मुंबई (गुरुदत्त वाकदेकर) : आयसीसी चॅम्पियन्स ट्रॉफी २०२५ च्या पहिल्या उपांत्य फेरीत भारताने दमदार खेळी करत ऑस्ट्रेलियाचा ४ विकेट्सने पराभव केला आणि अंतिम फेरीत धडक मारली. विराट कोहलीच्या संयमी आणि कौशल्यपूर्ण खेळीमुळे भारताने २६५ धावांचे लक्ष्य सहज पार केले.

ऑस्ट्रेलियाने प्रथम फलंदाजी करत ४९.३ षटकांत सर्वबाद २६४ धावा केल्या. भारताच्या गोलंदाजांनी प्रभावी कामगिरी करत कांगारू संघाला मोठी धावसंख्या उभारू दिली नाही. प्रत्युत्तरात भारतीय संघाने ४८.१ षटकांत २६७/६ धावा करून विजय संपादन केला.

विराटचा संयमी खेळ आणि हार्दिकचा आक्रमक शेवट

विराट कोहलीने ९८ चेंडूत ८४ धावा करत भारतीय डावाची सूत्रे हाती घेतली. श्रेयस अय्यर (४५), अक्षर पटेल (२७) आणि के. एल. राहुल (४२*) यांनीही महत्त्वाचे योगदान दिले. शेवटच्या क्षणी हार्दिक पांड्याने ३ उत्तुंग षटकार मारत (२८ धावा, २४ चेंडू) सामना भारताच्या बाजूने झुकवला. विराटला सामनावीर पुरस्काराने गौरविण्यात आले.

ऑस्ट्रेलियाच्या नॅथन एलिसने २/४९ आणि अॅडम झॅम्पाने ६०/२ अशी गोलंदाजी करत भारताच्या फलंदाजांना आव्हान देण्याचा प्रयत्न केला. मात्र, भारतीय फलंदाजांनी संयम राखत लक्ष्य पूर्ण केले.

भारताचा कर्णधार रोहित शर्मा “शेवटच्या चेंडूपर्यंत सामना अनिश्चित होता, पण आमच्या खेळाडूंनी योग्य निर्णय घेत विजय मिळवला. अंतिम फेरीसाठी आता मानसिक आणि शारीरिकरित्या सज्ज होण्याचा आमचा प्रयत्न असेल.”

ऑस्ट्रेलियाचा कर्णधार स्टीव्ह स्मिथ “गोलंदाजांनी मेहनत घेतली, पण आम्ही काही धावा कमी केल्या. खेळपट्टीवर धावा करणे सोपे नव्हते. मात्र, आमच्या संघाने उत्तम लढत दिली.”

भारताचा चॅम्पियन्स ट्रॉफीतील इतिहास:-

भारताने २०००, २००२, २०१३, २०१७ आणि आता २०२५ असा पाचव्यांदा चॅम्पियन्स ट्रॉफीच्या अंतिम फेरीत प्रवेश केला आहे. आता अंतिम फेरीत भारताची लढत न्यूझीलंड किंवा दक्षिण आफ्रिका संघातल्या विजेत्या संघाविरुद्ध होणार आहे.

अंतिम फेरीकडे नजर:-

भारताच्या या ऐतिहासिक विजयामुळे अंतिम फेरीबाबत उत्सुकता वाढली आहे. ५ मार्चला होणाऱ्या न्यूझीलंड विरुद्ध दक्षिण आफ्रिका सामन्यानंतर भारताच्या प्रतिस्पर्ध्याचा निर्णय होईल. आता भारतीय संघ अंतिम फेरीत कोणता पराक्रम गाजवतो, याकडे सर्वांचे लक्ष लागले आहे.

मुंबई (गुरुदत्त वाकदेकर) : राष्ट्रवादी काँग्रेस पार्टीचे मुंबई उपाध्यक्ष नंदकुमार काटकर यांची पुन्हा एकदा मुंबई सहकार सेलच्या अध्यक्षपदी नियुक्ती झाली आहे. त्यांच्या या निवडीमुळे सहकार क्षेत्रात नव्या ऊर्जा आणि नेतृत्वाला चालना मिळेल, अशी अपेक्षा व्यक्त केली जात आहे. 

*सहकार क्षेत्रात काटकर यांचे योगदान:-*

नंदकुमार काटकर यांनी सहकार क्षेत्रात महत्त्वपूर्ण योगदान दिले आहे. त्यांनी अनेक सहकारी संस्थांच्या उभारणीसाठी आणि त्यांच्या सक्षमीकरणासाठी प्रयत्न केले आहेत. त्यांची कार्यशैली, संघटन कौशल्य आणि सहकार क्षेत्रातील अनुभव यामुळे त्यांना पुन्हा अध्यक्षपदाची संधी मिळाली आहे. त्यांच्या नेतृत्वाखाली सहकारी संस्था अधिक मजबूत होतील, अशी अपेक्षा आहे.

अखिल भारतीय मराठा महासंघ, मुंबई शहर सरचिटणीस आणि राष्ट्रवादी काँग्रेस पार्टी प्रशासन उपाध्यक्ष महेंद्र मंदाकिनी जगन्नाथ तावडे यांनी सहकारी संस्था आणि सामान्य नागरिकांच्या हितासाठी ठोस उपाययोजना करण्याची गरज त्यांनी अधोरेखित केली.

मुंबई सहकार सेलच्या अध्यक्षपदी पुन्हा निवड झाल्यानंतर नंदकुमार काटकर यांनी सहकार क्षेत्राच्या विकासासाठी आपले संकल्प स्पष्ट केले आहेत. सहकारी बँका, गृहनिर्माण संस्था, पतपेढ्या आणि अन्य सहकारी संस्थांना बळकटी देण्यासाठी ते कार्यरत राहतील. तसेच, सहकारी संस्थांना भेडसावणाऱ्या अडचणींवर तोडगा काढण्यासाठी ते प्रयत्नशील असतील.

त्यांच्या या निवडीबद्दल सहकार क्षेत्रातील मान्यवर, कार्यकर्ते आणि हितचिंतकांनी त्यांचे अभिनंदन केले आहे. त्यांच्या पुढील कार्यकाळासाठी त्यांना मनःपूर्वक शुभेच्छा!

नालासोारा (गुरुदत्त वाकदेकर) : नालासोपारा (प.) येथील चक्रेश्वर तलावाजवळ जय हनुमान क्रिकेट संघ (बामणघर) यांच्या वतीने आयोजित भव्य टर्फ अंडर आर्म लीग क्रिकेट स्पर्धा – २०२५ (पर्व-१) रविवार, दिनांक २ मार्च २०२५ रोजी मोठ्या उत्साहात पार पडली. स्पर्धेमध्ये उत्कृष्ट १६ संघांनी सहभाग घेतला आणि प्रेक्षकांना खिळवून ठेवणाऱ्या सामन्यांचा आनंद मिळाला.

