारवायांमुळे कायद्याचे उल्लंघन करणाऱ्यांना स्पष्ट इशारा मिळाला असून भविष्यातही अशाच धडक मोहिमा सुरू राहणार असल्याचे संकेत प्रशासनाकडून देण्यात आले आहेत. प्रांताधिकारी भुषण अहिरे यांच्या नेतृत्वाखाली महसूल विभागाने उभारलेली ही कारवाईची साखळी केवळ अवैध वाळू वाहतुकीवर अंकुश ठेवणारी नसून शासनाच्या नैसर्गिक संपत्तीचे संरक्षण करण्यासाठी प्रशासन किती सजग आणि कटिबद्ध आहे, याचेही हे ठळक उदाहरण मानले जात आहे.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
