पाचोरा — देशाच्या सीमारेषेवर उभा राहून प्रत्येक नागरिकाच्या सुरक्षिततेची जबाबदारी खांद्यावर घेतलेला जवान जेव्हा आपल्या कुटुंबापासून दूर असतो, तेव्हा त्याच्या मागे उभा राहणारा समाजच त्याचे खरे बळ ठरतो. अशाच एका संवेदनशील प्रसंगात पाचोरा शहराने माणुसकीचे तेजस्वी उदाहरण घालून दिले आहे. बीएसएफमध्ये कार्यरत असलेले सागर दिलीप शेळके हे सध्या देशरक्षणाच्या कर्तव्यात तल्लीन असताना त्यांच्या वडिलांवर अचानक गंभीर शस्त्रक्रियेची वेळ आली आणि या कठीण क्षणी समाजाने एकदिलाने पुढे येत मदतीचा हात दिला. दिलीप शिवाजी शेळके यांना पाचोरा येथील निरामय हॉस्पिटलमध्ये दाखल करण्यात आले होते. डॉ.चारूदत्त खानोरे यांनी तातडीने शस्त्रक्रिया करण्याचा सल्ला दिला, मात्र त्यासाठी O Positive रक्ताची तातडीची आवश्यकता निर्माण झाली. कुटुंबीयांसमोर वेळेचे आणि परिस्थितीचे मोठे आव्हान उभे ठाकले होते. एका बाजूला मुलगा देशाच्या सीमेवर खंबीरपणे उभा

राहून राष्ट्रसेवा करत होता, तर दुसऱ्या बाजूला त्याच्या वडिलांच्या जीविताचा प्रश्न निर्माण झाला होता. अशा प्रसंगी समाजाची साथ मिळणे हीच खरी आशेची किरण ठरली. या संपूर्ण घटनेला वळण मिळाले तेव्हा,कॉपी पेस्ट न करणाऱ्या जेव्हा ध्येय न्युजने अत्यंत हृदयस्पर्शी शब्दांत ही बातमी समाजापर्यंत पोहोचवली. बातमी प्रसिद्ध होताच पाचोरा शहरात एक वेगळाच भावनिक प्रतिसाद उमटू लागला. केवळ पुरुषच नव्हे, तर महिलाही मोठ्या संख्येने रक्तदानासाठी पुढे सरसावल्या. जणू काही “सेवा हीच खरी पूजा” या भावनेने प्रत्येक नागरिक प्रेरित झाला होता. “It happens only in India.” ही भावना पुन्हा एकदा प्रत्यक्षात उतरलेली पाहायला मिळाली. स्वामी विवेकानंद यांनी सांगितले होते, “ज्यांना इतरांसाठी जगता येते, तेच खरे जिवंत असतात,” आणि महात्मा गांधींच्या “स्वतःला शोधायचे असेल तर इतरांच्या सेवेत स्वतःला हरवून टाका” या विचारांची प्रचिती या प्रसंगातून स्पष्टपणे आली. समाजसुधारक महात्मा ज्योतिराव फुले यांनीही “मानवतेची सेवा हीच खरी ईश्वरसेवा” असे प्रतिपादन केले होते. या सर्व महान विचारांची जाणीव पाचोरा शहरातील नागरिकांनी आपल्या कृतीतून करून दिली. या मदतीच्या कार्यात विशेष उल्लेख करावा लागेल तो फातेमा मुर्तुजा नगारिया आणि जितेश पंजवाणी यांचा. बोहरी समाजाची महिला भगिनी म्हणून फातेमा मुर्तुजा नगारिया यांनी दाखवलेला पुढाकार हा स्त्रीशक्तीचा आणि सामाजिक बांधिलकीचा प्रभावी नमुना ठरला. मुर्तुजा हार्डवेअरचे संचालक मुर्तुजा नगारिया यांच्या पत्नी फातेमा नगारिया, ज्या व्यवसायाने लेखापाल आहेत, त्यांनी सर्वप्रथम पुढाकार घेत रक्तदान केले. एकाच वेळी गृहिणी, व्यावसायिक आणि सामाजिक जाणीव असलेली नागरिक म्हणून त्यांनी आपली जबाबदारी पार पाडत समाजासमोर एक आदर्श निर्माण केला. त्यांच्यासोबतच मोबाईल व्यावसायिक जितेश पंजवाणी यांनीही तातडीने प्रतिसाद देत रक्तदान केले. भारत-पाकिस्तान फाळणीची सर्वाधिक झळ सोसूनही राखेतून फिनिक्स पक्ष्यासारखी पुन्हा उभारी घेत विकासाच्या दिशेने झेपावलेल्या सिंधी समाजाचे प्रतिनिधित्व करणारा हा युवक म्हणून जितुभाईंचा सहभाग विशेष उल्लेखनीय ठरतो. कोणत्याही प्रकारची प्रसिद्धी किंवा अपेक्षा न ठेवता, केवळ मानवतेच्या भावनेतून त्यांनी केलेले हे कार्य समाजासाठी प्रेरणादायी ठरले आहे. त्यांच्या या कृतीमुळे केवळ एका व्यक्तीचा जीव वाचवण्यास मदत झाली नाही, तर समाजातील एकोपा आणि सहकार्याची भावना अधिक दृढ झाली. या संपूर्ण उपक्रमामागे रोहित महाजन, आर्मी ग्रुप खान्देशचे संस्थापक अध्यक्ष यांची भूमिका देखील मोलाची ठरली. त्यांनी ध्येय न्युज मार्फत नागरिकांना भावनिक आवाहन करत सांगितले की, “आपल्या जवानाच्या कुटुंबावर आलेले संकट दूर करण्यासाठी प्रत्येकाने पुढाकार घेणे आवश्यक आहे. रक्तदानासारखे पवित्र कार्य केवळ एखाद्या व्यक्तीचे जीवन वाचवत नाही, तर समाजात मानवतेचा संदेशही पोहोचवते.” त्यांच्या या आवाहनाला मिळालेला प्रतिसाद हा समाजाच्या संवेदनशीलतेचा पुरावा आहे. छत्रपती शिवाजी महाराजांनी आपल्या मावळ्यांसोबत ज्या प्रकारे विश्वास आणि बांधिलकीचे नाते जपले, त्याच परंपरेचा वारसा आजही आपल्या समाजात जिवंत आहे, हे या प्रसंगातून अधोरेखित झाले. देश हितासाठी लढणाऱ्या जवानाच्या कुटुंबीयांची काळजी घेणे ही प्रत्येक नागरिकाची नैतिक जबाबदारी असल्याचे या घटनेतून स्पष्ट झाले. या घटनेने पाचोरा शहराला एक नवी ओळख मिळवून दिली आहे. येथे केवळ शब्दांनी नव्हे, तर कृतीतून देशभक्ती व्यक्त केली जाते, हे पुन्हा एकदा सिद्ध झाले आहे. संकटाच्या काळात कोणतीही अपेक्षा न ठेवता मदतीला धावून जाणे, हीच खरी भारतीय संस्कृती आहे आणि याच संस्कृतीचा वारसा पुढे नेण्याचे कार्य पाचोरा शहराने केले आहे. आजच्या धावपळीच्या आणि स्वार्थी जीवनशैलीत अशा प्रकारच्या घटना समाजाला एक नवा दृष्टिकोन देतात. त्या आपल्याला आठवण करून देतात की, माणुसकी अजूनही जिवंत आहे आणि योग्य वेळी ती अधिक तेजस्वीपणे प्रकट होते. एका जवानाच्या कुटुंबासाठी पुढे आलेल्या या मदतीने केवळ एका घराला आधार दिला नाही, तर संपूर्ण समाजाला एकत्र बांधण्याचे कार्य केले आहे. अशा या प्रेरणादायी घटनेतून प्रत्येकाने एक धडा घेण्याची गरज आहे. देशासाठी लढणाऱ्या जवानांप्रती कृतज्ञता व्यक्त करण्याचे अनेक मार्ग असले तरी त्यांच्या कुटुंबाच्या अडचणीच्या वेळी प्रत्यक्ष मदतीला धावून जाणे, हीच खरी राष्ट्रसेवा आहे. पाचोरा शहराने हे दाखवून दिले आहे की, देशभक्ती केवळ घोषणांमध्ये नसते किंवा पुरस्कार विकणे व पुरस्कार विकत घेणे यातून सिद्ध होत नाही . तर ती अशा कृतीतून सिद्ध करावी लागते.आणि हाच खरा मानवतेचा पुरस्कार असतो