*विजेत्यांचा सन्मान:-*

प्रथम क्रमांक: आध्या-११ (बामणघर) – ₹१२,०००/- रोख व आकर्षक चषक

द्वितीय क्रमांक: कालिका क्रीडा मंडळ (जांभूळनगर) – ₹७,०००/- रोख व आकर्षक चषक

तृतीय क्रमांक: अद्विक-११ (बामणघर) – आकर्षक चषक

चतुर्थ क्रमांक: आविष्कार-११ – आकर्षक चषक

*विशेष पारितोषिके:-*

*उपांत्य फेरी:-*
उत्कृष्ट गोलंदाज – संतोष मामा
उत्कृष्ट फलंदाज – केदार
सर्वोत्कृष्ट अष्टपैलू खेळाडू – अनमोल

*अंतिम फेरी:-*
उत्कृष्ट गोलंदाज – मयूर
उत्कृष्ट फलंदाज – गिरीश
सर्वोत्कृष्ट अष्टपैलू खेळाडू – केदार

सदर स्पर्धा यशस्वी करण्यासाठी जय हनुमान क्रिकेट संघ (बामणघर) चे पदाधिकारी निलेश पालांडे, योगेश जाधव, काशिनाथ चव्हाण, शुभम चव्हाण, आशिष जाधव, नामदेव चव्हाण, नंदकुमार जाधव यांनी मोलाचे योगदान दिले. तसेच, जय हनुमान मराठा मंडळ बामणघरचे अध्यक्ष रविंद्र साळवी, अमोल मोरे, विनोद साळवी संजय लोटणकर आणि गणेश चव्हाण यांनी महत्वपूर्ण भूमिका निभावली.

आंतरराष्ट्रीय क्रिकेटपटू कै. एकनाथ सोलकर यांच्या स्मरणार्थ एक्की इलेव्हन क्रिकेट (काळाचौकी) संघाच्या सौजन्याने खेळाडूंना विशेष कॅप देण्यात आल्या.

सदर स्पर्धेसाठी साळवी परिवाराने प्रथम आणि द्वितीय चषक, तसेच प्रभाकर सुर्वे आणि निलेश पालांडे यांनी पारितोषिकांची रक्कम दिली. शुभम चव्हाण व आशिष जाधव यांनी तृतीय व चतुर्थ चषक प्रदान केला.  काशिनाथ चव्हाण आणि प्रतिक विकास जाधव यांनी सामनावीर पुरस्कार प्रायोजित केले. तसेच, मिलिंद सुर्वे व कृष्णा चव्हाण यांनी वस्तूरूपात देणगी देऊन स्पर्धेस सहकार्य केले.

स्पर्धा यशस्वी पार पाडण्यासाठी नंदकुमार जाधव, शुभम चव्हाण, योगेश जाधव आणि निलेश पालांडे  काशिनाथ चव्हाण यांनी अथक परिश्रम घेतले. या स्पर्धेमुळे नालासोपाऱ्यात क्रिकेटच्या नव्या पर्वाची सुरुवात झाली असून, भविष्यातही अशाच रोमांचक स्पर्धांची चाहूल लागली आहे.

पाचोरा – शहरातील गांधीनगर भागातील श्री अंबाजी माता मंदिराचा २६ वा वर्धापनदिन मोठ्या उत्साहात साजरा करण्यासाठी विविध धार्मिक कार्यक्रमांचे आयोजन करण्यात आले आहे. ४ मार्च २०२५ रोजी होणाऱ्या या उत्सवात महाप्रसाद (भंडारा), महापूजा, पार्थिव शिवलिंग पूजन आणि महाआरती यांसारख्या धार्मिक विधींना भाविक मोठ्या संख्येने हजेरी लावणार आहेत. हजारोंच्या संख्येने येणाऱ्या भाविकांमुळे मंदिर परिसरात उत्साहाचे वातावरण निर्माण झाले आहे. परंतु, या धार्मिक सोहळ्याच्या पार्श्वभूमीवर गांधीनगर परिसरातील खराब रस्ते व खड्डे ही मोठी समस्या ठरत होती. त्यामुळे स्थानिक नागरिक व भाविकांची अनेक दिवसा पासुन नगरपालिका प्रशासनाकडे रस्त्यांची दुरुस्ती करण्याची मागणी केली जात होती.
     गांधीनगर परिसरातील भुयारी गटारींमुळे मुख्य रस्त्यांवर मोठ्या प्रमाणात खड्डे पडले होते. विशेषतः श्री अंबाजी माता मंदिराकडे जाणाऱ्या मार्गावर अनेक ठिकाणी खड्डे असल्यामुळे वाहतुकीस अडथळा निर्माण होण्याची शक्यता होती. भाविकांच्या मोठ्या गर्दीमुळे संभाव्य अपघाताचा धोका निर्माण झाला होता. त्यामुळे स्थानिक नागरिक, व्यापारी आणि सामाजिक संघटनांनी एकत्र येऊन पालिकेकडे तातडीने रस्त्यांचे डांबरीकरण अथवा खड्डे बुजवण्याची सतत मागणी केली जात होती गेल्या काही दिवसांपासून रस्त्यांची दुरवस्था ही नागरिकांसाठी मोठ्या चिंतेचा विषय ठरली होती. अनेकदा “आज उद्या काम सुरू होईल” अशा आश्वासनांवर ही समस्या प्रलंबित ठेवण्यात आली होती. त्यामुळे नागरिक आशेने या रस्त्यांकडे पाहत होते. मात्र, श्री अंबाजी माता मंदिराचा वर्धापनदिन अवघ्या काही दिवस व तासावर येऊन ठेपलेला असताना, ध्येय न्यूज आणि झुंज वृत्तपत्राने या समस्येवर रोक- ठोक वृत्त प्रसिद्ध केले. या पत्रकारितेच्या प्रभावामुळे नगरपालिका प्रशासनासह अनेक सामाजिक व राजकीय व्यक्तींना तातडीने पावले उचलण्यास भाग पाडले.
   पत्रकारांनी केलेल्या आवाहनाची नगरपालिका प्रशासनाने त्वरित दखल घेतली. त्यामुळे या भागातील रस्त्यांचे मुरूम टाकण्याचे काम हाती घेण्यात आले. यासाठी आमदार किशोरआप्पा पाटील यांचे निकटवर्तीय आणि कृषी उत्पन्न बाजार समितीचे सभापती तसेच या प्रभागाचे भावी नगरसेवक गणेश भीमराव पाटील व भावी नगरसेवक सुनील उर्फ नाना गौड यांनी विशेष पुढाकार घेतला. तर सुनील गौड यांनी स्वतः प्रत्यक्ष उभे राहून या कामाची जबाबदारी

