भडगाव – पाचोरा तालुका सहकारी शिक्षण संस्था संचलित सौ. सुमनताई गिरधर पाटील माध्यमिक विद्यालयाच्या उपमुख्याध्यापिका सौ. हेमलता शामकांत पाटील यांच्या नियत वयोमानानुसार सेवानिवृत्तीचा समारंभ नुकताच शालेय परिवार आणि अनेक मान्यवरांच्या उपस्थितीत संपन्न झाला. त्यांच्या दीर्घकाळाच्या सेवेतून निवृत्ती होत असल्याने शाळेतील शिक्षक, विद्यार्थी, तसेच विविध मान्यवरांनी त्यांना गौरविण्यासाठी एकत्र येऊन आदरांजली व्यक्त केली.समारंभाच्या अध्यक्षस्थानी शालेय समितीचे चेअरमन दत्ताआबा पवार होते, तर प्रमुख अतिथी म्हणून विजयजी देशपांडे, ताईसाहेब सौ. जयश्री ग. पूर्णपात्री, गटशिक्षणाधिकारी गणेशजी पाटील, केंद्रप्रमुख रवींद्रजी सोनवणे, प्राचार्य किशोर एस. पाटील, उपप्राचार्य संदीप एस. सोनवणे, पर्यवेक्षक शरद एस. महाजन आणि संस्था समन्वयक एस. डी. पाटील (सेवानिवृत्त प्राचार्य) हे मान्यवर उपस्थित होते. त्याचप्रमाणे सत्कारसमारंभासाठी आप्तेष्ट, नातेवाईक, शाळेचे विद्यार्थी आणि शिक्षक वर्गही मोठ्या संख्येने उपस्थित होते.कार्यक्रमाची सुरुवात प्राचार्य किशोर एस. पाटील यांच्या प्रास्ताविकाने झाली. यावेळी प्राचार्यांनी सौ. हेमलता पाटील मॅडम यांच्या दीर्घकाळाच्या कार्याचा गौरव केला. त्यांच्या निःस्वार्थ, समर्पित आणि विद्यार्थीप्रिय शिक्षणसेवेबद्दल आभार व्यक्त करत त्यांनी शाळेसाठी केलेल्या योगदानाबद्दल कृतज्ञता व्यक्त केली. शालेय परिवाराच्या वतीने सौ. हेमलता पाटील मॅडम यांचा सपत्नीक सन्मान करण्यात आला आणि त्यांना भेटवस्तू देऊन त्यांच्या कार्याचा आदर केला गेला.सत्कार समारंभात प्रमुख अतिथी विजयजी देशपांडे यांनी सौ. हेमलता पाटील यांच्या सेवाकार्याबद्दल कौतुक केले आणि त्यांच्या कार्याची प्रशंसा केली. त्यांच्या भाषणात त्यांनी शिक्षकाच्या भूमिकेवर विशेष भर दिला आणि सांगितले की शिक्षक हा व्यवसाय नसून एक पवित्र पेशा आहे. शिक्षकाने केवळ ज्ञानाचे वाटप न करता विद्यार्थ्यांच्या जीवनात चांगले संस्कार निर्माण करणे हीसुद्धा महत्त्वाची जबाबदारी असते. या भूमिकेत सौ. हेमलता पाटील मॅडम यांनी नेहमीच आपल्या कर्तव्याचे उत्कृष्ट पालन केले आहे.कार्यक्रमातील इतर मान्यवरांनीही सत्कारार्थींच्या कार्याचा गौरव केला. संस्था समन्वयक एस. डी. पाटील, मुख्याध्यापक एस. एम. पाटील, केंद्रप्रमुख रवींद्र सोनवणे, सौ. जयश्री पूर्णपात्री, शरद महाजन, मिनल पवार आणि दातार मॅडम यांनी आपल्या मनोगतातून सौ. हेमलता पाटील यांच्या अष्टपैलू व्यक्तिमत्त्वाचे वर्णन केले. त्यांनी सांगितले की, विद्यार्थ्यांच्या लाडक्या मॅडम म्हणून त्यांची ओळख होती आणि त्यांचा कविमन देखील त्यांच्या शिक्षणातील तळमळीतून झळकत होता.विजयजी देशपांडे यांनीही आपल्या भाषणात “ढाण्या वाघ” या पुस्तकाचा उल्लेख केला, ज्यात स्व.आमदार आप्पासाहेब ओंकार नारायण वाघ यांच्या जीवनपटावर लिहिलेले अनुभव आहेत. त्यांनी या संदर्भाने हेमलता पाटील मॅडम यांच्या कार्याचा उल्लेख केला आणि त्यांचे योगदान केवळ शाळेपुरते मर्यादित नसून, समाजातील शिक्षणक्षेत्रात त्यांचा मोलाचा सहभाग राहिल्याचे अधोरेखित केले.सत्काराला उत्तर देताना सौ. हेमलता पाटील मॅडम यांनी शिक्षक पेशाचे महत्त्व विशद केले. “शिक्षक हा व्यवसाय नाही, तो एक पवित्र पेशा आहे,” असे सांगत त्यांनी शिक्षकाच्या भूमिकेला कर्माशी जोडले पाहिजे, असे प्रतिपादन केले. विद्यार्थ्यांच्या जीवनातील सर्वांगीण विकासात शिक्षकाची भूमिका कशी महत्त्वाची असते, यावर त्यांनी प्रकाश टाकला.समारंभाच्या अध्यक्षीय भाषणात शालेय समितीचे चेअरमन दत्ताआबा पवार यांनी सौ. हेमलता पाटील मॅडम यांच्या उर्वरित आयुष्याला शुभेच्छा दिल्या. “तुम्ही शाळेत राबवत असलेले उपक्रम सातत्याने पुढे चालू ठेवा आणि शाळेशी असलेले ऋणानुबंध जपून ठेवा,” असा संदेश त्यांनी दिला.कार्यक्रमाचे सूत्रसंचालन देवेंद्र पाटील सर यांनी केले, तर आभार उपप्राचार्य संदीप सोनवणे यांनी मानले. या कार्यक्रमाच्या यशस्वीतेसाठी शाळेतील सर्व शिक्षक आणि शिक्षकेतर कर्मचाऱ्यांनी परिश्रम घेतले
ध्येय न्यूज चॅनेलच्या बातम्या मिळवण्यासाठी येथे क्लिक करून आमचा व्हाट्सअप ग्रुप जॉईन करा.