पाचोरा – जीवनाच्या वाटचालीत संघर्ष, प्रामाणिकपणा आणि न थकणारी जिद्द हेच खरे भांडवल असते, याचे जिवंत उदाहरण म्हणजे सुरेश धनराज तांबे. पहाटेच्या शांत वातावरणात, शहर अजून गाढ झोपेत असताना, सायकलवरून वृत्तपत्रांचे वितरण करत आपल्या कुटुंबाचा उदरनिर्वाह करणाऱ्या या कष्टकरी व्यक्तिमत्त्वाला आज समाजाने उंच स्थानावर पोहोचवले आहे. श्री. विवेक वर्धिनी नागरी सहकारी पतसंस्था मर्यादित, पाचोरा या प्रतिष्ठित संस्थेच्या संचालकपदी त्यांची झालेली निवड ही केवळ एक पदप्राप्ती नसून, ती त्यांच्या दीर्घकालीन परिश्रमांची आणि प्रामाणिक कार्याची सन्माननीय दखल आहे. पाचोरा शहरातील आर्थिक क्षेत्रात भक्कम स्थान निर्माण केलेल्या या पतसंस्थेकडे भाजप व RSS ची विचारसरणी असलेली संस्था म्हणूनही पाहिले जाते, त्यामुळेच या निवडीला एक वेगळे सामाजिक व वैचारिक महत्त्व प्राप्त झाले आहे. गेल्या तब्बल ४५ वर्षांपासून सुरेश तांबे यांनी अत्यंत साध्या पद्धतीने, कोणत्याही दिखाव्याशिवाय आपले कार्य सुरू ठेवले. दररोज पहाटे चार वाजता दिवसाची सुरुवात करून सकाळी नऊपर्यंत ते सायकलवरून विविध वृत्तपत्रे घराघरांत आणि शासकीय कार्यालयांत पोहोचवत असतात. पावसाची रिपरिप असो, हिवाळ्याची कडाक्याची थंडी असो किंवा उन्हाळ्याचे चटके – कोणत्याही परिस्थितीत त्यांनी आपले कर्तव्य कधीही सोडले नाही. त्यांच्या या चिकाटीने आणि निष्ठेने त्यांना सामान्य लोकांच्या मनात एक वेगळी ओळख निर्माण करून दिली आहे. पत्रकार म्हणूनही त्यांनी ‘दैनिक तरुण भारत’साठी काम करत असताना समाजातील विविध प्रश्नांना वाचा फोडली. त्यांच्या लेखणीतून सामान्य माणसाच्या वेदना आणि अपेक्षा व्यक्त झाल्या. त्यामुळेच त्यांचे व्यक्तिमत्त्व केवळ वृत्तपत्र वितरण करणाऱ्या व्यक्तीपुरते मर्यादित न राहता, समाजमनाचा आवाज बनले. “कष्ट करणाऱ्याला यशाचा मुकुट नक्कीच मिळतो,” ही उक्ती त्यांच्या आयुष्यात अक्षरशः खरी ठरली आहे. श्री. विवेक वर्धिनी नागरी सहकारी पतसंस्था ही पाचोरा शहरातील आर्थिक क्षेत्रात प्रगतीच्या शिखरावर असलेली संस्था म्हणून ओळखली जाते. या संस्थेच्या संचालकपदी सुरेश तांबे यांची निवड होणे म्हणजे संस्थेने एका प्रामाणिक, जमिनीवरच्या माणसाला संधी देत समाजाला एक सकारात्मक संदेश दिला आहे. “मोठेपणा पदात नसतो, तो माणुसकीत असतो,” हे त्यांच्या निवडीमुळे पुन्हा अधोरेखित झाले आहे. दि. २७ एप्रिल २०२७, सोमवार रोजी पतसंस्थेकडून आयोजित करण्यात आलेल्या सत्कार समारंभात सुरेश तांबे यांचा शाल, पुष्पहार आणि पुष्पगुच्छ देऊन गौरव करण्यात आला. या कार्यक्रमाला चेअरमन सदाशिव (आबा) त्र्यंबक पाटील, व्हाईस चेअरमन आशिष रमेशचंद्र लाहोटी, संचालक वसंत गोविंदा महाजन, संचालक मिलिंद नामदेव गायकवाड, संचालक शांताराम झगा पाटील, संचालक सचिन पुरुषोत्तम देशपांडे, संचालिका श्रीमती निर्मला सुरेश अमृतकर, संचालिका सौ. नीलिमा प्रकाश पाटील, संचालिका सौ. प्रियंका विनोद पाटील, मॅनेजर धर्मेश अग्रवाल यांच्यासह संजय कुलकर्णी, नंदू कुलकर्णी, अनिल पाटील, भरत तिवारी, सतीश जाधव, संजय नालकर आदी मान्यवर मोठ्या संख्येने उपस्थित होते. या वेळी उपस्थित मान्यवरांनी सुरेश तांबे यांच्या कार्याची आणि जीवनप्रवासाची मनापासून प्रशंसा केली. त्यांच्या संघर्षमय जीवनातून प्रेरणा घेण्याचे आवाहनही करण्यात आले. “यश म्हणजे एका दिवसाची कमाई नसते, ती अनेक वर्षांच्या घामाने आणि त्यागाने घडते,” या शब्दांत त्यांच्या वाटचालीचे वर्णन करण्यात आले. सत्काराला उत्तर देताना सुरेश तांबे यांनी अत्यंत नम्रपणे आपली भावना व्यक्त केली. त्यांनी सांगितले की, “माझ्यासारख्या सामान्य माणसाला इतक्या मोठ्या पदावर संधी देणे ही माझ्यासाठी मोठी जबाबदारी आहे. मी या विश्वासाला तडा जाऊ देणार नाही. समाजासाठी, संस्थेसाठी आणि सर्वसामान्य सदस्यांसाठी प्रामाणिकपणे काम करणे हेच माझे ध्येय असेल.” त्यांच्या या साध्या पण मनापासून आलेल्या शब्दांनी उपस्थितांच्या डोळ्यांत आनंदाश्रू तरळले. त्यांच्या निवडीमुळे पाचोरा शहरात एक वेगळीच सकारात्मक लहर निर्माण झाली आहे. सर्व स्तरांतून त्यांच्यावर अभिनंदनाचा वर्षाव होत असून, त्यांच्या यशामागील संघर्षाची कहाणी अनेकांसाठी प्रेरणादायी ठरत आहे. “जिद्द असेल तर परिस्थिती कितीही कठीण असली तरी माणूस स्वतःचे स्थान निर्माण करू शकतो,” हा संदेश त्यांच्या जीवनातून स्पष्टपणे दिसून येतो. आजच्या स्पर्धात्मक आणि दिखाऊ जगात, साधेपणा आणि प्रामाणिकपणाची किंमत कमी होत चालली असताना सुरेश तांबे यांची निवड ही एक आशेची किरण ठरली आहे. त्यांच्या यशामुळे अनेकांना नव्याने उभारी मिळाली असून, कष्टाला पर्याय नाही हे पुन्हा एकदा सिद्ध झाले आहे. सुरेश तांबे यांचा हा प्रवास केवळ वैयक्तिक यशापुरता मर्यादित नाही, तर तो प्रत्येक त्या व्यक्तीचा विजय आहे जो प्रामाणिकपणे मेहनत करतो, संघर्षाला घाबरत नाही आणि आपल्या ध्येयासाठी सतत प्रयत्नशील राहतो. त्यांच्या कार्यातून आणि व्यक्तिमत्त्वातून समाजाला एक नवी दिशा मिळेल, अशी अपेक्षा व्यक्त केली जात आहे. अशा या कष्टाळू, जिद्दी आणि प्रामाणिक व्यक्तिमत्त्वाच्या निवडीमुळे पाचोरा शहराचा अभिमान अधिक उंचावला आहे. त्यांच्या पुढील वाटचालीसाठी सर्व स्तरांतून शुभेच्छांचा वर्षाव होत असून, त्यांच्या कार्यातून समाजहिताचे नवे अध्याय लिहिले जातील, असा विश्वास व्यक्त होत आहे.