घेतली आणि गांधीनगर परिसरातील रस्त्यांचे मुरूम टाकण्याचे काम मार्गी लावले. त्यांच्या या तत्परतेमुळे नागरिकांमध्ये समाधानाचे वातावरण निर्माण झाले असून, त्यांचे कौतुक होत आहे. श्री अंबाजी माता मंदिराचा वर्धापन दिन हा भाविकांसाठी श्रद्धेचा मोठा सोहळा असतो. नव्हे तर या परिसरात जणू यात्रेचे स्वरूप दिसून येते त्यामुळे मंदिर परिसरात येणाऱ्या भाविकांची गैरसोय होऊ नये, तसेच कार्यक्रम निर्विघ्न पार पडावा, यासाठी नगरपालिकेने तसेच विद्यमान नगरसेवक आणि भावी नगरसेवकांनी तातडीने लक्ष घालून संबंधित रस्त्यांची दुरुस्ती करावी, अशी मागणी स्थानिक नागरिकांनी केली होती. नगरपालिकेने वेळीच उपाययोजना केल्यास या धार्मिक सोहळ्यात सहभागी होणाऱ्या भाविकांना कोणत्याही अडचणीचा सामना करावा लागणार नाही आणि कार्यक्रम निर्विघ्न पार पडेल. प्रशासनाने या गंभीर प्रश्नाची दखल घेत त्वरित उपाययोजना केल्यामुळे संपूर्ण गांधीनगर परिसरातील नागरिक आणि भाविकांत समाधानाचे वातावरण निर्माण झाले आहे.
   मंदिराच्या २६ व्या वर्धापन दिनानिमित्त भाविकांसाठी भव्य महाप्रसाद (भंडारा) चे आयोजन करण्यात आले आहे. तसेच महापूजा, पूजन आणि महाआरती हे धार्मिक विधीही संपन्न होणार आहेत. या सोहळ्याला हजारो भक्तगण मोठ्या संख्येने उपस्थित राहतील, असा अंदाज वर्तवण्यात येत आहे.  गांधीनगर भागात मोठ्या प्रमाणात भाविकांचा ओघ लक्षात घेऊन पोलीस प्रशासनानेही सुरक्षा व्यवस्थेची तयारी केली आहे. भाविकांची गर्दी नियोजनबद्धरीत्या नियंत्रित करण्यासाठी मंदीराकडून विशेष पथके तैनात करण्यात आले आहेत.
रस्त्यांचे काम तातडीने पूर्ण होण्यास आमदार किशोरआप्पा पाटील यांच्या मार्गदर्शनाखाली सभापती गणेश पाटील आणि सुनील गौड यांचा मोठा वाटा होता. त्यांनी आपल्या वैयक्तिक पातळीवर प्रयत्न करून रस्त्यांचे मुरूम टाकण्याचे काम वेगाने पार पाडले. त्यामुळे या लोकप्रतिनिधींचे आणि सामाजिक कार्यकर्त्यांचे नागरिकांकडून कौतुक होत आहे.
        संपूर्ण गांधीनगर परिसरात श्री अंबाजी माता मंदिराच्या वर्धापन सोहळ्याची तयारी मोठ्या जोशात सुरू आहे. मंदिर सुशोभित करण्यात आले असून, भाविकांच्या सोयीसाठी स्वच्छता मोहीम, रस्त्यांची दुरुस्ती, वाहतूक नियंत्रण आणि महाप्रसादासाठी योग्य नियोजन करण्यात आले आहे. गेल्या अनेक वर्षांपासून गांधीनगर परिसरातील रस्त्यांची अवस्था गंभीर आहे. धार्मिक सण-उत्सवाच्या वेळीच सुधारणा केली जाते, मात्र स्थायी उपाययोजना करण्याची गरज आहे, अशी नागरिकांची भावना आहे. यासंदर्भात प्रशासनाने कायमस्वरूपी रस्त्यांच्या डांबरीकरणासाठी उचित निधी मंजूर करावा आणि भविष्यात अशा समस्यांचा पुन्हा सामना करावा लागू नये, याची काळजी घ्यावी, अशी मागणी होत आहे.
श्री अंबाजी माता मंदिराच्या वर्धापनदिनानिमित्त गांधीनगर परिसरात धार्मिक वातावरण निर्माण झाले असून, भाविकांची मोठी उपस्थिती अपेक्षित आहे. नगरपालिकेने वेळीच रस्त्यांचे दुरुस्तीचे काम केल्याने भाविकांची गैरसोय टळली आणि धार्मिक सोहळा निर्विघ्न पार पडण्यास मदत होणार आहे. भविष्यात या भागातील रस्त्यांसाठी स्थायी उपाययोजना करण्याची मागणी नागरिकांनी केली असून, प्रशासनाने याकडे गांभीर्याने लक्ष देण्याची गरज आहे.

