पाचोरा : शहरातील जुना आणि कायमचा अनुत्तरीत प्रश्न म्हणून ओळखल्या जाणाऱ्या हातगाडी, फळ-भाजी विक्रेत्यांचे व्यवस्थापन आणि वाहनतळ अभावी उभ्या राहणाऱ्या वाहनांचे प्रश्न हे आजही तितक्याच तीव्रतेने नागरिकांच्या नजीक उभे आहेत. यासंदर्भात अनेकदा आलेले व गेलेले प्रशासन आणि सत्ताधाऱ्यांनी फक्त चर्चेची पातळी गाठली; प्रत्यक्ष कायम स्वरूपी अंमलबजावणी मात्र कधीच दिसली नाही. परिणामी, या निष्क्रियतेचा व दुटप्पी धोरणांचा भडका अखेर एका शेतकऱ्याच्या कृतीतून उफाळून आला. शहरात कांदा विक्रीसाठी आलेल्या एका शेतकऱ्याने प्रशासनाच्या अरेरावीला वैतागून आपले वाहन पेटवण्याचा निर्धार घेतल्याची धक्कादायक घटना गुरुवारी घडली.पाचोरा शहरातील केंद्रस्थानी असलेल्या बाजारपेठेत चारचाकी-दुचाकी वाहने आणि फळभाजी विक्रेत्यांची प्रचंड गर्दी सततचा अनुभव आहे. या भागात कुठलीही अधिकृत आणि मान्यताप्राप्त वाहनतळ नसल्यामुळे पोलीस प्रशासनाची ‘नो-पार्किंग’ झोन कार्यवाही ही कायदेशीरदृष्ट्या प्रश्नचिन्हास्पद ठरते. त्यात भर म्हणजे विक्रेत्यांविषयी प्रशासनाची भूमिका एका बाजूला अती सहनशील आणि दुसऱ्या बाजूला अती कठोर ( सर्वाना सारखे नियम नसल्याने ) या अन्यायाचे गारुड अधिकच गडद होत आहे. विशेषतः एका विशिष्ट टोळीच्या विक्रेत्यांना अभय दिले जाते तर दुसऱ्या शेतकरी वर्गाला मात्र छळ सहन करावा लागतो. हुतात्मा स्मारकापासून ते कन्या शाळेपर्यंत, आणि नीलम हॉटेलपासून ते नगर परिषदेच्या भाजीपाला मार्केटपर्यंत – संपूर्ण परिसरात हातगाड्यांची, फेरीवाल्यांची गर्दी इतकी आहे की पायी चालणेही कठीण झाले आहे. यातून निर्माण होणारी वाहतूक कोंडी, गैरसोय आणि गोंधळ याचा त्रास नागरिकांना तर होतोच; परंतु खरी झळ शिस्तीच्या नावाखाली दमवलेल्या गरीब शेतकऱ्यांना बसते नगरपरिषदेच्या भाजी मार्केटमध्ये दुकानांची डिपॉझिट आणि भाडेवसुली याबाबतही गोंधळाचे वातावरण आहे. कोणाला किती भरावे लागते, कोणाकडून काय घेतले जात नाही – हे सर्व अज्ञात व अलिखित नियमानुसार चालते. पारदर्शकतेच्या नावावर छद्म नाट्य आणि निवडक लोकांसाठीच असलेले नियम हे चित्र अधिकच निराशाजनक आहे. अनेक दुकानांना वर्षानुवर्षे डिपॉझिट न भरता, भाडे न देता जागा वापरण्याची मुभा दिली गेली आहे, तर नवीन येणाऱ्या, विशेषतः ग्रामीण शेतकऱ्यांना कोणीही स्थान देण्यास तयार नाही. या सर्व गोंधळाच्या मुळाशी आहे नगरपरिषदेत कार्यरत कर्मचाऱ्यांची ‘भाकरी न फिरवणारी’ वृत्ती. ही मंडळी कायम स्वरूपी वर्षानुवर्षे एकाच काम कामजात असल्याने त्यांच्या सेटींगमुळे वेळोवेळी विक्रेत्यांकडून उघडपणे किंवा छुप्या स्वरूपात लाभ घेऊन त्यांच्यावर लक्ष न देण्याचा मार्ग स्वीकारतात. त्यामुळेच बाजारपेठेतील शिस्तीचा बोजवारा उडाला आहे. विशेषतः काही कर्मचारी कम अधिकाऱ्यांनी स्वतःला कायमस्वरूपी मालक समजून घेतले असून त्यांची चिरीमिरी आणि पक्षपाती कार्यपद्धती ही सर्व समस्यांचा केंद्रबिंदू आहे. अनेक वेळा शिस्त राखण्याच्या नावाखाली फक्त काही निवडक विक्रेत्यांवर कारवाई केली जाते. बाकी लोक सेटींगच्या आधारे मोकळे फिरतात. परिणामी, निष्पाप विक्रेत्यांमध्ये असंतोषाचे वातावरण आहे  सध्या कार्यरत मुख्याधिकारी व त्यांच्या अधिकाऱ्यांनी आरोग्य विभागाच्या माध्यमातून शहरात स्वच्छते संबंधी सध्याची कामगिरी अप्रतीम आहे. सफाई ठेकेदाराची निवड योग्य A+ झाल्याने रस्ते व सार्वजनिक ठिकाणांची स्वच्छता व देखभाल चांगल्या प्रकारे केली जाते. मात्र, यामुळे मूळ प्रश्न सुटलेला नाही.वाहन पार्कींग, हातगाडी नियंत्रण, विक्रेत्यांचे एकसंध नियमन यासंदर्भात कोणतीही ठोस कृती किंवा धोरणात्मक अंमलबजावणी झालेली नाही. परिणामी, एकंदरीतच या अनिर्णयामुळे परिस्थिती अधिक बिघडत आहे.या सर्व पार्श्वभूमीवर काल 29 मे रोजी एक धक्कादायक प्रकार घडला. एका शेतकऱ्याने सकाळच्या सुमारास आपला कांदा विक्रीसाठी ट्रॅक्टरने शहरात आणला. अत्यल्प प्रमाणात आणलेला ताजा कांदा तो थेट ग्राहकांना विक्रीसाठी घेऊन आला होता. विक्रीस प्रारंभ होताच नगरपरिषदेचा कर्मचारी तेथे पोहोचला आणि अत्यंत उद्धटपणे त्या शेतकऱ्याशी वागू लागला.शाब्दिक चकमकीत काही कळायच्या आतच संतप्त झालेल्या शेतकऱ्याने आपल्या वाहनावर पेटवण्याचा निर्धार केला. त्याच्या डोळ्यातली असहायता आणि संताप इतका तीव्र होता की आजूबाजूचे नागरिकही हतबुद्ध झाले. सुदैवाने वेळेवर पोलीस,न पा प्रशासनाचे अधिकारी पत्रकार आणि काही सामाजिक कार्यकर्ते तिथे पोहोचले. त्यांनी मध्यस्थी करून परिस्थिती नियंत्रणात आणली. या घटनेने केवळ एक व्यक्ती नव्हे, तर संपूर्ण ग्रामीण शेतकरी वर्गाचा आक्रोश समाजासमोर आणला. प्रशासनाने वेळेवर हस्तक्षेप न केला असता, एक मोठा अनुचित प्रसंग घडला असता. या घटनेनंतर भाजीपाला विक्रेत्यांमध्ये प्रचंड खळबळ उडाली असून शेतकरी वर्गात संतापाचे वातावरण आहे.घडलेल्या प्रकाराच्या पार्श्वभूमीवर नगरपरिषद प्रशासनाने आता तरी जागे होणे गरजेचे आहे. हातगाडी, फळभाजी विक्रेत्यांसाठी स्पष्ट एकच धोरण व नियमावली असणे गरजेचे आहे आणि ती सर्वसामान्यांसाठी एकसारखी असली पाहिजे. ‘एकाला पोटाशी, दुसऱ्याला पाठीशी’ हे धोरण केवळ अन्यायाचे मूळ आहे. तसेच बाजारात सेटिंगवर चालणाऱ्या कर्मचाऱ्यांवर कठोर कारवाई होणे अत्यावश्यक आहे. त्यांच्यामुळेच प्रशासनाची प्रतिमा मलिन होत आहे. भाकरी फिरवल्यानंतर विशेषतः ‘चहा पेक्षा किटली गरम’ या वर्षानुवर्षे काम करणाऱ्या कर्मचाऱ्यांची सावलीसुद्धा बाजारपेठेवर पडू न देणे हाच उत्तम उपाय ठरू शकतो.शेतकरी हा या देशाचा अन्नदाता आहे. त्याने आपल्या श्रमाच्या बदल्यात मिळालेली भाजी बाजारात आणून विकण्यासाठी एवढे कष्ट केले आणि त्या बदल्यात जर त्याला अपमानास्पद वागणूक मिळाली, तर हा समाज म्हणून आपल्यासाठी लाजिरवाणा क्षण आहे.अशा घटनांपासून प्रशासनाने शिकावे आणि शेतकरी तसेच सर्वसामान्य विक्रेत्यांच्या सन्मानाचे संरक्षण व्हावे यासाठी सर्वांसाठी एकच नियम असतील असे योग्य पावले उचलावीत, हीच सर्वांची अपेक्षा आहे. अन्यथा भविष्यात असेच प्रसंग अधिक तीव्र स्वरूप धारण करतील आणि त्याची जबाबदारी संपूर्णतः प्रशासनावरच राहील.

पाचोरा शहरातील भडगाव रोडवरील एका लॉजिंगवर पोलिसांनी टाकलेल्या छाप्यात युवक आणि युवती अश्लील अवस्थेत सापडल्याची घटना समोर येताच, समाजमनात एकाच वेळी आश्चर्य, संताप आणि चिंता अशा संमिश्र भावना उमटल्या. या घटनेने समाजातील अनेक पातळ्यांवर असलेली तुटलेली शिस्त, गढूळ नैतिकता आणि गढबडलेल्या व्यवस्थेचे वास्तव उघडे पाडले आहे. केवळ दोन व्यक्तींच्या वैयक्तिक आयुष्याचा प्रश्न म्हणून ही बाब दुर्लक्षित करता येणार नाही. कारण ही घटना आपल्या समाजातील एका मोठ्या वळणाची नोंद करणारी आहे. या प्रकरणात युवक-युवती आक्षेपार्ह स्थितीत आढळले, हे जसे चिंताजनक आहे, तसेच हॉटेल चालकाने विश्वासाने आपल्या व्यवस्थापकावर जबाबदारी सोपवली व्यवस्थापकाने कोणतीही अधिकृत ओळख न तपासता रूम उपलब्ध करून दिली, हे देखील तितकेच गंभीर आहे. हॉटेल व्यावसायिकांनी फक्त नफा मिळवण्याच्या उद्देशाने कायद्याला बगल देऊन, कोणत्याही प्रकारच्या तपासणीशिवाय खोली भाड्याने देणे हा केवळ बेजबाबदारपणाच नव्हे, तर समाजहिताला धोका निर्माण करणारा प्रकार आहे. ग्राहकांची माहिती नोंदवहीमध्ये अपूर्ण होती, ओळखपत्रांची खातरजमा नव्हती, आणि कोणत्याही तपशीलांची शहानिशा केली नव्हती. या साऱ्या गोष्टी एकत्र आल्यावर लक्षात येते की अशा लॉजिंग व्यवसायांच्या मुळांमध्येच भ्रष्टाचार आणि गोंधळ दडलेला आहे. पोलिसांच्या गुन्हे प्रकटीकरण पथकातील सहाय्यक पोलिस निरीक्षक दिनेश भदाणे, पीएसआय योगेश गणगे, हवालदार संदीप राजपूत आणि विश्वास देशमुख यांनी तात्काळ आणि योग्य अशी छापेमारी करत कायद्यासमोर तथ्य ठेवले. ही कारवाई नक्कीच स्वागतार्ह आणि प्रशंसनीय आहे. मात्र प्रश्न उरतो तो म्हणजे – ही कारवाई अपवाद होती की आता पासून नियमित नियमांची अंमलबजावणी केली जाणार आहे? अशा लॉजिंग्सवर सातत्याने तपासण्या व्हायला हव्यात. ग्राहक नोंदवही, ओळखपत्रे, सीसीटीव्ही कॅमेरे, कर्मचाऱ्यांची पार्श्वभूमी यासारख्या बाबींवर काटेकोर देखरेख ठेवली गेली पाहिजे.
