पाचोरा – शहराच्या राजकीय इतिहासात निष्ठा, संघर्ष आणि सेवाभावाला न्याय देणाऱ्या निर्णयांची नोंद नेहमीच महत्त्वाची राहिली आहे. शिवसेनेचे कार्यसम्राट आमदार किशोरआप्पा पाटील यांच्या कार्यपद्धतीचे जिवंत उदाहरण ठरणारी किशोर बारावकर यांची उपनगराध्यक्ष पदावर झालेली नेमणूक आणि सुमितदादा किशोरआप्पा पाटील यांची गटनेता म्हणून निवड ही केवळ पदांची घोषणा नाही, तर जनतेच्या विश्वासावर शिक्कामोर्तब करणारा निर्णय मानला जात आहे. या दोन्ही नियुक्त्यांमधून कार्यकर्त्यांच्या त्यागाला मान, निष्ठेला योग्य सन्मान आणि युवा नेतृत्वाला स्पष्ट दिशा देण्याची आमदार किशोरआप्पा पाटील यांची भूमिका पुन्हा एकदा ठळकपणे समोर आली आहे. उपनगराध्यक्ष किशोर बारावकर यांची निवड करताना कोणतेही आर्थिक, सामाजिक किंवा जातीचे गणित लावलेले नाही, तर सर्वसामान्यांचा हक्काचा, रस्त्यावरचा कार्यकर्ता आणि चोवीस तास उपलब्धता हेच एकमेव निकष डोळ्यासमोर ठेवण्यात आले आहेत. महाविद्यालयीन जीवनापासून भारतीय विद्यार्थी सेनेच्या माध्यमातून शिवसेनेत सक्रिय झालेले किशोर बारावकर हे पाचोरा शिवसेनेच्या संघर्षकाळाचे साक्षीदार आहेत. त्या काळात कार्यकर्त्यांची आर्थिक परिस्थिती अत्यंत हालाखीची असताना मुंबई येथील तालुका संपर्कप्रमुखांना स्वतःच्या घरी मुक्काम, जेवणाची व्यवस्था करणे, प्रचारासाठी साधनसामग्री उभी करणे, हे सारे जबाबदारीने पार पाडणारा हा कार्यकर्ता होता. पाचोरा विधानसभा मतदारसंघात शिवसेनेचे तिकीट अशोकबंधू मिसाळ यांना मिळाल्यानंतर छत्रपती शिवाजी महाराज चौकातील अशोक दत्तू पाटील यांची पान टपरी आणि गोराडखेडा येथील दादासाहेब हनुमान बुधा पाटीत यांचे दुकान हेच शिवसेनेचे कार्यालय म्हणून वापरले जात होते. ज्या कार्यकर्त्याच्या घरी संधी मिळेल तिथे जेवण, दिवसभर प्रचार आणि पुन्हा संघर्ष, अशी ती परिस्थिती होती. त्या काळातील एक प्रसंग आजही कार्यकर्त्यांच्या स्मरणात आहे. प्रचाराच्या पहिल्याच दिवशी क्रूझर मिळाली, मात्र डिझेलसाठी पैसे नव्हते. पहाटेपासून उभी असलेली क्रूझर दुपारचे दोन वाजून गेले तरी हलू शकली नाही. अखेर किशोर बारावकर यांनी आपल्या गिरड रोडवरील एम.एस.ई.बी. कॉलनी निवासस्थानी जाऊन मावशींना म्हणजेच आपल्या आईंना परिस्थिती सांगितली. व सोने मागीतले ते घरातील सोने गहाण ठेवून डिझेलची व्यवस्था करण्यात आली आणि प्रचाराचा रथ पुढे सरकला. हा प्रसंग केवळ त्यागाचा नाही, तर कार्यकर्त्याच्या निष्ठेचा, पक्षासाठी सर्वस्व अर्पण करण्याच्या वृत्तीचा दाखला आहे. अशा या कार्यकर्त्याच्या आयुष्याचे सोने स्वर्गीय तात्यासाहेब आर. ओ. पाटील, स्वर्गीय मुकुंदआण्णा बिल्दीकर आणि प्रामुख्याने हॅट्रिक आमदार किशोरआप्पा पाटील यांनी ओळखले. आमदार किशोरआप्पा पाटील यांनी दिलेली उपनगराध्यक्ष पदाची  ही पावती म्हणजे एका सर्वसामान्य रस्त्यावरच्या कार्यकर्त्याला दिलेला न्यायच म्हणावा लागेल. तसेच पाचोरा नगरपालिका शिवसेनेच्या गटनेतेपदी सुमित किशोरआप्पा पाटील यांची झालेली निवड ही युवा नेतृत्वाला चालना देणारा निर्णायक टप्पा ठरत आहे. वडील आमदार आहेत, आई नगराध्यक्ष आहे म्हणून मुलगा गटनेतेपदी असा कोणताही निकष या निवडीमागे लावलेला नाही, हे पाचोरा शहर, तालुका आणि पंचक्रोशीतील जनता सहज सांगेल. उलट आमदार किशोरआप्पा पाटील यांना अभिमान वाटावा असा सुपुत्र त्यांच्या पोटी जन्माला आला आहे, असेच या निवडीकडे पाहिले जात आहे. सुमितदादा यांची नम्रता, मितभाषी स्वभाव, निर्व्यसनी जीवनशैली आणि सर्वसामान्यांशी थेट संवाद हे गुण मतदारसंघाने अनेक वेळा अनुभवले आहेत. विशेषतः नुकत्याच झालेल्या अतिवृष्टीच्या काळात सुमितदादांनी दाखवलेली कृती संपूर्ण मतदारसंघाच्या मनात घर करून गेली. सरकारी यंत्रणा काय करेल, वडील आमदार म्हणून काय भूमिका घेतील याची वाट न पाहता, स्वतः खिशातून पैसे खर्च करून गुडघ्याएवढ्या, कधी कधी कमरेएवढ्या पाण्यातून थेट नागरिकांच्या घरापर्यंत जाऊन मदत करण्याची वृत्ती त्यांनी दाखवली. हा अनुभव केवळ पाचोरा मतदारसंघानेच नव्हे, तर महाराष्ट्रानेही पाहिला. राजकीय वारसा असूनही केवळ वारशावर विसंबून न राहता स्वतःच्या कर्तृत्वावर राजकीय प्रवाहात कसे विलीन होता येते, याचे हे जिवंत उदाहरण आहे. बापापेक्षा बेटा सवाई ही म्हण येथे आठवावी, मात्र अनेकांच्या मते आ. किशोरआप्पा पाटील यांच्या कार्यशैलीचा वारसा पुढे नेत सुमितदादा पाचपटीने पुढे जात असल्याचे दिसून येते. पाचोरा नगरपालिका सभागृहात प्रथमच नगरसेवक म्हणून प्रतिनिधित्व मिळाल्यानंतर लगेचच गटनेतेपदाची जबाबदारी त्यांच्या खांद्यावर आली आहे. ही निवड म्हणजे त्यांच्या आतापर्यंतच्या कार्याची पावतीच मानली जात आहे. उपनगराध्यक्ष किशोर बारावकर आणि गटनेते सुमित किशोरआप्पा पाटील यांच्या निवडीमुळे शिवसेनेतील कार्यकर्त्यांच्या मनात नवा आत्मविश्वास निर्माण झाला असून हे फक्त पद नाही, ही जबाबदारी आणि जनतेचा विश्वास आहे ही भावना अधिक बळकट झाली आहे. या दोन्ही नियुक्त्यांबद्दल ध्येय न्यूज व साप्ताहिक झुंज वृत्तपत्रातर्फे किशोर बारावकर आणि सुमित किशोरआप्पा पाटील यांचे हार्दिक अभिनंदन करण्यात येत असून, त्यांच्या कार्यकाळातून पाचोरा शहराच्या विकासाला आणि सर्वसामान्यांच्या प्रश्नांना नवी दिशा मिळेल, अशी अपेक्षा व्यक्त केली जात आहे.