पाचोरा, २८ फेब्रुवारी २०२५: विज्ञान आणि तंत्रज्ञानाच्या क्षेत्रात विद्यार्थ्यांची रुची वाढावी, संशोधन वृत्ती जोपासली जावी आणि सर्जनशीलता फुलावी या उद्देशाने गुरुकुल इंटरनॅशनल स्कूल, पाचोरा येथे राष्ट्रीय विज्ञान दिनानिमित्त भव्य विज्ञान प्रदर्शनाचे आयोजन करण्यात आले. विद्यार्थ्यांनी कल्पकतेने तयार केलेल्या विविध प्रकल्पांच्या माध्यमातून विज्ञानाच्या वेगवेगळ्या शाखांचा प्रभावी परिचय करून दिला. कार्यक्रमाची सुरुवात मा. अनिलभाई दुलानी यांच्या हस्ते प्रतिकात्मक रॉकेट प्रक्षेपणाने आणि फीत कापून करण्यात आली.
   यावेळी शाळेचे मुख्याध्यापक मा. श्री. प्रेमकुमार शामनाणी सर, नगरसेवक मा. रामभाऊ केसवानी, प्रसिद्ध शिक्षणतज्ज्ञ श्री. हरिभाऊ पाटील, तसेच डॉ. मनीष दादा चंदनानी हे प्रमुख पाहुणे म्हणून उपस्थित होते. विद्यार्थ्यांनी सादर केलेल्या ३२८ वैज्ञानिक प्रतिकृतींनी प्रदर्शनाचे वैशिष्ट्य अधिकच उठावदार बनवले. विशेषतः “जल ही जीवन है” या संकल्पनेवर आधारित विविध प्रकल्पांनी पर्यावरणस्नेही दृष्टिकोन मांडला.
     विज्ञान प्रदर्शनात विद्यार्थ्यांनी विज्ञानाच्या विविध शाखांशी संबंधित अद्भुत प्रयोग आणि प्रतिकृती सादर केल्या. आधुनिक विज्ञान आणि तंत्रज्ञानाच्या प्रगतीला अनुसरून विविध कार्यरत मॉडेल्स तयार करण्यात आली होती. काही महत्त्वाचे प्रकल्प पुढीलप्रमाणे –
1. चंद्रयान-३ मॉडेल: विद्यार्थ्यांनी सादर केलेल्या या कार्यरत मॉडेलच्या माध्यमातून भारताच्या अभिमानास्पद चंद्रयान मिशनचा उलगडा करण्यात आला. चंद्रावर मानवाच्या उपस्थितीसाठी संशोधन कसे चालते, याचे प्रभावी स्पष्टीकरण विद्यार्थ्यांनी दिले.
2. जल संवर्धन प्रकल्प: पाण्याचे योग्य व्यवस्थापन, पुनर्वापर आणि जिरवण यावर आधारित मॉडेल्सने पर्यावरण पूरक उपाय सुचविले. जलसंपत्तीच्या व्यवस्थापनाचे महत्त्व पटवून देणाऱ्या प्रतिकृतींनी उपस्थितांचे लक्ष वेधले.
3. सौरऊर्जेवरील वाहन: वाढत्या ऊर्जा संकटावर उपाय म्हणून विद्यार्थ्यांनी सौरऊर्जेवर चालणाऱ्या वाहनाची प्रतिकृती तयार केली. हे मॉडेल पर्यावरणपूरक ऊर्जेचा वापर कसा करता येईल, हे दाखवते.
4. स्वयंचलित सिंचन प्रणाली: आधुनिक शेतीसाठी अत्यंत महत्त्वाची असलेली स्वयंचलित सिंचन प्रणाली विद्यार्थ्यांनी सादर केली. यामध्ये कमी पाण्यात अधिक उत्पादन घेता येण्याच्या संकल्पनेवर भर दिला.
5. आर्टिफिशियल इंटेलिजन्स आणि रोबोटिक्स: कृत्रिम बुद्धिमत्तेचा वापर करून विद्यार्थ्यांनी एक छोटासा रोबोट विकसित केला, जो आदेशांनुसार कार्य करतो. भविष्यातील तंत्रज्ञानाच्या दृष्टीने हा प्रकल्प प्रगल्भता दाखवणारा ठरला. यासह इतर अनेक प्रकल्पांमध्ये वैद्यकीय उपकरणे, घरगुती स्मार्ट सिस्टीम, भूकंप-संवेदन यंत्रणा, इंधन बचतीच्या उपाययोजना इत्यादी संकल्पनांचा समावेश होता. प्रत्येक विद्यार्थ्याने आपले मॉडेल प्रभावी सादरीकरणातून स्पष्ट केले. कार्यक्रमाची सुरुवात मा. अनिलभाई दुलानी यांच्या हस्ते करण्यात आली. उद्घाटनानंतर प्रमुख पाहुण्यांनी दीपप्रज्वलन करून प्रदर्शनाचा शुभारंभ केला. आपल्या उद्घाटनपर भाषणात दुलानी सरांनी विज्ञानाच्या महत्त्वावर प्रकाश टाकला आणि विद्यार्थ्यांना संशोधन वृत्ती वाढविण्यास प्रोत्साहन दिले. त्यांनी सांगितले की, “आजचे विद्यार्थी उद्याचे संशोधक आहेत. विज्ञान व तंत्रज्ञानाच्या साहाय्याने भारत पुढील काही दशकांत जागतिक महासत्ता होईल. त्यासाठी नवीन संशोधन आणि नवकल्पनांचा स्वीकार आवश्यक आहे.”
त्यानंतर नगरसेवक रामभाऊ केसवानी यांनी शालेय विद्यार्थ्यांमध्ये वैज्ञानिक दृष्टिकोन रुजवण्याच्या गरजेवर भर दिला. श्री. हरिभाऊ पाटील यांनीही आपल्या भाषणात विज्ञानाच्या विविध संधींबद्दल मार्गदर्शन केले. डॉ. मनीष दादा चंदनानी यांनी आधुनिक विज्ञानातील नवीन संशोधन आणि विद्यार्थ्यांसाठी उपलब्ध शिष्यवृत्ती याविषयी माहिती दिली.
   विद्यार्थ्यांनी आपल्या प्रतिकृतींबद्दल संपूर्ण माहिती देताना मराठी, हिंदी आणि इंग्रजी भाषेचा सुंदर वापर केला. त्यांचे प्रभावी सादरीकरण पाहून उपस्थित पाहुणे, पालक आणि शिक्षक भारावून गेले. विज्ञानावर विद्यार्थ्यांची पकड पाहून उपस्थित मान्यवरांनी त्यांचे कौतुक केले.
    भारतीय जैन संघटनेच्या महिला शाखेच्या सदस्यांनीही या विज्ञान प्रदर्शनास भेट दिली. त्यांनी विद्यार्थ्यांचे अभिनंदन करत त्यांना आणखी पुढे जाण्यासाठी प्रोत्साहित केले.
    या विज्ञान प्रदर्शनाच्या निमित्ताने गुरुकुल इंटरनॅशनल स्कूल च्या वतीने प्रमुख पाहुण्यांचा सत्कार करण्यात आला. मुख्याध्यापक मा. प्रेमकुमार शामनाणी सर यांनी शाळेच्या वतीने पाहुण्यांचे स्वागत करून विज्ञान शिक्षणाच्या प्रगतीसाठी शाळेच्या प्रयत्नांची माहिती दिली.
    कार्यक्रमाचे सुंदर आणि नेटके सूत्रसंचालन सौ. अमिना बोहरा यांनी केले. विज्ञान प्रदर्शनाच्या यशस्वीतेसाठी शाळेतील शिक्षक, शिक्षकेतर कर्मचारी, आणि विद्यार्थ्यांच्या पालकांचे मोठे सहकार्य लाभले.
    शिक्षकवर्गाने विद्यार्थ्यांना उत्तम मार्गदर्शन केले आणि त्यांचे प्रयोग साकारण्यात मोठी भूमिका बजावली. प्रयोग सादरीकरण, मॉडेल्स तयार करणे, माहिती संकलन इत्यादींसाठी शाळेतील विज्ञान शिक्षकांनी विशेष मेहनत घेतली.
    या प्रदर्शनात सर्व विद्यार्थ्यांच्या प्रयत्नांचे कौतुक करण्यात आले, तसेच काही प्रकल्पांना विशेष गौरव पुरस्काराने सन्मानित करण्यात आले.
प्रथम क्रमांक: चंद्रयान-३ कार्यरत मॉडेल
द्वितीय क्रमांक: सौरऊर्जेवरील वाहन
तृतीय क्रमांक: जल संवर्धन प्रकल्प
नवीन वैज्ञानिक संशोधनाची प्रेरणा मिळवणारे विज्ञान प्रदर्शन
या विज्ञान प्रदर्शनाच्या माध्यमातून विद्यार्थ्यांना विज्ञान विषयातील गोडी आणि प्रयोगशीलतेचा नवा दृष्टिकोन मिळाला. प्रयोगशील शिक्षणाच्या माध्यमातून विज्ञानाचे प्रत्यक्ष आकलन करून देणारा हा उपक्रम सर्वांसाठी प्रेरणादायी ठरला.
शाळेच्या मुख्याध्यापक प्रेमकुमार शामनाणी सरांनी अशा विज्ञान प्रदर्शनांची परंपरा पुढेही कायम राहावी, अशी इच्छा व्यक्त केली.
राष्ट्रीय विज्ञान दिनाच्या निमित्ताने भरवले गेलेले हे भव्य विज्ञान प्रदर्शन शाळेच्या विज्ञान शिक्षणातील एक महत्त्वाचा टप्पा ठरले.