या घटनेतील आणखी एक धक्कादायक पैलू म्हणजे काही तथाकथित भुरटे पत्रकार व सामाजिक कार्यकर्ते अशा आबंट शौकीन जोडप्यांना रूम उपलब्ध करून देणाऱ्या लॉजिंगवर ‘नजर’ ठेवतात वेळे प्रसंगी तिथे येणाऱ्या अशा जोडप्यांना स्टाफच्या मदतीने त्यांची माहिती जमा करतात आणि ब्लॅकमेल करून पैसे उकळतात ही बाब अत्यंत लाजिरवाणी आहे. पत्रकारिता ही समाजाचा आरसा मानली जाते,परंतु पत्रकारितेच्या नावावर अशा व्यक्ती स्वतःच समाजाला काळिमा फासणाऱ्या ठरतात. अशी मंडळी पत्रकारितेच्या छत्राखाली स्वतःचा पोटापाण्याचा व्यवसाय चालवत असतील तर हे निंदनीयच नव्हे, तर गुन्हेगारी स्वरूपाचे आहे. त्यांच्यावर देखील कायदेशीर कारवाई होणे अत्यंत गरजेचे आहे.परंतु यासाठी अधिकृत तक्रार देण्यासाठी कोणीही पुढे येणार नाही कारण या सर्व गोष्टी “तेरी भी चूप मेरी भी चुप” अशा स्वरूपात असतात
एकीकडे लॉजिंग व्यवस्थापन बेजबाबदारपणे खोल्या देत आहे, तर दुसरीकडे अशी प्रकरणे हेरून काही भुरटी पत्रकार मंडळी पत्रकार संघटनेच्या नावाने ग्रुप तयार करणे व ‘पकड’ तयार करून पैसे कमावतात – यात शेवटी बळी पडतात ते युवक-युवती. & अनैतिक संबंध जोपासणारे वैवाहिक जोडपे या भडगाव रोड हॉटेल प्रकरणात युवक परधर्मीय असल्याची आणि युवती गरीब कुटुंबातील असल्याची माहिती समोर आली. त्यामुळे चुप्प राहीली नाही तर या प्रकरणाला वेगळे सामाजिक आणि धार्मिक वळण लागले असते.असतेच काही धर्मांध व कट्टरपंथीय गट अशा घटनांचा गैरफायदा घेत सामाजिक तेढ वाढवतात, द्वेषभावना पसरवतात आणि सामान्य नागरिकांच्या मनात गोंधळ निर्माण करतात. याचा फटका सर्वसामान्य कुटुंबांना आणि मुलींच्या भविष्याला बसतो. अशा प्रकरणांमध्ये युवतीवर समाजाकडून अधिक मोठा दोष दिला जातो. तिच्या वर्तनावर, कपड्यांवर, बोलण्यात, वागण्यात शंभर प्रश्न विचारले जातात. तिच्या कुटुंबावर कलंक लागतो. समाज माध्यमांमध्ये तिची ओळख व्हायरल होते. अशा प्रसंगांमध्ये युवती मानसिकदृष्ट्या तुटून जाते, आत्महत्येच्या विचारापर्यंत जाते. तिचे शिक्षण, करिअर, वैवाहिक जीवन साऱ्याच गोष्टींवर याचा दुष्परिणाम होतो. म्हणूनच पोलिसांनी आणि माध्यमांनी अशा प्रकरणांमध्ये संबंधित व्यक्तींची ओळख गोपनीय ठेवणे हे कायदेशीरच नव्हे तर मानवीदृष्ट्याही आवश्यक आहे. या साऱ्या प्रकारामध्ये पालक आणि समाजाची भूमिका अत्यंत महत्त्वाची आहे. केवळ पोलिस आणि प्रशासकीय यंत्रणांकडे दोष देऊन भागणार नाही. पालकांनी आपल्या मुलांशी खुलेपणाने संवाद साधायला हवा, त्यांचे मित्र-मैत्रिणी कोण आहेत, त्यांचा मानसिक आणि भावनिक कल कसा आहे, याकडे लक्ष द्यायला हवे. प्रेम, स्नेह आणि योग्य मार्गदर्शनाने तरुणांना विश्वासात घेणे हे गरजेचे आहे. फक्त दबाव, शिस्त आणि शिक्षा यांच्या माध्यमातून आपण आपल्या मुलांना दूर लोटत असतो आणि ते अशा चुकीच्या वाटांकडे वळतात. या प्रकरणाने आपल्याला एक गोष्ट स्पष्ट करून सांगितली – की समाज म्हणून आपण तुटलो आहोत. नैतिकता, नियम, जबाबदारी, सहिष्णुता या साऱ्या मूल्यांची आपल्याकडे उणीव आहे. हॉटेलचे व्यवस्थापन, पोलिस यंत्रणा, पत्रकारिता, पालक आणि समाज – सर्व घटकांनी एकत्र येऊन या समस्येच्या मुळावर मारायला हवे. नाहीतर अशा घटनांचा प्रादुर्भाव वाढत जाईल आणि हेच आपण उद्याचे समाज म्हणून पाहू इच्छितो का, हा गंभीर प्रश्न आपल्यासमोर उभा राहील. लॉजिंगमध्ये घडलेली ही घटना केवळ पोलिस कारवाईचा भाग नाही. ही आपल्या समाजाच्या अधःपतनाची निशाणी आहे. ही एक चेतावणी आहे – ज्या पातळीवर समाज घसरतोय, त्या पातळीवर जर आपण आज विचार केला नाही, तर उद्याचा काळ आणखीनच भयावह ठरेल. म्हणूनच, फक्त घटना पाहणे पुरेसे नाही, तर त्या घटनांमागे दडलेले संदर्भ समजून घेणे आणि त्यावर उपाययोजना करणे ही काळाची गरज आहे. कायद्याचा धाक, नैतिकतेचे भान आणि समाजिक जबाबदारी यांची सांगड घालूनच आपण अशी घसरलेली परिस्थिती रोखू शकतो. अन्यथा अशा खोल्यांतून बाहेर पडणाऱ्या आवाजात भविष्यात संपूर्ण समाजाची प्रतिष्ठा गमावली जाईल, आणि तेव्हा पश्चातापाला उशीर झालेला असेल.

राजकारण हे समाजसेवेचे प्रभावी माध्यम आहे, असं म्हटलं जातं. पण हे सत्य कृतीत उतरवणं हे प्रत्येकाच्या शक्तीबाहेरचं असतं. मात्र काही व्यक्तिमत्त्वं आणि कुटुंबं आपल्या सामाजिक भूमिकेतून, निःस्वार्थ सेवाभावातून आणि स्पष्ट नेतृत्वशैलीतून समाजात अशी ओळख निर्माण करतात की, त्यांच्या राजकीय प्रवासाची सुरुवात ही सुद्धा एक विचारांचा ध्वजवंदन ठरते. पिंपळगाव हरेश्वर येथे राजमाता अहिल्याबाई होळकर यांच्या 300 व्या जयंतीनिमित्त पार पडलेल्या मंदिर स्वच्छता व महाआरती कार्यक्रमाच्या निमित्ताने याचे प्रत्यंतर पुन्हा एकदा आले. भारतीय जनता पक्षात नुकताच प्रवेश केलेल्या वाघ परिवाराने पाचोरा येथे आल्यानंतर अवघ्या काही तासांतच आपली बांधिलकी, कृतीशीलता आणि संघटनशीलता स्पष्ट करत पिंपळगावात एका उदाहरणवत सामाजिक सहभागाचे दर्शन घडवले. या उपक्रमात वाघ परिवाराचे प्रमुख सदस्य, पाचोरा तालुका सहकारी शिक्षण संस्थेचे चेअरमन नानासाहेब संजय वाघ, यांनी स्वतः भाजपाचे स्थानिक पदाधिकारी यांच्या समावेत मंदिर स्वच्छतेच्या कार्यात सहभाग घेतला  वाघ परिवाराचा भारतीय जनता पक्षात प्रवेश ही काही केवळ औपचारिक घटना नव्हती. हा प्रवेश एका सामाजिक विचाराने, जनसंपर्काच्या बळावर आणि सामाजिक बदलाच्या संकल्पनेवर आधारित होता. वाघ कुटुंब हे गेल्या अनेक वर्षांपासून पाचोरा तालुक्यातच नव्हे जिल्ह्याच्या राजकारणात राजकीय,शैक्षणिक, सहकारी आणि ग्रामीण विकासाच्या क्षेत्रात सक्रिय असून, नानासाहेब संजय वाघ हे माजी आमदार दिलीप भाऊ वाघ यांच्यासोबत त्या कार्याचा चेहरा मानले जातात.ज्या दिवशी मुंबई येथे दिलीप भाऊ वाघ यांचा भाजप पक्षप्रवेश झाला त्यानंतर पाचोरा येथे परतल्यावर काही तासातच पाचोरा तालुक्यातील पिंपळगाव हरेश्वर मंदिर स्वच्छता अभियानात जुन्या भाजप कार्यकर्त्यांसमवेत सहभाग घेतला. केवळ व्यासपीठावर भाषणं करण्याऐवजी त्यांनी श्रमदानातून जनतेशी नाळ जोडली. या कृतीतून त्यांनी जनतेपुढे एक असा आदर्श मांडला की, राजकारणात फक्त सत्ता मिळवणे हा उद्देश नसून, सेवाभाव, सामाजिक समर्पण आणि आध्यात्मिक मूल्यांचा प्रसार हाच खरा हेतू असावा पाचोरा तालुका सहकारी शिक्षण संस्थेचे चेअरमन असलेले नानासाहेब संजय वाघ हे शिक्षण क्षेत्रातले एक सशक्त आणि आदरणीय व्यक्तिमत्त्व आहे. त्यांच्या नेतृत्वाखाली संस्थेच्या विविध शाळांमध्ये केवळ भौतिक सुविधा नव्हे, तर विद्यार्थ्यांच्या सर्वांगीण विकासावर भर देण्यात आला. त्यांनी शाळा म्हणजे चार भिंती आणि शिक्षक एवढाच दृष्टिकोन झुगारून संस्थेच्या कार्यपद्धतीत प्रगत दृष्टिकोन आणला. त्यांची भाषाशैली अत्यंत समंजस,अभ्यास वृत्ती पण ठाम असते. पिंपळगावच्या कार्यक्रमात बोलताना त्यांनी अतिशय प्रेरणादायी विचार मांडले – “राजमाता अहिल्याबाई होळकर यांच्या जयंती निमित्त आपण सेवा आणि श्रद्धेच्या मार्गाने पुढे जात आहोत. आज मंदिराची स्वच्छता करताना मला जाणवलं की, आपण समाजात स्वच्छतेसारखे सकारात्मक विचारही रुजवले पाहिजेत. भारतीय जनता पक्षात प्रवेश हा माझ्यासाठी व वाघ परिवारासमवेत आमच्या कार्यकर्त्यांसाठी केवळ राजकीय पाऊल नाही, तर समाज परिवर्तनाच्या मार्गावर एक सामूहिक चाल आहे.”त्यांच्या या मनोगतातून समाजाप्रती असलेली बांधिलकी आणि भारतीय परंपरेप्रती असलेली निष्ठा स्पष्ट जाणवते. त्यांच्या नेतृत्वात पक्षाला विचारशील, अभ्यासू आणि संयमी कार्यकर्त्यांची मोठी ताकद मिळेल, याबाबत कोणतीही शंका नाही.  