मेष–आज कामात गती येईल आणि आत्मविश्वास वाढलेला राहील. प्रलंबित निर्णय मार्गी लागण्याची शक्यता आहे. आर्थिक व्यवहारात सावधपणा ठेवा. कुटुंबीयांचा पाठिंबा मिळेल.
शुभ अंक: 9 | शुभ रंग: तांबूस

वृषभ–आज संयम व स्थिरता राखणे आवश्यक आहे. कामाच्या ठिकाणी जबाबदाऱ्या वाढू शकतात. खर्चावर नियंत्रण ठेवल्यास फायदा होईल. आरोग्याकडे लक्ष द्या.
शुभ अंक: 6 | शुभ रंग: गडद हिरवा

मिथुन–संवादातून आज महत्त्वाची कामे साध्य होतील. नवीन ओळखी उपयुक्त ठरतील. प्रवासाचे संकेत आहेत. वेळेचे नियोजन योग्य ठेवा.
शुभ अंक: 5 | शुभ रंग: फिकट पिवळा

कर्क –घरगुती प्रश्नांकडे लक्ष द्यावे लागेल. भावनिक निर्णय टाळावेत. आर्थिक बाबतीत स्थैर्य येण्यास सुरुवात होईल. विश्रांती गरजेची आहे.
शुभ अंक: 2 | शुभ रंग: मोत्यासारखा पांढरा

सिंह –आज नेतृत्वगुणांना वाव मिळेल. कामात यश मिळण्याची शक्यता आहे. अहंकार टाळल्यास संबंध सुधारतील. सकारात्मक विचार ठेवा.
शुभ अंक: 1 | शुभ रंग: केशरी पिवळा

कन्या–कामात अचूकता आणि शिस्त राखावी लागेल. सहकाऱ्यांचे सहकार्य मिळेल. आरोग्याच्या बाबतीत दिनक्रम सांभाळा. आर्थिक निर्णय विचारपूर्वक घ्या.
शुभ अंक: 4 | शुभ रंग: निळसर राखाडी

तुळ–आज समतोल साधण्याचा प्रयत्न करा. भागीदारीत स्पष्ट संवाद आवश्यक आहे. खर्च व उत्पन्न यांचा ताळमेळ ठेवा. नातेसंबंधात सौहार्द राहील.
शुभ अंक: 7 | शुभ रंग: हलका गुलाबी

वृश्चिक–आज आत्मविश्वास आणि धैर्य वाढेल. गुप्त शत्रूंवर मात करण्याची क्षमता राहील. वाद टाळल्यास फायदा होईल. संयमाने वागा.
शुभ अंक: 8 | शुभ रंग: गडद मरून

धनु –नवीन संधींचा शोध घेण्याचा दिवस आहे. शिक्षण व प्रवासासाठी अनुकूलता आहे. उत्साह वाढलेला राहील. खर्च मर्यादेत ठेवा.
शुभ अंक: 3 | शुभ रंग: निळसर जांभळा

मकर–कामाचा ताण वाढला तरी यश मिळेल. वरिष्ठांचे मार्गदर्शन लाभेल. आर्थिक स्थैर्य मजबूत होईल. संयम व सातत्य ठेवा.
शुभ अंक: 10 | शुभ रंग: गडद तपकिरी

कुंभ –आज नवीन कल्पना प्रत्यक्षात आणण्याची संधी मिळेल. सामाजिक संपर्क वाढतील. मित्रांचे सहकार्य लाभेल. आर्थिक निर्णय विचारपूर्वक घ्या.
शुभ अंक: 11 | शुभ रंग: निळसर पांढरा

मीन –आज मन शांत ठेवणे गरजेचे आहे. आध्यात्मिक विचारांकडे ओढ वाढेल. कुटुंबातील सहकार्य मिळेल. आर्थिक बाबतीत सावध रहा.
शुभ अंक: 12 | शुभ रंग: फिकट समुद्री हिरवा