पाचोरा-भडगाव तालुक्यात उत्साहाचे वातावरण पाचोरा : यश हे केवळ वैयक्तिक कर्तृत्वाचे प्रतीक नसून समाजासाठी प्रेरणादायी ठरणारे दीपस्तंभ असते, या भावनेतून पाचोरा-भडगाव तालुक्यातील स्पर्धा परीक्षा व पोलीस भरतीत यश मिळवलेल्या विद्यार्थ्यांचा भव्य सत्कार सोहळा आयोजित करण्यात आला आहे. लोकप्रिय आमदार किशोर आप्पा पाटील यांच्या मार्गदर्शनाखाली आणि पाचोरा-भडगाव शिवसेना युवा सेनेच्या पुढाकारातून हा प्रेरणादायी उपक्रम साकारला जात असून, संपूर्ण तालुक्यात या कार्यक्रमाबद्दल उत्सुकतेचे वातावरण निर्माण झाले आहे. शुक्रवार दिनांक १ मे २०२६ रोजी सकाळी १० वाजता छत्रपती शिवाजी महाराज चौक, पाचोरा येथील शिवसेना मध्यवर्ती कार्यालयात हा भव्य सत्कार समारंभ पार पडणार आहे. या कार्यक्रमात विविध स्पर्धा परीक्षांमध्ये उत्तीर्ण झालेल्या तसेच पोलीस भरतीत यश संपादन केलेल्या विद्यार्थ्यांचा गौरव करण्यात येणार असून, त्यांच्या पालकांचाही सन्मान करण्यात येणार आहे. विद्यार्थ्यांच्या यशामागे पालकांचे योगदान महत्त्वाचे असल्याची जाणीव ठेवून हा उपक्रम राबवण्यात येत असल्याचे आयोजकांनी स्पष्ट केले आहे. या सोहळ्याचे प्रमुख मार्गदर्शक म्हणून प्रा. राजेंद्र चिंचोले उपस्थित राहणार आहेत. त्यांच्या मार्गदर्शनातून विद्यार्थ्यांना भविष्यातील दिशा, अभ्यासाचे नियोजन तसेच स्पर्धात्मक परीक्षांमध्ये यशस्वी होण्यासाठी आवश्यक असलेले गुण याबाबत मौल्यवान मार्गदर्शन मिळणार आहे. त्यांच्या उपस्थितीमुळे कार्यक्रमाला शैक्षणिक व वैचारिक उंची लाभणार असल्याची अपेक्षा व्यक्त होत आहे. कार्यक्रमाला विविध क्षेत्रातील मान्यवरांची उपस्थिती लाभणार आहे. प्रांताधिकारी पाचोरा भूषणअहिरे, पोलीस उप अधीक्षक पाचोरा बापू रोहम, तहसीलदार पाचोरा विजय बनसोडे, पोलीस निरीक्षक राहुल पवार तसेच मुख्याधिकारी मंगेश देवरे हे प्रमुख अतिथी म्हणून उपस्थित राहणार आहेत. प्रशासनातील उच्चपदस्थ अधिकारी विद्यार्थ्यांच्या यशाचा गौरव करताना त्यांच्या अनुभवातून प्रेरणादायी विचार मांडतील, अशी अपेक्षा व्यक्त होत आहे. याशिवाय नगराध्यक्ष पाचोरा सुनीताताई पाटील, जिल्हा अध्यक्ष शिवसेना रावसाहेब पाटील, कृषी उत्पन्न बाजार समितीचे सभापती गणेश पाटील, पाचोरा नगरपालिका गटनेते सुमित पाटील, उपनगराध्यक्ष किशोर बारावकर, राजेंद्र पाटील, विनोद तावडे, समाधान पाटील, सुधाकर पाटील, भोला पाटील, अजय चौधरी, नंदकिशोर देवरे यांचीही प्रमुख उपस्थिती राहणार आहे. या सर्व मान्यवरांच्या उपस्थितीत विद्यार्थ्यांचा सत्कार होणार असल्याने कार्यक्रमाचे महत्त्व अधिकच वाढले आहे. स्पर्धा परीक्षा व पोलीस भरती ही आजच्या काळात अत्यंत कठीण आणि स्पर्धात्मक प्रक्रिया बनली आहे. अशा परिस्थितीत ग्रामीण भागातील विद्यार्थ्यांनी कठोर परिश्रम, चिकाटी आणि सातत्याच्या जोरावर यश मिळवणे ही अभिमानास्पद बाब मानली जात आहे. या यशस्वी विद्यार्थ्यांच्या कार्याचा गौरव करून त्यांना प्रोत्साहन देणे तसेच इतर विद्यार्थ्यांसाठी प्रेरणादायी उदाहरण निर्माण करणे हा या सत्कार समारंभाचा मुख्य उद्देश आहे. या कार्यक्रमाच्या माध्यमातून विद्यार्थ्यांना त्यांच्या यशाचा सन्मान मिळणार असून त्यांच्या आत्मविश्वासात भर पडणार आहे. तसेच इतर विद्यार्थ्यांना देखील स्पर्धा परीक्षांकडे आकर्षित करून त्यांना योग्य दिशा देण्याचा प्रयत्न केला जाणार आहे. समाजात सकारात्मक स्पर्धात्मक वातावरण निर्माण करण्यासाठी अशा उपक्रमांची आवश्यकता असल्याचे मत अनेकांनी व्यक्त केले आहे. पाचोरा-भडगाव शिवसेना युवा सेनेच्या वतीने या कार्यक्रमाचे नियोजन करण्यात आले असून सर्व तयारी पूर्णत्वाकडे गेली आहे. कार्यक्रम सुरळीत आणि प्रभावीपणे पार पडावा यासाठी कार्यकर्ते मेहनत घेत आहेत. विद्यार्थ्यांच्या सन्मानाचा हा सोहळा संस्मरणीय ठरेल असा विश्वास आयोजकांनी व्यक्त केला आहे. या भव्य सत्कार समारंभाला जास्तीत जास्त नागरिकांनी उपस्थित राहून विद्यार्थ्यांचा उत्साह वाढवावा असे आवाहन आयोजकांच्या वतीने करण्यात आले आहे. यशस्वी विद्यार्थ्यांच्या कर्तृत्वाचा साक्षीदार होण्याची आणि त्यांच्याकडून प्रेरणा घेण्याची ही सुवर्णसंधी असल्याने नागरिकांनी मोठ्या संख्येने उपस्थित राहावे असेही आवाहन करण्यात आले आहे. समाजातील तरुण पिढीला योग्य दिशा देण्यासाठी आणि त्यांच्या यशाचा गौरव करण्यासाठी आयोजित करण्यात आलेला हा उपक्रम निश्चितच प्रेरणादायी ठरणार असून भविष्यातही अशा उपक्रमांची परंपरा सुरू राहील अशी अपेक्षा व्यक्त होत आहे.

पाचोरा – राज्यातील पाणीपुरवठा व स्वच्छता क्षेत्रात महत्त्वाची भूमिका बजावणाऱ्या महाराष्ट्र जीवन प्राधिकरण कंत्राटदार संघटनेच्या नव्या कार्यकारिणीची निवड नुकतीच मुंबई येथे पार पडलेल्या बैठकीत एकमताने करण्यात आली. या निवडीत पाचोरा येथील लक्ष्मी कन्स्ट्रक्शन या नामांकित बांधकाम संस्थेचे कार्यकारी संचालक संजयभाऊ कुमावत यांची सचिवपदी झालेली निवड विशेष लक्षवेधी ठरली असून जळगाव जिल्ह्यासह संपूर्ण उत्तर महाराष्ट्रात आनंदाचे वातावरण निर्माण झाले आहे. संघटनेच्या भविष्यातील धोरणात्मक निर्णय प्रक्रियेत महत्त्वाची भूमिका बजावणाऱ्या या पदावर अनुभवी आणि अभ्यासू व्यक्तिमत्त्वाची निवड झाल्याने कंत्राटदारांमध्ये नव्या अपेक्षांना उधाण आले आहे. मुंबई येथे आयोजित या महत्त्वपूर्ण बैठकीस राज्याच्या विविध भागांतून मोठ्या संख्येने कंत्राटदार उपस्थित होते. महाराष्ट्र जीवन प्राधिकरण तसेच पाणीपुरवठा व स्वच्छता विभागाशी निगडित कामांमध्ये येणाऱ्या अडचणी, तांत्रिक बदल, धोरणात्मक प्रश्न आणि कंत्राटदारांच्या व्यावसायिक समस्यांवर सखोल चर्चा करण्यात आली. बैठकीदरम्यान संघटनेच्या आगामी पाच वर्षांच्या वाटचालीसाठी सक्षम नेतृत्वाची गरज अधोरेखित करण्यात आली आणि त्यानुसार नव्या कार्यकारिणीची निवड करण्यात आली. या नव्या कार्यकारिणीत अध्यक्षपदी राजीव कृष्णाणी (पुणे), सचिवपदी संजयभाऊ कुमावत (पाचोरा), उपाध्यक्षपदी आर. ए. घुले (पालघर) आणि आर. के. मदानी (मुंबई) तसेच खजिनदारपदी सतीष रानडे (पुणे) यांची एकमताने निवड झाली. या सर्व पदाधिकाऱ्यांवर संघटनेची धुरा सोपवताना त्यांच्या अनुभव, कार्यक्षमता आणि संघटनात्मक दृष्टिकोनाचा विचार करण्यात

आला. विशेषतः सचिवपदासाठी संजयभाऊ कुमावत यांची निवड ही त्यांच्या दीर्घकालीन अनुभवाची आणि कार्यक्षेत्रातील ठोस कामगिरीची पावती मानली जात आहे. संजयभाऊ कुमावत हे गेल्या अनेक वर्षांपासून बांधकाम क्षेत्रात सक्रिय असून त्यांनी लक्ष्मी कन्स्ट्रक्शनच्या माध्यमातून विविध दर्जेदार प्रकल्प यशस्वीरित्या पूर्ण केले आहेत. कामातील काटेकोरपणा, वेळेचे नियोजन, गुणवत्ता राखण्याची बांधिलकी आणि प्रशासनाशी सुसंवाद साधण्याची क्षमता यामुळे त्यांनी स्वतःची वेगळी ओळख निर्माण केली आहे. विविध शासकीय प्रकल्पांमध्ये त्यांनी केलेल्या कामगिरीमुळे त्यांना क्षेत्रात विश्वासार्ह आणि सक्षम कंत्राटदार म्हणून मान्यता मिळाली आहे. केवळ व्यावसायिक क्षेत्रातच नव्हे तर संघटनात्मक कार्यातही त्यांनी नेहमीच पुढाकार घेतला आहे. कंत्राटदारांच्या समस्या, निधीअभावी अडकलेली कामे, बिल मंजुरीतील विलंब, तांत्रिक अडथळे आणि प्रशासनाशी असलेले समन्वयाचे प्रश्न या विषयांवर त्यांनी ठाम भूमिका मांडली आहे. त्यामुळे सचिवपदी त्यांची निवड ही संघटनेच्या भविष्यासाठी सकारात्मक पाऊल मानली जात असून त्यांच्या नेतृत्वाखाली संघटनेला नवे बळ मिळेल, असा विश्वास व्यक्त होत आहे. या बैठकीला उपस्थित असलेल्या मान्यवरांमध्ये विजय मुंडे (परळी), गणेश चव्हाण (छत्रपती संभाजीनगर), सानप (नांदेड), गवळी (पुणे) यांच्यासह राज्यातील विविध शहरांतील अनेक अनुभवी कंत्राटदारांचा समावेश होता. या सर्वांनी नव्या कार्यकारिणीच्या निवडीचे स्वागत करत संजयभाऊ कुमावत यांच्या नेतृत्वगुणांचे कौतुक केले. त्यांच्या दांडग्या संपर्काचा, सखोल