या कार्यक्रमात उपस्थित असलेले भाजप जिल्हा उपाध्यक्ष मधु भाऊ काटे हे देखील कार्यकर्त्यांमध्ये एक प्रेरणास्थान मानले जातात. त्यांनी आपल्या छोटेखानी भाषणात वाघ कुटुंबाच्या प्रवेशाचं आणि तत्काळ कृतीशील सहभागाचं कौतुक करताना म्हटलं, “आजकाल अनेकजण पक्षात प्रवेश घेतात, पण समाजाशी नाळ जोडणं आणि सर्वांना सोबत घेऊन प्रत्यक्ष कृती करणे हे फार थोड्यांच्याच अंगी असतं. माजी आमदार दिलीपभाऊ वाघ व नानासाहेब संजय वाघ यांचं नेतृत्व, त्यांचा दृष्टिकोन आणि त्यांचा संयमी स्वभाव हे भाजपसाठी एक नवा ऊर्जा स्रोत ठरेल. त्यांच्या अनुभवाचा पक्षाला निश्चितपणे लाभ होईल.”मधु भाऊ काटेंच्या या शब्दांनी केवळ कौतुकच व्यक्त केलं नाही, तर संपूर्ण जिल्ह्यातील कार्यकर्त्यांना नव्या नेतृत्वाच्या स्वागतासाठी तयार केलं. या संपूर्ण कार्यक्रमाचा केंद्रबिंदू होता – राजमाता अहिल्याबाई होळकर यांचा जीवन आदर्श. स्वच्छता, भक्ती, सेवा, शिस्त, समाजकल्याण आणि स्त्रीशक्तीचा प्रेरणादायी इतिहास या साऱ्यांचा संगम त्यांच्या कार्यातून घडलेला आहे. पिंपळगावमधील मंदिर स्वच्छता, महाआरती आणि महिला कार्यकर्त्यांचा सक्रीय सहभाग यामध्ये त्यांचा आदर्श स्पष्टपणे प्रतिबिंबित झाला. कार्यक्रमात महिलावर्ग, युवक, ग्रामस्थ, कार्यकर्ते आणि गावातील जेष्ठ मंडळींच्या उपस्थितीने एकात्मतेचे दर्शन घडले. या साऱ्या घडामोडींमध्ये वाघ परिवाराच्या पक्षप्रवेशाची औपचारिकता नव्हे, तर त्यांच्या प्रवेशाची “चिंतनशील सुरुवात” पाहायला मिळाली.वाघ कुटुंबाचा भाजपमध्ये प्रवेश ही घटना एका ठराविक गावापुरती मर्यादित राहिलेली नाही. ती एक व्यापक संदेश घेऊन आली आहे – की राजकारण ही जर लोकसेवेची दिशा असेल, तर त्याची सुरुवात प्रत्यक्ष समाजात उतरून करावी लागते. मतपेढ्या आणि घोषणा यापेक्षा अधिक प्रभावी असतो तो जनतेतला विश्वास. आणि वाघ कुटुंबाने, विशेषतः नानासाहेब संजय वाघ यांनी, या विश्वासाचं बीज पहिल्याच दिवशी पेरलं आहे. राजकारणात प्रवेश करताच मंदिरात स्वच्छता आणि आरती – हा काही लोकांना “प्रचाराचा प्रयत्न” वाटू शकतो. पण अशा कृतींचं विश्लेषण केवळ बाह्यदृष्टीने केल्यास त्यातला सखोल भावार्थ उमगणार नाही. हाच तर अहिल्याबाईंचा मार्ग होता – कृती, संस्कार आणि समर्पण पिंपळगाव हरेश्वर येथील या कार्यक्रमामुळे वाघ कुटुंबाच्या नेतृत्वाच्या नव्या पर्वाची सुरुवात झाली आहे. पक्षाचे वरिष्ठ नेते, स्थानिक भाजपचे जुने व वाघ परिवारासोबत भाजपात नवीन आलेले कार्यकर्ते, महिला मंडळ, युवक मंडळ आणि ग्रामस्थ यांचा एकत्र सहभाग हा केवळ एक कार्यक्रम नव्हता – ती एक चळवळ होती. वाघ कुटुंब आता केवळ सहकारी शिक्षण क्षेत्रात नव्हे, तर राजकारणातही एक जबाबदार आणि विचारशील उपस्थिती म्हणून आपली भूमिका निभावेल, अशी आशा आहे. लोकशाही प्रक्रियेतील सक्रिय सहभाग आणि विचाराधारित कृती यांचा आदर्श तयार करत, वाघ कुटुंब भारतीय जनता पक्षाच्या तालुका पातळीवर नव्हे तर जिल्हास्तरावरही एक महत्त्वाचा स्तंभ ठरेल, याबाबत आता कुठलाही प्रश्न उरलेला नाही.

पाचोरा – तालुक्यातील पिंपळगाव हरेश्वर येथे पुण्यश्लोक अहिल्याबाई होळकर यांच्या 300 व्या जयंतीनिमित्त अत्यंत भावपूर्ण व प्रेरणादायी कार्यक्रमाचे आयोजन करण्यात आले. भारतीय जनता पार्टीच्या वतीने आयोजित या कार्यक्रमात हरिहरेश्वर मंदिरात स्वच्छता अभियान, महादेवाची महाआरती व सामूहिक सहभागातून श्रमदानाच्या माध्यमातून एक नवा आदर्श निर्माण करण्यात आला. राजमाता अहिल्यादेवी होळकर या केवळ एक यशस्वी राज्यकर्त्या नव्हत्या, तर त्या एक धर्मपरायण, जनकल्याणकारी, दूरदृष्टी असलेल्या आदर्श स्त्री नेतृत्वाचं ज्वलंत उदाहरण होत्या. त्यांच्या 300 व्या जयंतीनिमित्त देशभरात विविध उपक्रमांचे आयोजन करण्यात आले आहे. पिंपळगाव हरेश्वर हे या यादीत एक विशेष ठिकाण ठरले, कारण येथे झालेल्या कार्यक्रमात भक्ती, स्वच्छता आणि सामूहिक

एकजुटीचा अनोखा संगम पाहायला मिळाला.या कार्यक्रमाचे वैशिष्ट्य म्हणजे यामध्ये कोणताही औपचारिकता वा मोठ्या भाषणांचा गडबड न करता, प्रत्यक्ष कृतीच्या माध्यमातून पुण्यस्मरण केले गेले. सकाळीच ग्रामस्थ, कार्यकर्ते, महिलावर्ग, युवा मंडळी मंदिरात जमले. त्यांनी प्रथम मंदिर परिसराची स्वच्छता केली. जमिनीवर पडलेले कचरा, वाळलेली झाडांची पाने, कुजलेल्या फुलांचे अवशेष व धुळकट झालेली दगडी पायऱ्या स्वच्छ करण्यात आल्या. मंदिराच्या सभोवतालचा परिसर झाडून स्वच्छ केला गेला. नंतर मंदिरातील नंदी, महादेवाच्या पिंडीवर चढलेल्या जुने पूजासामग्री स्वच्छ करण्यात आली. या श्रमदानात पुरुषांसोबत महिलांनीही उत्साहाने भाग घेतला. स्वच्छता अभियानानंतर संपूर्ण मंदिर परिसरात दिव्य वातावरण निर्माण झाले. नंतर महादेवाची महाआरती अत्यंत भक्तिभावाने पार पडली. मंदिरामध्ये ‘ओं नमः शिवाय’ चा गजर, टाळ-मृदंगाचा नाद, भक्तीमय आरतीचे सूर आणि सुगंधित धुपाचा दरवळ असा एक सजीव आध्यात्मिक अनुभव सहभागी प्रत्येकाच्या मनात रुजून गेला.कार्यक्रमाचे नेतृत्व पिंपळगाव मंडळाच्या अध्यक्षा सौ. शोभाताई शांतीलाल तेली यांनी उत्साहाने केले. त्यांच्या मार्गदर्शनाखाली संपूर्ण नियोजन नीट आणि सुसज्ज पद्धतीने पार पडले. कार्यक्रमास डॉ. शांतीलाल तेली यांची उपस्थिती विशेष महत्त्वाची ठरली. त्यांनी सामाजिक समरसतेचा व संस्कारांचा संदेश देत उपस्थितांना अहिल्याबाईंच्या कार्याचे स्मरण करून दिले.भाजप जिल्हा उपाध्यक्ष मधुभाऊ काटे हेही उपस्थित होते. त्यांनी आपल्या छोटेखानी भाषणातून सांगितले की, “अहिल्यादेवी होळकर यांनी भारतात मंदिरे, धर्मशाळा, तळी, घाट बांधून केवळ धर्म नव्हे तर समाजाचे पुनरुत्थान केले. आज त्यांच्या जयंतीला अशा सेवाभावी कार्यक्रमातून आपण त्यांना खरी श्रद्धांजली अर्पण करत आहोत.”या कार्यक्रमात नुकताच भाजपामध्ये प्रवेश केलेले पाचोरा तालुका सहकारी शिक्षण संस्थेचे चेअरमन नानासाहेब संजय वाघ हे स्वतः सहभागी होते. त्यांनी देखील मंदिर स्वच्छतेच्या कार्यात स्वतः झाडू घेत भाग घेतला. त्यांच्या मनोगतात त्यांनी नमूद केले की, “राजमाता अहिल्याबाई होळकर या महाराष्ट्राच्या सांस्कृतिक आणि सामाजिक इतिहासातील एक तेजस्वी पर्व आहेत. त्यांचे जीवन हे समर्पण, सेवा, शिस्त आणि नीतिमत्तेचा सर्वोच्च आदर्श आहे. आज त्यांच्याच शिकवणीप्रमाणे आपण प्रत्येकाने समाजासाठी काहीतरी योगदान देण्याचा निर्धार केला पाहिजे. हा कार्यक्रम केवळ श्रद्धांजली नव्हे, तर आपल्या जीवनातील एक सुसंस्कारित पाऊल आहे.”कार्यक्रमात शिवदास तात्या पाटील, अनिल धना पाटील, विनोद महाजन, मौजूलाल जैन, पंडित तेली, संतोष कुटे, गोविंदा येवळे, प्रशांत तेली, प्रशांत पाटील, सुनील सर, योगेश हटकर, भडांगे सर, अशोक हरी पाटील, आणि महिला मंडळाच्या कार्यकर्त्या तसेच इतर ग्रामस्थ मोठ्या संख्येने सहभागी झाले होते. महिलांनी फुलांनी व रांगोळीने मंदिर परिसर सजवला. त्यांचे योगदानही लक्षणीय ठरले.कार्यक्रमामध्ये लहान मुला-मुलींनाही सहभागी करून घेण्यात आले. त्यांना अहिल्यादेवींच्या जीवनकार्याची ओळख करून देण्यात आली. पिंपळगाव हरेश्वरमध्ये झालेला हा कार्यक्रम म्हणजे राजमाता अहिल्यादेवी होळकर यांच्या स्मृतीला साजेशी जयंती ठरली. या दिवशी केवळ शोभेची भाषणे झाली नाहीत, तर प्रत्यक्ष कृतीतून आदर्श निर्माण झाला. सामाजिक समरसतेचा संदेश, भक्तिभावाचे दर्शन, स्वच्छतेचा वसा, आणि संस्कारांची प्रेरणा या सर्वांचा एकत्र संगम पिंपळगावने अनुभवला.