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

पाचोरा – तालुक्यात सन २०१९ पासून सुरू असलेले शेतकरी अनुदानातील कथित घोटाळे आता केवळ प्रशासकीय चुकांपुरते मर्यादित न राहता संघटित स्वरूपाच्या रॅकेटकडे निर्देश करत असल्याचे चित्र स्पष्ट होत आहे. विशेष बाब म्हणजे या प्रकरणात काही आरोपी निश्चित करून त्यांच्यावर गुन्हे दाखल झाले असून सध्या ते सब जेलमध्ये आहेत आणि मागील आठवड्यात न्यायालयात या प्रकरणांची चार्जशीट देखील दाखल झालेली आहे. असे असतानाही २०२५ मध्ये झालेल्या अतिवृष्टीनंतर पाचोरा तालुक्यातील शेतकऱ्यांच्या अनुदान वितरणाबाबत एकामागून एक संशयास्पद बाबी समोर येत असून आरोपी जेलमध्ये असतानाही अनुदानातील गैरव्यवहार कसे सुरू आहेत असा थेट सवाल उपस्थित होत आहे. या संपूर्ण प्रकरणा बाबत सामाजिक कार्यकर्ता व पत्रकार संदीप दामोदर महाजन यांनी तहसीलदार पाचोरा तसेच प्रांताधिकारी व जिल्हाधिकारी जळगाव यांच्याकडे सविस्तर व लेखी अर्ज व निवेदन सादर करून सत्य व अधिकृत माहितीची मागणी केली असून त्यांच्या अर्जांमुळे शेतकरी अनुदान प्रकरण पुन्हा एकदा चर्चेच्या केंद्रस्थानी आले आहे. सन २०१९ पासून अतिवृष्टी, नैसर्गिक आपत्ती, नुकसानभरपाई तसेच विविध शासकीय योजनांतर्गत शेतकऱ्यांना देण्यात येणाऱ्या अनुदानाच्या वितरणात मोठ्या प्रमाणावर तक्रारी प्राप्त झाल्याचे त्यांनी आपल्या निवेदनात स्पष्ट केले आहे. विशेषतः २०२५ मध्ये काही महिन्यांपूर्वी झालेल्या अतिवृष्टीनंतर शेजारील जामनेर व चाळीसगाव तालुक्यांमध्ये बागायत व कोरडवाहू शेतीचे पंचनामे स्वतंत्रपणे करण्यात आले आणि त्या पंचनाम्यांच्या आधारे त्या तालुक्यातील संबंधित शेतकऱ्यांना अनुदानाची रक्कम वितरितही करण्यात आली.पाचोरा तालुक्यात मात्र अशा प्रकारे स्वतंत्र पंचनामे का करण्यात आले नाहीत हा प्रश्न अद्याप अनुत्तरित आहे. जामनेर व चाळीसगावमध्ये प्रक्रिया पूर्ण होत असताना पाचोऱ्यात शेतकऱ्यांना अनुदानापासून वंचित ठेवण्यामागे नेमके गूढ काय, असा सवाल आता उघडपणे विचारला जात आहे. आरोपी जेलमध्ये असूनही पाचोऱ्यात शेतकऱ्यांच्या नावावर मंजूर झालेल्या अनुदानाच्या रकमा अजूनही त्रयस्थ किंवा इतर व्यक्तींच्या खात्यावर कशा काय वर्ग होत आहेत हा मुद्दा अधिक गंभीर ठरत आहे. जर मुख्य आरोपी तुरुंगात आहेत आणि चार्जशीट दाखल आहे तर प्रशासकीय यंत्रणेमधील कोणत्या पातळीवरून ही प्रक्रिया पुढे चालू आहे याची चौकशी होणे अत्यावश्यक असल्याची भावना व्यक्त होत आहे आणि यावरूनच शेतकरी अनुदानातील रॅकेट पूर्णपणे संपुष्टात न येता अजूनही कार्यरत असल्याचा संशय बळावत आहे. संदीप दामोदर महाजन यांनी तहसीलदार पाचोरा यांना दिलेल्या अर्जात सन २०१९ पासून आजपर्यंत शेतकरी अनुदानासंदर्भात प्राप्त झालेल्या तक्रारींचा वर्षनिहाय तपशील, चुकीच्या खात्यावर वर्ग झालेल्या रकमेची संख्यात्मक माहिती, त्यावर करण्यात आलेली कारवाई तसेच प्रत्यक्ष किती शेतकऱ्यांना रक्कम मिळाली व किती प्रकरणे प्रलंबित आहेत याची अधिकृत माहिती मागितली असून ही माहिती वरिष्ठ प्रशासकीय स्तरावर व न्यायालयीन स्तरावर सादर करण्यासाठी आवश्यक असल्याचे त्यांनी स्पष्ट केले आहे. त्याचबरोबर प्रांताधिकारी व जिल्हाधिकारी यांच्याकडे दिलेल्या निवेदनात त्यांनी तहसील स्तरावर काही प्रमाणात चौकशी झाल्याचे सांगितले जात असले तरी संपूर्ण व पारदर्शक माहिती आजतागायत सार्वजनिक झालेली नसल्याने शेतकऱ्यांमध्ये संभ्रम, नाराजी व अविश्वासाची भावना निर्माण होत असल्याचे नमूद केले आहे. अनुदान ही शेतकऱ्यांसाठी मदत असावी की लूट असा प्रश्न पुन्हा एकदा ऐरणीवर आला असून पाचोरा तालुक्यातील अनेक शेतकरी आधीच नैसर्गिक आपत्ती, वाढता उत्पादन खर्च आणि बाजारातील अस्थिरतेमुळे आर्थिक संकटात सापडले असताना शासनाकडून मिळणारे अनुदान चुकीच्या खात्यावर जाणे किंवा मिळण्यात विलंब होणे ही बाब शेतकऱ्यांसाठी दुहेरी मार ठरत आहे. त्यामुळे या प्रकरणाकडे केवळ प्रशासकीय फाईल म्हणून न पाहता शेतकऱ्यांच्या हक्कांचा प्रश्न म्हणून पाहिले जावे अशी मागणी जोर धरू लागली आहे. आरोपी जेलमध्ये असतानाही अनुदानातील गैरव्यवहार सुरू असल्याचे संकेत मिळत असतील तर ही बाब प्रशासनासाठी गंभीर इशारा मानली जात असून दोषी व्यक्ती कोणत्याही पातळीवर असोत त्यांच्यावर कठोर कारवाई होणे आणि संपूर्ण यंत्रणेची सखोल चौकशी होणे आवश्यक असल्याचे मत व्यक्त होत आहे. संदीप दामोदर महाजन यांनी कायदेशीर, संयमित व अभिलेखांवर आधारित मार्गाने ही बाब पुढे नेली असून गरज पडल्यास न्यायालयीन पातळीवरही पाठपुरावा केला जाईल असे संकेत दिले आहेत. आता प्रशासन या संपूर्ण प्रकरणावर काय भूमिका घेते, पाचोरा तालुक्यातील पंचनामे का झाले नाहीत, चुकीच्या खात्यावर गेलेल्या रकमेचा माग कसा घेतला जातो आणि शेतकऱ्यांना प्रत्यक्ष न्याय कधी मिळतो याकडे संपूर्ण तालुक्याचे लक्ष लागले असून शेतकरी अनुदानातील हा कथित घोटाळा भूतकाळापुरता न राहता वर्तमानातही कार्यरत असल्याचे जर सिद्ध झाले तर त्याचे परिणाम प्रशासनाच्या विश्वासार्हतेवर दूरगामी ठरणार आहेत.

