पाचोरा – शहरासाठी अभिमानाची बाब ठरावी अशी शैक्षणिक कामगिरी डॉ. अंजली पाटील यांनी केली आहे. वैद्यकीय क्षेत्रात सातत्यपूर्ण परिश्रम, जिद्द आणि शिस्तबद्ध अभ्यास यांच्या जोरावर त्यांनी एम.एस. (Obstetrics & Gynecology) या पदव्युत्तर अभ्यासक्रमासाठी तेरणा मेडिकल कॉलेज, नेरूळ, नवी मुंबई येथे प्रवेश मिळवला आहे. स्त्रीरोग व प्रसूतीशास्त्र या अत्यंत जबाबदारीच्या आणि संवेदनशील शाखेत उच्च शिक्षणाची संधी मिळणे ही केवळ वैयक्तिक यशाची बाब नसून पाचोरा शहरासाठीही गौरवाची घटना मानली जात आहे. डॉ. अंजली पाटील या श्री.गो.से.हायस्कूलचे मुख्याध्यापक श्री.एन.आर.पाटील (ठाकरे) आणि उपशिक्षिका सौ.ज्योती नरेंद्र पाटील (ठाकरे) यांच्या कन्या आहेत. शिक्षण क्षेत्राशी जोडलेल्या कुटुंबात वाढ झाल्यामुळे लहानपणापासूनच अभ्यासाबाबत गांभीर्य, शिस्त आणि समाजाप्रती जबाबदारीचे संस्कार त्यांच्यावर झाले. आई-वडिलांच्या मार्गदर्शनामुळे शिक्षण हे केवळ पदवीपुरते मर्यादित न ठेवता समाजासाठी उपयुक्त ठरावे, ही भूमिका त्यांनी कायम जपली. शालेय व महाविद्यालयीन शिक्षणात त्यांनी विज्ञान शाखेत विशेष प्रावीण्य मिळवले. मानवी आरोग्य, आजारांचे निदान आणि उपचारपद्धती याबाबतची ओढ त्यांना वैद्यकीय शिक्षणाकडे घेऊन गेली. त्यानुसार त्यांनी एमबीबीएस पदवी लातूर येथून यशस्वीरित्या संपादन केली. एमबीबीएस शिक्षणादरम्यान त्यांनी शैक्षणिक गुणवत्ता टिकवून ठेवत प्रत्यक्ष रुग्णसेवेचा अनुभवही आत्मसात केला. पदवी पूर्ण झाल्यानंतर त्यांनी ग्रामीण भागात सेवा देण्याचा निर्णय घेतला आणि गेल्या वर्षी पिंपळगाव ग्रामीण रुग्णालयात वैद्यकीय अधिकारी म्हणून कार्यरत राहिल्या. ग्रामीण रुग्णालयातील सेवा ही अनेक अडचणींनी भरलेली असते. मर्यादित साधनसामग्री, वाढती रुग्णसंख्या आणि तातडीच्या वैद्यकीय गरजा अशा परिस्थितीत त्यांनी जबाबदारीने व संवेदनशीलतेने काम केले. विशेषतः महिलांच्या आरोग्यविषयक समस्या, गर्भवती मातांची काळजी, प्रसूतीपूर्व व प्रसूतीनंतरचे उपचार आणि महिलांमधील आजारांबाबत त्यांनी विशेष लक्ष दिले. याच अनुभवातून स्त्रीरोग व प्रसूतीशास्त्र या शाखेत उच्च शिक्षण घेण्याचा त्यांचा निर्धार अधिक पक्का झाला. एम.एस. (Obstetrics & Gynecology) ही पदवी मिळवण्यासाठी तीव्र स्पर्धा, सातत्यपूर्ण अभ्यास आणि आत्मविश्वासाची गरज असते. या सर्व कसोट्यांवर यश मिळवत डॉ. अंजली पाटील यांनी तेरणा मेडिकल कॉलेज, नेरूळ, नवी मुंबई येथे प्रवेश मिळवला आहे. महानगरातील प्रगत वैद्यकीय सुविधा, आधुनिक तंत्रज्ञान आणि अनुभवी प्राध्यापकांच्या मार्गदर्शनाखाली शिक्षण घेण्याची संधी त्यांना मिळणार आहे. या शिक्षणाच्या माध्यमातून भविष्यात ग्रामीण व शहरी भागातील महिलांना अधिक सक्षम व दर्जेदार आरोग्यसेवा देण्याचा त्यांचा मानस आहे. त्यांच्या या उल्लेखनीय यशाबद्दल पाचोरा तालुका सहकारी शिक्षण संस्थेचे अध्यक्ष आणि माजी आमदार दिलीपभाऊ वाघ, चेअरमन संजयनाना वाघ, मानद सचिव ॲड.महेशदादा देशमुख, व्हॉइस चेअरमन नानासाहेब व्ही. टी.जोशी, शालेय समितीचे चेअरमन खलीलदादा देशमुख, तांत्रिक विभागाचे चेअरमन वासुदेव आण्णा महाजन यांच्यासह शहरातील शैक्षणिक, सामाजिक आणि वैद्यकीय क्षेत्रातील मान्यवरांनी त्यांचे मनःपूर्वक अभिनंदन केले आहे. पाचोरा शहरातील शिक्षक कुटुंबातील कन्येने वैद्यकीय क्षेत्रात अशी भरारी घेतल्याने सर्व स्तरांतून आनंद व्यक्त होत असून डॉ. अंजली पाटील यांची पुढील वाटचाल अनेक विद्यार्थिनींसाठी प्रेरणादायी ठरेल, असा विश्वास व्यक्त केला जात आहे. तिच्या यशाबद्दल व पुढील वाटचालीस ध्येय न्यूज मधून वृत्तपत्राचे संपादक संदीप महाजन व महाजन परिवारा तर्फे हार्दिक शुभेच्छा

वरखेडी ( कु. चेतना हिरे ) पाचोरा तालुका सहकारी शिक्षण संस्था संचलित श्री सु. भा. पाटील प्राथमिक विद्या मंदिर, पाचोरा येथे दिनांक १९ फेब्रुवारी २०२६, गुरुवार रोजी हिंदवी स्वराज्याचे संस्थापक, रयतेचे जाणते राजे यांची जयंती अतिशय दिमाखात, उत्साहात आणि स्वराज्यभावनेत साजरी करण्यात आली. संपूर्ण शाळा परिसर भगव्या ध्वजांनी, शिवविचारांनी, स्वराज्याच्या घोषणांनी आणि प्रेरणादायी संदेशांनी सजविण्यात आला होता. विद्यार्थ्यांमध्ये जोश, शिक्षकांमध्ये अभिमान आणि पालकांमध्ये समाधान अशी सकारात्मक ऊर्जा संपूर्ण कार्यक्रमात अनुभवायला मिळाली. कार्यक्रमाच्या अध्यक्षस्थानी मुख्य इमारत दुपार सत्र विभागाचे प्रमुख ईश्वर पाटील सर होते, तर शाळेच्या मुख्यध्यापिका उज्वला साळुंके मॅडम यांच्या सक्षम नेतृत्वाखाली आणि मार्गदर्शनाखाली संपूर्ण कार्यक्रमाचे नियोजन अत्यंत नियोजनबद्ध (well planned) आणि शिस्तबद्ध पद्धतीने करण्यात आले होते. यावेळी जेष्ठ शिक्षिका लक्ष्माबाई सोनवणे मॅडम, भडगाव रोड विभागाचे प्रमुख दिपक पाटील सर, सकाळ सत्र विभागाचे प्रमुख स्वप्नील माने सर तसेच जयश्री वाघ मॅडम आदी मान्यवर शिवभक्त उपस्थित होते. मान्यवरांच्या हस्ते शिवरायांच्या प्रतिमेस पुष्पहार अर्पण करून आणि दीपप्रज्वलन करून कार्यक्रमाची मंगलमय सुरुवात करण्यात आली. शाळेतील चिमुकल्या मावळ्यांनी सादर केलेली शौर्यपूर्ण भाषणे, जोशपूर्ण पोवाडे, तालबद्ध नृत्य, शिवकालीन वेशभूषा आणि घणघणीत शिवगर्जना यामुळे संपूर्ण सभागृहात रणशिंगाचा नाद घुमल्याचा भास निर्माण झाला. विद्यार्थ्यांच्या confident आणि energetic सादरीकरणाला उपस्थित पालक, शिक्षक आणि मान्यवरांकडून भरभरून appreciation मिळाली. महेश लोखंडे सर यांनी तयार केलेले आकर्षक, कलात्मक आणि informative फलकलेखन विशेष लक्षवेधी ठरले असून त्यातून शिवरायांचे धोरण, स्वराज्यसंकल्पना आणि इतिहास विद्यार्थ्यांपर्यंत प्रभावी visual माध्यमातून पोहोचला. भडगाव रोड विभागाचे प्रमुख दिपक पाटील सर यांनी प्रश्नोत्तर पद्धतीने विद्यार्थ्यांशी संवाद (interactive session) साधत आजच्या काळात विद्यार्थ्यांनी कोणत्या विकारांशी, चुकीच्या प्रवृत्तींशी आणि अन्यायाविरुद्ध लढा द्यायचा आहे, जीवनात योग्य ध्येय कसे ठरवायचे आणि सजग, जबाबदार नागरिक कसे घडायचे याबाबत मोलाचे मार्गदर्शन केले. अध्यक्षीय भाषणात