मुंबई (गुरुदत्त वाकदेकर) : गोलंदाजांच्या कामगिरीनंतर, फिल साॅल्टच्या अर्धशतकाच्या मदतीने, रॉयल चॅलेंजर्स बंगळुरू (आरसीबी) ने क्वालिफायर-१ सामन्यात पंजाब किंग्जचा पराभव केला आणि आयपीएल २०२५ च्या अंतिम फेरीत दिमाखात प्रवेश केला. या सामन्यात आरसीबीने नाणेफेक जिंकून प्रथम गोलंदाजी करण्याचा निर्णय घेतला आणि पंजाब संघाला १४.१ षटकात फक्त १०१ धावांवर गुंडाळले. प्रत्युत्तरात आरसीबीने १० षटकात दोन गडी बाद १०६ धावा केल्या आणि सामना जिंकला.
आरसीबी संघ आता पहिले जेतेपद जिंकण्यापासून एक पाऊल दूर आहे. पराभव होऊनही पंजाब संघाला जेतेपदाच्या सामन्यात प्रवेश करण्याची अजून एक संधी आहे. गट टप्प्यात अव्वल स्थानावर असल्याने, पंजाबला अतिरिक्त संधी मिळेल. पंजाबचा सामना रविवारी क्वालिफायर-२ मध्ये गुजरात टायटन्स आणि मुंबई इंडियन्स यांच्यात शुक्रवारी होणाऱ्या एलिमिनेटरच्या विजेत्याशी होईल. जर पंजाबने तो सामना जिंकला तर ते अंतिम फेरीत पोहोचू शकतील जिथे त्यांचा सामना ३ जून रोजी अहमदाबादमध्ये आरसीबीशी होईल. कमी लक्ष्याचा पाठलाग करताना, आरसीबीने विराट कोहलीची विकेट लवकर गमावली, जो १२ चेंडूत दोन चौकारांच्या मदतीने १२ धावा काढून बाद झाला. त्यानंतर साॅल्ट आणि मयंक अगरवालने डाव पुढे नेला आणि संघाला विजयाच्या जवळ नेले. तथापि, मुशीर खानने मयंकला श्रेयस अय्यरच्या हाती झेल देऊन तंबूमध्ये पाठवले. १३ चेंडूत दोन चौकार आणि एका षटकाराच्या मदतीने १९ धावा काढून मयंक बाद झाला. साॅल्टने २३ चेंडूत अर्धशतक पूर्ण केले. आयपीएल प्लेऑफमध्ये आरसीबीसाठी हे सर्वात कमी चेंडूंमध्ये केलेले अर्धशतक आहे. या बाबतीत सॉल्टने ख्रिस गेलला मागे टाकले, ज्याने २०१६ मध्ये सनरायझर्स हैदराबादविरुद्ध २५ चेंडूत अर्धशतक झळकावले होते. साॅल्ट येथेच थांबला नाही आणि तो संघ जिंकेपर्यंत खेळपट्टीवर राहिला. कर्णधार रजत पाटीदारने मुशीर खानच्या चेंडूवर षटकार मारून संघाला जेतेपदाच्या सामन्यात नेले. साॅल्टने २७ चेंडूत सहा चौकार आणि तीन षटकारांसह ५६ धावा काढल्यानंतर नाबाद राहिला, तर पाटीदारने आठ चेंडूत एक चौकार आणि एक षटकारासह १५ धावा काढल्या.
यापूर्वी, पंजाबची फलंदाजी खूपच खराब होती आणि संघाने निराशाजनक कामगिरी केली. त्यांच्याकडून मार्कस स्टोइनिसने सर्वाधिक २६ धावा केल्या. त्याच वेळी, प्रभसिमरन आणि अझमतुल्लाह उमरझाई प्रत्येकी १८ धावा करून बाद झाले. त्यांचे सहा फलंदाज दुहेरी आकडाही गाठू शकले नाहीत. पंजाबची फलंदाजी इतकी खराब होती की संघ पूर्ण २० षटकेही खेळू शकला नाही. यासह पंजाबने एक नको असलेला विक्रम आपल्या नावावर केला. पंजाबचा संघ आयपीएल प्लेऑफमध्ये सर्वात कमी षटके फलंदाजी करणारा संघ बनला आहे. २००८ मध्ये दिल्ली डेअरडेव्हिल्स (आता कॅपिटल्स) ने बनवलेला हा नको असलेला विक्रम त्यांनी मागे टाकला. त्यावेळी, दिल्लीचा संघ राजस्थान रॉयल्सविरुद्ध फक्त १६.१ षटके फलंदाजी करू शकला. आयपीएल प्लेऑफमधील ही संयुक्त तिसरी सर्वात कमी धावसंख्या आहे. आरसीबीकडून जोश हेझलवूड आणि सुयश शर्माने प्रत्येकी तीन विकेट्स घेतल्या तर यश दयालने दोन विकेट्स घेतल्या. याशिवाय भुवनेश्वर कुमार आणि रोमारियो शेफर्ड यांना प्रत्येकी एक यश मिळाले.

पाचोरा — शहर व तालुक्यातील नागरिक, शेतकरी, व्यापारी, विद्यार्थ्यांचा अत्यंत महत्वाचा आणि दैनंदिन गरजांशी निगडित असलेला विषय म्हणजे एटीएम सेवा आणि बँक व्यवहारांतील सातत्याने निर्माण होणाऱ्या अडचणी. या गंभीर समस्येकडे शासन, प्रशासन आणि बँक व्यवस्थापनाचे लक्ष वेधण्यासाठी पाचोरा शहरातील पत्रकारांनी पुढाकार घेतला असून, दिनांक 29 मे रोजी प्रांताधिकारी भूषण अहिरे यांच्यासह स्थानिक आमदार किशोरआप्पा पाटील यांचे प्रतिनिधी व जिल्हाप्रमुख रावसाहेब पाटील यांना एक सविस्तर निवेदन सादर करण्यात आले.
या निवेदनाची दखल घेत, आमदार किशोरआप्पा पाटील यांनी तत्काळ नागरिकांच्या समस्या सोडविण्यासाठी तातडीने कृती सुरू केली आहे. त्यांनी प्रांताधिकारी कार्यालयात उद्या दिनांक 30 मे रोजी पाचोरा शहरातील सर्व बँक व्यवस्थापकांची तातडीची बैठक आयोजित करण्याचे निर्देश दिले आहेत. या बैठकीत बँक व्यवस्थापक यांच्यात थेट संवाद साधून समस्यांचे त्वरित निराकरण करण्याचे उद्दिष्ट ठरवण्यात आले आहे.
सध्याची परिस्थिती पाहता, पाचोरा शहरासह आसपासच्या ग्रामीण भागातील लोक सतत अडचणीत सापडले आहेत. विशेषतः राष्ट्रीयकृत व खाजगी बँकांचे एटीएम केंद्रे वारंवार बंद असल्याने, नागरिकांना आवश्यक त्या वेळी रोख रक्कम मिळण्यात मोठी अडचण निर्माण होत आहे. काही ठिकाणी ‘नेटवर्क समस्या’, ‘ कॅश उपलब्ध नाही’, ‘देखभाल सुरू आहे’ अशा सूचना लावून सेवा बंद ठेवली जाते. तर काही ठिकाणी यंत्रणेच पूर्णपणे बंद असून, ग्राहकांना केवळ निराशाच पदरी पडते. या समस्येचा सर्वाधिक फटका सध्या शेतकरी वर्गाला बसत आहे. खरीप हंगाम तोंडावर असताना शेतकऱ्यांना बी-बियाणे, खते, कीटकनाशके खरेदीसाठी रोख रक्कमेची निकड असते. अनेक शेतकऱ्यांच्या खात्यांमध्ये पीक कर्जाच्या स्वरूपात रक्कम जमा झालेली आहे. परंतु, एटीएम सेवा बंद असल्यामुळे किंवा बँकांमध्ये होणारी गर्दी आणि तांत्रिक अडचणीमुळे त्यांना आपलीच रक्कम वेळेवर मिळत नाही. परिणामी, शेतकऱ्यांचे शेतीचे नियोजन पूर्णपणे विस्कळीत होत असून, त्यांच्यावर आर्थिक व मानसिक तणाव वाढला आहे. म्हणून पाचोरा येथील पत्रकारांनी सादर केलेल्या निवेदनात नागरिकांच्या व शेतकऱ्यांच्या हिताचे अनेक मुद्दे उपस्थित करण्यात आले आहेत. निवेदनात पुढीलप्रमाणे स्पष्ट व ठोस मागण्या मांडण्यात आल्या आहेत 1. पाचोरा शहर व तालुक्यातील सर्व एटीएम केंद्रांची तातडीने तपासणी करावी.& सध्या किती एटीएम कार्यरत आहेत, किती बंद आहेत, याचा संपूर्ण डेटा संकलित करावा.2) जे एटीएम वारंवार किंवा सतत बंद राहत आहेत, त्यांना कार्यान्वित करण्यासाठी ठोस कार्यवाही करावी.