पाचोरा शहरात राजमाता माँसाहेब जिजाऊ जयंती, क्रांतिज्योती सावित्रीबाई फुले जयंती तसेच महिला मुक्तिदिनाचे औचित्य साधून उद्या आयोजित करण्यात येणारा लोकनियुक्त नगराध्यक्ष पदाचा पदग्रहण समारंभ हा केवळ राजकीय कार्यक्रम न राहता सामाजिक जाणीव आणि महिला सक्षमीकरणाचा ठोस संदेश देणारा ठरणार आहे. शिवसेनेच्या लोकनियुक्त नगराध्यक्ष सौ. सुनिताताई किशोर आप्पा पाटील यांच्या पदग्रहणानिमित्त पाचोरा शहरात उत्साहाचे वातावरण निर्माण झाले असून नागरिकांमध्ये मोठी अपेक्षा दिसून येत आहे. दिनांक ३ जानेवारी २०२६ रोजी सकाळी १० वाजता पाचोरा येथील मानसिंगा ग्राऊंड येथे हा भव्य पदग्रहण सोहळा पार पडणार आहे. या कार्यक्रमात महिला मुक्तिदिनाचे औचित्य साधून महिला बचत गटांसाठी विशेष मार्गदर्शन शिबीर आयोजित करण्यात आले असून महिलांच्या आर्थिक सक्षमीकरणावर विशेष भर देण्यात येणार आहे. महिलांनी स्वयंरोजगाराच्या माध्यमातून आर्थिकदृष्ट्या सक्षम व्हावे, स्वतःचे व कुटुंबाचे भविष्य सक्षमपणे घडवावे यासाठी बचत गटांचे महत्त्व, विविध शासकीय योजना, आर्थिक शिस्त आणि उद्योजकतेच्या संधी याबाबत मार्गदर्शन केले जाणार आहे. राजमाता जिजाऊ आणि सावित्रीबाई फुले यांच्या विचारांचा वारसा पुढे नेणाऱ्या या कार्यक्रमातून महिलांचे शिक्षण, स्वाभिमान आणि नेतृत्वक्षमतेचे महत्त्व अधोरेखित केले जाणार आहे. लोकनियुक्त नगराध्यक्ष पदाची शपथ स्वीकारताना सौ. सुनिताताई किशोर आप्पा पाटील या पाचोरा शहराच्या सर्वांगीण विकासासाठी कटिबद्ध राहण्याचा निर्धार व्यक्त करणार असून शहरातील मूलभूत सुविधा, स्वच्छता, पाणीपुरवठा, रस्ते, आरोग्य व शिक्षण या क्षेत्रात पारदर्शक आणि लोकाभिमुख कारभार करण्याची दिशा मांडणार आहेत. महिलांसाठी विशेष योजना प्रभावीपणे राबवून त्यांना निर्णयप्रक्रियेत सामावून घेण्यावर भर देण्यात येणार असल्याचेही त्या यावेळी स्पष्ट करणार आहेत. नगराध्यक्षपद हे अधिकाराचे नव्हे तर जबाबदारीचे पद असून नागरिकांच्या विश्वासाला पात्र ठरण्यासाठी प्रामाणिक प्रयत्न केले जातील, असा विश्वास या पदग्रहणाच्या माध्यमातून व्यक्त होणार आहे. या कार्यक्रमाचे आयोजन शिवसेना, युवासेना, महिला आघाडी व सर्व अंगीकृत संघटना, पाचोरा यांच्या वतीने करण्यात आले असून शिवसेनेच्या संघटनात्मक ताकदीचे दर्शन या सोहळ्यात घडणार आहे. विविध क्षेत्रातील मान्यवर, पदाधिकारी, महिला बचत गटांच्या प्रतिनिधी, शिवसैनिक आणि नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे. पदग्रहण समारंभाची औपचारिकता आणि सामाजिक बांधिलकीतून महिलांसाठी मार्गदर्शन शिबीर असा दुहेरी उद्देश साधणारा हा उपक्रम पाचोरा शहरासाठी प्रेरणादायी ठरणार असून महिला नेतृत्व, लोकशाही मूल्ये आणि सकारात्मक राजकारणाची दिशा दाखवणारा हा कार्यक्रम ठरेल, अशी अपेक्षा व्यक्त केली जात आहे.