ईश्वर पाटील सर यांनी शिवरायांची युद्धनीती, गनिमी काव्याचे तंत्र, मावळ्यांचे संघटन, धाडस आणि दूरदृष्टी यावर सविस्तर प्रकाश टाकत लाल महालातील पहिल्या धाडसी कारवाईसह विविध ऐतिहासिक घटनांचे उदाहरणे दिली आणि विद्यार्थ्यांमध्ये leadership skills, आत्मविश्वास आणि राष्ट्रप्रेमाची भावना अधिक दृढ केली. कार्यक्रमाचे सुसंगत, प्रभावी आणि time-managed सूत्रसंचालन संदिप वाघ यांनी केले, तर शेवटी आशिष पाटील सर यांनी उपस्थित सर्व विद्यार्थी, पालक, शिक्षक व मान्यवरांचे मनःपूर्वक आभार मानले. या कार्यक्रमाच्या यशस्वी आयोजनासाठी सर्व शिक्षक व कर्मचाऱ्यांचे मोलाचे सहकार्य लाभले. या जयंती उत्सवाला आणखी एक विशेष आकर्षण लाभले ते म्हणजे सु. भा. पाटील पाचोरा शाळेतील विद्यार्थी विधान वाघ आणि लक्ष्मी वाघ यांनी छत्रपती शिवाजी महाराज चौकात साकारलेली राजमाता जिजाऊ आणि बाल शिवरायांची राजस, तेजस्वी आणि दिमाखदार वेशभूषा. पारंपरिक शिवकालीन पोशाखातील सूक्ष्म बारकावे, डोक्यावरची पागोटे, अलंकार, शस्त्रांची प्रतिकृती आणि चेहऱ्यावर झळकणारा आत्मविश्वास पाहून उपस्थितांना जणू स्वराज्याचा इतिहास प्रत्यक्ष समोर उभा असल्याचा live अनुभव मिळाला. लहानग्यांच्या निरागसतेतून झळकणारी तेजस्वी छबी पाहून नागरिक भारावून गेले. या वेशभूषेची चर्चा संपूर्ण पाचोरा तालुक्यात colorfully रंगली असून दोन्ही मुलांवर कौतुकाचा अक्षरशः वर्षाव होत आहे. छत्रपती शिवाजी महाराज चौकात अनेक नागरिकांनी त्यांच्यासोबत photos आणि selfies काढत आनंद व्यक्त केला. इतिहासाविषयी प्रेम, संस्कार, परंपरा आणि स्वराज्यनिष्ठा जपणाऱ्या या उपक्रमामुळे सर्वत्र अभिमानाची भावना व्यक्त होत आहे. विधान वाघ आणि लक्ष्मी वाघ हे कोमल मधुकर वाघ सर आणि प्रा. जयश्रीताई वाघ मॅडम यांची सुपुत्र–सुपुत्री असून, त्यांच्या संस्कारांचे, राष्ट्रभक्तीचे आणि प्रेरणेचे हे सुंदर reflection असल्याचे सर्वत्र बोलले जात आहे. एकूणच छत्रपती शिवाजी महाराज जयंतीनिमित्त आयोजित या भव्य, प्रेरणादायी आणि ऐतिहासिक कार्यक्रमामुळे विद्यार्थ्यांमध्ये इतिहासाबद्दल आदर, स्वाभिमान, शिस्त, धैर्य, leadership आणि राष्ट्रप्रेमाची भावना अधिक दृढ झाली असून हा सोहळा पाचोरा शहर व तालुक्यासाठी प्रेरणादायी milestone ठरला.

पाचोरा – पाचोरा तालुका सहकारी शिक्षण संस्थेच्या श्री गो. से. हायस्कूल, पाचोरा येथे आज गुरुवार दिनांक 19 फेब्रुवारी 2026 रोजी यांची जयंती अत्यंत उत्साहात, शिस्तबद्ध व प्रेरणादायी वातावरणात साजरी करण्यात आली. सकाळपासूनच विद्यालय परिसर शिवरायांच्या विचारांनी, घोषणांनी आणि विद्यार्थ्यांच्या उत्स्फूर्त सहभागाने भारलेला दिसून आला. राष्ट्रनिर्मितीतील शिवरायांचे योगदान, त्यांचे दूरदृष्टीचे नेतृत्व, न्यायप्रिय प्रशासन आणि स्वराज्याची संकल्पना विद्यार्थ्यांपर्यंत पोहोचावी या हेतूने हा कार्यक्रम आयोजित करण्यात आला होता. कार्यक्रमाची सुरुवात मुख्याध्यापक एन. आर. पाटील आणि उपमुख्याध्यापक आर. एल. पाटील यांच्या हस्ते छत्रपती शिवाजी महाराजांच्या अर्धपुतळ्याचे विधिवत पूजन व पुष्पहार अर्पण करून करण्यात आली. उपस्थित सर्व शिक्षक, कर्मचारी व विद्यार्थ्यांनी महाराजांच्या प्रतिमेस वंदन करून त्यांच्या पराक्रमाला, त्यागाला आणि आदर्शांना अभिवादन केले. “जय भवानी, जय शिवाजी”च्या घोषणांनी संपूर्ण परिसर दुमदुमून गेला. या कार्यक्रमास पर्यवेक्षिका ए. आर. गोहिल मॅडम, पर्यवेक्षक आर. बी. बांठिया, पर्यवेक्षक आर. बी. तडवी, सांस्कृतिक विभाग प्रमुख एम. टी. कौंडीण्य, क्रीडा प्रमुख एस. पी. करंदे, किमान कौशल्य प्रमुख मनीष बाविस्कर, कार्यालयीन प्रमुख अजय सिनकर तसेच सकाळ व दुपार सत्रातील सर्व शिक्षक बंधू-भगिनी, शिक्षकेतर कर्मचारी आणि मोठ्या संख्येने विद्यार्थी उपस्थित होते. सर्वांच्या सामूहिक उपस्थितीमुळे कार्यक्रमाला विशेष शोभा प्राप्त झाली. मुख्याध्यापक एन. आर. पाटील यांनी आपल्या मार्गदर्शक मनोगतात छत्रपती शिवाजी महाराजांचे जीवनकार्य विद्यार्थ्यांसमोर सविस्तरपणे मांडले. शिवरायांचे यश केवळ तलवारीच्या बळावर नव्हे तर नियोजन, शिस्त, लोकसहभाग आणि न्याय्य प्रशासनावर आधारित होते, असे त्यांनी नमूद केले. विद्यार्थ्यांनी शिवरायांच्या जीवनातील स्वाभिमान, कर्तव्यनिष्ठा, राष्ट्रप्रेम, स्त्री-सन्मान आणि सर्वधर्मसमभाव ही मूल्ये आत्मसात केली पाहिजेत, असे आवाहन त्यांनी केले. उपमुख्याध्यापक आर. एल. पाटील यांनी शिवरायांच्या नेतृत्वगुणांवर प्रकाश टाकत स्पष्ट ध्येय, कठोर परिश्रम आणि योग्य दिशा यामुळेच कोणतेही स्वप्न साकार होते, असे सांगितले तसेच विद्यार्थ्यांनी अभ्यासासोबत सामाजिक भान जपून जबाबदार नागरिक बनावे, हा शिवजयंतीचा खरा संदेश असल्याचे स्पष्ट केले. सांस्कृतिक विभागाच्या मार्गदर्शनाखाली विद्यार्थ्यांनी शिवरायांच्या जीवनावर आधारित अभिवादन व प्रेरणादायी सादरीकरण केले. क्रीडा प्रमुख एस. पी. करंदे यांनी शारीरिक तंदुरुस्ती, शिस्त आणि संघभावनेचे महत्त्व अधोरेखित केले. किमान कौशल्य प्रमुख मनीष बाविस्कर यांनी कौशल्याधारित शिक्षणाच्या माध्यमातून आत्मनिर्भरतेकडे वाटचाल करण्याचा संदेश दिला तर कार्यालयीन प्रमुख अजय सिनकर यांनी कार्यक्रमाच्या यशस्वी आयोजनाबद्दल सर्वांचे कौतुक केले. संपूर्ण कार्यक्रमात शिस्त, वेळेचे पालन आणि स्वच्छता यावर विशेष भर देण्यात आला. विद्यार्थ्यांनी शिक्षकांच्या मार्गदर्शनाखाली कार्यक्रमाची तयारी करताना एकात्मतेचा आणि सहकार्याचा आदर्श निर्माण केला. शिक्षकेतर कर्मचाऱ्यांच्या सहकार्यामुळे कार्यक्रम सुरळीत आणि यशस्वीपणे पार पडला. कार्यक्रमाच्या शेवटी उपस्थित सर्वांनी छत्रपती शिवाजी महाराजांच्या विचारांना आपल्या दैनंदिन जीवनात आचरणात आणण्याचा संकल्प केला. स्वराज्याची भावना, कर्तव्यनिष्ठा आणि समाजहिताची जाणीव मनात ठेवून वाटचाल करण्याचा निर्धार व्यक्त करत कार्यक्रमाची सांगता झाली. श्री गो. से. हायस्कूल, पाचोरा येथे साजरी झालेली ही शिवजयंती विद्यार्थ्यांच्या मनात राष्ट्रप्रेम, आत्मविश्वास आणि प्रेरणेची नवी ज्योत प्रज्वलित करणारी ठरली.