3) प्रत्येक बँकेने किमान एक एटीएम केंद्र २४ तास कार्यरत ठेवावे.विशेषतः शेतकरी व विद्यार्थी वर्गासाठी ही सेवा अत्यावश्यक आहे. 4) प्रत्येक एटीएम कॅबिनमध्ये, मशीन बंद किंवा नादुरुस्त असल्यास त्वरित संपर्क साधता यावा यासाठी सूचना फलक लावावा. यामध्ये संबंधित बँकेच्या किमान चार अधिकाऱ्यांची नावे व ( कार्यान्वीत ) मोबाइल क्रमांक नमूद असावेत.5.) बँकेच्या सेवा संदर्भात नागरिकांना भेडसावणाऱ्या अडचणी नागरीकां कडून लेखी स्वरूपात संकलित करून त्यावर संयुक्त बैठक घ्यावी. 6) बँक व्यवहारासाठी हिंदी व मराठीत मितभाषी अधिकारी/कर्मचारी नियुक्त करावेत.
या निवेदनात स्पष्टपणे नमूद करण्यात आले आहे की, वरील सर्व मागण्या 5 जून 2025 पर्यंत पूर्ण करण्यात याव्यात. अन्यथा, जनहितार्थ सामाजिक बांधिलकीतून लोकशाही मार्गाने आंदोलन छेडण्यात येईल.
यामध्ये सतत बंद राहणाऱ्या एटीएम केंद्रांना ढोल-ताशांच्या गजरात पुष्पहार अर्पण करून लोकशाही पद्धतीने ‘अंत्यसंस्कार’ करण्यात येतील. विशेषतः रेल्वे स्टेशनबाहेर असलेले सतत बंद राहणारे एटीएम केंद्र हे आंदोलनाचे प्रमुख केंद्र ठरणार आहे.
यानंतर संबंधित बँक व्यवस्थापकांना गुलाबपुष्प व पेन अर्पण करून त्यांच्या सजगतेसाठी ‘नम्रतेने जागृती’ करण्यात येईल. शेवटी, जर बँक व्यवस्थापनाने सकारात्मक कार्यवाही केली नाही, तर कोणतीही पूर्वसूचना न देता बँकेसमोर ‘ढोल बजाओ आंदोलन’ राबवण्यात येईल.
हा लढा केवळ सामाजिक बांधिलकीतून… राजकारणाशी काहीही संबंध नाही!
या संपूर्ण चळवळीचा मूळ हेतू म्हणजे जनतेच्या मुलभूत गरजांकडे लक्ष वेधून त्या सोडविणे. या आंदोलनाचा कोणत्याही राजकीय पक्षाशी वा प्रवृत्तीसोबत संबंध नसून, पत्रकारांनी सामाजिक बांधिलकीतून आणि जनहिताच्या भूमिकेतून पुढाकार घेतल्याचे स्पष्टपणे नमूद करण्यात आले आहे. या निवेदनाची प्रत खालील अधिकाऱ्यांना देण्यात आली आहे, जेणेकरून संबंधित यंत्रणाही या गंभीर समस्येकडे लक्ष देतील व समन्वयाने काम करतील 1)मा. डीवायएसपी साहेब, पाचोरा, जि. जळगाव 2) मा. तहसीलदार साहेब, पाचोरा, जि. जळगाव 3) मा. पोलिस निरीक्षक साहेब, पाचोरा, जि. जळगाव 4) मा. रेल्वे स्टेशन अधीक्षक साहेब, पाचोरा, जि. जळगाव
या संपूर्ण घडामोडीत आमदार किशोरआप्पा पाटील यांची तात्काळ प्रतिक्रिया आणि कार्यवाही उल्लेखनीय ठरली आहे. निवेदन प्राप्त होताच त्यांनी काही सेकंदात याची गंभीर दखल घेत, लगेचच उद्याच सर्व बँक व्यवस्थापकांची बैठक बोलावली आहे. या बैठकीत सर्व अडचणींचा सखोल आढावा घेऊन, नागरिक व शेतकऱ्यांच्या प्रश्नांची त्वरित सोडवणूक करण्याचे संकेत त्यांनी दिले आहेत. या प्रकारे पत्रकारांनी केलेल्या संयमी व लोकशाही माध्यमातून सुरू झालेल्या चळवळीला प्रशासन आणि लोकप्रतिनिधींकडून मिळालेला प्रतिसाद निश्चितच आदर्शवत आहे. ही बैठक व त्यानंतर होणारी कार्यवाही पाचोरा शहर व तालुक्याच्या बँकिंग प्रणालीत सकारात्मक बदल घडवून आणेल, अशी सर्वसामान्यांची आशा आहे.

पाचोरा : -सध्याच्या काळात देशाच्या कणा असलेल्या शेतकऱ्यांचे जीवन अधिकच कठीण बनले असून, शेतीसाठी अत्यावश्यक असलेल्या पैशांसाठी त्यांना अक्षरशः वणवण भटकावे लागत आहे. पिकांची लागवड सुरू होण्याच्या तोंडावरच शेतकऱ्यांना बियाणे, खते, कीडनाशके आणि इतर शेतीसाठी लागणाऱ्या साधनसामुग्रीसाठी रोख रक्कमेची नितांत गरज असते. मात्र, पाचोरा शहरासह संपूर्ण तालुक्यातील बहुतांश एटीएम सेवा गेल्या अनेक दिवसांपासून बंद अवस्थेत आहेत. त्यामुळे बँकेतून पैसे काढणे अत्यंत कठीण झाले असून, याचा सर्वात मोठा फटका ग्रामीण भागातील शेतकऱ्यांना बसत आहे.विशेष म्हणजे, अनेक शेतकऱ्यांच्या खात्यांमध्ये शासकीय मदतीच्या, सोसायट्यांच्या किंवा पीककर्जाच्या माध्यमातून रक्कम जमा झाली आहे. मात्र, ती रक्कम प्रत्यक्षात मिळवण्यासाठी त्यांना बँकेच्या शाखांमध्ये दीर्घ रांगा लावाव्या लागत आहेत किंवा बंद एटीएमपुढे रिकाम्या हाताने परतावे लागत आहे. काही शेतकऱ्यांनी तर पैसे काढण्यासाठी १० ते १५ किलोमीटरचा प्रवास करून दुसऱ्या गावातील बँकांमध्ये धाव घेतली आहे, पण तिथेही कधी कॅश नसते, तर कधी नेटवर्क नाही. परिणामी, शेतकरी वर्गामध्ये मोठ्या प्रमाणात असंतोष निर्माण झाला आहे.या पार्श्वभूमीवर आता पत्रकार बांधवांनी आपल्या संघटना गत तट बाजूला सारून एकत्र येऊन या गंभीर प्रश्नाला वाचा फोडण्याचा निर्धार केला आहे. सध्या बातम्या संकलित करण्यापेक्षा शेतकऱ्यांच्या प्रश्नांसाठी एकजूट होण्याची गरज असल्याचे स्पष्ट करत, पत्रकारांना संघटना, गट-तट, मतभेद यापलीकडे जाऊन एकत्र येण्याचे आवाहन करण्यात आले आहे. पाचोरा शहरातील पत्रकारांनी ठरवले आहे की, केवळ बातम्यांपुरते मर्यादित न राहता प्रत्यक्ष कृतीत उतरून, आंदोलनाच्या माध्यमातून शेतकऱ्यांचा आवाज शासनदरबारी पोहोचवला जाईल.या आंदोलनाचा प्रारंभ शहरातील छत्रपती शिवाजी महाराज चौकात एकत्र येऊन करण्यात येणार आहे. २९ मे गुरुवारी सकाळी ११ वाजता सर्व पत्रकारांनी या ठिकाणी उपस्थित राहावे, असे आवाहन करण्यात आले आहे. त्यानंतर प्रांताधिकारी कार्यालय व पाचोरा विधानसभा मतदारसंघाचे आमदार किशोरआप्पा पाटील यांना निवेदन सादर करण्यात येईल. निवेदनाद्वारे शहरातील सर्व बंद एटीएम तातडीने सुरु करण्याची मागणी केली जाईल. तसेच, एक आठवड्याच्या आत ही एटीएम सेवा पूर्ववत झाली नाही, तर त्या त्या बँकेच्या बंद एटीएमवर अनोख्या पद्धतीने निषेध नोंदवण्यात येणार आहे.या निषेधात बंद एटीएमवर ढोल-ताशांच्या गजरात पुष्पहार अर्पण करून संबंधित बँकेच्या व्यवस्थापकाला बँकेत जाऊन एटीएम सेवा तात्काळ सुरू कराव्या यासाठी गुलाबपुष्प देत विनंती करण्यात येणार आहे या आंदोलनामागे कुठलाही राजकीय हेतू नसून, हा शुद्ध सामाजिक आणि जनहितार्थ उपक्रम असल्याचे आयोजकांनी स्पष्ट केले आहे. बँकिंग सुविधा बंद ठेवणे हे केवळ तांत्रिक अडचण नसून, शेतकऱ्यांच्या व सर्वसामान्य नागरिकांच्या भावनांशी खेळणारे कृत्य आहे. शहरातील व तालुक्यातील इतर सामाजिक संस्था, कार्यकर्ते, शेतकरी संघटना, व्यापारी संघटना आणि विद्यार्थ्यांनी देखील या आंदोलनात सहभागी होऊन शेतकऱ्यांच्या पाठीशी उभे राहण्याची गरज आहे. पत्रकारांनी जर एकत्रितपणे आवाज उठवला, तर प्रशासन आणि बँका निश्चितच जागरूक होतील, असा विश्वास व्यक्त करण्यात येत आहे. त्यामुळे उद्या २९ मे रोजी सकाळी ११ वाजता छत्रपती शिवाजी महाराज चौकात जास्तीत जास्त पत्रकारांनी उपस्थित राहावे, ही नम्र विनंती आयोजकांनी केली आहे.