पाचोरा – येथील अग्रवाल समाजाची नूतन कार्यकारिणी नुकतीच जाहीर करण्यात आली असून समाजाच्या संघटनात्मक बळकटीकरणासाठी हा महत्त्वाचा टप्पा मानला जात आहे. समाजातील सर्व घटकांना सोबत घेऊन सामाजिक, सांस्कृतिक व सेवाभावी उपक्रम अधिक प्रभावीपणे राबविण्याच्या उद्देशाने ही कार्यकारिणी गठित करण्यात आली आहे. अनुभवी, सक्रिय आणि समाजकार्याची जाण असलेल्या सदस्यांचा समावेश केल्यामुळे पुढील काळात समाजहिताचे निर्णय आणि उपक्रम अधिक गतिमान होतील, अशी अपेक्षा व्यक्त केली जात आहे. नूतन कार्यकारिणीत अध्यक्षपदी रमेश शंकरलाल मोर यांची निवड करण्यात आली आहे. उपाध्यक्षपदी सिताराम (मुन्ना) बन्सीलाल अग्रवाल यांची जबाबदारी देण्यात आली असून सचिवपदी मोहन चंद्रकांत अग्रवाल यांची नियुक्ती झाली आहे. सहसचिव म्हणून राजेश सतिश पटवारी काम पाहणार आहेत. कार्याध्यक्षपदी राजेश शांतीलाल मोर यांची निवड करण्यात आली असून कोषाध्यक्षपदी दिनेश चंदुलाल अग्रवाल यांच्याकडे आर्थिक शिस्त व नियोजनाची जबाबदारी सोपविण्यात आली आहे. सहकोषाध्यक्ष म्हणून रवी गोपाल मोर कार्य पाहतील, तर सहकार्याध्यक्षपदी लक्ष्मीकांत गोविंदलाल पटवारी यांची निवड करण्यात आली आहे. समाजातील उपक्रमांची माहिती प्रभावीपणे पोहोचविण्यासाठी प्रसिध्दी प्रमुखपदी निखिल सुभाष मोर यांची नियुक्ती करण्यात आली आहे. कार्यकारिणीतील सदस्य म्हणून सुभाष जगन्नाथ अग्रवाल, किशोर तेजमल अग्रवाल, गोपाल सुरजमल अग्रवाल, संजय मगनलाल पटवारी, निर्मल कैलास पटवारी, अनुराग राजकुमार भारतीया, महावीर भवरलाल अग्रवाल आणि नवील अशोक मोर यांचा समावेश आहे. या सर्व सदस्यांच्या अनुभवाचा आणि सक्रिय सहभागाचा लाभ समाजाच्या विविध उपक्रमांना निश्चितच होईल, असा विश्वास व्यक्त करण्यात येत आहे. नूतन कार्यकारिणीचा प्रमुख उद्देश समाजातील ऐक्य अधिक दृढ करणे, युवकांना नेतृत्वाच्या संधी उपलब्ध करून देणे, महिलांच्या सहभागाला प्रोत्साहन देणे तसेच शिक्षण, आरोग्य, आपत्ती मदत आणि सांस्कृतिक उपक्रमांमध्ये सक्रिय योगदान देणे हा आहे. समाजातील गरजू घटकांसाठी मदतकार्य, मार्गदर्शन शिबिरे, शैक्षणिक प्रोत्साहन आणि सामूहिक कार्यक्रमांचे आयोजन करण्यात येणार असल्याचे संकेत देण्यात आले आहेत. या निवडीबद्दल समाजातील ज्येष्ठ, युवक आणि महिला वर्गातून समाधान व्यक्त करण्यात येत असून नूतन कार्यकारिणीच्या माध्यमातून पाचोरा अग्रवाल समाज अधिक संघटित, सक्रिय आणि समाजोपयोगी वाटचाल करेल, अशी सर्वांची अपेक्षा आहे. आगामी काळात सर्व सदस्यांच्या सहकार्याने समाजहिताचे निर्णय घेतले जातील आणि पाचोरा शहरात अग्रवाल समाजाचा सकारात्मक ठसा अधिक ठळकपणे उमटेल, असा विश्वास व्यक्त करण्यात आला आहे.

मेष-आज निर्णयक्षमता वाढलेली राहील. रखडलेली कामे पूर्ण करण्यासाठी योग्य वेळ आहे. आर्थिक व्यवहारात स्पष्टता ठेवा. कुटुंबात तुमचे मत महत्त्वाचे ठरेल.
शुभ अंक: 9 | शुभ रंग: केशरी

वृषभ-आज संयमाने वागल्यास लाभ होईल. कामाच्या ठिकाणी बदल स्वीकारावे लागतील. खर्चावर नियंत्रण आवश्यक आहे. आरोग्याबाबत दुर्लक्ष टाळा.
शुभ अंक: 6 | शुभ रंग: फिकट हिरवा

मिथुन-नवीन कल्पनांना आज चांगला प्रतिसाद मिळेल. संवादातून गैरसमज दूर होतील. प्रवासाचे योग संभवतात. वेळेचे नियोजन महत्त्वाचे ठरेल.
शुभ अंक: 5 | शुभ रंग: लिंबूसरी

कर्क-घरगुती बाबींवर लक्ष द्यावे लागेल. भावनिक निर्णय टाळावेत. आर्थिक स्थैर्य राखण्यासाठी प्रयत्न करा. विश्रांतीसाठी वेळ काढा.
शुभ अंक: 2 | शुभ रंग: शुभ्र

सिंह-आज आत्मविश्वासात वाढ होईल. कामात नेतृत्वाची संधी मिळेल. वरिष्ठांशी मतभेद टाळा. यशासाठी संयम आवश्यक आहे.
शुभ अंक: 1 | शुभ रंग: गडद पिवळा

कन्या-कामात अचूकता राखल्यास समाधान मिळेल. सहकाऱ्यांचे सहकार्य लाभेल. आरोग्याच्या दृष्टीने दिनचर्या सांभाळा. खर्च मर्यादित ठेवा.
शुभ अंक: 4 | शुभ रंग: निळसर हिरवा

तुळ-आज समतोल राखणे महत्त्वाचे आहे. भागीदारीतील निर्णय काळजीपूर्वक घ्या. आर्थिक व्यवहारात स्पष्टता ठेवा. नातेसंबंध सुधारण्याची संधी आहे.
शुभ अंक: 7 | शुभ रंग: आकाशी

वृश्चिक-आज अंतर्गत शक्ती वाढलेली जाणवेल. गुप्त योजना यशस्वी होऊ शकतात. वाद टाळल्यास लाभ होईल. संयम ठेवा.
शुभ अंक: 8 | शुभ रंग: मरून

धनु-नवीन शिकण्याची संधी मिळेल. प्रवास व शिक्षणासाठी दिवस अनुकूल आहे. उत्साह जास्त राहील. खर्चावर नियंत्रण ठेवा.
शुभ अंक: 3 | शुभ रंग: जांभळट निळा

मकर-कामाचा ताण जाणवू शकतो पण मेहनतीचे फळ मिळेल. वरिष्ठांचा विश्वास वाढेल. आर्थिक बाबतीत स्थैर्य येईल. धीर आवश्यक आहे.
शुभ अंक: 10 | शुभ रंग: तपकिरी

कुंभ-नवीन संपर्क लाभदायक ठरतील. सामाजिक कामात सहभाग वाढेल. कल्पकतेला वाव मिळेल. आर्थिक निर्णय विचारपूर्वक घ्या.
शुभ अंक: 11 | शुभ रंग: फिकट निळा

मीन -आज मन शांत ठेवणे गरजेचे आहे. आध्यात्मिक विचारांकडे ओढ वाढेल. कुटुंबाचा आधार मिळेल. आर्थिक बाबतीत सावध रहा.
शुभ अंक: 12 | शुभ रंग: पिस्ता हिरवा