पाचोरा – पाचोरा तालुका सहकारी शिक्षण संस्था संचलित श्री गो से हायस्कूलमध्ये विद्यार्थ्यांच्या शैक्षणिक प्रगतीसाठी अत्यंत महत्त्वपूर्ण ठरणाऱ्या नॅशनॅलिटी व डोमिसाईल प्रमाणपत्रांचे वितरण समारंभ उत्साहपूर्ण वातावरणात पार पडला. शालेय परिसरात आयोजित या कार्यक्रमाला मान्यवरांची उपस्थिती लाभली असून विद्यार्थ्यांमध्ये विशेष आनंद आणि समाधानाचे वातावरण पाहायला मिळाले. कार्यक्रमाचे प्रमुख पाहुणे म्हणून तहसीलदार मा. विजय बनसोडे उपस्थित होते. त्यांच्या हस्ते विद्यार्थ्यांना नॅशनॅलिटी व डोमिसाईल प्रमाणपत्रांचे वाटप करण्यात आले. शैक्षणिक आयुष्यातील पुढील टप्प्यांसाठी ही कागदपत्रे अत्यावश्यक असल्याने विद्यार्थ्यांच्या चेहऱ्यावर आत्मविश्वास झळकत होता. याप्रसंगी शालेय समितीचे चेअरमन मा. दादासो. खलील देशमुख, स्टेट बँक ऑफ इंडिया चे मॅनेजर प्रदीप जाधव, उपमुख्याध्यापक आर.एल. पाटील, पर्यवेक्षिका सौ. ए.आर. गोहिल, पर्यवेक्षक आर.बी. तडवी, आर.बी. बांठिया, किमान कौशल्य प्रमुख मनीष बाविस्कर, कार्यालय प्रमुख अजय सिनकर, सांस्कृतिक विभाग प्रमुख एम.टी. कौंडिण्य, क्रीडा प्रमुख एस.पी. करंदे, धनलक्ष्मी ई सर्व्हिसेस चे संचालक विकास सोनगिरे तसेच शिक्षक बंधू-भगिनी आणि विद्यार्थी मोठ्या संख्येने उपस्थित होते. कार्यक्रमाच्या प्रारंभी उपस्थित मान्यवरांचे स्वागत करण्यात आले. त्यानंतर प्रमाणपत्र वितरणाची औपचारिक सुरुवात झाली. विद्यार्थ्यांनी शिस्तबद्ध पद्धतीने प्रमाणपत्र स्वीकारत आपला आनंद व्यक्त केला. शालेय समितीचे चेअरमन दादासो. खलील देशमुख यांनी आपल्या मनोगतात शाळेने विद्यार्थ्यांच्या शैक्षणिक गरजांची योग्य वेळी दखल घेत आवश्यक कागदपत्रे उपलब्ध करून दिल्याबद्दल समाधान व्यक्त केले. ग्रामीण भागातील विद्यार्थ्यांना शासकीय प्रक्रिया पूर्ण करताना अनेक अडचणींचा सामना करावा लागतो; अशा वेळी शाळेच्या पुढाकारामुळे विद्यार्थ्यांना मोठा दिलासा मिळतो, असे त्यांनी नमूद केले. विद्यार्थ्यांच्या सर्वांगीण विकासासाठी संस्था कटिबद्ध असल्याचेही त्यांनी स्पष्ट केले. तहसीलदार विजय बनसोडे यांनी आपल्या मार्गदर्शनपर भाषणात विद्यार्थ्यांशी थेट संवाद साधत नॅशनॅलिटी आणि डोमिसाईल प्रमाणपत्र ही केवळ औपचारिक कागदपत्रे नसून विद्यार्थ्यांच्या ओळखीचा महत्त्वाचा भाग असल्याचे सांगितले. पुढील शिक्षण, स्पर्धा परीक्षा, शिष्यवृत्ती योजना तसेच विविध शासकीय प्रक्रियांसाठी ही प्रमाणपत्रे आवश्यक असल्याने ती सुरक्षित जतन करावीत, असा सल्ला त्यांनी दिला. यासोबतच विद्यार्थ्यांमध्ये नैतिक मूल्यांची जपणूक होणे अत्यंत गरजेचे असल्याचे त्यांनी विविध उदाहरणांच्या माध्यमातून स्पष्ट केले. प्रामाणिकपणा, शिस्त, परिश्रम आणि वेळेचे योग्य नियोजन या गुणांमुळेच आयुष्यात यश प्राप्त होते, असे त्यांनी अधोरेखित केले. उपमुख्याध्यापक आर.एल. पाटील यांनी शाळेच्या वतीने या उपक्रमामागील उद्दिष्ट स्पष्ट करत विद्यार्थ्यांना कोणत्याही प्रशासकीय अडचणींशिवाय पुढील शिक्षणासाठी आवश्यक सुविधा उपलब्ध करून देणे ही शाळेची जबाबदारी असल्याचे सांगितले. शिक्षक व कार्यालयीन कर्मचाऱ्यांनी समन्वयाने काम करून ही प्रक्रिया सुरळीत पूर्ण केल्याबद्दल त्यांनी सर्वांचे अभिनंदन केले. संपूर्ण कार्यक्रमाचे सूत्रसंचालन आर.बी. बोरसे यांनी प्रभावीपणे केले, तर बी.एस. पाटील यांनी उपस्थित मान्यवर, शिक्षक, पालक आणि विद्यार्थ्यांचे आभार व्यक्त केले. या उपक्रमामुळे विद्यार्थ्यांचा आत्मविश्वास अधिक दृढ झाला असून श्री गो से हायस्कूलने विद्यार्थीकेंद्रित कार्यपद्धतीचा आदर्श पुन्हा एकदा अधोरेखित केला आहे.