जळगाव – धानोरा येथील युवा क्रिकेटपटू हर्षवर्धन चौधरी याने आपल्या उत्तम खेळगुणांद्वारे राज्याच्या यशात मोलाचा वाटा उचलण्यास सुरुवात केली असून, त्याची नुकतीच महाराष्ट्र क्रिकेट असोसिएशन आणि नाशिक क्रिकेट असोसिएशनमार्फत हरियाणा – पानिपत येथे होणाऱ्या राष्ट्रीय अजिंक्यपद क्रिकेट स्पर्धेसाठी महाराष्ट्र संघात निवड करण्यात आली आहे. ही बाब जळगाव जिल्ह्यासाठी आणि धानोरा सारख्या ग्रामीण भागासाठी अभिमानाची गोष्ट आहे. या विशेष प्रसंगी महाराष्ट्र राज्याचे पाणीपुरवठा व स्वच्छता मंत्री आणि जळगाव जिल्ह्याचे पालकमंत्री ना. भाऊसो गुलाबरावजी पाटील यांचे स्वीय सहाय्यक नवलसिंगराजे पाटील यांनी जळगाव येथे खास सत्कार समारंभाचे आयोजन करून हर्षवर्धन चौधरीचा शाल, श्रीफळ व पुष्पगुच्छ देऊन सन्मान केला. यावेळी पाटील यांनी चौधरी याच्या खेळगुणांची प्रशंसा करत त्याला पुढील वाटचालीसाठी शुभेच्छा दिल्या. विशेष बाब म्हणजे नवलसिंगराजे पाटील यांनी या स्पर्धेसाठी आवश्यक असलेल्या सर्व आर्थिक खर्चाची स्पॉन्सरशिप घेत उदयोन्मुख खेळाडूला प्रोत्साहन देण्याचा आदर्श निर्माण केला आहे.या कार्यक्रमाला दोडे गुर्जर संस्थानचे अध्यक्ष चंद्रशेखरदादा पाटील, त्रिमूर्ती कॉलेजचे चेअरमन मनोजबापू पाटील तसेच माही पाटील हे मान्यवरही उपस्थित होते. सर्व मान्यवरांच्या उपस्थितीत झालेला हा सत्कार सोहळा हा केवळ एका खेळाडूचा गौरव नव्हता, तर हा ग्रामीण भागातील नवोदित युवकांच्या क्रीडाविकासासाठी दिलेला सशक्त संदेश होता.हर्षवर्धन चौधरी याच्या क्रिकेट क्षेत्रातील या यशामागे त्याचा सातत्याने घेतलेला सराव, प्रशिक्षकांचे मार्गदर्शन, पालकांचा पाठिंबा आणि स्थानिक पातळीवरील संस्थांची साथ यांचा मोठा वाटा आहे. लहानशा गावातून येणारा हा युवा खेळाडू आपल्या जिद्दीने मोठ्या स्पर्धेत स्थान पटकावतोय, ही बाब इतर अनेक युवकांना प्रेरणादायी आहे. विशेषतः ग्रामीण भागातील युवकांसाठी ही एक दिशा देणारी घटना ठरत आहे.नवलसिंगराजे पाटील यांनी आपल्या भाषणात म्हटले की, “आजच्या युगात तरुणांनी खेळासोबत शिक्षणातही प्रगती करणे आवश्यक आहे. राज्यात आणि देशात खेळांच्या माध्यमातून पुढे जाण्याच्या असंख्य संधी आहेत. अशा वेळी ग्रामीण भागातील खेळाडूंना योग्य मार्गदर्शन, सुविधा आणि आर्थिक पाठबळ मिळणे अत्यंत महत्त्वाचे आहे. हर्षवर्धनसारख्या मेहनती युवकांना मदत करणे ही माझी सामाजिक जबाबदारी समजून मी स्वतः पुढाकार घेतला आहे.”हर्षवर्धन चौधरी याच्या निवडीमुळे जळगाव जिल्ह्यातील क्रीडा क्षेत्रात एक नवा आत्मविश्वास निर्माण झाला आहे. जिल्हा स्तरावर काम करणाऱ्या क्रिकेट अकॅडमी, प्रशिक्षक व खेळाडू यांच्यासाठी ही निवड एक प्रेरणा आहे. हर्षवर्धनच्या या यशामुळे त्याच्या पुढील राष्ट्रीय आणि आंतरराष्ट्रीय स्तरावरील संधींचा मार्ग मोकळा झाला आहे.यावेळी चंद्रशेखर दादा पाटील यांनी सांगितले की, “गावपातळीवरून राष्ट्रीय स्तरापर्यंत पोहोचणं ही सोपी गोष्ट नाही. हर्षवर्धनने त्याच्या कष्टाने ही कामगिरी साधली आहे. त्याचा हा प्रवास ग्रामीण भागातील इतर अनेक युवकांसाठी दीपस्तंभ ठरेल यात शंका नाही.”मनोज बापू पाटील यांनी आपल्या मनोगतात नमूद केलं की, “आज ग्रामीण भागातील खेळाडू प्रामाणिक सराव व आत्मविश्वासाच्या जोरावर राज्य व राष्ट्रीय पातळीवर चमकत आहेत. हर्षवर्धनसारख्या खेळाडूंना संस्थात्मक पाठबळ मिळाल्यास ते देशासाठीही खेळू शकतील.हर्षवर्धनने सत्कारानंतर आपल्या भावना व्यक्त करताना सांगितले की, “ही निवड माझ्यासाठी खूप मोठी जबाबदारी आहे. मला मिळालेल्या संधीचे सोने करणे हेच माझं ध्येय आहे. नवलसिंगराजे पाटील यांनी मला दिलेली आर्थिक मदत आणि प्रोत्साहन हे मला अधिक प्रेरणादायी वाटते. त्यांच्या मार्गदर्शनामुळे माझ्या संधींना अधिक बळ मिळाले आहे.क्रिकेट क्षेत्रात पुढे जाण्यासाठी ग्रामीण खेळाडूंना भेडसावणाऱ्या अडचणी – दर्जेदार प्रशिक्षणाची कमतरता, आर्थिक पाठबळाची मर्यादा, व्यासपीठाचा अभाव – या सर्व गोष्टींवर मात करत हर्षवर्धनसारख्या खेळाडूंनी मिळवलेलं यश हे केवळ वैयक्तिक नव्हे, तर संपूर्ण जिल्ह्यासाठी गौरवाची बाब ठरत आहे हर्षवर्धन चौधरीने याआधी जिल्हा व विभागीय पातळीवरील अनेक स्पर्धांमध्ये उत्कृष्ट कामगिरी केली असून त्याच्या फलंदाजीतील सुस्पष्टता, तंत्रशुद्ध खेळ आणि मैदानावरील सकारात्मक ऊर्जा ही त्याच्या यशाची प्रमुख कारणे आहेत. प्रशिक्षक आणि संघ व्यवस्थापन यांच्यासह खेळाडू मित्रांनीही त्याच्या कामगिरीची प्रशंसा केली आहे.या कार्यक्रमाच्या आयोजनामध्ये स्थानिक क्रीडाप्रेमी नागरिकांनीही सहभाग घेत हर्षवर्धनला शुभेच्छांचा वर्षाव केला. कार्यक्रमाच्या शेवटी उपस्थित सर्व मान्यवरांच्या हस्ते त्याला पुढील स्पर्धेसाठी किट, बूट, जर्सी यांचे संच प्रदान करण्यात आले. या सोहळ्यामुळे एक गोष्ट स्पष्ट झाली – ग्रामीण भारतातही प्रचंड क्षमतेचे खेळाडू आहेत, फक्त त्यांना योग्य संधी व मार्गदर्शन मिळण्याची गरज आहे. नवलसिंगराजे पाटील यांच्यासारखे लोकप्रतिनिधी जर पुढाकार घेत राहिले, तर हर्षवर्धनसारखे अनेक हिरो उदयाला येतील आणि महाराष्ट्रच नव्हे तर भारताला जागतिक पातळीवर गौरव मिळवून देतील.हर्षवर्धन चौधरीच्या यशाला केवळ क्रीडाक्षेत्रात मर्यादा नाही तर त्याच्या मागे असलेल्या समर्पणाची, कष्टाची आणि चिकाटीची ही कथा आजच्या तरुणाईला एक संदेश देणारी आहे – की स्वप्न मोठी असावी, पण त्यासाठी प्रयत्न त्याहून मोठे असावेत!

पाचोरा – तालुक्यातील जारगाव हे गाव, जे पूर्वी केवळ विकासाचे गांव आणि ग्रामीण अर्थकारणासाठी ओळखले जात होते, आता तिथल्या स्टेट बँक ऑफ इंडिया (SBI) शाखेमुळे व व्यवसायामुळे फार मोठे आर्थिक उलाढालीचे एक आदर्श बँकिंग केंद्र म्हणून ओळखले जात आहे. पाचोरा शहरात अनेक मोठ्या बँका असताना, जारगावसारख्या ग्रामीण भागातील शाखेने आपल्या सेवेमुळे आणि कर्मचाऱ्यांच्या नम्र व पारदर्शक वागणुकीमुळे ग्राहकांच्या मनात आपली वेगळी ओळख निर्माण केली आहे. कालच्या एका साध्या बँक भेटीतून मिळालेला अनुभव याचे प्रत्यक्ष उदाहरण ठरला.
सध्या सर्वच व्यवहार आता डिजिटल होत असताना, बँकेत प्रत्यक्ष जाण्याची वेळ खूप कमीच येते. मात्र, काल कामानिमित्त जारगाव शाखेत जाण्याचा प्रसंग आला आणि तिथे जे वातावरण अनुभवायला मिळाले ते उल्लेखनीय होते. विशेष म्हणजे त्या वेळी शाखा व्यवस्थापक श्रीमती संगिता शिंदे, आणि शिपाई जयदीप कोळी बँकेच्या कामा निमित्त बाहेर गेले होते. त्यामुळे शाखेत थोडा अधिक वेळ घालवावा लागला. या वेळेत तिथल्या कार्यपद्धतीचा जवळून अभ्यास करता आला आणि यामुळे एक सकारात्मक अनुभव मिळाला.
जारगाव SBI शाखेची वाटचाल ही पाचोऱ्याच्या सुपुत्रांनी घडवलेली यशोगाथा आहे. एकेकाळी पाचोरा शहरातील मोठ्या SBI शाखेतून नागरिक आपले व्यवहार चांगल्या सेवेच्या कारणाने इतर बँकेकडे स्पेशली HDFC बँकेकडे वर्ग करत असताना त्यावेळी जारगाव SBI शाखेचे व्यवस्थापक व पाचोऱ्याचे सुपूत्र अभिलाष (भाई) बोरकर यांच्या नेतृत्वाखाली अनेक पाचोरेकरांनी जारगाव शाखेकडे ग्राहकांची पावले वळवली. मितभाषी व सेवाभावी वृत्ती असलेले श्री बोरकर यांनी त्या काळात आपल्या नम्र कार्यपद्धतीने जारगाव शाखेच्या सेवेला प्रगतीचे आलेखाचे वळण दिले. त्यांच्या बदलीनंतर आलेले नवे व्यवस्थापक विवेक हांडे साहेब यांनी देखील भाई बोरकर यांची परंपरा चालवत ग्राहकाभिमुख सेवा देण्याचे काम नेटाने सुरू ठेवले.
कालच्या जारगाव SBI शाखेच्या भेटीत दिसून आले की, संपूर्ण शाखेत शासकीय धोरणानुसार नेहमीप्रमाणे या कार्यालयात सुद्धा कमी व मोजकाच कर्मचारी वर्ग कार्यरत आहे. बँक व्यवस्थापक श्रीमती संगीता शिंदे, स्पे. असि. सुनिल महाजन , सहायक लिपीक श्री भामरे , शिपाई जयदिप कोळी, वॉचमन जगदीश पाटील हा संपूर्ण स्टाफ प्रत्येक जण बँकेचे कौटूंबिक सदस्य या नात्याने अत्यंत कार्यक्षमतेने आपापल्या जबाबदाऱ्या तर सोडाच परंतु इतरांच्या देखील जबाबदाऱ्या पार पाडत होते. कामांचे ठराविक विभाग न ठेवल्यासारखेच प्रत्येकजण ग्राहकांच्या गरजेनुसार पुढे सरसावून सेवा देत होते. कुणी ‘हे माझे काम नाही’ असे म्हणताना दिसले नाही. हेच खरे कार्यसंस्कृतीचे लक्षण आहे.