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

पाचोरा – तालुक्यातील पिंपळगाव हरेश्वर येथील सामाजिक कार्यकर्ते शालिग्राम ओंकार मालकर यांच्या माळी समाजातील गेल्या २५ वर्षांच्या सातत्यपूर्ण कार्याची दखल घेत शिवसेनेच्या माळी क्रांती सेनेच्या प्रदेश उपाध्यक्ष तसेच उत्तर महाराष्ट्र अध्यक्षपदी त्यांची नियुक्ती जाहीर करण्यात आली आहे. शिवसेनेचे कार्यसम्राट आमदार किशोर आप्पा पाटील यांच्या शिफारसीवरून शिवसेनेचे मुख्य नेते व उपमुख्यमंत्री एकनाथराव शिंदे साहेब यांनी ही निवड जाहीर केली असून, यावेळी माळी क्रांती सेनेचे प्रदेशाध्यक्ष रमेश बारस्कर उपस्थित होते. ठाणे येथे आज अधिकृत नियुक्तीपत्र देऊन ही जबाबदारी मालकर यांच्याकडे सोपवण्यात आली. शालिग्राम मालकर यांनी समाजकार्याची सुरुवात तळागाळातून करत माळी समाजाच्या शैक्षणिक, सामाजिक व संघटनात्मक प्रश्नांवर सातत्याने काम केले आहे. ग्रामीण भागातील युवकांना संघटित करणे, समाजात जनजागृती घडवून आणणे, तसेच विविध सामाजिक उपक्रमांच्या माध्यमातून एकात्मतेची भावना बळकट करणे, हे त्यांच्या कार्याचे प्रमुख वैशिष्ट्य राहिले आहे. त्यांच्या कामामुळे समाजात विश्वास निर्माण झाला असून, हीच विश्वासार्हता त्यांच्या निवडीमागे निर्णायक ठरली आहे. नव्या जबाबदारीनंतर शालिग्राम मालकर आगामी काळात उत्तर महाराष्ट्रात माळी समाजामध्ये व्यापक जनजागृती मोहीम राबविणार आहेत. वंदनीय बाळासाहेब ठाकरे यांच्या विचारधारेवर चालणाऱ्या शिवसेनेत जास्तीत जास्त समाजबांधवांना सामावून घेणे, संघटन मजबूत करणे आणि समाजाच्या प्रश्नांना संघटित व्यासपीठावरून न्याय मिळवून देणे, हा त्यांच्या कामाचा केंद्रबिंदू असणार आहे. पक्षाच्या ध्येयधोरणांशी निष्ठा राखत समाजहिताचे मुद्दे प्रभावीपणे मांडणे, युवकांना नेतृत्वाच्या संधी उपलब्ध करून देणे आणि महिला-युवक सहभाग वाढवणे, यावर ते भर देणार असल्याचे त्यांनी स्पष्ट केले आहे. या नियुक्तीमुळे पाचोरा तालुक्यासह संपूर्ण उत्तर महाराष्ट्रात माळी समाजाच्या संघटनात्मक कार्याला नवी दिशा मिळेल, असा विश्वास व्यक्त केला जात आहे. समाजबांधव, कार्यकर्ते आणि शिवसेनेतील पदाधिकाऱ्यांकडून शालिग्राम मालकर यांचे अभिनंदन करण्यात येत असून, त्यांच्या नेतृत्वाखाली माळी क्रांती सेनेचे कार्य अधिक गतिमान होईल, अशी अपेक्षा व्यक्त होत आहे.