वरखेडी ( कु. चेतना हिरे ) पाचोरा येथील एस. एस. एम. एम. महाविद्यालयात आज 19 फेब्रुवारी 2026 रोजी अखंड हिंदुस्तानचे आराध्य दैवत, विश्ववंदनीय छत्रपती शिवाजी महाराज यांची जयंती अत्यंत उत्साहपूर्ण आणि प्रेरणादायी वातावरणात साजरी करण्यात आली. महाविद्यालयाच्या इतिहास विभागाच्या वतीने या जयंतीचे भव्य आयोजन करण्यात आले होते. कार्यक्रमाच्या प्रारंभी पाचोरा–भडगाव मतदारसंघाचे माजी आमदार तथा पाचोरा तालुका सहकारी शिक्षण संस्थेचे अध्यक्ष भाऊसाहेब दिलीप ओंकार वाघ आणि संस्थेचे चेअरमन नानासाहेब संजय वाघ यांच्या हस्ते छत्रपती शिवाजी महाराजांच्या पुतळ्यास पुष्पहार अर्पण करून अभिवादन करण्यात आले. याच प्रसंगी इतिहास विभागाच्या वतीने आयोजित करण्यात आलेल्या रांगोळी स्पर्धा तसेच छत्रपती शिवाजी महाराजांच्या गडकिल्ले प्रदर्शनाचे उद्घाटन माजी आमदार भाऊसाहेब दिलीप वाघ यांच्या हस्ते करण्यात आले. विद्यार्थ्यांच्या सृजनशीलतेतून आणि अभ्यासपूर्ण मांडणीतून साकारलेले हे प्रदर्शन शिवकालीन इतिहासाचे जिवंत दर्शन घडवणारे ठरले. विविध किल्ल्यांचे भौगोलिक, ऐतिहासिक आणि लष्करी महत्त्व पोस्टर व प्रतिकृतींच्या माध्यमातून मांडण्यात आले होते. मार्गदर्शनपर भाषणात माजी आमदार दिलीपभाऊ वाघ यांनी विद्यार्थ्यांना संबोधित करताना छत्रपती शिवाजी महाराजांच्या जीवनचरित्रातील प्रेरणादायी पैलूंवर सखोल प्रकाश टाकला. लढाऊपणा, सूक्ष्म नियोजन, संकटांना न घाबरता धैर्याने सामोरे जाण्याची वृत्ती, योग्य नियोजनाच्या आधारे प्रत्येक आव्हानावर मात करण्याची क्षमता हे गुण विद्यार्थ्यांनी आत्मसात करावेत, असे त्यांनी आवर्जून सांगितले. आजच्या स्पर्धात्मक युगात केवळ ज्ञान नव्हे तर मूल्याधिष्ठित नेतृत्व आणि सामाजिक जबाबदारीची जाणीवही तितकीच महत्त्वाची असल्याचे त्यांनी नमूद केले. इतिहास विभागाच्या विद्यार्थ्यांनी रांगोळी स्पर्धा व गडकिल्ले प्रदर्शनाच्या माध्यमातून शिवकालीन विविध प्रसंगांचे कलात्मक रेखाटन सादर केले. रायगड, राजगड, प्रतापगड, सिंहगड यांसारख्या किल्ल्यांचे दर्शन, तसेच स्वराज्य स्थापनेतील महत्त्वाच्या घटनांचे चित्रण पाहून उपस्थितांनी विद्यार्थ्यांच्या अभ्यासू वृत्तीचे कौतुक केले. या उपक्रमातून विद्यार्थ्यांनी केवळ इतिहासाची पुनरावृत्ती न करता त्यातील मूल्ये आणि राष्ट्रनिर्मितीची प्रेरणा समाजासमोर ठेवण्याचा प्रयत्न केला. संस्थेचे चेअरमन नानासाहेब संजय वाघ यांनीही आपल्या मनोगतातून शिवाजी महाराजांच्या विचारांची आजच्या काळातील उपयुक्तता अधोरेखित केली. शिक्षणसंस्थांनी केवळ शैक्षणिक गुणवत्ता वाढविण्यावर भर न देता विद्यार्थ्यांमध्ये राष्ट्रभक्ती, शिस्त, कर्तव्यभावना आणि सामाजिक संवेदनशीलता रुजवावी, असे त्यांनी सांगितले. अशा उपक्रमांमुळे विद्यार्थ्यांचा सर्वांगीण विकास घडतो, असेही त्यांनी स्पष्ट केले. या कार्यक्रमास संस्थेचे ज्येष्ठ संचालक आप्पासाहेब सतीश चौधरी महाविद्यालयाचे प्राचार्य डॉ. शिरीष पाटील, उपप्राचार्य डॉ. वासुदेव वले, उपप्राचार्य डॉ. जे. व्ही. पाटील, कनिष्ठ महाविद्यालयाचे उपप्राचार्य प्रा. एस. एस. पाटील, पर्यवेक्षक डॉ. जे. पी. बडगुजर, इतिहास विभाग प्रमुख डॉ. जे. डी. गोपाळ, डॉ. के. एस. इंगळे, डॉ. एस. बी. तडवी, प्रा. एस. टी. सूर्यवंशी, प्रा. पी. एम. डोंगरे, डॉ. वाय. बी. पुरी, प्रा. राजेश वळवी, डॉ. क्रांती सोनवणे, प्रा. स्वप्नील भोसले, प्रा. नितीन पाटील, प्रा. महेंद्र महाजन, डॉ. सुनीता गुंजाळ, डॉ. अतुल सूर्यवंशी, प्रा. ललित वाघ, श्री. ऋषिकेश ठाकूर, प्रा. महेश माळी, प्रा. स्वप्नील ठाकरे, प्रा. ललित पाटील, प्रा. डी. एस. पाटील आदी मान्यवर मोठ्या संख्येने उपस्थित होते. महाविद्यालयातील प्राध्यापक, शिक्षक, शिक्षकेतर कर्मचारी आणि विद्यार्थी यांचीही लक्षणीय उपस्थिती लाभली. कार्यक्रमाचे सूत्रसंचालन प्रा. माणिक पाटील यांनी प्रभावीपणे केले. पोस्टर व रांगोळी स्पर्धेची संकल्पना इतिहास विभागातील प्रा. डॉ. माणिक पाटील यांची होती. संपूर्ण कार्यक्रमात शिस्तबद्ध आयोजन, अभ्यासपूर्ण मांडणी आणि उत्स्फूर्त सहभाग यांचा सुंदर संगम दिसून आला. छत्रपती शिवाजी महाराज जयंतीनिमित्त आयोजित हा उपक्रम विद्यार्थ्यांच्या मनात इतिहासाबद्दल अभिमान आणि स्वराज्याच्या विचारांची प्रेरणा जागवणारा ठरला.

पाचोरा – केंद्रीय युवा व्यवहार व क्रीडा मंत्रालयाच्या ‘मेरा भारत युवा केंद्र’ या राष्ट्रीय स्तरावरील व्यासपीठामार्फत राबविण्यात येणाऱ्या आंतरराज्य युवा विनिमय कार्यक्रम २०२६ साठी जळगाव जिल्ह्यातील सामाजिक व शैक्षणिक क्षेत्रात उल्लेखनीय कार्य करणाऱ्या एम.एम. पाचोरा महाविद्यालयाच्या विद्यार्थिनी कु. चेतना रणदीप हिरे यांची निवड झाली आहे. ही निवड केवळ वैयक्तिक यशापुरती मर्यादित न राहता पाचोरा शहर, जळगाव जिल्हा आणि महाराष्ट्राच्या युवक क्षमतेचे राष्ट्रीय पातळीवरील प्रतिनिधित्व करणारी ठरली आहे. विशेष म्हणजे, कु. चेतना हिरे यांच्यासोबत जळगाव जिल्ह्यातील आणखी आठ युवकांचीही या प्रतिष्ठित कार्यक्रमासाठी निवड करण्यात आली असून एकूण नऊ युवकांचा हा गट महाराष्ट्राचे प्रतिनिधित्व करणार आहे. हा युवक गट २२ फेब्रुवारी ते १ मार्च २०२६ या कालावधीत केरळ राज्याच्या शैक्षणिक, सामाजिक व सांस्कृतिक अभ्यास दौऱ्यावर जाणार आहे. या संपूर्ण उपक्रमाचे नेतृत्व कमलेश सोनवणे यांच्या मार्गदर्शनाखाली पार पडणार असून नियोजनबद्ध कार्यक्रम, चर्चासत्रे, सांस्कृतिक सादरीकरणे आणि परस्पर संवादाच्या माध्यमातून युवकांमध्ये राष्ट्रीय एकात्मतेची भावना अधिक दृढ करण्यावर भर देण्यात येणार आहे. ‘मेरा भारत युवा केंद्र’ अंतर्गत राबविण्यात येणाऱ्या या आंतरराज्य युवा विनिमय कार्यक्रमाचा मुख्य उद्देश विविध राज्यांतील युवकांना एकमेकांच्या संस्कृती, परंपरा, भाषा, सामाजिक रचना आणि विकासात्मक उपक्रमांची प्रत्यक्ष ओळख करून देणे हा आहे. देशातील विविधतेतून एकात्मतेचा अनुभव घेणे, सामाजिक सलोखा वाढविणे, नेतृत्वगुणांचा विकास घडविणे, स्वयंशिस्त, संघभावना आणि राष्ट्रप्रेम वृद्धिंगत करणे हे या कार्यक्रमाचे केंद्रबिंदू आहेत. या दौऱ्यात युवकांना केरळ राज्यातील शैक्षणिक संस्था, सामाजिक उपक्रम, स्वयंसेवी संघटना, सांस्कृतिक स्थळे आणि विकास मॉडेल्सची माहिती दिली जाणार आहे. कु. चेतना रणदीप हिरे या एम.एम. पाचोरा महाविद्यालयात शिक्षण घेत असताना सामाजिक कार्यात सातत्याने सक्रिय राहिल्या आहेत. विद्यार्थिनी म्हणून शिक्षणाबरोबरच समाजोपयोगी उपक्रमांमध्ये सहभाग, युवक प्रबोधन, स्वयंसेवी कार्य तसेच शैक्षणिक उपक्रमांमध्ये त्यांनी घेतलेली पुढाकाराची भूमिका ही त्यांच्या निवडीमागील महत्त्वाची बाब ठरली आहे. त्यांच्या या कार्याची दखल घेत केंद्रीय राज्यमंत्री रक्षा खडसे, जिल्हाधिकारी रोहन घुगे तसेच जिल्हा युवा अधिकारी अभिषेक चावरे यांनी त्यांचे अभिनंदन करून कौतुक केले आहे. त्यांनी युवकांनी शिक्षणासोबतच सामाजिक बांधिलकी जपावी, राष्ट्रीय स्तरावरील संधींचा लाभ घ्यावा आणि आपल्या जिल्हा व राज्याचे नाव उज्ज्वल करावे, असा संदेश दिला आहे. या निवडीमुळे जळगाव जिल्ह्याचा लौकिक राष्ट्रीय पातळीवर अधिक उंचावला असून जिल्ह्यातील युवकांनी सामाजिक, शैक्षणिक व राष्ट्रउभारणीच्या कार्यात सक्रिय सहभाग घ्यावा, असा सकारात्मक संदेश या यशातून मिळत आहे. कु. चेतना रणदीप हिरे यांची ही निवड पाचोरा शहरातील शैक्षणिक क्षेत्रासाठी अभिमानास्पद ठरली असून त्यांच्या यशामुळे इतर विद्यार्थ्यांनाही राष्ट्रीय स्तरावर काम करण्याची प्रेरणा मिळणार आहे. केरळमध्ये होणाऱ्या या प्रतिनिधित्वातून महाराष्ट्राच्या सांस्कृतिक, सामाजिक आणि शैक्षणिक मूल्यांचे प्रभावी सादरीकरण होईल तसेच देशातील युवकांमध्ये परस्पर समज, सहकार्य आणि राष्ट्रीय एकात्मतेची भावना अधिक दृढ होईल, असा विश्वास व्यक्त केला जात आहे.