अभ्यासाचा आणि समस्यांकडे पाहण्याच्या व्यावहारिक दृष्टिकोनाचा संघटनेला मोठा फायदा होईल, असे मत अनेकांनी व्यक्त केले. विशेष बाब म्हणजे उत्तर महाराष्ट्रातून पहिल्यांदाच या राज्यस्तरीय संघटनेत सचिवपदावर प्रतिनिधित्व मिळाले आहे. त्यामुळे जळगाव जिल्ह्यातील कंत्राटदारांमध्ये उत्साहाची लाट पसरली आहे. ग्रामीण आणि निमशहरी भागातील कंत्राटदारांना भेडसावणाऱ्या समस्यांकडे आता अधिक गांभीर्याने पाहिले जाईल, अशी अपेक्षा व्यक्त केली जात आहे. स्थानिक स्तरावर अडकलेली कामे, निधी वितरणातील अडचणी, तांत्रिक अडथळे आणि प्रशासकीय प्रक्रियेतील विलंब या सर्व मुद्द्यांवर प्रभावीपणे आवाज उठवण्यासाठी सक्षम नेतृत्व मिळाल्याची भावना कंत्राटदारांमध्ये दिसून येत आहे. नव्या कार्यकारिणीसमोर अनेक महत्त्वाची आव्हाने उभी आहेत. पाणीपुरवठा योजनांमधील तांत्रिक बदल, वाढती स्पर्धा, कामाच्या मोबदल्यातील असमतोल, वेळेत बिल मंजुरी न होणे, तसेच धोरणात्मक बदलांमुळे निर्माण होणाऱ्या अडचणी यावर ठोस उपाययोजना करणे आवश्यक आहे. या पार्श्वभूमीवर सचिव म्हणून संजयभाऊ कुमावत यांच्यावर मोठी जबाबदारी येणार आहे. शासन आणि कंत्राटदार यांच्यातील दुवा म्हणून काम करताना त्यांनी समन्वय साधून सर्वांसाठी न्याय्य निर्णय मिळवून देण्याची अपेक्षा व्यक्त होत आहे. संघटनेचे मावळते अध्यक्ष ज्ञानेश्वर अरगडे (पुणे), प्रशांत महागावकर आणि विजय मुंडे यांसह अनेक वरिष्ठांनी नव्या कार्यकारिणीचे अभिनंदन करत पुढील वाटचालीसाठी शुभेच्छा दिल्या. त्यांनी संघटनेच्या कामकाजात सातत्य, पारदर्शकता आणि समन्वय यांना प्राधान्य देण्याचे आवाहन केले. नव्या नेतृत्वाने कंत्राटदारांच्या हितासाठी ठोस भूमिका घेऊन संघटनेची उंची वाढवावी, अशी अपेक्षा त्यांनी व्यक्त केली. संजयभाऊ कुमावत यांच्या निवडीचे वृत्त समजताच पाचोरा शहरात आणि जळगाव जिल्ह्यातील विविध भागांतून त्यांचे अभिनंदन करण्यात आले. सहकारी, मित्रपरिवार, व्यावसायिक भागीदार आणि विविध सामाजिक क्षेत्रातील व्यक्तींनी त्यांना शुभेच्छांचा वर्षाव केला. त्यांच्या कार्यपद्धतीवर विश्वास व्यक्त करत पुढील कार्यकाळात ते कंत्राटदारांच्या समस्यांचे प्रभावी निराकरण करतील, अशी आशा सर्वांनी व्यक्त केली. राज्यातील पाणीपुरवठा योजनांच्या अंमलबजावणीत कंत्राटदारांची भूमिका अत्यंत महत्त्वाची मानली जाते. या योजनांमुळे ग्रामीण आणि शहरी भागातील नागरिकांना मूलभूत सुविधा उपलब्ध होतात. त्यामुळे या क्षेत्रात कार्यरत असलेल्या कंत्राटदारांच्या अडचणी सोडवणे आणि त्यांना योग्य मार्गदर्शन करणे हे संघटनेचे प्रमुख उद्दिष्ट आहे. या दृष्टीने अनुभवी आणि दूरदृष्टी असलेले नेतृत्व मिळणे ही संघटनेसाठी मोठी जमेची बाजू ठरत आहे. एकूणच, महाराष्ट्र जीवन प्राधिकरण कंत्राटदार संघटनेच्या नव्या कार्यकारिणीची निवड ही संघटनेच्या बळकटीसाठी महत्त्वाची पायरी ठरली असून संजयभाऊ कुमावत यांच्या सचिवपदी निवडीमुळे संघटनेच्या कार्यात नवी ऊर्जा आणि दिशा मिळेल, असा विश्वास व्यक्त होत आहे. त्यांच्या नेतृत्वाखाली कंत्राटदारांच्या समस्या अधिक प्रभावीपणे मांडल्या जातील आणि त्यावर ठोस उपाययोजना करण्यात येईल, अशी अपेक्षा व्यक्त करत राज्यभरातून त्यांच्यावर शुभेच्छांचा वर्षाव होत आहे.

जळगाव, दि. २१ एप्रिल (जिमाका वृत्तसेवा) – अन्नपदार्थांच्या गुणवत्तेबाबत आणि ग्राहकांच्या आरोग्याच्या दृष्टीने अत्यंत महत्त्वाचा मुद्दा समोर येत असताना अन्न व औषध प्रशासनाने अन्न व्यवसायिकांना स्पष्ट सूचना देत सजगतेचा इशारा दिला आहे. अन्न सुरक्षा व मानके कायदा, २००६ अंतर्गत नागरिकांना सुरक्षित, सकस आणि पारदर्शक माहिती असलेले अन्न मिळणे हा मूलभूत अधिकार असून, त्याचे पालन करणे प्रत्येक अन्न व्यवसायिकासाठी बंधनकारक आहे. मात्र, अलीकडील काही घटनांमुळे या नियमांकडे दुर्लक्ष होत असल्याचे स्पष्ट झाले आहे. राज्यातील विविध भागांतून प्राप्त

झालेल्या तक्रारींनुसार, काही रेस्टॉरंट्स, हॉटेल्स, केटरिंग सेवा आणि फास्ट फूड विक्रेते पनीरऐवजी “चीज अॅनालॉग”चा वापर करत असल्याचे उघड झाले आहे. विशेष म्हणजे, या पदार्थाचा वापर करून तयार केलेल्या खाद्यपदार्थांबाबत ग्राहकांना कोणतीही स्पष्ट माहिती दिली जात नसल्याने ग्राहकांची दिशाभूल होत आहे. काही ठिकाणी तर “चीज अॅनालॉग” किंवा “पनीर अॅनालॉग” यासारख्या पर्यायी पदार्थांची विक्री सरळ “पनीर” किंवा “चीज” या नावाने केली जात असल्याचेही निदर्शनास आले आहे. ही बाब अत्यंत गंभीर मानली जात असून, यामुळे ग्राहकांचा विश्वास ढासळण्याची शक्यता निर्माण

झाली आहे. अन्न सुरक्षा व मानके (अन्नपदार्थ मानके व अन्न मिश्रित पदार्थ) विनियम, २०११ नुसार “पनीर” हा पदार्थ केवळ दुधापासूनच तयार केला जाऊ शकतो, हे स्पष्टपणे नमूद करण्यात आले आहे. त्याउलट “डेअरी अॅनालॉग” किंवा “चीज अॅनालॉग” हे पदार्थ वनस्पती तेल, स्टार्च, इमल्सिफायर आणि इतर कृत्रिम घटकांच्या साहाय्याने तयार केले जातात. त्यामुळे या दोन पदार्थांमध्ये केवळ नावापुरता नव्हे तर गुणधर्म, पोषणमूल्य आणि दर्जाच्या दृष्टीनेही मोठा फरक आहे. यामुळे ग्राहकांना योग्य माहिती मिळणे अत्यावश्यक ठरते. अन्न व औषध प्रशासनाने यावर भर देत सांगितले आहे की, कोणत्याही अन्नपदार्थात जर “चीज अॅनालॉग”चा वापर करण्यात आला असेल, तर त्याचा स्पष्ट उल्लेख मेनूकार्ड, इलेक्ट्रॉनिक डिस्प्ले बोर्ड तसेच बिलावर करणे बंधनकारक आहे. लेबलिंग व डिस्प्ले नियम, २०२० नुसार ही माहिती ग्राहकांसमोर पारदर्शकपणे मांडणे आवश्यक आहे. या नियमांचे उल्लंघन केल्यास संबंधितांवर अन्न सुरक्षा व मानके अधिनियमांतर्गत कठोर कारवाई करण्यात येणार असल्याचा इशारा प्रशासनाने दिला आहे. या पार्श्वभूमीवर अन्न व्यवसायिकांची जबाबदारी अधिकच वाढली आहे. ग्राहकांच्या विश्वासावर चालणाऱ्या या व्यवसायात प्रामाणिकपणा आणि पारदर्शकता अत्यंत महत्त्वाची आहे. अल्प नफ्यासाठी किंवा खर्च कमी करण्याच्या हेतूने ग्राहकांची दिशाभूल करणे हे केवळ कायद्याचे उल्लंघन नाही, तर नैतिकदृष्ट्याही चुकीचे आहे. त्यामुळे व्यवसायिकांनी स्वतःहून नियमांचे पालन करत ग्राहकांना योग्य माहिती देणे गरजेचे आहे. तसेच, अन्न व्यवसाय परवाना घेताना दिलेली माहिती अद्ययावत ठेवण्याची सूचनाही प्रशासनाने दिली आहे. मोबाईल क्रमांक किंवा ई-मेल आयडीमध्ये बदल झाल्यास त्याची नोंद त्वरित करणे आवश्यक आहे. चुकीची किंवा अपूर्ण माहिती दिल्यास संबंधितांवर कारवाई होऊ शकते. प्रशासनाच्या दृष्टीने ही माहिती महत्त्वाची असल्याने ती अचूक आणि अद्ययावत असणे आवश्यक आहे. ग्राहकांनाही या प्रकरणात सजग राहण्याचे आवाहन करण्यात आले आहे. पनीर किंवा चीज खरेदी करताना त्यावरील लेबल नीट तपासणे, उत्पादनाची माहिती समजून घेणे आणि संशयास्पद बाब आढळल्यास बिल घेणे हे आवश्यक आहे. हॉटेल किंवा रेस्टॉरंटमध्ये ऑर्डर देताना वापरण्यात येणाऱ्या घटकांविषयी विचारणा करणेही तितकेच महत्त्वाचे आहे. ग्राहक जितके जागरूक राहतील, तितक्या प्रमाणात अशा गैरप्रकारांना आळा बसू शकतो. अन्न सुरक्षा आयुक्त श्रीधर डुबे-पाटील यांनी नागरिकांना आवाहन करताना सांगितले की, जर कोणत्याही ठिकाणी ग्राहकांची दिशाभूल होत असल्याचे आढळले, तर तात्काळ १८००-२२२-३६५ या टोल फ्री क्रमांकावर तक्रार नोंदवावी. प्रशासनाकडून अशा तक्रारींवर त्वरित कारवाई केली जाईल, असे त्यांनी स्पष्ट केले आहे. एकंदरीत, “चीज अॅनालॉग”चा वाढता वापर आणि त्यासंदर्भातील माहिती लपविण्याचे प्रकार हे ग्राहकांच्या आरोग्यासोबतच त्यांच्या विश्वासालाही तडा देणारे ठरत आहेत. त्यामुळे अन्न व्यवसायिकांनी नियमांचे काटेकोर पालन करत पारदर्शकता राखणे आवश्यक आहे, तर ग्राहकांनीही जागरूक राहून योग्य निर्णय घेणे गरजेचे आहे. प्रशासनाच्या या कठोर भूमिकेमुळे भविष्यात अशा प्रकारांना निश्चितच आळा बसेल, अशी अपेक्षा व्यक्त केली जात आहे.

