चोपडा : जळगाव पीपल्स को-ऑपरेटिव्ह बँके विरोधात दाखल तक्रारीवर अद्याप गुन्हा नोंद झाला नसल्यामुळे चोपड्यात नागरिकांमध्ये तीव्र नाराजी निर्माण झाली आहे. या पार्श्वभूमीवर सागर काशिनाथ ओतारी यांनी दि. 14 ऑगस्टपासून चोपडा शहर पोलीस स्टेशन समोर सुरू केलेले आमरण अन्नत्याग उपोषण आज चौथ्या दिवशीही ठामपणे सुरू आहे. उपोषणकर्त्यांचा दावा आहे की “न्याय मिळेपर्यंत लढा सुरू राहील.”
स्वातंत्र्य दिनालाही अन्यायाविरोधात उपोषण
15 ऑगस्टसारख्या राष्ट्रीय पर्वाच्या दिवशीही उपोषण सुरू ठेवावे लागत असल्याने नागरिक व स्थानिक कार्यकर्त्यांमध्ये संतापाची भावना दिसून आली. “देश स्वतंत्र होऊनही अन्यायाविरुद्ध उपोषणाला बसावे लागत आहे, ही दुर्दैवी बाब आहे,” असे मत उपोषणास भेट देणाऱ्या काही नेत्यांनी व्यक्त केले.
नागरिकांचा मोठा प्रतिसाद
या उपोषणाला शिवसेना (शिंदे गट) पदाधिकारी, विविध राजकीय पक्षांचे कार्यकर्ते, सामाजिक संघटनांचे पदाधिकारी तसेच सर्वसामान्य नागरिक मोठ्या संख्येने भेट देत आहेत. नागरिकांचा ओघ सुरू असून उपोषण शांततापूर्ण पद्धतीने सुरू आहे.
न्यायालयीन पार्श्वभूमी
सागर ओतारी यांनी 26 एप्रिल 2025 रोजी चोपडा शहर पोलीस स्टेशनला तक्रार दाखल केली होती. त्यांच्या म्हणण्यानुसार, त्या तक्रारीवर गुन्हा नोंदविण्यात आलेला नाही. दरम्यान, बँकेने या संदर्भात मा. उच्च न्यायालय औरंगाबाद खंडपीठात रिट पिटीशन क्र. 798/2025 दाखल केली होती. सुनावणीदरम्यान बँकेच्या वकिलांनी याचिका मागे घेतल्याने 24 जून 2025 रोजी मा. उच्च न्यायालयाने ती रद्द केली. यानंतरही अद्याप कारवाई न झाल्याचा आरोप उपोषणकर्ते व नागरिकांकडून होत आहे.
तपासावरील प्रश्नचिन्ह
सदर प्रकरणातील तपास अधिकारी यांनी वरिष्ठांकडे वारंवार परवानगी मागूनही गुन्हा नोंदवला गेला नाही, अशी माहिती समोर येत आहे. नागरिकांमध्ये अशी भावना व्यक्त होत आहे की, “जर न्यायालयीन पातळीवर मार्ग मोकळा झाला असेल तर पोलिसांनी त्वरित कारवाई करावी.”
नागरिकांच्या प्रतिक्रिया
पत्रकारांशी बोलताना काही नागरिकांनी, “सत्ताधारी पक्षाशी संबंधित व्यक्तीलाही उपोषणास बसावे लागत असेल तर सर्वसामान्य जनतेचे काय हाल होत असतील?” असा प्रश्न उपस्थित केला. तसेच, पोलिस प्रशासनाने कारवाईत विलंब करून लोकांचा विश्वास गमावला असल्याची नाराजीही व्यक्त करण्यात आली.
उपोषणकर्त्यांच्या मुख्य मागण्या
1) तक्रारीनुसार संबंधित आरोपींवर गुन्हा नोंदवून आवश्यक ती कारवाई करावी.
2) प्रकरणात विलंब घडवून आणणाऱ्या जबाबदार अधिकारी यांची चौकशी व्हावी.
प्रकृती खालावली, तरीही उपचारास नकार
उपोषणकर्ते सागर ओतारी यांच्या प्रकृतीत बिघाड झाल्याची माहिती आहे. उप जिल्हा रुग्णालयाचे वैद्यकीय अधिकारी दररोज दोन वेळा तपासणी करत असून, उपचारासाठी दाखल होण्याचा सल्ला त्यांनी दिला आहे. मात्र ओतारी यांनी उपचारास नकार दिला असून, उपोषण सुरू ठेवण्याचा निर्धार कायम ठेवला आहे.
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