मुंबई (गुरुदत्त वाकदेकर) : क्रिकेटप्रेमींसाठी आनंदाची बातमी! आयसीसी चॅम्पियन्स ट्रॉफी २०२५ च्या उपांत्य फेरीचे बिगुल वाजले आहे. पहिल्या सेमीफायनलमध्ये भारत आणि ऑस्ट्रेलिया आमनेसामने येणार आहेत, तर दुसऱ्या सेमीफायनलमध्ये दक्षिण आफ्रिका आणि न्यूझीलंड यांच्यात जबरदस्त टक्कर होणार आहे. सध्याच्या आकडेवारीनुसार, भारत अंतिम फेरीसाठी प्रबळ दावेदार मानला जात आहे, तर दुसऱ्या सामन्यात कोणता संघ बाजी मारेल याचा अंदाज बांधणे कठीण आहे.

*पहिला उपांत्य सामना: भारत विरुद्ध ऑस्ट्रेलिया – रोहित सेना विजयी लय कायम ठेवणार?*

भारतीय संघाने गट फेरीतील सर्व सामने जिंकून उपांत्य फेरीत प्रवेश केला आहे. रोहित शर्मा, विराट कोहली आणि शुभमन गिल यांचा फॉर्म दमदार आहे, तर जसप्रीत बुमराह आणि मोहम्मद सिराज यांचा वेगवान मारा विरोधी संघांसाठी धोकादायक ठरत आहे. दुसरीकडे, ऑस्ट्रेलियाच्या संघात मॅट शॉर्ट दुखापतग्रस्त झाल्यामुळे त्यांची फलंदाजी काहीशी कमकुवत वाटते.

भारताचा फायदा: दुबईतील खेळपट्टी फिरकीपटूंना मदत करणारी असल्याने कुलदीप यादव आणि रवींद्र जडेजा प्रभावी ठरू शकतात.

ऑस्ट्रेलियाचं आव्हान: अनुभवी कर्णधार पॅट कमिन्सच्या नेतृत्वाखाली कंगारू संघ जोरदार लढत देऊ शकतो.

*दुसरा उपांत्य सामना: दक्षिण आफ्रिका विरुद्ध न्यूझीलंड – काटे की टक्कर!*

लाहोरच्या खेळपट्टीवर हा सामना होणार असून, दोन्ही संघ समान ताकदीचे असल्यामुळे हा अटीतटीचा सामना ठरेल.

दक्षिण आफ्रिकेचा फायदा: वेगवान गोलंदाज कागिसो रबाडा आणि मार्को यानसेन शानदार फॉर्मात आहेत, तर क्विंटन डी कॉक आणि एडन मार्करम यांच्या कामगिरीवर संघाचा विजय अवलंबून असेल.

न्यूझीलंडचे आव्हान: केन विल्यमसनच्या नेतृत्वाखाली संघाने सातत्यपूर्ण खेळ केला आहे, तर ट्रेंट बोल्ट आणि टिम साऊदीच्या गोलंदाजीचा प्रभाव मोठा असू शकतो.

*संभाव्य अंतिम सामना – भारत विरुद्ध दक्षिण आफ्रिका?*

आकडेवारीनुसार, भारत अंतिम फेरीत पोहोचण्याची शक्यता जास्त आहे. जर दक्षिण आफ्रिकेने न्यूझीलंडवर मात केली, तर भारत आणि दक्षिण आफ्रिकेत अंतिम सामना होईल. या स्पर्धेत भारत अधिक संतुलित संघ असल्यामुळे त्यांचा विजयाचा दावा अधिक मजबूत वाटतो.

ही स्पर्धा कोण जिंकेल यावर सर्वांचे लक्ष आहे. भारत फायनलमध्ये पोहोचेल का? की ऑस्ट्रेलिया आणि न्यूझीलंड मोठा अपसेट करतील? उत्तर लवकरच मिळेल!

मुंबई (गुरुदत्त वाकदेकर) : दृष्टी फाउंडेशनच्या वतीने आयोजित रक्तदान शिबिरात दिव्यांग बांधवांनी उत्स्फूर्तपणे सहभाग घेतला आणि समाजासाठी आपली जबाबदारी पार पाडली. विशेष म्हणजे १३७ दिव्यांगांनी रक्तदान करून समाजासाठी आपल्या योगदानाची जाणीव करून दिली. या शिबिरात डॉक्टर प्रागजी वाझा यांनी १०७व्यांदा रक्तदान करून एक प्रेरणादायी उदाहरण घालून दिले.

रक्तदानानंतर दिव्यांगांच्या चेहऱ्यावर दिसणारा आनंद हा खऱ्या अर्थाने दिव्य आणि अद्भुत होता. दिव्यांगाचा उत्साह बघून संस्थेचे अध्यक्ष भरत गडा यांनी दर चार महिन्यांनी दिव्यांगासाठी रक्तदान शिबिर आयोजित करण्याचा मानस व्यक्त केला.

समाजसेवा आणि परोपकाराच्या या भावनेला पुढे नेत, दृष्टी फाउंडेशनच्या वतीने २,००० हून अधिक दिव्यांगांना महिनाभर पुरेल इतके रेशन वितरित करण्यात आले. ही सामाजिक उपक्रमाची मालिका गेल्या चार वर्षांपासून प्रत्येक महिन्याच्या पहिल्या रविवारी अविरत सुरू आहे.

समाजातील अनेक दानशूर व्यक्ती आणि संस्था या उपक्रमाला सहकार्य करत असून, चक्षुदान मोहिमेच्या माध्यमातून अनेक दृष्टिहीनांना दृष्टी मिळवून देण्याचे कार्यही फाउंडेशन करत आहे. केवळ डोळे उपलब्ध करून देणे नाही, तर त्यासाठी लागणाऱ्या शस्त्रक्रियेचा संपूर्ण खर्चही संस्था उचलते. आतापर्यंत अनेक दृष्टिहीन व्यक्तींना नवी दृष्टी देऊन त्यांच्या आयुष्यात प्रकाश आणण्याचे कार्य दृष्टी फाउंडेशन करत आहे.