एरंडोल – जळगाव जिल्ह्यातील एरंडोल तालुक्यातील खडकी बु. येथील रहिवासी विवाहित शशिकांत सुरेश चौधरी (वय 39) हे दि. 25 डिसेंबर 2023 पासून बेपत्ता असून तब्बल दोन वर्षांचा कालावधी उलटूनही त्यांचा कोणताही ठावठिकाणा लागलेला नाही. या प्रकरणी एरंडोल पोलीस स्थानकात बेपत्ता नोंद करण्यात आलेली असतानाही तपासाची गती मंद असल्याची चर्चा परिसरात सुरू आहे. शशिकांत सुरेश चौधरी हे किराणा व्यवसाय करून आपल्या कुटुंबाचा उदरनिर्वाह करत होते. मात्र अचानक बेपत्ता झाल्यानंतर त्यांच्या कुटुंबीयांवर मोठा मानसिक आघात झाला आहे. विशेषतः त्यांच्या पत्नी व कुटुंबीयांची अवस्था अत्यंत हालाखीची झाली असून, दोन वर्षे उलटूनही कोणतीही ठोस माहिती न मिळाल्याने कुटुंबीयांमध्ये चिंतेचे वातावरण कायम आहे. या घटनेनंतर त्यांच्या लहान भावाने नंदलाल सुरेश चौधरी तसेच इतर नातेवाईक, शेजारी, आप्तजन आणि मित्रपरिवार यांनी वैयक्तिक स्तरावर मोठ्या प्रमाणात शोधमोहीम राबवली. परिसरातील गावांमध्ये, नातेवाईकांकडे, तसेच विविध ठिकाणी चौकशी करूनही शशिकांत यांचा कोणताही मागमूस लागलेला नाही. यामुळे या प्रकरणात अधिक गंभीरपणे तपास होण्याची मागणी स्थानिक नागरिकांकडून होत आहे. बेपत्ता झालेल्या शशिकांत सुरेश चौधरी यांचे वर्णन असे आहे की, त्यांची उंची सुमारे पाच फूट तीन इंच असून ते गौरवर्णीय व सडपातळ बांध्याचे आहेत. त्यांच्या या शारीरिक वैशिष्ट्यांच्या आधारे कुणाला ते आढळल्यास त्वरित संपर्क साधण्याचे आवाहन कुटुंबीयांनी केले आहे. दरम्यान, दोन वर्षे उलटूनही बेपत्ता व्यक्तीचा शोध न लागणे ही गंभीर बाब मानली जात असून पोलिस प्रशासनाच्या तपास पद्धतीवरही प्रश्न उपस्थित होत आहेत. या प्रकरणी सखोल आणि वेगवान तपास करून शशिकांत चौधरी यांचा शोध लावावा, अशी मागणी कुटुंबीयांसह ग्रामस्थांकडून होत आहे. कुणाला शशिकांत सुरेश चौधरी यांच्याबाबत कोणतीही माहिती मिळाल्यास त्यांनी त्वरित खालील मोबाईल क्रमांकांवर संपर्क साधावा, असे आवाहन करण्यात आले आहे – 9579089473 / 9226646717.

पाचोरा – आंबेडकरी चळवळीच्या विचारांना आवाज देणाऱ्या आणि सामाजिक परिवर्तनाचा जाज्वल्य संदेश जनमानसात पोहोचवणाऱ्या सुप्रसिद्ध भीमगीत गायक आनंद शिंदे यांचा भव्य कार्यक्रम पाचोरा शहरात आयोजित करण्यात आल्याने संपूर्ण तालुक्यात उत्साहाचे आणि अपेक्षांचे वातावरण निर्माण झाले आहे. येत्या शनिवारी सायंकाळी ७ वाजता पाचोरा बस स्थानक परिसरातील नागसेन नगर येथे हा भव्य सांस्कृतिक सोहळा रंगणार असून, हजारो श्रोते या कार्यक्रमाचा आनंद

घेण्यासाठी उपस्थित राहतील, अशी अपेक्षा व्यक्त केली जात आहे. या कार्यक्रमाच्या अध्यक्षस्थानी आमदार हे राहणार असून, एम एस पी बिल्डकॉनचे मनोज पाटील यांचे या उपक्रमासाठी विशेष सहकार्य लाभले आहे. सामाजिक समता, बंधुता आणि न्याय यांसारख्या मूल्यांचा प्रसार करण्यासाठी आयोजित केलेला हा कार्यक्रम केवळ मनोरंजनापुरता मर्यादित न राहता सामाजिक जागृतीचे प्रभावी माध्यम ठरणार आहे, असे आयोजकांचे मत आहे. भीमगीतांचा इतिहास हा केवळ संगीतापुरता मर्यादित नसून तो एका सामाजिक चळवळीचा आवाज आहे. डॉ. बाबासाहेब आंबेडकर यांच्या विचारांना लोकांपर्यंत पोहोचवण्यासाठी भीमगीतांनी मोठी भूमिका बजावली आहे. याच परंपरेला पुढे नेत आनंद शिंदे यांनी आपल्या दमदार आणि प्रभावी आवाजातून समाजातील अन्याय, विषमता आणि शोषणाविरुद्ध लढण्याची प्रेरणा दिली आहे. त्यांच्या गाण्यांमधील शब्द हे केवळ काव्य नसून ते समाजातील प्रत्येक घटकाला जागृत करणारे विचार आहेत. त्यामुळेच त्यांच्या कार्यक्रमाला सर्व स्तरातील नागरिक मोठ्या उत्साहाने प्रतिसाद देतात. पाचोरा भडगाव तालुक्यात राष्ट्रपिता महात्मा फुले आणि डॉ. बाबासाहेब आंबेडकर यांच्या संयुक्त जयंतीनिमित्त विविध सामाजिक आणि सांस्कृतिक कार्यक्रमांचे आयोजन करण्यात येत आहे. त्याच पार्श्वभूमीवर या भीमगीतांच्या कार्यक्रमाचे आयोजन करण्यात आले असून, स्थानिक सामाजिक कार्यकर्ते आणि आंबेडकरी संघटनांनी यासाठी विशेष पुढाकार घेतला आहे. या कार्यक्रमामुळे केवळ सांस्कृतिक रंगत वाढणार नसून समाजात एकात्मतेचा आणि समतेचा संदेश अधिक दृढ होणार आहे. कार्यक्रमस्थळी उत्तम ध्वनी व्यवस्था, श्रोत्यांसाठी व्यवस्थित बसण्याची सोय तसेच सुरक्षेची काटेकोर व्यवस्था करण्यात येणार आहे. मोठ्या प्रमाणावर नागरिकांची उपस्थिती अपेक्षित असल्याने वाहतूक आणि शिस्त राखण्यासाठी प्रशासनाकडूनही विशेष नियोजन करण्यात आले आहे. या कार्यक्रमाच्या यशस्वी आयोजनासाठी विविध समित्या कार्यरत असून प्रत्येक घटकावर बारकाईने लक्ष दिले जात आहे. या भव्य सोहळ्यास अनेक मान्यवरांची उपस्थिती लाभणार आहे. प्रसिद्ध गीतकार सागर पवार, पाचोरा नगराध्यक्ष सुनीता पाटील, उपविभागीय अधिकारी भूषण अहिरे, गटनेते सुमित पाटील, बाजार समिती सभापती गणेश पाटील, उपविभागीय पोलिस अधिकारी बापू रोहम, तहसीलदार विजय बनसोडे, मुख्याधिकारी मंगेश देवरे, पोलिस निरीक्षक राहुल कुमार पवार, आगार व्यवस्थापक प्रकाश पाटील यांच्यासह विविध क्षेत्रातील मान्यवर या कार्यक्रमाला उपस्थित राहून या उपक्रमाला गौरव देतील. भीमगीतांच्या माध्यमातून समाजातील तळागाळातील लोकांपर्यंत विचार पोहोचवण्याची ताकद प्रचंड आहे. अशा कार्यक्रमांमुळे युवकांमध्ये प्रेरणा निर्माण होते, सामाजिक प्रश्नांबाबत जागरूकता वाढते आणि समाजातील एकोपा अधिक बळकट होतो. त्यामुळेच या कार्यक्रमाला केवळ एक सांस्कृतिक कार्यक्रम म्हणून न पाहता तो सामाजिक परिवर्तनाचा एक महत्त्वाचा टप्पा म्हणूनही पाहिले जात आहे. शहरातील नागसेन नगर परिसर सध्या या कार्यक्रमाच्या तयारीने गजबजलेला दिसत आहे. सजावट, ध्वनी यंत्रणा, मंच उभारणी आणि प्रकाशयोजना यासाठी विशेष प्रयत्न सुरू असून, प्रत्येक गोष्ट आकर्षक आणि व्यवस्थित होण्यासाठी आयोजक प्रयत्नशील आहेत. स्थानिक नागरिकांनीही या कार्यक्रमासाठी मोठ्या उत्साहाने सहकार्य केले आहे, ज्यामुळे हा कार्यक्रम अधिक भव्य होण्याची चिन्हे