जर पाचोरा शहरातील राष्ट्रीयकृत बँकांच्या अनुभवाबद्दल बोलायचे झाले, तर सद्यास्थितीत HDFC बँक सोडली तर पाचोऱ्यातील अनेक ग्राहकांच्या तक्रारी इतर बँकांच्या बाबत ऐकिवात आहेत. बहुतेक बँकांमध्ये ग्राहकांना कमालीचा त्रास सहन करावा लागतो. त्यांची अडवणूक, दुर्लक्ष, आणि “उद्या या”, “परवा या” अशा वाक्यांच्या सर्रास वापरामुळे सामान्य माणसाला बँकेत जायचे म्हणजे टेंशनचा विषय बनतो. मात्र, जारगाव शाखेत याचा पूर्णतः अभाव होता. येथे ना केवळ ग्राहकांची फसवणूक होते, ना त्यांच्या भावनांशी खेळ. येथे ग्राहकांशी प्रेमळ संवाद साधला जातो आणि त्यांची कामे वेळेत मार्गी लावली जातात.
जारगाव शाखेच्या व्यवस्थापनाकडे पाहिले असता, हे लक्षात येते की यांची सेवा ही केवळ ‘काम’ म्हणून मर्यादित नाही, तर ही एक सामाजिक बांधिलकी म्हणून जोपासली जाते. विशेषतः संजय गांधी निराधार योजना, विधवा महिला योजना, वृद्धपकाळ योजना अशा विविध शासकीय योजनांचे खातेधारक या शाखेत आहेत. या लाभार्थ्यांचे बँक खात्यांशी मोबाईल नंबर लिंक असून शासनाचे अनुदान त्यांच्यापर्यंत वेळेत पोहचविण्यासाठी शाखेतील सर्व कर्मचारी कटिबद्ध आहेत. लाभार्थ्यांना कोणतेही अडथळे न येता त्यांचे पैसे वेळेवर मिळावेत, यासाठी शाखेतील प्रत्येक जण जबाबदारीने काम करतो. हे फार मोठे वैशिष्ट्य म्हणावे लागेल.
या सर्व अनुभवाच्या पार्श्वभूमीवर एक जुना प्रसंग आठवतो. काही वर्षा पूर्वी पाचोरा SBI मुख्य शाखेतील उप-व्यवस्थापक श्री. खोब्रागडे यांनी ‘ध्येय न्युज’ व ‘झुंज’ या स्थानिक वृत्तपत्रांचे संपादक संदीप महाजन यांच्याशी वाद घातला होता. श्री.खोब्रागडे यांनी पत्रकार संदीप महाजन यांच्या बाबत चुकीचे वक्तव्य केल्याने पाचोऱ्यातीलच नव्हे तर मुंबई स्तरावरील पत्रकारांनी आवाज उठवला होता. परिणामी मुंबई येथील SBI महाराष्ट्राच्या चिफ जनरल मॅनेजर यांनी तातडीने उच्चस्तरावरून चौकशी व दखल घेऊन पाचोरा SBI मुख्यशाखेचे व्यवस्थापक श्री. खोब्रागडे यांना निलंबित करण्याचा निर्णय घेतला. अखेर आमदार किशोरआप्पा यांच्या मध्यस्थिने आणि संघटनेचे पदाधिकारी व स्थानिक व्यक्ती असल्याने अभिलाष बोरकर यांनी स्वतःच्या प्रतिष्ठेची बाजी लावून हे प्रकरण शांत केले. अखेर श्री खोब्रागडे यांना लेखी माफी मागावी लागली परिणाम यवतमाळ जिल्ह्यातील जंगल भागात श्री खोब्रागडे यांची बदली करण्यात आली. या पार्श्वभूमीवर जर आज जारगाव शाखेतले वातावरण पाहिले, तर निश्चितच आश्वासक वाटते.
ग्राहकांशी आदराने वागून, त्यांची कामे वेळेवर, पारदर्शक पद्धतीने पूर्ण करणारे अधिकारी आणि कर्मचारी हे केवळ नोकरीसाठी काम करत नाहीत. ते समाजाच्या विश्वासाला उत्तर देतात. प्रत्येक समाधानी ग्राहकाच्या मनातून निघणारी शुभेच्छा, दुवा ही त्या कर्मचाऱ्यांसाठी आणि त्यांच्या परिवारासाठीही अत्यंत मोलाची ठरते. त्यामुळेच जारगाव SBI शाखेचे कार्यकर्तृत्व केवळ खात्यांची संख्या , डिपॉझीट, कर्जाचे क्रीम ग्राहक वाढवणारे नाही, तर मनं जिंकणारे आहे.
ग्रामीण भागातही उत्कृष्ट बँकिंग सेवा देऊन विश्वासार्हतेचा एक नवा आदर्श निर्माण करणाऱ्या जारगाव शाखेचे हे कार्य निश्चितच उल्लेखनीय आहे. या शाखेत बँक म्हणजे एक ताणतणावाचे ठिकाण नसून, मदतीचा आणि विश्वासाचा केंद्रबिंदू बनले आहे. या शाखेचे व्यवस्थापक, कर्मचारी आणि संपूर्ण बँक टीम यांचे यासाठी विशेष कौतुक करावे लागेल. पाचोऱ्यासह परिसरातील इतर बँकांनी जारगाव SBI शाखेच्या कार्यपद्धतीचा आदर्श घ्यावा, हीच अपेक्षा.

पाचोरा – भडगाव विधानसभा मतदारसंघाचे माजी आमदार आणि पाचोऱ्याच्या राजकारणात आपल्या कर्तृत्वाने स्वतंत्र ठसा उमटवलेले प्रतिष्ठित नेते दिलीपभाऊ वाघ यांनी आज मंगळवार दिनांक २७ मे रोजी आपल्या असंख्य कार्यकर्त्यांसह भारतीय जनता पक्षात

अधिकृत प्रवेश करून तालुक्यातील राजकीय समीकरणांना नव्याने कलाटणी दिली. महाराष्ट्रातील भाजप मुख्यालयात झालेल्या या भव्य प्रवेश सोहळ्याला भाजपचे वरिष्ठ भाजप प्रदेशाध्यक्ष तथा महसूल मंत्री चंद्रशेखर बावनकुळे यांच्या हस्तेजलसंपदा मंत्री गिरीशभाऊ महाजन , विधानसभा सभापती राम शिंदे , रवींद्र चव्हाण बांधकाम मंत्री , आमदार मंगेशदादा चव्हाण ,जळगाव जिल्हाध्यक्ष डॉ. राधेश्याम चौधरी यांच्या प्रमुख उपस्थितीत यांच्या प्रमुख उपस्थितीत पार

पडला. यावेळी पक्षाचे इतर अनेक ज्येष्ठ नेते आणि कार्यकर्ते देखील उपस्थित होते.दिलीपभाऊ वाघ यांच्या या प्रवेशाने पाचोरा-भडगाव तालुक्यातील भाजप कार्यकर्त्यांमध्ये चैतन्य संचारले असून राजकीय चर्चांना आणि अपेक्षांना नवे वळण लाभले आहे. गेल्या काही महिन्यांपासून त्यांच्या संभाव्य पक्षप्रवेशाच्या चर्चा रंगत होत्या. अखेर त्या चर्चांना पूर्णविराम देत त्यांनी अधिकृतपणे भाजपमध्ये प्रवेश करत भाजपला स्थानिक पातळीवर मोठे बळ दिले आहे.या ऐतिहासिक प्रवेश सोहळ्यावेळी पाचोरा व भडगाव तालुक्यातील राजकीय, सामाजिक आणि सहकारी क्षेत्रातील अनेक मान्यवर पदाधिकारी यांनी देखील दिलीप वाघ यांच्या सोबत मुंबई येथे भाजप मध्ये प्रवेश केला यात प्रामुख्याने पाचोरा तालुका सहकारी शिक्षण संस्थेचे चेअरमन तथा पाचोरा न.पा.राष्ट्रवादी काँग्रेसचे गटनेते संजय वाघ कृषी उत्पन्न बाजार समितीचे संचालक तथा पाचोरा पं.स.माजी सदस्य विजय पाटील शेतकरी सहकारी संघाचे संचालक तथा पाचोरा पं.स.चे माजी सभापती अनिल पाटील राष्ट्रवादी काँग्रेसचे जिल्हा कार्याध्यक्ष शालीग्राम मालकर भडगाव न.पा.माजी नगराध्यक्ष तथा कृषी उत्पन्न बाजार समितीचे संचालक शामकांत भोसले कृषी उत्पन्न बाजार समितीचे माजी सभापती राजेंद्र पाटील पाचोरा पिपल्स बँकेचे संचालक तथा राष्ट्रवादी काँग्रेसचे जिल्हाउपाध्यक्ष भागवत महालपुरे पाचोरा न.पा.माजी उपनगराध्यक्ष वासुदेव महाजन जळगाव जिल्हा मजुर संस्थेचे चेअरमन प्रकाश पाटील पाचोरा शेतकरी संघाचे संचालक शिवदास पाटील पाचोरा शेतकरी संघाचे चेअरमन सुनिल पाटील खडकदेवळा सरपंच सुदाम वाघ माजी नगरसेवक तथा शेतकरी संघाचे संचालक शरद पाटील शेतकरी संघाचे संचालक प्रविण गुजर, मच्छिंद्र थोरात, शशी पाटील माजी नगरसेवक अशोक मोरे माजी पं.स.सदस्य ललित वाघ बंजारा क्रांती दल जिल्हाध्यक्ष संजय राठोड माजी नगरसेवक वाशिद बागवान अंतुर्ली सरपंच वसंत पाटील माजी नगरसेवक रणजित पाटील सु.भा.पाटील प्राथ.विद्यामंदिर चे चेअरमन जगदीश सोनार राष्ट्रवादी काँग्रेस जिल्हाउपाध्यक्ष प्रशांत नैनाव माजी नगरसेवक प्रकाश चौधरी अजय अहिरे, अ‍ॅड.अविनाश सुतार, भगवान मिस्तरी, विनोद पाटील, अमोल ठाकूर, सुनिल चौधरी, गिरीष राठोड, प्रशांत महाले, गणेश पाटील, मोहसीन टकारी, अ‍ॅड.ललित सुतार, सतिष देशमुख, हरीष पाटील, निलेश पाटील, तेजस पाटील, सचिन शिंदे, गौरव पाटील, चेतन पाटील, युक्तेश बाविस्कर, महेश माळी, कृष्णराव साळूंखे, शामकांत वाडेकर, दिपक पाटील, रविंद्र पाटील, राजेंद्र साळूंखे, दत्तात्रय पाटील, वसंत पाटील, राजेंद्र पाटील, मनोज वाघ, प्रदिप वाघ, सदाशिव नरवाडे, युनूस मेंबर, संदीप कोल्हे, महेंद्र मानसिंग पाटील, रंगराव पाटील, भगवान पाटील, योगेश पाटील, नंदलाल पाटील, सुरेश कोळी, आबा पाटील, वाल्मिक पाटील, सचिन पाटील, विलास पाटील, अरूण पाटील, मनोजकुमार पाटील, प्रा.