समाजातील प्रत्येकाने प्रेरणा घेण्यासारखी ही चळवळ अधिक व्यापक करण्यासाठी प्रत्येकाने पुढे यावे, रक्तदान, नेत्रदान आणि समाजसेवेत सहभागी व्हावे!

ऐनपूर – ता रावेर येथील सरदार वल्लभभाई पटेल कला व विज्ञान महाविद्यालयात भारतीय राज्यघटनेच्या अमृत महोत्सवानिमित्त ‘संविधान गौरव महोत्सव’ अंतर्गत एका विशेष व्याख्यानाचे आयोजन करण्यात आले. हा कार्यक्रम महाविद्यालयाच्या समान संधी केंद्राच्या वतीने आणि प्राचार्य डॉ. जे. बी. अंजने यांच्या मार्गदर्शनाखाली संपन्न झाला. या व्याख्यानाचा उद्देश विद्यार्थ्यांमध्ये भारतीय राज्यघटनेविषयी जागरूकता निर्माण करणे, तसेच संविधान निर्मितीच्या ऐतिहासिक प्रवासाचे सखोल ज्ञान देणे हा होता.या महत्त्वपूर्ण व्याख्यानासाठी ‘भारतीय राज्यघटनेचा इतिहास’ हा विषय घेण्यात आला होता, ज्यामध्ये महाविद्यालयातील एकूण ४२ विद्यार्थ्यांनी सहभाग घेतला. या व्याख्यानाचे प्रमुख वक्ते डॉ. नरेंद्र मुळे यांनी भारतीय राज्यघटनेच्या निर्मिती प्रक्रियेचा सखोल अभ्यास मांडला. राज्यघटनेच्या मुळाशी असलेल्या विविध ऐतिहासिक घटना, कायदे आणि आयोग यांचा विद्यार्थ्यांना स्पष्ट व सविस्तर परिचय मिळावा, या उद्देशाने त्यांनी १९३५ चा भारत प्रशासन कायदा, सायमन कमिशन, १९४२ मधील क्रिप्स मिशन योजना, १९४६ च्या कॅबिनेट मिशन योजना, १९४७ चा भारत स्वातंत्र्य कायदा यासारख्या महत्त्वपूर्ण घटनांचा आढावा घेतला.भारतीय राज्यघटनेच्या निर्मितीमध्ये डॉ. बाबासाहेब आंबेडकर, डॉ. राजेंद्रप्रसाद, पं. जवाहरलाल नेहरू, सरदार वल्लभभाई पटेल, मौलाना अबुल कलाम आजाद, बी.एन. राव यांसारख्या थोर नेत्यांनी मोलाची भूमिका बजावली. भारतीय राज्यघटनेची जडणघडण करताना विविध घटक विचारात घेतले गेले. हे संविधान केवळ कायद्यांची एक जंत्री नसून भारतीय लोकशाहीच्या संपूर्ण मूल्यप्रणालीचे अधिष्ठान आहे, असे डॉ. नरेंद्र मुळे यांनी आपल्या व्याख्यानात स्पष्ट केले. भारतीय राज्यघटनेच्या प्रवासातील अनेक महत्त्वपूर्ण बाबींवर त्यांनी विद्यार्थ्यांना मार्गदर्शन केले.
त्यामध्ये पुढील मुद्द्यांचा विशेष उल्लेख करण्यात आला:                            . भारत प्रशासन कायदा, १९३५ – भारतीय स्वायत्त प्रशासनाचा पाया रचणारा कायदा  सायमन कमिशन आणि त्याचा विरोध – भारतीय लोकांचा स्वातंत्र्याच्या दिशेने निर्णायक टप्पा                                  १९४२ च्या क्रिप्स मिशन योजना – भारताला स्वतंत्र दर्जा देण्याच्या संधीची कल्पना    १९४६ कॅबिनेट मिशन योजना – भारतीय राज्यघटनेच्या आराखड्याचे प्रारूप           १९४७ चा भारत स्वातंत्र्य कायदा – भारताच्या स्वातंत्र्याचा अधिकृत दस्तऐवज         या व्याख्यानात न्याय, स्वातंत्र्य, समानता, बंधुता आणि राष्ट्राची एकता व अखंडता यासंदर्भात विशेष चर्चा करण्यात आली. भारतीय संविधानाने सर्व नागरिकांना मूलभूत अधिकार आणि कर्तव्ये दिली आहेत, यावरही भर देण्यात आला.                                           भारतीय संविधानाने स्त्री-पुरुष समानता आणि स्त्रियांचे संरक्षण यासाठी अनेक महत्त्वपूर्ण कायदे निर्माण केले. स्त्रीसंबंधित कायदे, कामगार कायदे, शिक्षण विषयक कायदे यांचा आढावा घेत डॉ. नरेंद्र मुळे यांनी भारतीय स्त्रियांना संविधानाने दिलेल्या विशेष संरक्षणाबद्दल सविस्तर माहिती दिली.                                    संविधानातील काही महत्त्वाचे स्त्री-संरक्षण उपाय:                                            ‘समान वेतन कायदा, १९७६                 घरेलू हिंसाप्रतिबंधक कायदा, २००५    बालविवाह प्रतिबंधक कायदा, २००६         मातृत्व हक्क कायदा, १९६१              संविधान आणि शिक्षण – विद्यार्थ्यांसाठी महत्त्वाचा धडा                               भारतीय संविधानाने शिक्षण हा मूलभूत अधिकार असल्याचे स्पष्ट केले. त्यामुळेच शिक्षण हक्क कायदा, २००९ अंतर्गत ६ ते १४ वयोगटातील प्रत्येक मुलाला मोफत आणि सक्तीचे शिक्षण देण्याची हमी देण्यात आली आहे.                             कार्यक्रमाच्या अध्यक्षीय समारोपात प्राचार्य डॉ. जे. बी. अंजने यांनी भारतीय राज्यघटनेचे महत्त्व आणि त्याचा जागतिक स्तरावर प्रभाव यावर प्रकाश टाकला. त्यांनी आपल्या मार्गदर्शनपर भाषणात सांगितले की, संयुक्त राष्ट्र संघटनेच्या (UN) विविध कायदे तयार करताना भारतीय संविधानाचा आदर्श घेतला जातो. भारतीय संविधान हा केवळ कायद्यांचा संच नाही, तर तो भारतीय समाजाच्या सर्वांगीण विकासासाठी तयार करण्यात आलेला महान दस्तऐवज आहे.      या उपक्रमाचे समान संधी केंद्राचे समन्वयक प्रा. एस. पी. उमरीवाड यांनी उत्तम प्रकारे आयोजन केले. तसेच महाविद्यालयातील प्रा. डॉ. नरेंद्र मुळे, डॉ. पी. आर. गवळी, डॉ. व्ही. एन. रामटेके, डॉ. रेखा पी. पाटील, डॉ. एम. के. सोनवणे, प्रा. ज्ञानेश्वर कोळी, प्रा. अक्षय महाजन तसेच श्री. श्रेयस पाटील, श्री. सौरभ पाटील, श्री. हर्षल पाटील यांनी कार्यक्रमाच्या यशस्वी आयोजनात मोलाचे सहकार्य केले.                              कार्यक्रमाचे सूत्रसंचालन प्रा. एस. पी. उमरीवाड यांनी अतिशय प्रभावीपणे पार पाडले, तर आभार प्रदर्शन डॉ. पी. आर. गवळी यांनी केले.                        ‘संविधान गौरव महोत्सव’ अंतर्गत आयोजित हा व्याख्यान सत्र विद्यार्थ्यांसाठी प्रेरणादायी ठरला. राज्यघटनेच्या ऐतिहासिक प्रवासाविषयी सखोल माहिती मिळाल्यामुळे विद्यार्थी संविधानविषयक मुद्द्यांवर अधिक जाणकार बनले. या कार्यक्रमामुळे संविधानाचा सखोल अभ्यास करणे, त्याचा समाजावर होणारा प्रभाव समजून घेणे आणि त्यानुसार जबाबदारीने वागणे या दृष्टीने विद्यार्थ्यांमध्ये नवा दृष्टिकोन निर्माण झाला.महाविद्यालयाने असे उपक्रम भविष्यातही आयोजित करावेत, अशी अपेक्षा विद्यार्थ्यांनी व्यक्त केली.