दिसत आहेत. या कार्यक्रमाच्या निमित्ताने पाचोरा शहरात सांस्कृतिक वातावरण अधिकच खुलणार असून, विविध स्तरांतील लोक एकत्र येऊन विचारांची देवाणघेवाण करतील. भीमगीतांच्या माध्यमातून समाजात सकारात्मक ऊर्जा निर्माण होईल आणि सामाजिक समतेचा संदेश अधिक प्रभावीपणे पसरवला जाईल, असा विश्वास व्यक्त केला जात आहे. शिवशक्ती भीमशक्ती सेनेच्या वतीने या कार्यक्रमासाठी विशेष आवाहन करण्यात आले आहे. प्रवीण ब्राह्मणे, विकी बाविस्कर, सनी साठे, रोहित ब्राह्मणे, अनुराग खेडकर, जयेश तायडे, संघमित्र लोंढे, भय्या खेडकर, भीमराव खैरे, सचिन केदार, सागर अहिरे यांनी समस्त शाहू-फुले-आंबेडकरी जनतेने मोठ्या संख्येने उपस्थित राहून कार्यक्रमाची शोभा वाढवावी, असे आवाहन केले आहे. एकूणच, हा कार्यक्रम पाचोरा तालुक्यासाठी केवळ एक सांस्कृतिक पर्व नसून सामाजिक जाणीव आणि एकात्मतेचा संदेश देणारा महत्त्वाचा सोहळा ठरणार आहे. आनंद शिंदे यांच्या दमदार सादरीकरणातून उपस्थितांना प्रेरणा, उत्साह आणि नवचैतन्याचा अनुभव मिळणार असून, हा कार्यक्रम दीर्घकाळ स्मरणात राहील, यात शंका नाही.

पाचोरा – सहकार क्षेत्रात विश्वास, पारदर्शकता आणि माणुसकीची मूल्ये जपत सातत्याने प्रगतीचा नवा इतिहास घडवणाऱ्या संत नरहरी महाराज नागरी सहकारी पतसंस्था मर्या., पाचोरा या संस्थेच्या रौप्य महोत्सव सोहळ्याने पाचोरा शहरात उत्साहाचे आणि अभिमानाचे वातावरण निर्माण केले. २० एप्रिल २०२५ रोजी सकाळी १० वाजता अहीर सुवर्णकार मंगल कार्यालय येथे आयोजित या सोहळ्याने संस्थेच्या २५ वर्षांच्या प्रवासाचा प्रेरणादायी आढावा सादर करत उपस्थितांना सहकाराच्या शक्तीची जाणीव करून दिली. या कार्यक्रमाच्या अध्यक्षस्थानी आमदार किशोरआप्पा पाटील उपस्थित होते. यावेळी दादासो शशिकांत साळुंखे, गौतमजी बलसाने, दादासो दिलीप रामू पाटील, मेहबूब आर. डी. जैन, महेश कासार यांसारख्या विविध क्षेत्रातील मान्यवरांची उपस्थिती लाभली. मान्यवरांच्या हस्ते संस्थेच्या कार्याचा गौरव करण्यात आला आणि पुढील वाटचालीसाठी प्रेरणादायी शुभेच्छा देण्यात आल्या. कार्यक्रमाची सुरुवात चेअरमन विष्णू महादू सोनार यांच्या प्रास्ताविकाने झाली. त्यांनी संस्थेच्या स्थापनेपासून आजपर्यंतच्या वाटचालीचा आढावा घेताना स्पष्ट केले की, २००१ मध्ये सुरू झालेली ही पतसंस्था केवळ आर्थिक व्यवहारापुरती मर्यादित राहिली नाही, तर सामाजिक जबाबदारी, ग्राहकांप्रती आत्मीयता आणि सर्वसमावेशक विचारसरणी यांचा समतोल राखत पुढे सरकली. त्यामुळेच अल्पावधीतच या संस्थेने पाचोरा परिसरात एक विश्वासार्ह आणि आदर्श संस्था म्हणून आपली ओळख निर्माण केली. संस्थेच्या उभारणीमागे सोनार समाजातील ज्येष्ठ व दूरदृष्टी असलेल्या व्यक्तींचे योगदान अधोरेखित करताना त्यांनी सांगितले की, समाजासाठी काहीतरी सकारात्मक घडवण्याच्या भावनेतून सुरू झालेल्या या प्रयत्नाने आज एक मजबूत आर्थिक व्यवस्था निर्माण केली आहे. मात्र या संस्थेचे खरे वेगळेपण तिच्या कार्यपद्धतीत दिसते. व्यवहार करताना जात, धर्म, पंथ किंवा सामाजिक स्तर यांचा विचार न करता सर्वांना समान संधी देण्याचा आदर्श येथे प्रत्यक्षात राबवण्यात आला आहे. हीच भूमिका संस्थेच्या विश्वासार्हतेची खरी ओळख ठरली आहे. यानंतर माजी पदाधिकाऱ्यांचा गौरव सोहळा पार पडला. माजी चेअरमन कै. एम.डी. सोनार यांच्या वतीने वासुदेव सोनार, राजाराम सोनार, नंदकुमार सोनार, अँड. मदन के. मोरे, राजु बाळदकर, सौ. मिरा सोनार, विष्णु सोनार, सुरेरा देवरे, मनोहर सोनार, सौ. संगिता सोनार, वासुदेव जडे, सौ. हर्षाली जडे तसेच माजी व्यवस्थापक विष्णु जडे आणि स्व. दत्तात्रय पाटील यांच्या वतीने त्यांचे पुत्र राजेश पाटील, सुमेरसिंग राजपूत, श्रीपाल गौड यांचा शाल, श्रीफळ व पुष्पगुच्छ देऊन सन्मान करण्यात आला. या सत्काराने संस्थेच्या पायाभूत टप्प्यात योगदान देणाऱ्या व्यक्तींप्रती कृतज्ञता व्यक्त करण्यात आली. सत्काराला उत्तर देताना माजी चेअरमन राजाराम सोनार, नंदकुमार सोनार आणि राजु बाळदकर यांनी आपल्या आठवणी जागवताना संस्थेच्या सुरुवातीच्या काळातील आव्हाने आणि त्यावर मात करत उभारलेली यशस्वी वाटचाल याचा उल्लेख केला. त्यानंतर सीए आर. डी. जैन, महेश कासार, गौतमजी बलसाने, शशिकांत साळुंखे आणि दिलीप पाटील यांनीही मनोगत व्यक्त करत संस्थेच्या कार्यपद्धतीचे कौतुक केले. यावेळी जिल्हा उपनिबंधक गौतम बलसाने यांनी आपल्या भाषणात स्पष्ट शब्दांत सांगितले की, संत नरहरी महाराज नागरी सहकारी पतसंस्था ही सहकार क्षेत्रातील एक आदर्श मॉडेल आहे. पारदर्शक व्यवहार, शून्य थकबाकी, शिस्तबद्ध व्यवस्थापन आणि सामाजिक बांधिलकी यांचा उत्कृष्ट संगम या संस्थेत पाहायला मिळतो, असे त्यांनी नमूद केले. त्यांनी पुढे सांगितले की, सहकार क्षेत्रात टिकून राहण्यासाठी केवळ आर्थिक ताकद पुरेशी नसते, तर विश्वास आणि नीतिमत्ता हे घटक महत्त्वाचे असतात, आणि या दोन्ही बाबी या संस्थेने प्रभावीपणे जपल्या आहेत. अध्यक्षीय भाषणात आमदार किशोर आप्पा पाटील यांनी संस्थेच्या कामकाजाचा गौरव करताना तिच्या प्रगतीच्या वेगाचे विशेष कौतुक केले. त्यांनी सांगितले की, ग्रामीण व निमशहरी भागात अशा संस्था समाजाला आर्थिक बळ देण्याबरोबरच सामाजिक एकात्मता टिकवण्याचे कार्य करतात. या पतसंस्थेने आपल्या कामगिरीतून एक आदर्श निर्माण केला असून भविष्यातही हीच परंपरा कायम राहील, असा विश्वास त्यांनी व्यक्त केला. कार्यक्रमाच्या शेवटी सभासदांना भेटवस्तूंचे वितरण करण्यात आले. कार्यक्रमाचे सुत्रसंचालन प्रा. सी. एन. चौधरी यांनी प्रभावीपणे केले, तर आभार प्रदर्शन अँड. मदन मोरे यांनी मानले. सध्या चेअरमन विष्णु (बापू) महादू सोनार, व्हाईस चेअरमन सुरेश (नाना) रूपचंद देवरे आणि संचालक मंडळ संस्थेची वाटचाल अधिक सक्षमपणे पुढे नेत आहेत. त्यांनी पूर्वसुरींच्या कार्याचा वारसा जपत नव्या संकल्पनांद्वारे संस्थेची प्रगती अधिक गतीमान केली आहे. सातत्य, पारदर्शकता आणि विश्वास या मूल्यांचा पाया अधिक मजबूत करत त्यांनी संस्थेला नवे मानदंड दिले आहेत. याचबरोबर व्यवस्थापक श्रीपाल सुगनचंद गौड, कॅशियर विवेक नारायण कानडे आणि शिपाई जितेंद्र हिम्मत पाटील यांच्या कार्याचेही विशेष कौतुक करण्यात आले. ग्राहकांना वेळेत सेवा देणे, त्यांच्या अडचणी समजून घेणे आणि त्यांचे समाधान करणे ही त्यांची कार्यशैली संस्थेच्या प्रतिमेला अधिक उजळवणारी ठरली आहे. संस्थेच्या कामगिरीचा आढावा घेताना ० टक्के एन.