ज्ञानयज्ञात वैशालीताईचा दीपप्रज्वल! पाचोरा भडगाव मध्ये ऐतिहासिक सीईटी प्रवेश सराव परीक्षा यशस्वी

पाचोरा & भडगाव  – राजकारण हे केवळ सत्तेसाठी नसून समाजासाठी असावे, हे शिवसेना (उद्धव बाळासाहेब ठाकरे) पक्षाने दाखवून दिले आहे. युवासेना प्रमुख आदित्य ठाकरे यांच्या नेतृत्वाखाली आणि आमदार वरुण सरदेसाई यांच्या मार्गदर्शनाखाली संपूर्ण महाराष्ट्रभर एकाच वेळी अभियांत्रिकी, वैद्यकीय, औषध निर्माण शास्त्र व विधी या शाखांसाठी मोफत सीईटी सराव परीक्षा आयोजित करण्यात आली. हा उपक्रम शैक्षणिक क्षेत्रातील सामाजिक बांधिलकीचं प्रतीक ठरला असून पाचोरा व भडगाव तालुक्यातही विद्यार्थ्यांनी याला उत्स्फूर्त प्रतिसाद दिला. परीक्षा तात्यासाहेब आर. ओ. पाटील नगर येथील निर्मल इंटरनॅशनल स्कूल (पूर्व प्राथमिक विभाग) येथे आयोजित करण्यात आली होती. या उपक्रमात 280 हून अधिक विद्यार्थ्यांनी सहभाग घेतला. सुरुवातीला युवासेना नेत्या सौ. वैशालीताई सूर्यवंशी यांनी उपस्थित राहून विद्यार्थ्यांना मनापासून शुभेच्छा दिल्या. त्यांच्या भाषणातील आत्मीयता आणि प्रेरणादायी शब्दांमुळे विद्यार्थ्यांमध्ये उत्साहाचे आणि आत्मविश्वासाचे वातावरण निर्माण झाले. त्यांच्या शैलीत प्रेम होते, विश्वास होता आणि विद्यार्थ्यांच्या उज्वल भविष्यासाठी एक निखळ चिंता होती. शैक्षणिक आणि सामाजिक क्षेत्रात सातत्याने योगदान देणाऱ्या वैशालीताईंचे यापूर्वीही अनेक उपक्रमांमधील सक्रिय योगदान दिसून आले आहे. त्यांचे विचार नेहमीच विद्यार्थी-केंद्रित असून त्यांनी याही कार्यक्रमात प्रत्येक विद्यार्थ्याला स्पर्धा परीक्षेत यशस्वी होण्यासाठी मानसिक बळ दिले. त्यांच्या मार्गदर्शनाने परीक्षेला औपचारिकतेपलीकडे जाऊन एक स्नेह आणि प्रेरणेची जोड दिली. या उपक्रमाच्या आयोजनात उद्धव मराठे, योजना ताई पाटील, शशिकांत पाटील, सिकंदर तडवी, गजू पाटील, संतोष पाटील, डी. डी. पाटील, उमेश हटकर यांसह अनेक पदाधिकारी आणि कार्यकर्त्यांचे योगदान लाभले. त्यांनी परीक्षेच्या संपूर्ण व्यवस्थेची जबाबदारी नेटाने पार पाडली. विद्यार्थ्यांच्या परीक्षेनंतर सर्वांना प्रमाणपत्र देण्यात आले. विद्यार्थ्यांनी या उपक्रमाचे मन:पूर्वक स्वागत केले. “ही परीक्षा आम्हाला आत्मविश्वास देते आणि CET परीक्षेसाठी योग्य तयारीचा अनुभव मिळतो,” असे विद्यार्थ्यांनी नमूद केले. भविष्यातही अशा उपक्रमांची आवश्यकता असल्याचे मत अनेकांनी व्यक्त केले. या परीक्षेच्या निमित्ताने पाचोरा-भडगाव परिसरात केवळ शैक्षणिक नव्हे तर सामाजिक जाणिवेचा एक आदर्श उभा राहिला. सौ. वैशालीताई सूर्यवंशी यांची उपस्थिती, त्यांचे मार्गदर्शन आणि विद्यार्थ्यांप्रती असलेले प्रेम या साऱ्यांनी या उपक्रमाला एक नवा आयाम दिला. हा कार्यक्रम केवळ परीक्षा नव्हती, तर विद्यार्थ्यांच्या स्वप्नांना दिशा देणारा एक प्रेरणादायी प्रवास ठरला.