पाचोरा : सामाजिक न्याय, समता आणि संविधानिक मूल्यांसाठी सातत्याने संघर्ष करणारे, आंबेडकर चळवळीतील झुंजार योद्धा म्हणून ओळख असलेले सामाजिक कार्यकर्ते विशाल तात्या बागुल यांची रिपब्लिकन सेना पाचोरा तालुका अध्यक्षपदी नियुक्ती करण्यात आली आहे. ही नियुक्ती रिपब्लिकन सेनेचे राष्ट्रीय अध्यक्ष सरसेनानी आनंदराज आंबेडकर साहेब यांच्या आदेशानुसार व मार्गदर्शनाखाली करण्यात आली असून, त्यामुळे पाचोरा तालुक्यातील आंबेडकरी चळवळीला नवसंजीवनी मिळाल्याची भावना व्यक्त होत आहे. विशाल बागुल हे गेल्या अनेक वर्षांपासून सामाजिक, शैक्षणिक आणि राजकीय क्षेत्रात सक्रिय असून, त्यांनी आपली ओळख ही केवळ पदांमुळे नव्हे तर तळागाळातील लोकांशी असलेल्या थेट संपर्कामुळे निर्माण केली आहे. त्यांनी यापूर्वी वंचित बहुजन आघाडी पाचोरा तालुका अध्यक्ष या पदावर काम करताना संघटनात्मक बांधणीवर विशेष भर दिला होता. त्यांच्या कार्यकाळात पाचोरा तालुक्यातील सुमारे ३५ गावांमध्ये शाखा उभारणी करून कार्यकर्त्यांचे जाळे मजबूत करण्यात आले होते. गावागावात बैठका, संविधान जागृती उपक्रम, सामाजिक प्रश्नांवरील आंदोलन आणि संघटन विस्ताराच्या माध्यमातून त्यांनी आपली वेगळी छाप सोडली. दरम्यान, पक्षाच्या ध्येय-धोरणांमध्ये झालेल्या बदलांमुळे आणि जिल्हा अध्यक्षांनी राजीनामा दिल्याच्या पार्श्वभूमीवर, पक्षनिष्ठेचा आणि वैचारिक स्पष्टतेचा आदर्श ठेवत विशाल बागुल यांनीही आपल्या पदाचा राजीनामा दिला. आंबेडकर घराण्याशी असलेली एकनिष्ठ भूमिका, डॉ. बाबासाहेब आंबेडकरांच्या विचारांप्रती असलेली निष्ठा आणि सरसेनानी आनंदराज आंबेडकर साहेब यांच्या नेतृत्वावर असलेला ठाम विश्वास यामुळे विशाल बागुल यांची निवड रिपब्लिकन सेनेच्या पाचोरा तालुका अध्यक्षपदी करण्यात आली. निवडीबद्दल बोलताना विशाल बागुल यांनी स्पष्ट शब्दांत सांगितले की, वरिष्ठांच्या आदेशानुसार आणि मार्गदर्शनाखाली पक्ष संघटना अधिक मजबूत करण्यासाठी ते पूर्ण ताकदीने काम करतील. “गाव तिथे शाखा” हा मंत्र घेऊन केवळ रिपब्लिकन सेनेच्या शाखा स्थापन करून कार्यकर्त्यांना एकत्र बांधण्याचा प्रयत्न केला जाईल. सामाजिक अन्याय, शोषण आणि वंचितांच्या प्रश्नांवर रिपब्लिकन सेना ठामपणे उभी राहील, असा विश्वासही त्यांनी व्यक्त केला. आंबेडकर चळवळीतील योद्धा म्हणून विचारांची मशाल पेटवून ठेवत, युवकांना संघटित करण्यावर विशेष लक्ष दिले जाईल, असेही त्यांनी सांगितले. दि. ३०/१२/२०२५ रोजी मुंबई येथील आंबेडकर भवन येथे रिपब्लिकन सेनेचा प्रवेश व नियुक्ती सोहळा मोठ्या उत्साहात पार पडला. या वेळी राष्ट्रीय अध्यक्ष सरसेनानी आनंदराज आंबेडकर साहेब यांच्या हस्ते विशाल बागुल पाचोरा, दीपक राजपूत सातगाव डोंगरी आणि विलास चव्हाण चाळीसगाव यांनी अधिकृतपणे रिपब्लिकन सेनेमध्ये प्रवेश केला. याच कार्यक्रमात विशाल बागुल यांची पाचोरा तालुका अध्यक्षपदी, दीपक राजपूत यांची पाचोरा महासचिवपदी, तर विलास चव्हाण यांची चाळीसगाव तालुका अध्यक्षपदी नियुक्ती जाहीर करण्यात आली. या कार्यक्रमास रिपब्लिकन सेनेचे प्रदेश सचिव विनोद कांबळे, जळगाव जिल्हा अध्यक्ष विनोद सोनवणे, कामगार सेना जिल्हाध्यक्ष प्रमोद इंगळे यांच्यासह अनेक मान्यवर, पदाधिकारी आणि कार्यकर्ते उपस्थित होते. उपस्थितांनी नवनियुक्त पदाधिकाऱ्यांचे अभिनंदन करत, त्यांच्या माध्यमातून संघटना अधिक बळकट होईल, असा विश्वास व्यक्त केला. विशाल बागुल यांच्या नियुक्तीमुळे पाचोरा तालुक्यातील आंबेडकरी चळवळीला नवे नेतृत्व मिळाले असून, सामाजिक लढ्यांना अधिक धार मिळेल, अशी भावना मित्रपरिवार, कार्यकर्ते आणि विविध स्तरातून व्यक्त होत आहे. संविधान, समता आणि बंधुता या मूल्यांसाठी झुंजारपणे लढणाऱ्या या योद्ध्याकडून रिपब्लिकन सेनेच्या संघटनात्मक वाटचालीला निश्चितच नवी दिशा मिळेल, असा विश्वास सर्वत्र व्यक्त केला जात आहे.

मेष –आज नवीन वर्षाची सुरुवात आत्मविश्वासाने होईल. रखडलेली कामे मार्गी लागण्याची शक्यता आहे. आर्थिक बाबतीत सावध निर्णय घ्या. कुटुंबात समजूतदारपणा ठेवल्यास वातावरण प्रसन्न राहील.
शुभ अंक: 9 | शुभ रंग: लाल

वृषभ– आज मन स्थिर राहील व विचार स्पष्ट होतील. खर्चावर नियंत्रण ठेवल्यास फायदा होईल. कामाच्या ठिकाणी संयम आवश्यक आहे. आरोग्याकडे दुर्लक्ष करू नका.
शुभ अंक: 6 | शुभ रंग: हिरवा

मिथुन-संवाद कौशल्यामुळे आज लाभ होईल. नवीन ओळखी निर्माण होतील. प्रवासाचे योग संभवतात. घाईत निर्णय घेणे टाळा.
शुभ अंक: 5 | शुभ रंग: पिवळा

कर्क–भावनिक विचारांवर संयम ठेवा. कुटुंबाशी संबंधित महत्त्वाचा निर्णय घ्यावा लागू शकतो. आर्थिक स्थिती हळूहळू सुधारेल. विश्रांतीला वेळ द्या.
शुभ अंक: 2 | शुभ रंग: पांढरा

सिंह –आज तुमच्या नेतृत्वगुणांना वाव मिळेल. मान–सन्मान वाढण्याची शक्यता आहे. अहंकार टाळल्यास संबंध सुधारतील. नवीन संधी मिळू शकते.
शुभ अंक: 1 | शुभ रंग: सोनेरी

कन्या–आज नियोजनबद्ध काम केल्यास यश मिळेल. कामाचा ताण जाणवू शकतो. आरोग्याची काळजी घ्या. छोट्या गोष्टीत आनंद शोधा.
शुभ अंक: 4 | शुभ रंग: निळा

तुळ–समतोल राखण्याचा आजचा दिवस आहे. भागीदारीतून लाभ संभवतो. खर्च आणि उत्पन्न यांचा ताळमेळ ठेवा. वैयक्तिक नात्यांत स्पष्टता ठेवा.
शुभ अंक: 7 | शुभ रंग: गुलाबी

वृश्चिक–आज आत्मपरीक्षणाचा दिवस आहे. गुप्त शत्रूंपासून सावध रहा. मेहनतीचे फळ मिळण्यास सुरुवात होईल. संयम ठेवल्यास यश निश्चित आहे.
शुभ अंक: 8 | शुभ रंग: गडद लाल

धनु –नवीन वर्षी नवीन विचार व उद्दिष्टे ठरतील. शिक्षण व प्रवासासाठी अनुकूल दिवस आहे. उत्साह जास्त राहील. खर्चावर लक्ष ठेवा.
शुभ अंक: 3 | शुभ रंग: जांभळा

मकर–कामाच्या क्षेत्रात जबाबदाऱ्या वाढतील. वरिष्ठांचे सहकार्य मिळेल. आर्थिक स्थैर्य हळूहळू येईल. धैर्य व सातत्य ठेवा.
शुभ अंक: 10 | शुभ रंग: करडा

कुंभ-नवीन कल्पना सुचतील व त्या अमलात आणण्याची संधी मिळेल. मित्रमंडळींचे सहकार्य लाभेल. सामाजिक कार्यात सहभाग वाढेल.
शुभ अंक: 11 | शुभ रंग: आकाशी