पी.ए., शून्य थकबाकी, सातत्याने ‘अ’+ दर्जाचा ऑडिट, नियमित नफा आणि लाभांश वितरण या बाबी ठळकपणे मांडण्यात आल्या. २००६ मध्ये उत्तर महाराष्ट्रात ‘अ’+ ऑडिट मिळवणारी एकमेव पतसंस्था म्हणून मिळालेली ओळख आजही कायम आहे. विशेष म्हणजे कर्जवसुली किंवा चेक बाऊन्ससंदर्भात न्यायालयीन प्रकरणांचा अभाव ही संस्थेच्या कार्यशिस्तीची साक्ष देणारी बाब ठरते. संस्थेतील एकोपा अधोरेखित करताना कोणत्याही सदस्याने मीटिंग भत्ता स्वीकारला नाही आणि निवडणुकीची गरज भासली नाही, ही बाब उपस्थितांसाठी प्रेरणादायी ठरली. सहकारातून समृद्धी हा विचार केंद्रस्थानी ठेवत संस्थेने आर्थिक व्यवहारांसोबत सामाजिक एकात्मता जोपासण्याचे कार्य सातत्याने केले आहे. आजच्या स्पर्धात्मक वातावरणात टिकून राहण्यासाठी ज्या मूल्यांची आवश्यकता असते, त्या सर्व गुणांचा संगम संत नरहरी महाराज नागरी सहकारी पतसंस्थेत दिसून येतो. ही संस्था केवळ आर्थिक व्यवहारापुरती मर्यादित न राहता विश्वास, प्रामाणिकपणा आणि माणुसकीची जपणूक करणारी एक प्रेरणादायी चळवळ बनली आहे. भूतकाळातील योगदान, वर्तमानातील कार्यतत्परता आणि भविष्याचा दूरदृष्टीने विचार या त्रिसूत्रीच्या बळावर ही पतसंस्था आगामी काळातही सहकार क्षेत्रात नवे आदर्श निर्माण करेल, असा आशावाद यावेळी व्यक्त करण्यात आला.

पाचोरा – शहरातील आर्थिक क्षेत्रात विश्वासार्हतेची ओळख निर्माण करणाऱ्या वर्धमान पतसंस्थेने अक्षय तृतीयेच्या शुभ मुहूर्तावर आपल्या कार्याचा एक महत्त्वपूर्ण टप्पा पार करत नव्या ठिकाणी स्थलांतरण केले. श्री महावीर शॉपिंग सेंटर, जैन पाठशाळा शेजारी, जामनेर रोड, पाचोरा येथे नव्या कार्यालयाचे उद्घाटन धार्मिक विधी आणि उत्साहपूर्ण वातावरणात पार पडले. या सोहळ्यामुळे संस्थेच्या सेवाविस्ताराला नवी दिशा मिळणार असल्याची भावना उपस्थितांमध्ये व्यक्त झाली. कार्यक्रमाची सुरुवात पारंपरिक पद्धतीने कलश पूजनाने करण्यात आली. संस्थेचे जेष्ठ सभासद राधेश्याम दायमा यांच्या हस्ते विधी संपन्न झाला. त्यानंतर नवकार महामंत्राचा सामूहिक जप करण्यात आला, ज्यामुळे संपूर्ण परिसरात भक्तिमय वातावरण निर्माण झाले आणि कार्यक्रमाला पावित्र्याची छटा लाभली. या प्रसंगी संस्थेचे चेअरमन जीवन भाऊ जैन यांच्या नेतृत्वाखाली अनेक मान्यवर उपस्थित होते. व्हाईस चेअरमन दिनेशशेठ बोथरा ,कार्यकारी संचालक प्रफुल्लशेठ बांठीया किशोरभाऊ बांठिया, अजय थेपडे सर, मनोज भाई सिसोदिया, रितेश भाई ललवाणी, धर्मेंद्र धाडीवाल, शैलेश येवले, दीपक भाई मुथा, शैलेश खंडेलवाल, संदेश बडोला यांच्यासह संस्थेचे व्यवस्थापक हेमराज बाफना व संपूर्ण स्टाफ यांनी कार्यक्रमात सक्रिय सहभाग नोंदवला. तसेच शॉपिंग सेंटरमधील व्यापाऱ्यांनी मोठ्या संख्येने उपस्थित राहून संस्थेच्या नव्या वाटचालीस शुभेच्छा दिल्या. या संपूर्ण सोहळ्यात एक नाव अत्यंत आदराने आणि भावनिक स्वरात उच्चारले गेले, ते म्हणजे स्वर्गीय भाकचंदशेठ बोथरा,स्वर्गीय राजूशेठ बडोला (PC ग्रुप).कांतीलालशेठ श्रीश्रीमाळ ,पप्पूसेठ बांठिया हे वर्धमान पतसंस्थेची स्थापना, तिची उभारणी, नियोजनबद्ध आणि शिस्तबद्ध कामकाजाची पायाभरणी या सर्वामागे त्यांची दूरदृष्टी, जिद्द आणि अथक परिश्रम होते. समाजातील विविध घटकांना एकत्र आणत त्यांनी या संस्थेला केवळ आर्थिक संस्था न ठेवता विश्वासाचे केंद्र बनवले.राजूशेठ बडोला हे संस्थापक चेअरमन होते ते आयुष्याच्या अखेरच्या श्वासापर्यंत त्यांनी संस्थेच्या वाढीसाठी महत्वपूर्ण जबाबदारी सांभाळली आणि प्रत्येक टप्प्यावर संस्थेला दिशा देत राहिले. त्यांच्या कार्याची आणि योगदानाची आठवण करताना अनेकांच्या डोळ्यात अश्रू दाटून आले, कारण त्यांनी घालून दिलेल्या मूल्यांवरच आज ही संस्था भक्कमपणे उभी आहे. अक्षय तृतीया हा सण नवीन कार्याची सुरुवात करण्यासाठी अत्यंत शुभ मानला जातो. या दिवशी नव्या कार्यालयात प्रवेश केल्याने संस्थेच्या आगामी वाटचालीत सातत्याने प्रगती आणि यश लाभेल, असा विश्वास यावेळी व्यक्त करण्यात आला. वर्धमान पतसंस्थेची स्थापना 2002 साली समाज बांधव, मित्र, कंपनी स्नेही आणि व्यापारी हितचिंतक यांच्या संयुक्त प्रयत्नातून झाली. स्थापनेपासूनच संस्थेने पारदर्शकता, प्रामाणिक व्यवहार आणि विश्वास या तत्त्वांवर आपले कार्य उभे केले आहे. विशेष म्हणजे, स्थापनेपासून आजपर्यंत संचालक मंडळाची निवडणूक घेण्याची वेळ कधीच आली नाही, ही बाब संस्थेतील परस्पर विश्वास आणि एकात्मतेचे उत्तम उदाहरण ठरते. संस्थेने सभासदांच्या हिताला नेहमीच प्राधान्य दिले आहे. दरवर्षी सभासदांना लाभांश देण्याची परंपरा सातत्याने जोपासली जात आहे. त्याचबरोबर गुणवंत पाल्यांचा सत्कार करून शिक्षणाला प्रोत्साहन देण्याचे महत्त्वाचे सामाजिक कार्यही संस्था नियमितपणे पार पाडत आहे. नवीन ठिकाणी स्थलांतरणामुळे संस्थेच्या कामकाजात अधिक सुसूत्रता येणार असून ग्राहकांना अधिक चांगल्या सुविधा मिळणार आहेत. व्यापारी भागात कार्यालय असल्याने व्यवहार अधिक सोपे आणि वेगवान होण्यास मदत होईल, अशी अपेक्षा व्यक्त केली जात आहे. कार्यक्रमादरम्यान उपस्थित मान्यवरांनी संस्थेच्या आतापर्यंतच्या यशस्वी प्रवासाचा आढावा घेतला आणि पुढील वाटचालीसाठी शुभेच्छा दिल्या. एकूणच, वर्धमान पतसंस्थेचे हे स्थलांतरण केवळ स्थानांतर नसून प्रगतीचा आणि विश्वासाचा नवा टप्पा आहे. स्वर्गीय राजूशेठ बडोला यांनी रोवलेल्या मूल्यांची परंपरा पुढे नेत संस्था आगामी काळात अधिक व्यापक सेवा देत नवे यश संपादन करेल, असा आशावाद या सोहळ्याच्या निमित्ताने व्यक्त होत आहे.