कॉपीमुक्त शिक्षण प्रणाली, शासकीय पातळीवरील कडक नियम, कठोर कारवाईचे धोरण आणि अचानक लागू होणारे शैक्षणिक निर्णय यामुळे सध्या विद्यार्थी व पालक वर्गात मोठ्या प्रमाणावर असंतोष, संभ्रम आणि भयभीत वातावरण निर्माण झालेले दिसून येते. शिक्षण म्हणजे केवळ परीक्षा पास होणे, गुणांची टक्केवारी मिळवणे किंवा प्रमाणपत्र मिळवणे एवढाच मर्यादित अर्थ नसून शिक्षण हा व्यक्तिमत्त्व घडविण्याचा, विचारक्षम नागरिक निर्माण करण्याचा आणि देशाच्या भविष्यास आकार देण्याचा मूलभूत आधारस्तंभ आहे, हे आपण अनेकदा विसरतो. त्यामुळे शासनाच्या धोरणांवर टीका किंवा समर्थन करण्याआधी, अथवा कॉपीमुक्त शिक्षणाच्या नावाने जे काही घडत आहे त्याचा उहापोह करण्याआधी, सध्याच्या शिक्षण व्यवस्थेचे वास्तव अत्यंत प्रांजळपणे आणि डोळसपणे समजून घेणे गरजेचे आहे. आजची शिक्षण व्यवस्था पाहिली तर ती केवळ अभ्यासक्रम, परीक्षा आणि निकालांपुरती मर्यादित न राहता सामाजिक, आर्थिक आणि मानसिक स्तरावर विभागली गेलेली आहे. विशेषतः विद्यार्थी आणि पालक वर्गात तीन ठळक गट निर्माण झालेले स्पष्टपणे दिसून येतात आणि या तिन्ही गटांचा शिक्षणाकडे पाहण्याचा दृष्टिकोन, अपेक्षा आणि वास्तव एकमेकांपेक्षा पूर्णतः वेगळे आहे. पहिला गट म्हणजे आर्थिकदृष्ट्या अत्यंत सक्षम पालक वर्ग. या वर्गातील पालकांनी आपल्या मुलांचे भविष्य सुरक्षित करण्याच्या उद्देशाने त्यांना लहान वयातच शैक्षणिक हब, मेट्रो सिटी, नामांकित शहरांमधील शाळा आणि महाविद्यालयांमध्ये पाठवणे हेच योग्य समजले आहे. अनेक ठिकाणी तर केवळ शिक्षणासाठी फ्लॅट खरेदी करणे, नातेवाईक किंवा कुटुंबातील सदस्यांना त्या शहरात स्थायिक करणे, हा एक प्रकारचा ट्रेंडच बनला आहे. या पालकांसाठी शिक्षण म्हणजे गुंतवणूक आहे आणि त्या गुंतवणुकीवर भविष्यात चांगला परतावा मिळावा, ही अपेक्षा असते. त्यामुळे शाळेची फी, कोचिंग क्लासेस, हॉस्टेल, एक्स्ट्रा करिक्युलर अ‍ॅक्टिव्हिटीज, इंटरनॅशनल एक्सपोजर या सर्व गोष्टी त्यांच्या दृष्टीने स्वाभाविक आहेत, मात्र या गटातील मुलांनाही प्रचंड स्पर्धा, मानसिक ताण, सतत तुलना आणि कामगिरीचा दबाव यांना सामोरे जावे लागत असल्याचे वास्तवही नाकारता येत नाही. दुसरा गट म्हणजे सर्वसामान्य, मध्यमवर्गीय परंतु आर्थिकदृष्ट्या बऱ्यापैकी सक्षम असा पालक वर्ग. हा वर्ग संख्येने सर्वाधिक आहे आणि सध्याच्या शिक्षण व्यवस्थेतील सर्वात मोठा संभ्रम याच वर्गात दिसून येतो. या पालकांच्या मुलांचे शिक्षण प्रामुख्याने इंग्रजी माध्यम, सूट-बूट, शालेय बस, आकर्षक इमारती आणि CBSE बोर्ड याभोवती फिरताना दिसते. CBSE अभ्यासक्रम आज सेमी इंग्रजी माध्यमातही सुरू झाला आहे, परंतु खऱ्या अर्थाने NCERT आधारित अभ्यासक्रम कितपत दर्जेदार पद्धतीने शिकवला जातो, याचा विचार फारच थोडे पालक करतात. अनेक शाळा आणि महाविद्यालये केवळ नावापुरती CBSE असल्याचे चित्र दिसून येते. त्या ठिकाणी शिकवणारा शिक्षक वर्ग खरोखरच CBSE प्रणालीतून शिकलेला आहे का, त्यांना NCERT सिलेबस, लर्निंग आउटकम्स आणि कॉम्पिटन्सी बेस्ड एज्युकेशन याची समज आहे का, याचा गांभीर्याने विचार प्रवेश घेताना होताना दिसत नाही. या गटातील अनेक निर्णय भावनिक आणि सामाजिक दबावातून घेतले जातात. घरातील महिलांचा हट्ट, शेजाऱ्यांच्या मुलांचे उदाहरण, नात्यातील किंवा ओळखीतील मुलं इंग्रजी माध्यमाच्या शाळेत जात असल्यामुळे आपल्या मुलांनीही तिथेच जायला हवे, हा एकमेव निकष अनेकदा ठरतो. हा दृष्टिकोन केवळ सुशिक्षित गृहिणींपुरता मर्यादित नसून घरकाम करणाऱ्या, बचत गट चालवणाऱ्या, श्रमिक महिलांमध्येही तितक्याच प्रमाणात दिसून येतो. आपली मुलं गाडीत गेली पाहिजेत, इंग्रजी माध्यमात शिकली पाहिजेत, गुड मॉर्निंग, सॉरी, थँक यू हे शब्द लहानपणीच बोलायला हवेत, हा एक प्रकारचा सामाजिक प्रतिष्ठेचा मापदंड बनला आहे. मात्र वास्तव असे आहे की इंग्रजी माध्यमातील बहुतांश शाळांमधील शिक्षक वर्ग कमी पगारावर काम करणारा आहे. अनेक शिक्षक सकाळी शाळेत आणि संध्याकाळी स्वतःच्या किंवा संस्थात्मक क्लासेसमध्ये शिकवण्या घेत असतात. परिणामी शाळेतील अध्यापन हे औपचारिक आणि मर्यादित राहते, तर परीक्षेत येणाऱ्या प्रश्नांची तयारी, उजळणी आणि परताळणी ही घरगुती शिकवणीत होते. याचा परिणाम असा होतो की निकाल लागल्यानंतर 95, 96, 97, 99 टक्के गुण पाहून पालक वर्ग अत्यंत आनंदी होतो आणि आपला निर्णय योग्य असल्याचा भ्रम निर्माण होतो, पण हा भ्रमाचा भोपळा तेव्हा फुटतो, जेव्हा हीच मुलं ऑल इंडिया पातळीवर NCERT आधारित स्पर्धा परीक्षा, प्रवेश चाचण्या किंवा उच्च शिक्षणाच्या स्पर्धेत उतरतात. तेव्हा त्यांच्या खऱ्या शैक्षणिक क्षमतेचे, संकल्पनात्मक समजुतीचे आणि विश्लेषणात्मक कौशल्यांचे मूल्यांकन होते आणि अनेकदा अपेक्षाभंग होतो. दुर्दैवाने तोपर्यंत वेळ निघून गेलेली असते. तिसरा गट म्हणजे मराठी माध्यम शाळांमधील विद्यार्थी. हा गट आज सर्वाधिक संकटात आहे. विद्यार्थीसंख्या कमी, प्रवेशासाठी मारामार, शाळा बंद पडण्याची भीती आणि शिक्षकांची अनिश्चितता हे सारे वास्तव मराठी माध्यमाच्या शाळांभोवती फिरताना दिसते. अनेक ठिकाणी जेमतेम तुकडी वाचवण्यासाठी विविध मार्ग अवलंबले जातात. पालकांना वेगवेगळ्या सवलती, आश्वासने, कधी अप्रत्यक्ष दबाव तर कधी