डॉ.माणिक पाटील, धर्मराज पाटील, संजय राठोड, गुलाब पाटील, हेमराज पाटील, प्रकाश पाटील, डिगंबर बोरसे, प्रशांत पाटील, सुरेश परदेशी, सचिन शिंदे, लोकेश पाटील, भुपेंद्र पाटील, कपुरचंद तेली, अनिल देवरे, मोजुलाल जैन, दिलीप जैन, संतोष कुटे, प्रशांत माळी, पंडीत नैनाव, गोविंदा येवले, प्रशांत नैनाव, रविंद्र पाटील, अमोल पाटील, हर्षल पाटील, रामेश्‍वर पवार, विनोद पाटील, संजय पाटील, चेतन परदेशी, नंदू टिळक, किशोर पाटील, रशीद काहकर, शितल पाटील, रामभाऊ पाटील, हिरालाल पाटील, बी.एम.पाटील, किरण देवरे, भिमा पाटील, अविनाश पाटील, कर्नल पाटील, विजय राठोड, सचिन राठोड, भास्कर व्यवहारे, सुपडू परदेशी, कैलास पाटील, शेखर राजपूत, रघुनाथ पाटील, रावसाहेब पाटील, शंतनु पाटील, सागर अहिरे, रामधन परदेशी, नितेश शेलार, विलास भामरे, अशोक सोनी, अभिजीत पवार, रज्जाक अबिद, मुन्नाकाका परदेशी, पिंटू तावरे, कमल पाटील, सागर पाटील, चंदन झंवर, बापु सोमवंशी, सचिन पाटील, भुषण पाटील, सुनिल पाटील, रमेश पाटील, बालाजी पाटील, कल्याण पाटील, कुणाल पाटील, मोनू हिरे, पुरूषोत्तम पाटील, लक्ष्मण पाटील, विश्‍वनाथ पाटील, विनोद पाटील, भिमराव पाटील, कल्पेश पाटील, संजय कारभारी, भाईदास पाटील, रणधीर पाटील, अशोक पाटील, अरूण सोनवणे, यशवंत पाटील, परेश पाटील, राहुल पाटील, राजेंद्र पाटील, अमोल पाटील, भुषण पाटील, संजय पाटील, विकी पाटील, निखिल पाटील, सोनु पाटील, हिराजी पाटील, शिवराज पाटील, ताराचंद पाटील, जितेंद्र पाटील, किरण पाटील, प्रकाश पाटील, अशोक पाटील, झिपरू केदार यांसारख्या ज्येष्ठ पदाधिकाऱ्यांचा सहभाग लक्षणीय ठरला. या सर्व नेत्यांचा आणि कार्यकर्त्यांचा पक्षप्रवेश केवळ वैयक्तिक नव्हता, तर तो एक व्यापक जनसहभाग होता जो भाजपच्या नेतृत्वाखाली स्थानिक विकासाच्या दिशेने नव्या ध्येयाने पुढे जाणार असल्याचे संकेत देतो. दिलीपभाऊ वाघ यांचा राजकीय प्रवास हा त्यांचे पिताश्री माजी आमदार स्व आप्पासाहेब ओ ना वाघ यांच्या आदर्शवादी सारखा प्रेरणादायी आणि जनतेशी नाळ जोडणारा आहे. त्यांनी आपल्या राजकीय कारकिर्दीची सुरुवात महाविद्यालयीन जीवनातच जी एस व कार्यकर्त्याच्या रूपात केली होती. सार्वजनिक राजकारणात त्यांची पहिली निवड १९९१ साली पाचोरा न पा नगरसेवक म्हणून झाली. त्यानंतर त्यांनी नगरसेवक पदावर सातत्याने कार्य केले आणि पाचोरा नगरपरिषदेचे नगराध्यक्ष म्हणून १९९५ ते २०१२ पर्यंत सर्वाधिक जास्त वेळ असलेला पाच वेळा नगराध्यक्षा पदाचा कालावधी भोगला आहे विशेष म्हणजे, एकदा त्यांनी लोकनियुक्त नगराध्यक्ष म्हणूनही नेतृत्व केले. आणि 2009 मधील जळगाव जिल्ह्यातीलच नव्हे तर संपूर्ण महाराष्ट्रातील ते एकमेव असे आमदार होते की ते एकाच वेळी नगराध्यक्ष व आमदार पदावर विराजमान असल्याचा इतिहास नोंदवला आहे त्यांच्या या कार्यकाळात त्यांनी पाचोरा शहरात नागरी सुविधा, रस्ते, पाणीपुरवठा, आरोग्य, शिक्षण, स्वच्छता आणि सहकारी क्षेत्रात अनेक उल्लेखनीय कामे केली आहेत. त्यानंतर जनतेच्या विश्वासावर आणि कार्यक्षमतेच्या बळावर ते पाचोरा – भडगाव विधानसभा मतदारसंघाचे आमदार म्हणून निवडून आले. आपल्या आमदारकीच्या कार्यकाळात त्यांनी या तालुक्याच्या विकासासाठी विविध योजना राबवल्या. त्यांच्या प्रयत्नांमुळे अनेक रस्त्यांचे कामे पूर्ण झाली, शेतकऱ्यांसाठी सिंचन प्रकल्प, सहकारी संस्था, शिक्षण संस्था व ग्रामीण पायाभूत सुविधा यामध्ये लक्षणीय भर पडली. सध्या ते जिल्हा नियोजन मंडळाचे सदस्य, जळगाव जिल्हा दूध संघाचे संचालक, तसेच पाचोरा तालुका सहकारी शिक्षण संस्थेचे अध्यक्ष म्हणून कार्यरत आहेत.दिलीपभाऊ वाघ हे कुशल संघटक, जनसामान्यांसाठी लढाऊ आणि कार्यकर्त्यांशी संपर्कात राहणारे लोकनेते म्हणून ओळखले जातात. त्यांनी कधीही पदासाठी राजकारण केले नाही, तर जनतेसाठी राजकारण केले. त्यांच्या निर्णयप्रक्रियेत पारदर्शकता, सहकार्य व संवादाचा समावेश असतो. त्यांनी राजकारणात सामाजिक समरसता, सर्वसमावेशक विकास आणि सहकार चळवळीला गती देण्यासाठी अहोरात्र कार्य केले आहे.भाजपमध्ये त्यांचा प्रवेश हा स्थानिक राजकारणात मोठा बदल घडवू शकतो, कारण ते केवळ स्वतःच्या लोकप्रियतेच्या जोरावर नव्हे, तर आपल्या मागे असलेल्या कार्यकर्त्यांच्या प्रबळ पाठबळावर पक्षाला नवे आयाम देऊ शकतात. त्यांच्या नेतृत्वाखाली पाचोरा-भडगाव मतदारसंघात भाजपला अधिक बळकट करण्यासाठी कार्यकर्त्यांमध्ये नवचैतन्य निर्माण झाले आहे.या सोहळ्याच्या निमित्ताने मुंबई येथील भाजप पक्ष कार्यालय परिसर सुद्धा जनतेने फुलून गेला होता. भगवे झेंडे, घोषणांनी परिसर दुमदुमून गेला होता. ‘दिलीपभाऊ वाघ पुढे चला, आम्ही तुमच्या पाठीशी आहोत’, ‘भाजपचा विजय असो’, अशा घोषणा कार्यकर्त्यांनी दिल्या.दिलीपभाऊ वाघ यांनी पक्ष प्रवेशानंतर केलेल्या भाषणात सांगितले की, “मी फक्त विकासासाठी विचारांचा बदल करत आहे. दिलीपभाऊ वाघ यांनी पक्ष प्रवेशा नंतर केलेल्या भाषणात सांगितले की पंतप्रधान नरेंद्र मोदी यांचे नेतृत्व, अमित शहा व देवेंद्र फडणवीस यांची रणनीती, गिरीषभाऊ महाजन यांचे सर्वसामान्यांशी असलेले अतूट नाते, जनतेशी असलेली आपुलकी, अखंड कार्यतत्परता आणि पक्षाची कार्यसंस्कृती हीच माझ्या निर्णयामागची खरी प्रेरणा आहे.” माझ्या सोबत असलेले कार्यकर्ते माझी खरी ताकद आहेत आणि आता आम्ही मिळून पाचोरा-भडगावच्या जनतेच्या अपेक्षा पूर्ण करण्यासाठी कटिबद्ध आहोत.यावेळी भाजपचे प्रदेश अध्यक्ष चंद्रकांत बावनकुळे यांनी देखील आपल्या भाषणात दिलीपभाऊ वाघ यांच्या अनुभवाचे आणि कार्यक्षमतेचे स्वागत करताना सांगितले की, “भाजपमध्ये अशा अनुभवी, लोकाभिमुख, सहकार क्षेत्रात प्रदीर्घ कार्य करणाऱ्या नेतृत्वाची गरज होती. दिलीपभाऊंचा प्रवेश म्हणजे भाजपच्या विजयाचे रणशिंग.राजकीय विश्लेषकांच्या मते, हा प्रवेश भाजपसाठी केवळ पाचोरा-भडगावमध्येच नव्हे, तर संपूर्ण जळगाव जिल्ह्यात नवा राजकीय टप्पा निर्माण करणारा ठरू शकतो. स्थानिक पातळीवर कार्यरत असलेले अन्य राजकीय पक्षही आता नव्या रणनीतीसाठी सज्ज होण्याची शक्यता आहे. येणाऱ्या काळात या प्रवेशाचे पडसाद स्थानिक स्वराज्य संस्था, न पा,जिल्हा परिषद, पंचायत समिती आणि आगामी सर्वच निवडणुकीत नक्कीच उमटतील. महाराष्ट्राचे जलसंपदा मंत्री ना गिरीशभाऊ महाजन यांनी बोलताना सांगितले एकंदरीतच, दिलीपभाऊ वाघ यांचा भाजपमधील प्रवेश हा तालुक्याच्या राजकारणात आणि सहकारी क्षेत्रात मोठा आणि निर्णायक पाऊल मानला जात आहे. या प्रवेशामुळे राजकीय, सामाजिक, सहकारी, शैक्षणिक आणि स्थानिक प्रशासन या सर्वच पातळ्यांवर नव्या समीकरणांची बीजे रुजली आहेत. पक्षाच्या कार्यकर्त्यांमध्ये नवचैतन्य आणि विजयाचा विश्वास निर्माण करणाऱ्या या ऐतिहासिक क्षणाने पाचोरा- भडगाव तालुका पुन्हा एकदा एका नव्या राजकीय पर्वाच्या उंबरठ्यावर उभा आहे.