पाचोरा – शहराच्या आरोग्यविश्वात गेल्या काही वर्षांत ज्या नावाने एक वेगळी ओळख निर्माण केली आहे, ते म्हणजे सिद्धिविनायक मल्टीस्पेशालिटी हॉस्पिटल. या रुग्णालयाच्या यशामागे केवळ अत्याधुनिक सुविधा किंवा उपचारपद्धती नाही, तर त्यामागे आहे रुग्णसेवेबद्दलची नितांत निष्ठा, माणुसकीची जाणीव आणि समाजाप्रती असलेली प्रामाणिक बांधिलकी. या मूल्यांना प्रत्यक्ष कृतीत उतरवणाऱ्या आणि बालरुग्णांच्या उपचारात विशेष प्रावीण्य मिळवलेल्या डॉ. ग्रिष्मा पाटील यांचा आज वाढदिवस साजरा होत आहे. या निमित्ताने त्यांच्या सेवाभावी कार्याचा घेतलेला हा वेध प्रत्येकाला प्रेरणा देणारा आहे. लहानग्यांच्या आरोग्याची जबाबदारी ही केवळ वैद्यकीय उपचारापुरती मर्यादित नसते, तर त्यात संवेदनशीलता, संयम आणि योग्य निर्णयक्षमता यांचा समतोल आवश्यक असतो. हीच वैशिष्ट्ये डॉ. ग्रिष्मा पाटील यांच्या कार्यशैलीत स्पष्टपणे दिसून येतात. त्यांच्या प्रत्येक उपचारामागे केवळ विज्ञान नसते, तर त्या मागे असते ममत्वाची ऊब आणि पालकांच्या भावनांची जाण. त्यामुळेच त्यांच्या संपर्कात आलेल्या प्रत्येक कुटुंबासाठी त्या केवळ डॉक्टर न राहता विश्वासार्ह मार्गदर्शक बनतात. शहादा येथे जन्मलेल्या डॉ. ग्रिष्मा पाटील यांचे बालपण शैक्षणिक वातावरणात आणि सुसंस्कारांच्या छायेत गेले. त्यांचे वडील डी डी पाटील यांनी सहकार क्षेत्रात जबाबदारीने काम करत कुटुंबात शिस्त आणि प्रामाणिकपणाची बीजे रोवली, तर आई रेखा पाटील यांनी घरगुती मूल्यांमधून संवेदनशीलतेचा वारसा दिला. या दोन्ही गोष्टींचा परिणाम त्यांच्या व्यक्तिमत्त्वावर लहानपणापासूनच दिसून येतो. शालेय जीवनात सातत्याने प्रथम क्रमांक पटकावत त्यांनी आपल्या बुद्धिमत्तेची झलक दाखवली. पुढे वैद्यकीय क्षेत्रात प्रवेश घेत त्यांनी भाऊसाहेब हिरे गव्हर्नमेंट मेडिकल कॉलेज येथे एमबीबीएस ही पदवी विशेष गुणवत्तेसह पूर्ण केली आणि त्यानंतर पुण्यातील वाय सी एम मेडिकल कॉलेजमधून बालरोग व नवजात शिशुरोग या शाखेत उच्च शिक्षण घेऊन तज्ज्ञ म्हणून स्वतःची ओळख निर्माण केली. शिक्षण पूर्ण झाल्यानंतर पुणे आणि मुंबईसारख्या महानगरांमध्ये काम करताना त्यांनी आधुनिक वैद्यकीय प्रणाली, तातडीच्या परिस्थितीतील उपचारपद्धती आणि रुग्ण व्यवस्थापन याचा सखोल अनुभव घेतला. मात्र, या अनुभवाचा उपयोग केवळ स्वतःच्या करिअरसाठी न करता समाजासाठी काहीतरी करण्याची त्यांची जिद्द अधिक दृढ झाली. २०१८ साली डॉ. स्वप्नील पाटील यांच्याशी विवाह झाल्यानंतर या दोघांनी एकत्रितपणे आपल्या मातीत परत येण्याचा निर्णय घेतला आणि पाचोरा येथे सेवा सुरू करण्याचे ध्येय ठरवले. भडगाव रोडवरील भाग्यश्री प्लाझा येथे सिद्धिविनायक मल्टीस्पेशालिटी हॉस्पिटलची स्थापना झाली आणि अल्पावधीतच हे रुग्णालय लोकांच्या विश्वासाचे केंद्र बनले. सुरुवातीला अनेक अडचणींचा सामना करत त्यांनी रुग्णसेवेचा दर्जा कायम ठेवला. प्रत्येक रुग्णाला आपुलकीने वागवणे, त्यांच्या समस्या समजून घेणे आणि योग्य उपचार देणे या तत्त्वांवर त्यांनी कधीही तडजोड केली नाही. त्यामुळेच आज या रुग्णालयाचे नाव केवळ पाचोरा शहरापुरते मर्यादित न राहता परिसरातील अनेक गावांपर्यंत पोहोचले आहे. सामाजिक बांधिलकी जपत त्यांनी १ जुलै २०२३ पासून MJPJAY आणि PMJAY या शासकीय योजनांची प्रभावी अंमलबजावणी सुरू केली. या योजनांमुळे आर्थिकदृष्ट्या दुर्बल कुटुंबांनाही उच्च दर्जाची वैद्यकीय सेवा मोफत मिळू लागली. विशेषतः नवजात शिशुंपासून ते बारा वर्षांपर्यंतच्या बालकांवर होणारे उपचार अनेक कुटुंबांसाठी दिलासादायक ठरले आहेत. ताप, न्युमोनिया, कावीळ, पोटाचे विकार, वाढ न होणे किंवा इतर गंभीर आजार अशा विविध समस्यांवर त्यांनी अत्यंत कुशलतेने उपचार करून अनेक बालकांना नवजीवन दिले आहे. डॉ. स्वप्नील पाटील यांच्या मार्गदर्शनाखाली या रुग्णालयात विविध गुंतागुंतीच्या आजारांवरही उपचार केले जातात. मधुमेह, हृदयविकार, उच्च रक्तदाब, थायरॉईड, किडनी विकार, मेंदूचे आजार, यकृताशी संबंधित समस्या तसेच दमा आणि मिरगीसारख्या आजारांवर येथे आधुनिक पद्धतीने उपचार उपलब्ध आहेत. अचूक निदान आणि वेळेवर दिलेली उपचारपद्धती यामुळे अनेक रुग्णांना नवजीवन मिळाले आहे. या रुग्णालयातील सुविधा देखील अत्याधुनिक आहेत. सुसज्ज आयसीयू, नवजात शिशुसाठी स्वतंत्र NICU, डायलिसिस सेवा, सीटी स्कॅन, प्रशिक्षित वैद्यकीय कर्मचारी आणि २४ तास रुग्णवाहिका सेवा यामुळे उपचार प्रक्रिया अधिक सक्षम झाली आहे. रुग्णांच्या नातेवाईकांशी संवाद साधून त्यांना उपचारांची माहिती देणे आणि त्यांच्या मनातील भीती दूर करणे यावरही विशेष भर दिला जातो. त्यामुळे रुग्णालयात येणाऱ्या प्रत्येक व्यक्तीला विश्वास आणि सुरक्षिततेची भावना मिळते. कोरोना महामारीच्या कठीण काळात या रुग्णालयाने बजावलेली भूमिका विशेष उल्लेखनीय आहे. त्या काळात अनेक ठिकाणी आरोग्यसेवा ढासळत असताना, येथे मात्र रुग्णांना योग्य उपचार देण्याबरोबरच आर्थिकदृष्ट्या त्यांच्यावर अतिरिक्त भार पडणार नाही याची काळजी घेतली गेली. या कार्यामुळे अनेक कुटुंबांनी या रुग्णालयावर अटळ विश्वास ठेवला. आज सिद्धिविनायक मल्टीस्पेशालिटी हॉस्पिटल हे केवळ उपचाराचे केंद्र नसून, ते आशा आणि आधार देणारे स्थान बनले आहे. येथे येणाऱ्या प्रत्येक रुग्णाला सन्मानाची वागणूक मिळते, त्यांच्या वेदनांना समजून घेतले जाते आणि त्यांना योग्य मार्गदर्शन केले जाते. या सर्व प्रक्रियेत डॉ. ग्रिष्मा पाटील यांची भूमिका अत्यंत महत्त्वाची आहे. त्यांच्या कार्यामुळेच अनेक कुटुंबांच्या चेहऱ्यावर पुन्हा हास्य फुलले आहे. डॉ. ग्रिष्मा पाटील यांच्या वाढदिवसानिमित्त त्यांच्या या समर्पित सेवेला सलाम करताना समाजाच्या वतीने त्यांना मनःपूर्वक शुभेच्छा दिल्या जात आहेत. त्यांच्या कार्याचा हा प्रवास अधिक व्यापक होत राहो, अधिकाधिक रुग्णांना त्याचा लाभ मिळो आणि आरोग्यसेवेचा हा दीप सतत तेजाने प्रज्वलित राहो, हीच सर्वांची सदिच्छा आहे.                                                   (हा विशेष लेख झुंज वृत्तपत्र व ध्येय न्यूजचे संपादक संदीप महाजन आणि त्यांच्या परिवाराच्या वतीने सन्मानपूर्वक सादर करण्यात आला आहे.)