भावनिक साद घालून प्रवेश संख्या पूर्ण केली जाते. या शाळांमध्ये केवळ वीस टक्के विद्यार्थी खऱ्या अर्थाने स्पर्धेत उतरणारे, अभ्यासक्रम पूर्ण करणारे आणि पुढील शिक्षणासाठी सक्षम ठरणारे असतात. उरलेले ऐंशी टक्के विद्यार्थी थेट कॉपी, सेटिंग किंवा कसेतरी पास या मानसिकतेवर चळाण आधारित प्रवेश घेतात. सगळ्यात गंभीर बाब म्हणजे पाचवीतच प्रवेश घेताना संबंधित शिक्षकांकडून शब्द सोडवला जातो की तुम्ही आमच्या मुलाला दहावीपर्यंत पास करून द्यायची जबाबदारी घेत असाल तरच आम्ही या शाळेत प्रवेश देतो. अशा प्रकारे शिक्षणाची जबाबदारी शिक्षकांवर ढकलली जाते आणि पालक स्वतःची जबाबदारी मोकळी करतात. यामुळे शिक्षण हा व्यवहार बनतो आणि मूल्याधिष्ठित प्रक्रिया राहात नाही. या संपूर्ण पार्श्वभूमीवर प्रत्यक्ष अनुभवातून एक अत्यंत महत्त्वाचा मुद्दा समोर येतो. ध्येय करिअर अकॅडमीच्या माध्यमातून संचालक या नात्याने आलेला स्वअनुभव असा आहे की पाचवीत प्रवेश घेतलेली अनेक मुले अशी आढळून आली की ज्यांना बालवाडी स्तरावरील बेसिक शब्द देखील नीट लिहिता येत नाहीत, वाचता येत नाहीत. अक्षरओळख, शब्दओळख, साधे वाक्य वाचन, लिहिण्याची सवय यांचा पूर्णपणे अभाव असलेले विद्यार्थी समोर येत असताना जेव्हा पालकांना स्पष्टपणे सांगितले जाई की आपल्या पाल्याचा पाया कच्चा आहे, बेसिक मजबूत करण्यासाठी वेळ, मेहनत आणि विशेष तयारी लागेल, तेव्हा बहुतांश पालक हे वास्तव स्वीकारण्यास तयार नसत. उलटपक्षी पालक सरळपणे सांगत, आमचा मुलगा हुशार आहे, फक्त तो तुमच्या समोर बोलायला घाबरतो. मात्र संबंधित शिक्षकाने जे निरीक्षण नोंदवले आहे त्याची पडताळणी पालकांनी स्वतः घरी कधीच केलेली नसते. आपल्या मुलाला खरोखर काय येते, काय येत नाही, तो वाचू शकतो का, लिहू शकतो का, साधे प्रश्न स्वतः सोडवू शकतो का, याची तसदी घेण्याची वेळ किंवा मानसिकता अनेक पालकांकडे दिसून येत नाही. अशा परिस्थितीत मुलांच्या कमतरता लपवून ठेवल्या जातात, दोष शिक्षकांवर ढकलला जातो आणि हळूहळू ही कमतरता दहावीपर्यंत गंभीर स्वरूप धारण करते. या तिन्ही स्तरांवरून पाहिले तर आज संपूर्ण शैक्षणिक चक्र हे विस्कळीत, विसंवादी आणि उद्दिष्टहीन झालेले दिसते.याची मुळे बालवाडीपासून आठवीपर्यंतच्या काळात दडलेली आहेत—हाच काळ पायाभूत विकासाचा असतो. म्हणूनच ज्या पालकांनी आणि विद्यार्थ्यांनी कॉपीवर अवलंबून भविष्याचा विचार केला आहे, त्यांच्यासाठी ही वेळ आता निघून गेलेली आहे, हे स्पष्टपणे स्वीकारावे लागेल. मात्र बालवाडीपासून आठवीपर्यंतचा विद्यार्थी वर्ग अजूनही धोक्याची घंटा ओळखून योग्य वेळी योग्य निर्णय घेऊ शकतो. पालकांनी बाह्य आकर्षणांपेक्षा पायाभूत कौशल्ये, वाचन-लेखन, संकल्पनात्मक समज, शिस्त आणि स्व-अभ्यास यांवर लक्ष केंद्रित केले, तरच करिअरचा पाया भक्कम होईल. दुसऱ्या बाजूला शिस्त आणि शिक्षकांकडून दिली जाणारी शिक्षा ही संकल्पना वीस वर्षांपूर्वीच जवळपास संपुष्टात आली आहे. आज विद्यार्थी सरळपणे शिक्षकांना सांगतात की तुमची नोकरी आणि पगार वाचवायचा असेल तर तुम्हालाच आम्हाला पास करावे लागेल. आठवीपर्यंत नियम, नववी दहावीला महाविद्यालयाची चाहूल, त्यामुळे अभ्यासाचा ताण नाही, पालकांकडे लक्ष द्यायला वेळ नाही आणि शिक्षक स्वतः शिकवण्या घेत असल्यामुळे शाळेतील अध्यापन दुय्यम ठरते. या सगळ्या प्रक्रियेत नुकसान नेमके कोणाचे होते हा प्रश्न अत्यंत गंभीर आहे. मुलांचे, पालकांचे, शिक्षकांचे, शाळांचे की देशाचे, हा केवळ चर्चेचा विषय नसून आत्मपरीक्षणाचा विषय आहे. प्रत्येक घटकाने आपापल्या स्तरावर स्वतःकडे प्रामाणिकपणे पाहण्याची गरज आहे. पालकांनी केवळ फी भरून किंवा शाळा निवडून आपली जबाबदारी संपली असे समजू नये. शिक्षकांनी केवळ पगार आणि निकालापुरते शिक्षण मर्यादित न ठेवता विद्यार्थ्यांच्या पायाभूत क्षमतांवर लक्ष केंद्रित करावे. शासनाने धोरणे आखताना केवळ आकडेवारीपुरते न थांबता त्यांची अंमलबजावणी वास्तवाशी सुसंगत आहे का याचा विचार करावा. कोरोना काळानंतर तर मुलांचे आणि शिक्षणाचे नाते जणू तुटलेच आहे. ऑनलाइन शिक्षण, मोबाईल आणि स्क्रीन टाइम यामुळे अभ्यासाची सवय आणि शिस्त ढासळली आहे. आज केवळ मोजके पालक जागरूक आहेत आणि त्यांच्या घरातील मुलं स्वयंभू पद्धतीने अभ्यास करणारी आहेत. परिस्थिती इतकी गंभीर आहे की अनेक मुलं दहावीपर्यंत पोहोचतात, परंतु स्वतःचे नाव मराठीत शुद्धलेखनासह लिहू शकत नाहीत आणि इंग्रजीचा तर दूरवरचा संबंधही नसतो. याची मुळे बालवाडीपासून ते आठवीपर्यंतच्या टप्प्यात दडलेली आहेत. हाच काळ मुलांच्या बौद्धिक, भाषिक, नैतिक आणि सामाजिक पायाभूत विकासाचा असतो. या टप्प्यावर पालकांनी अष्टपैलू विकासाच्या दृष्टीने मुलांकडे कटाक्षाने लक्ष देणे अत्यावश्यक आहे. अजूनही वेळ पूर्णपणे निघून गेलेली नाही. शासनाची शैक्षणिक धोरणे बदलत आहेत आणि अनेक शाळांच्या जागी भविष्यात मोठमोठ्या इमारती उभ्या राहतील अशी चिन्हे दिसत आहेत. मराठी शाळांना घरघर लागलेली आहे, मात्र ही घरघर आपल्या मुलांच्या भवितव्याला लागू नये याची काळजी पालकांनी, शिक्षकांनी आणि समाजाने वेळीच घेतली पाहिजे. अन्यथा शिक्षणाच्या नावाखाली केवळ प्रमाणपत्रधारी पण दिशाहीन पिढी निर्माण होईल आणि त्याचे परिणाम भविष्यात अत्यंत भयावह असतील हे निश्चित.