पाचोरा  :- निवडणुकीच्या काळात भाजपाने शेतकऱ्यांना संपूर्ण कर्जमाफी, हमीभावाने खरीप आणि रब्बी पिकांची खरेदी, जीएसटीमधून शेतीमालाच्या आवश्यक वस्तूंना सूट, आणि वीज दरांमध्ये सवलत यांसारखी अनेक आश्वासने दिली होती. मात्र, सत्ता मिळाल्यानंतर या आश्वासनांची अंमलबजावणी झालेली नाही. परिणामी, शेतकरी अडचणीत सापडले असून त्यांच्या मागण्यांकडे दुर्लक्ष होत आहे. याच्या निषेधार्थ काँग्रेस पक्षाने पाचोरा येथे एकदिवसीय धरणे आंदोलन आयोजित केले.
     या आंदोलनात शेतकऱ्यांना तातडीने संपूर्ण कर्जमाफी देण्यात यावी, तसेच सोयाबीन, कापूस, तूर, हरभरा यांसारख्या महत्त्वाच्या पिकांची शासनाने हमीभावाने खरेदी करावी, या मागण्यांचा पुनरुच्चार करण्यात आला. याशिवाय, जे शेतकरी त्यांच्या पिके खुले बाजारात कमी दराने विकण्यास मजबूर झाले, त्यांच्यासाठी ‘भावांतर योजना’ त्वरित लागू करावी, अशीही जोरदार मागणी करण्यात आली.
      सध्या राज्यभरात वीज वितरण कंपनीकडून घरगुती आणि शेतीसाठी वापरण्यात येणाऱ्या वीज कनेक्शनवर स्मार्ट मीटर बसवण्याची मोहीम राबवली जात आहे. मात्र, स्मार्ट मीटरमुळे ग्राहकांना अनावश्यक आर्थिक भार सोसावा लागत आहे. ग्रामीण आणि शहरी भागातील नागरिकांनी याला मोठ्या प्रमाणात विरोध दर्शवला असून, काँग्रेस पक्षाने या स्मार्ट मीटर बसवण्याच्या निर्णयाला विरोध केला आहे. त्यामुळे, हा निर्णय मागे घेऊन ग्राहकांवर अन्याय होऊ नये, अशी काँग्रेस कार्यकर्त्यांची प्रमुख मागणी होती.
          शेतकऱ्यांना शेतीसाठी आवश्यक असणाऱ्या खते, बियाणे, कीटकनाशके आणि शेतीसाठी लागणारी अवजारे यांना जीएसटीमधून मुक्त करण्याची गरज आहे. परंतु, सरकारच्या अनास्थेमुळे या वस्तूंच्या किमती वाढल्या असून, शेतकऱ्यांना मोठ्या आर्थिक संकटाला सामोरे जावे लागत आहे. सरकारने जीएसटीमधून या वस्तूंना मुक्त केल्यास, शेतकऱ्यांचे उत्पादन खर्च कमी होईल आणि शेती अधिक फायदेशीर ठरेल, असा मुद्दा या आंदोलनात उपस्थित करण्यात आला.
     या आंदोलनादरम्यान, भाजप सरकारच्या शेतकरीविरोधी धोरणांविरोधात जोरदार घोषणाबाजी करण्यात आली. सरकारला त्यांच्या निवडणूकपूर्व आश्वासनांची आठवण करून देण्यासाठी काँग्रेस कार्यकर्त्यांनी “शेतकऱ्यांच्या हक्कासाठी लढा”, “खोटी आश्वासने देणारे सरकार हाय हाय”, “संपूर्ण कर्जमाफी अमलात आणा” यांसारख्या घोषणा दिल्या. या आंदोलनानंतर, काँग्रेसच्या शिष्टमंडळाने नायब तहसीलदार विनोद कुमावत यांना मागण्यांचे निवेदन सादर केले.
    या धरणे आंदोलनात काँग्रेसचे अनेक प्रमुख नेते आणि कार्यकर्ते मोठ्या संख्येने सहभागी झाले होते. काँग्रेस तालुका अध्यक्ष सचिन सोमवंशी यांच्या नेतृत्वाखाली हे आंदोलन करण्यात आले. यावेळी काँग्रेसचे जिल्हाध्यक्ष प्रदीपराव पवार, तालुका अध्यक्ष सचिन सोमवंशी, प्रदेश प्रतिनिधी शेख इस्माइल शेख फकिरा, जिल्हा सरचिटणीस प्रताप पाटील, जिल्हा सचिव राजेंद्र महाजन, इरफान मनियार, युवक प्रदेश सरचिटणीस आशुतोष पवार, मनोहर महाले, महिला सरचिटणीस कुसुम पाटील, शरीफ शेख, शंकर सोनवणे, उबाठाचे अरुण पाटील, अॅड. के. एस. पाटील, आनंद अहीरे, नवल भोई, युवक काँग्रेस अध्यक्ष कल्पेश येवले, सुनील पाटील, मुबारक शेख, प्रकाश भिवसने, साहेबराव पाटील, दशरथ पाटील, रामसिंग जाधव, रविंद्र राठोड, चेतन बोदवडे आदी पदाधिकारी व कार्यकर्ते मोठ्या संख्येने उपस्थित होते.
     यावेळी उपस्थित नेत्यांनी भाजप सरकारला कडक शब्दांत इशारा दिला की, जर सरकारने शेतकऱ्यांच्या मागण्यांकडे दुर्लक्ष केले, तर काँग्रेस पक्ष राज्यभर तीव्र आंदोलन करेल. शेतकऱ्यांचे हक्क आणि कल्याण ही काँग्रेस पक्षाची प्राथमिकता असून, शेतकऱ्यांच्या लढाईत काँग्रेस त्यांच्या पाठीशी खंबीरपणे उभी राहील, असे नेत्यांनी स्पष्ट केले.
      शेतकऱ्यांच्या प्रश्नांबाबत भाजप सरकारकडून चालू असलेल्या दुर्लक्षाविरोधात काँग्रेसने केलेले हे धरणे आंदोलन मोठ्या प्रमाणावर यशस्वी झाले. शेतकऱ्यांच्या मागण्यांसाठी काँग्रेस कार्यकर्त्यांनी दाखवलेली एकजूट आणि संघर्षभावना पाहता, भविष्यात यासंदर्भात आणखी तीव्र आंदोलन होण्याची शक्यता नाकारता येत नाही.