मीन–आज अंतर्मन शांत ठेवणे गरजेचे आहे. आध्यात्मिक विचार वाढतील. आर्थिक निर्णय विचारपूर्वक घ्या. कुटुंबाचा आधार मिळेल.
शुभ अंक: 12 | शुभ रंग: समुद्री हिरवा

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

पाचोरा – पाचोरा नगरपालिकेतील भाजपाच्या नगरसेवकांनी एकमताने निर्णय घेत सुरज संजय वाघ यांची भाजप गटनेतेपदी निवड केली. स्थानिक राजकारणाच्या दृष्टीने ही निवड महत्त्वाची मानली जात असून नगरपालिकेतील भाजपाच्या आगामी वाटचालीसाठी ही निवड दिशादर्शक ठरणार असल्याची भावना यावेळी उपस्थितांमधून व्यक्त करण्यात आली. पक्ष संघटन मजबूत ठेवणे, नगरविकासाशी संबंधित प्रश्न प्रभावीपणे मांडणे आणि सर्व नगरसेवकांना एकत्र घेऊन काम करणे या जबाबदाऱ्या सुरज वाघ यांच्यावर सोपविण्यात आल्या आहेत. या निवडीप्रसंगी माजी आमदार दिलीप भाऊ वाघ, अमोल भाऊ शिंदे, वैशालीताई सूर्यवंशी, संजय वाघ यांची प्रमुख उपस्थिती होती. तसेच नवनिर्वाचित नगरसेवक सुरज वाघ, राहुल गायकवाड, सौ. कविता विनोद पाटील, सौ. कविता उमेश हटकर, गोपाल अर्जुनदास वासवाणी, देशमुख आमरीन अब्दुल रहेमान यांच्यासह भाजपाचे अनेक पदाधिकारी, कार्यकर्ते व समर्थक मोठ्या संख्येने उपस्थित होते. या बैठकीत सर्वांनी एकमताने सुरज वाघ यांच्या नावाला अनुमोदन दिले आणि कोणताही विरोध न होता त्यांची निवड जाहीर करण्यात आली. या वेळी बोलताना माजी आमदार दिलीप भाऊ वाघ यांनी सुरज वाघ यांचे अभिनंदन करत सांगितले की नगरपालिकेतील भाजप गटाने एकजुटीचे दर्शन घडविले असून ही एकजूटच शहराच्या विकासासाठी उपयोगी ठरेल. सुरज वाघ हे तरुण, अभ्यासू आणि जनतेशी थेट संवाद साधणारे नेतृत्व असल्याने त्यांच्याकडून प्रभावी भूमिका अपेक्षित आहे. नगरपालिकेतील विविध प्रश्नांवर भाजपाची भूमिका अधिक ठामपणे मांडली जाईल आणि नागरिकांच्या हितासाठी सातत्याने प्रयत्न केले जातील असा विश्वास त्यांनी व्यक्त केला. अमोल भाऊ शिंदे व वैशालीताई सूर्यवंशी यांनीही या निवडीचे स्वागत करत सुरज वाघ यांना पुढील कार्यकाळासाठी शुभेच्छा दिल्या. त्यांनी पाचोरा शहरातील पायाभूत सुविधा, स्वच्छता, पाणीपुरवठा, रस्ते, आरोग्य व शिक्षण यांसारख्या मूलभूत प्रश्नांवर भाजप गटाने ठोस भूमिका घेणे आवश्यक असल्याचे नमूद केले. या कार्यक्रमाला भाजपाचे ज्येष्ठ कार्यकर्ते मधुकर काटे, सुभाष पाटील, बन्सीलाल पाटील, प्रदीप पाटील, नंदू सोमवंशी, सचिन भोसले, भूषण वाघ, वासुदेव महाजन, विकास पाटील, शरद सुभाष पाटील, विनोद सुभाष पाटील, लकी पाटील, ॲड. अविनाश सुतार, सुनील पाटील सर, ए. बी. अहिरे, सतीश बापू शिंदे, टिपू देशमुख, बंटी हटकर, दीपक माने, स्वप्निल सोनार, विनोद पाटील, ॲड. ललित सुतार, पिंटू चौधरी, जगदीश पाटील, निखिल डी पाटील, बंटी महाजन, कृष्णा साळुंखे आदी मान्यवर उपस्थित होते. या सर्वांनी नवनिर्वाचित गटनेते सुरज वाघ यांचे मनःपूर्वक अभिनंदन केले. निवडीनंतर सुरज वाघ यांचा उपस्थित मान्यवरांच्या हस्ते सत्कार करण्यात आला. सत्काराला उत्तर देताना सुरज वाघ यांनी सर्वांचे आभार मानले आणि ही जबाबदारी केवळ पद म्हणून नव्हे तर सेवेची संधी म्हणून स्वीकारत असल्याचे सांगितले. पाचोरा शहराच्या सर्वांगीण विकासासाठी भाजप गट एकसंघ राहून काम करेल, सामान्य नागरिकांच्या अडचणी, प्रलंबित प्रश्न आणि नगरपालिकेतील प्रशासनाशी संबंधित बाबींवर ठामपणे भूमिका मांडली जाईल असे त्यांनी स्पष्ट केले. तसेच पक्षाच्या ज्येष्ठ नेत्यांनी दाखविलेल्या विश्वासास पात्र ठरण्याचा प्रामाणिक प्रयत्न करणार असून सर्व नगरसेवकांना सोबत घेऊन सकारात्मक वातावरणात काम केले जाईल असेही त्यांनी नमूद केले. शहरातील विकासकामांना गती देणे, केंद्र व राज्य शासनाच्या योजनांचा लाभ अधिकाधिक नागरिकांपर्यंत पोहोचवणे आणि नगरपालिकेतील कारभार अधिक पारदर्शक करण्यासाठी भाजप गट प्रयत्नशील राहील असा विश्वास त्यांनी व्यक्त केला. या निवडीमुळे पाचोरा नगरपालिकेतील भाजप गटाला नवे नेतृत्व मिळाले असून आगामी काळात नगरपालिकेतील राजकारणात अधिक सक्रिय आणि प्रभावी भूमिका भाजपाकडून पाहायला मिळेल अशी चर्चा शहरात होत आहे.