वरील मजकूर आपणास योग्य वाटल्यास आपण फक्त नाव कट न करता अथवा मजकुरात बदल न करता इतरत्र Send करणेस अथवा प्रसिद्ध करणेस विनंती

Dhyeya News & सा. झुंज संपादक.. संदीप दा. महाजन, पाचोरा जि. जळगाव
(M.A.B.Ed) & Journalism
M0 7588645907 /73 8510 8510

पाचोरा – तालुक्यात यावर्षी इयत्ता दहावीच्या राज्य मंडळ परीक्षेचे अत्यंत नियोजनबद्ध आणि शिस्तबद्ध आयोजन करण्यात आले असून विद्यार्थ्यांनी कोणत्याही प्रकारच्या भीतीला किंवा तणावाला बळी न पडता आत्मविश्वासाने परीक्षा द्यावी, असे आवाहन गटशिक्षणाधिकारी पाचोरा तथा परीरक्षक विजय पवार यांनी केले आहे. पाचोरा पंचायत समिती शिक्षण विभागाच्या वतीने आयोजित करण्यात आलेल्या दहावी परीक्षा केंद्र संचालक व सहाय्यक परीरक्षक यांच्या सहविचार सभेत ते बोलत होते. पाचोरा तालुक्यात यंदा राज्य मंडळाच्या दहावी परीक्षेसाठी एकूण तेरा परीक्षा केंद्र निश्चित करण्यात आली असून या केंद्रांवर चार हजार पाचशे पंचवीस विद्यार्थी परीक्षेस प्रविष्ट झालेले आहेत. एवढ्या मोठ्या संख्येने विद्यार्थ्यांची परीक्षा सुरळीत, पारदर्शक आणि गैरप्रकारमुक्त पद्धतीने पार पाडण्यासाठी प्रशासनाच्या वतीने व्यापक तयारी करण्यात आली आहे. याच पार्श्वभूमीवर पाचोरा येथील गो से विद्यालयात ही महत्त्वाची सहविचार सभा आयोजित करण्यात आली होती. या सभेत परीक्षा आयोजनाचा सविस्तर आढावा घेताना गटशिक्षणाधिकारी विजय पवार यांनी केंद्र संचालक, सहाय्यक परीरक्षक तसेच संबंधित कर्मचाऱ्यांना आवश्यक त्या सूचना दिल्या. परीक्षा प्रक्रियेत कुठल्याही प्रकारची त्रुटी राहू नये, यासाठी प्रत्येक स्तरावर काटेकोर नियोजन करण्यात आले असल्याचे त्यांनी स्पष्ट केले. सर्व परीक्षा केंद्रांवर सीसीटीव्ही यंत्रणा बसवण्यात आली असून त्याद्वारे सतत निरीक्षण ठेवण्यात येणार आहे. यासोबतच प्रत्येक वर्गात झूम अ‍ॅपच्या माध्यमातून संनियंत्रण करण्यात येणार आहे. परीक्षा काळात तालुका स्तरावर स्वतंत्र नियंत्रण कक्ष कार्यान्वित करण्यात आला असून या नियंत्रण कक्षातून थेट सर्व परीक्षा केंद्रांवर लक्ष ठेवण्यात येणार आहे. कोणतीही अडचण, तांत्रिक समस्या किंवा अनुचित प्रकार आढळल्यास तात्काळ कारवाई करता यावी, यासाठी हे नियंत्रण प्रभावी ठरणार असल्याचे त्यांनी सांगितले. परीक्षा सुरळीत पार पडावी, विद्यार्थी व पालकांमध्ये विश्वासाचे वातावरण निर्माण व्हावे आणि शिक्षक व कर्मचारी यांचे समन्वयाने काम व्हावे, या उद्देशाने हे नियोजन करण्यात आले असल्याचेही त्यांनी नमूद केले. विद्यार्थ्यांना मार्गदर्शन करताना त्यांनी विशेषतः नैतिकतेवर भर दिला. विद्यार्थ्यांनी कोणत्याही प्रकारचा गैरमार्ग अवलंबू नये, आपल्या मेहनतीवर, अभ्यासावर आणि आत्मविश्वासावर विश्वास ठेवून शांत मनाने परीक्षा द्यावी, असे आवाहन त्यांनी केले. परीक्षा प्रक्रियेत शिस्त आणि पारदर्शकता राखण्यासाठी तालुका स्तरावर दोन भरारी पथक आणि तेरा बैठे पथकांची नियुक्ती करण्यात आली आहे. याशिवाय यावर्षी महसूल विभागाचे स्वतंत्र बैठे पथक नेमण्यात आले असून त्यामुळे परीक्षा प्रक्रियेवर अधिक काटेकोर नियंत्रण राहणार आहे. या सर्व पथकांचे कार्य म्हणजे परीक्षा काळात सतत निरीक्षण ठेवणे, नियमांचे पालन होत आहे का हे पाहणे आणि कोणताही अनुचित प्रकार घडू नये याची दक्षता घेणे होय. या सहविचार सभेचे प्रास्ताविक भागवत कोरे यांनी केले तर उपस्थितांचे आभार राजू सूर्यवंशी यांनी मानले. परीक्षा काळात तहसीलदार विजय बनसोडे व गटविकास अधिकारी सुधाकर मुंढे हे वेळोवेळी परीक्षा केंद्रांना भेटी देणार असून त्यांच्या उपस्थितीमुळे प्रशासनातील समन्वय अधिक बळकट होणार आहे. परीक्षा नियंत्रणाच्या कामासाठी कैलास बडगुजर, दिलीप अहिरे, नितीन भालेराव यांच्यासह केंद्र प्रमुख अनिल पाटील, सीमा पाटील, जयदीप पाटील, सुनील शिवदे, गिरीश भोयर, सतीश पाटील, संजय पाटील आदी अधिकारी व कर्मचारी नियुक्त करण्यात आले आहेत. एकूणच पाचोरा तालुक्यात दहावीच्या परीक्षेसाठी शिक्षण विभाग, प्रशासन आणि संबंधित यंत्रणा पूर्णतः सज्ज असून नियोजन, तंत्रज्ञानाचा वापर आणि जबाबदार यंत्रणेच्या माध्यमातून यंदाची परीक्षा शांततापूर्ण व यशस्वीरीत्या पार पडेल, असा विश्वास यावेळी व्यक्त करण्यात आला.

लोणी – (चेतना हिरे , वरखेडी ) लोकनेते पद्मभूषण डॉ. बाळासाहेब विखे पाटील प्रवरा ग्रामीण शिक्षण संस्थेच्या लोणी येथील पद्मश्री विखे पाटील कॉलेजच्या वाणिज्य विभागामार्फत ‘विकसित भारत @2047’ या विषयावर दोन दिवसीय राष्ट्रीय परिषदेचे यशस्वी आयोजन करण्यात आले होते. ही परिषद दि. 13 व 14 फेब्रुवारी 2026 रोजी प्रवरानगर, ता. राहता, जि. अहिल्यानगर येथील APJ Abdul Kalam Seminar Hall येथे उत्साहपूर्ण वातावरणात पार पडली. देशाच्या सर्वांगीण विकासाच्या दिशेने शैक्षणिक व संशोधन क्षेत्रातून मोलाचे योगदान देणाऱ्या या परिषदेत विविध राज्यांतील अभ्यासक, प्राध्यापक व संशोधक विद्यार्थ्यांनी मोठ्या संख्येने सहभाग नोंदविला. परिषदेच्या उद्घाटनप्रसंगी संस्थेचे सहसचिव भारत घोगरे यांनी ग्रामीण भारताच्या विकासाच्या संकल्पनेवर सखोल मार्गदर्शन केले. पद्मश्री डॉ. विठ्ठलराव विखे पाटील यांनी ग्रामीण भागाचा विकास साधताना सहकाराच्या माध्यमातून उभारलेला प्रवरा परिसर आजही देशासाठी आदर्श ठरत असल्याचे त्यांनी अधोरेखित केले. ग्रामीण भारत सक्षम झाल्याशिवाय ‘विकसित भारत’ची संकल्पना पूर्णत्वास जाणार नाही, असे त्यांनी स्पष्ट केले. या राष्ट्रीय परिषदेसाठी महाराष्ट्र, गुजरात, ओडिशा, कर्नाटक आदी राज्यांतून एकूण 170 संशोधन निबंध प्राप्त झाले होते, त्यापैकी सुमारे 40 संशोधक विद्यार्थी व प्राध्यापकांनी प्रत्यक्ष सत्रात आपले संशोधन निबंध सादर केले. आर्थिक विकास, ग्रामीण-शहरी समतोल, शिक्षणाची भूमिका, उद्योग व नवोन्मेष, सामाजिक समावेश, नैतिक मूल्ये आणि मानवी दृष्टिकोन यांसारख्या विषयांवर अभ्यासपूर्ण चर्चा झाली. या परिषदेत श्री शेठ मुरलीधरजी मानसिंगका साहित्य विज्ञान व वाणिज्य महाविद्यालय, पाचोरा येथील वाणिज्य विषयाच्या प्राध्यापिका सौ. जयश्री वर्मा वाघ यांनी सादर केलेल्या संशोधन निबंधाला विशेष दाद मिळाली. त्यांच्या सखोल अभ्यासपूर्ण, वास्तववादी आणि भविष्याभिमुख मांडणीमुळे त्यांना ‘बेस्ट रिसर्च पेपर प्रेझेंटेशन’ या प्रकारात राष्ट्रीय स्तरावरील प्रथम क्रमांकाचा पुरस्कार मान्यवरांच्या हस्ते प्रदान करण्यात आला. यावेळी त्यांना सन्मानचिन्ह व सन्मानपत्र देऊन गौरविण्यात आले. पुरस्कार स्वीकारल्यानंतर बोलताना प्रा. सौ. जयश्रीताई वर्मा वाघ यांनी भारत विकसित राष्ट्र होण्यासाठी सर्वांनी एकत्रित प्रयत्न करण्याची गरज असल्याचे मत व्यक्त केले. देशाच्या विकासासाठी योगदान देताना सुरुवात स्वतःपासून करणे आवश्यक असून वैयक्तिक विकासातूनच समाज व देशाचा विकास साध्य होतो, असे त्यांनी नमूद केले. विकासाच्या प्रक्रियेत मानवतेची जपणूक होणे तितकेच महत्त्वाचे असून माणूस म्हणून माणसासारखे वागणे हीच खरी प्रगती असल्याचे त्यांनी ठामपणे सांगितले. येत्या काळात भारत जागतिक महासत्ता बनेल, असा विश्वासही त्यांनी व्यक्त केला. या परिषदेत शिक्षण संचालक डॉ. प्रदीप दिघे, K. B. P. कॉलेजच्या अधिष्ठाता डॉ. हर्षा गोयल, कर्नाटक येथील डॉ. विद्या जिरगे, मुंबई येथील डॉ. चंद्रशेखर देवरे, डॉ. श्याम साळुंखे, उपप्राचार्य डॉ. आर. ए. पवार, डॉ. भाऊसाहेब रणपिसे यांच्यासह विविध विद्याशाखांतील तज्ज्ञ प्राध्यापक, संशोधक व विद्यार्थी मोठ्या संख्येने उपस्थित होते. प्रारंभी डॉ. दीपक पाटील यांनी प्रास्ताविक करून परिषदेच्या उद्दिष्टांची माहिती दिली, तर डॉ. आर. ए. पवार यांनी महाविद्यालय व संस्थेमार्फत राबविण्यात येणाऱ्या विविध शैक्षणिक व संशोधनात्मक उपक्रमांची माहिती देत परिषदेचे महत्त्व विशद केले. संशोधन संस्कृती वृद्धिंगत करणे, विद्यार्थ्यांमध्ये वैज्ञानिक दृष्टिकोन निर्माण करणे आणि देशाच्या विकासात बौद्धिक योगदान देणे हा या परिषदेचा मुख्य हेतू असल्याचे त्यांनी सांगितले. संपूर्ण परिषदेत अभ्यासपूर्ण चर्चा, प्रश्नोत्तर सत्रे आणि विचारविनिमयामुळे बौद्धिक वातावरण निर्माण झाले होते. सूत्रसंचालन डॉ. शांताराम चौधरी यांनी केले, तर आभार प्रदर्शन डॉ. विजय खर्डे यांनी केले. यशस्वी आयोजनाबद्दल आयोजक वाणिज्य विभागाचे सर्वत्र कौतुक करण्यात आले असून ‘विकसित भारत @2047’ या राष्ट्रीय परिषदेने संशोधनाला चालना देत देशाच्या उज्ज्वल भविष्यासाठी सामूहिक प्रयत्नांची दिशा निश्चित केली, असे मत उपस्थित मान्यवरांनी व्यक्त केले.

पाचोरा – छत्रपती शिवाजी महाराज जयंतीचे औचित्य साधून भाजप वैद्यकीय आघाडी जळगाव (पश्चिम), माऊली क्लिनिक व गोदावरी फाऊंडेशन जळगाव यांच्या संयुक्त विद्यमाने पाचोरा शहरात भव्य मोफत हृदयरोग व त्वचारोग तपासणी व मार्गदर्शन शिबिराचे आयोजन करण्यात आले आहे. समाजातील सर्वसामान्य नागरिकांना दर्जेदार वैद्यकीय सुविधा उपलब्ध व्हाव्यात, हृदयविकार, उच्च रक्तदाब, मधुमेह तसेच त्वचारोग यांचे वेळीच निदान व्हावे आणि उपचाराबाबत योग्य मार्गदर्शन मिळावे या सामाजिक उद्देशाने हे शिबिर आयोजित करण्यात आले आहे. या शिबिरात हृदयरोग व त्वचारोगाशी संबंधित विविध तपासण्या व तज्ज्ञांचे मार्गदर्शन मोफत स्वरूपात उपलब्ध करून देण्यात येणार आहे. हृदयविकारांच्या वाढत्या प्रमाणाचा विचार करता ईसीजी, २डी इको, कार्डिओग्राफ, रक्तदाब तपासणी, मधुमेह तपासणी तसेच आवश्यक रक्ततपासण्या केल्या जाणार आहेत. यासोबतच त्वचारोग निदान शिबिरात इसब, गजकर्ण, जुनाट खाज, अॅलर्जी, तीळ, मस, चेहऱ्यावरील डाग, टॅटू काढणे, चामखीळ काढणे यांसारख्या त्वचेच्या विविध समस्यांवर तपासणी व मार्गदर्शन दिले जाणार आहे. “आता त्वचेची समस्या लपवू नका” या संदेशातून नागरिकांना आपल्या आरोग्याबाबत सजग राहण्याचे आवाहन आयोजकांनी केले आहे. या शिबिराचे मार्गदर्शक म्हणून मा. ना. गिरीष महाजन, गा. आ. मंगेश चव्हाण व डॉ राधेश्यामदादा चौधरी यांचे मोलाचे मार्गदर्शन लाभणार आहे. तपासणी व उपचार मार्गदर्शनामध्ये एन्जिओग्राफी, एन्जिओप्लास्टी, पेसमेकर, रिनल एन्जिओप्लास्टी, आय.व्ही.सी. फिल्टर, बायपास अशा आधुनिक वैद्यकीय प्रक्रियांबाबत सविस्तर माहिती देण्यात येणार आहे. तसेच कार्डिओव्हास्कुलर तपासणीसाठी मोफत २डी इको आणि कार्डिओतज्ज्ञांकडून सल्ला दिला जाणार आहे. हे शिबिर गुरुवार, दिनांक १९ फेब्रुवारी २०२६ रोजी सकाळी १०.०० ते दुपारी २.०० या वेळेत आयोजित करण्यात आले आहे. शिबिराचे स्थळ माऊली क्लिनिक, डॉ. दादासाहेब जीवन पाटील (वाणेगावकर), राज पिठाची गिरणी जवळ, विवेकानंद नगर, पुनगाव रोड, पाचोरा, जि. जळगाव असे आहे. शिबिरात सहभागी होण्यासाठी नोंदणी अत्यावश्यक असून नोंदणीसाठी ९९६०९०७०६० या क्रमांकावर संपर्क साधण्याचे आवाहन करण्यात आले आहे. या उपक्रमासाठी दिलीप वाम, मधुभाऊ काटे (मा. जि. प. सदस्य), सुभाषभाऊ पाटील (उपाध्यक्ष भाजपा, जळगाव), वैशालीताई सूर्यवंशी, दीपक माने यांचे सहकार्य लाभत असून आयोजनाची जबाबदारी त्यांनी समर्थपणे पार पाडली आहे. तसेच डॉ. जीवन पाटील सहसंयोजक भाजपा वैद्यकीय आघाडी, डॉ. उल्हास पाटील वैद्यकीय महाविद्यालय व धर्मदाय रुग्णालय, डॉ. वैशाली पाटील संचालिका माऊली क्लिनिक, डॉ. उल्हास पाटील माजी खासदार, डॉ. सौ. वर्षा पाटील सचिव, डॉ. केतकी पाटील सदस्य, डॉ. वैभव पाटील डी.एम. कार्डिओलॉजी यांचे मार्गदर्शन व सहकार्य या शिबिराला लाभत आहे. शिबिराबाबत विशेष बाब म्हणजे शासकीय योजनेत न बसणाऱ्या सर्व शस्त्रक्रिया सवलतीच्या दरात करण्यात येणार आहेत, त्यामुळे आर्थिकदृष्ट्या दुर्बल घटकांनाही आवश्यक उपचार घेणे सुलभ होणार आहे. गोदावरी फाऊंडेशन संचलित या उपक्रमातून समाजातील आरोग्यविषयक जाणीव वाढवणे आणि वेळेवर तपासणीद्वारे गंभीर आजार टाळणे हा मुख्य हेतू आहे. या शिबिरासाठी संपर्क म्हणून आशिष भिरूड ९३७३३५०००९ व रत्नशेखर जैन ७०३०५७११११ यांचे क्रमांक देण्यात आले आहेत. जळगाव–भुसावळ महामार्ग क्र. ६, जळगाव खु. येथील डॉ. उल्हास पाटील वैद्यकीय महाविद्यालय व धर्मदाय रुग्णालय तसेच माऊली क्लिनिक यांच्या संयुक्त प्रयत्नातून हा सामाजिक उपक्रम राबविण्यात येत आहे. छत्रपती शिवाजी महाराज जयंतीच्या प्रेरणेतून समाजाच्या आरोग्यासाठी राबविण्यात येणारे हे मोफत हृदयरोग व त्वचारोग तपासणी शिबिर नागरिकांसाठी निश्चितच उपयुक्त ठरणार असून हृदयविकार, उच्च रक्तदाब, मधुमेह व त्वचारोगांनी त्रस्त असलेल्या नागरिकांनी या सुवर्णसंधीचा लाभ घ्यावा असे आवाहन आयोजकांकडून करण्यात आले आहे.