पाचोरा – भडगाव मतदार संघाचे आमदार किशोरआप्पा पाटील यांच्या मातोश्री स्व.गं.भा.नर्मदाआई धनसिंग पाटील यांचे सोमवार, दिनांक २४ फेब्रुवारी २०२५ रोजी दुःखद निधन झाले. त्यांच्या स्मृतीप्रित्यर्थ सर्वपक्षीय शोकसभा आणि सार्वजनिक कीर्तनाचा कार्यक्रम आयोजित करण्यात आला आहे. या शोकसभेसाठी आणि कीर्तनासाठी परिसरातील मान्यवरांसह सामाजिक, धार्मिक आणि राजकीय क्षेत्रातील अनेक प्रमुख व्यक्ती उपस्थित राहणार आहेत.
स्व. गं.भा. नर्मदाआई यांच्या स्मरणार्थ सर्वपक्षीय शोकसभेचे आयोजन शुक्रवार, ७ मार्च २०२५ रोजी सायंकाळी ५:०० वाजता करण्यात आले आहे. हा कार्यक्रम शिवतीर्थ-चिंतामणी कॉलनी, भडगाव रोड, पाचोरा येथे संपन्न होणार आहे या शोकसभेसाठी पाचोरा तसेच परिसरातील सर्व राजकीय पक्षांचे नेते, सामाजिक कार्यकर्ते, व्यापारी वर्ग, ग्रामस्थ आणि नागरिक उपस्थित राहणार आहेत. स्व.गं.भा.नर्मदाआई पाटील यांनी आयुष्यभर आपल्या कुटुंबासोबतच समाजासाठीही योगदान दिले. त्यांच्या सहृदय आणि दयाळू स्वभावामुळे त्या संपूर्ण परिसरात विशेष मान्यता प्राप्त व्यक्ती होत्या.आमदार किशोरआप्पा पाटील यांनी मातोश्रीप्रती आपले भावनिक वक्तव्य करतांना सांगीतले
“आई ही आपली पहिली गुरू असते. तिच्या संस्कारांतूनच आम्ही समाजसेवा आणि लोकहिताची भावना बाळगतो. माझ्या मातोश्रींनी आयुष्यभर आपल्या कुटुंबासाठी तसेच इतरांसाठीही समर्पित भावनेने कार्य केले. त्या आम्हाला सोडून गेल्या असल्या तरी त्यांच्या शिकवणीने आणि विचारांनी आम्हाला आयुष्यभर मार्गदर्शन मिळत राहील.”
सर्वपक्षीय शोकसभेनंतर स्व. गं.भा.नर्मदाबाई धनसिंग पाटील यांच्या आत्मशांतीसाठी एक सार्वजनिक कीर्तनाचा कार्यक्रम आयोजित करण्यात आला आहे. हा कीर्तन सोहळा दोन दिवस चालणार असून, यात दोन प्रसिद्ध कीर्तनकार आपली विचारधारा आणि आध्यात्मिक संदेश देणार आहेत.पहिले कीर्तन:
शुक्रवार, ७ मार्च २०२५ रोजी रात्री ८:०० वाजता
कीर्तनकार: ह. भ. प. समाधान महाराज भोजेकर
दुसरे कीर्तन: शनिवार, ८ मार्च २०२५ रोजी सकाळी ८:०० वाजता कीर्तनकार: ह. भ. प. गोविंद महाराज वरसडेकर
या कीर्तनांच्या माध्यमातून जीवनाचे तात्त्विक स्वरूप, श्रद्धा, भक्ती आणि सामाजिक एकात्मतेच्या महत्त्वावर प्रकाश टाकला जाणार आहे.
तर उत्तरकार्याचा कार्यक्रम – अंतिम श्रद्धांजली
शोकसभेच्या दुसऱ्या दिवशी, शनिवार, ८ मार्च २०२५ रोजी सकाळी १०:३० वाजता उत्तरकार्याचा कार्यक्रम आयोजित करण्यात आला आहे. हे विधीवत धार्मिक कार्यक्रम असणार असून, परिवारातील सदस्य, आप्तेष्ट आणि नागरिक यात सहभागी होतील.
या कार्यक्रमाला राजकीय, सामाजिक, शैक्षणिक, औद्योगिक आणि धार्मिक क्षेत्रातील मान्यवर मोठ्या संख्येने उपस्थित राहणार आहेत. शिवसेना-युवासेना, महिला आघाडी, पाचोरा-भडगाव यांच्या वतीने हा कार्यक्रम आयोजित करण्यात आला आहे.
पाचोरा आणि परिसरातील नागरिकांनी त्यांच्या अंत्ययात्रेच्या प्रसंगी स्व.गं.भा.नर्मदाआई धनसिंग पाटील यांना श्रद्धांजली अर्पण करताना त्यांच्या आठवणी सांगितल्या. एका नागरिकाने आपल्या भावना व्यक्त करताना सांगितले, “त्या खूप प्रेमळ आणि संयमी स्वभावाच्या होत्या. समाजातील अनेक गरजूंना मदतीचा हात देण्याचे त्यांचे कार्य प्रेरणादायी होते.”
हा शोकसभा आणि कीर्तन सोहळा केवळ श्रद्धांजली वाहण्याचा कार्यक्रम नाही, तर त्यांच्या स्मृतींना कायमचे जतन करण्याचा एक प्रयत्न आहे. परिवार, समाज, नातेवाईक आणि हितचिंतकांच्या सहकार्याने हा कार्यक्रम यशस्वी करण्याचे प्रयत्न करण्यात येत आहेत. पाचोरा आणि परिसरातील सर्व नागरिकांना या शोकसभेसाठी उपस्थित राहणार आहेत