मेष
आज मेहनती कामांना मान्यता प्राप्त होईल. आर्थिक प्रगतीचा साठा होईल, पण खर्चात सतर्कता गरजेची.
शुभ अंक: १ • शुभ रंग: लाल

वृषभ
मालव्य राजयोगामुळे प्रतिष्ठा आणि आर्थिक स्थिरता दिसणार आहे. मात्र भावनिक निर्णय टाळा.
शुभ अंक: ६ • शुभ रंग: गुलाबी

मिथुन
बुधादित्य योगामुळे नोकरी-व्यवसायात प्रगतीस चालना मिळेल. पण मनात ताण येऊ शकतो, संयम ठेवा.
शुभ अंक: ५ • शुभ रंग: पिवळा

कर्क
सर्जनशीलतेच्या माध्यमातून नवे संधी मिळतील. प्रवास किंवा संवादातून फायदा होईल.
शुभ अंक: ३ • शुभ रंग: निळा

सिंह
नेतृत्वगुण स्पष्ट होणारे. राजयोगाचा प्रभाव कुटुंब व कामात दिसून येईल, परंतु संयम आवश्यक.
शुभ अंक: ९ • शुभ रंग: सोनेरी

कन्या
सेवा–कार्यस्थळी विरोध किंवा अडथळ्यांचा सामना करावा लागू शकतो. नियोजन आणि संयम महत्वाचे.
शुभ अंक: ५ • शुभ रंग: हिरवा

तुला
आर्थिक बाबतीत काळजी घ्या, पण प्रेम–नातंयात समाधानप्रद क्षण मिळतील.
शुभ अंक: २ • शुभ रंग: गुलाबी

वृश्चिक
राजयोगामुळे आर्थिक लाभाची शक्यता आहे. मात्र खर्चावर नियंत्रण आवश्यक.
शुभ अंक: ७ • शुभ रंग: काळा

धनु
प्रवास, शिक्षण किंवा सार्वजनिक संवादात यश मिळू शकते; तथापि खर्चावर संयम ठेवा.
शुभ अंक: ३ • शुभ रंग: नारिंगी

मकर
स्वतःतील आत्मपरीक्षणाच्या वेळेत करिअरशी संबंधित पुढील टप्प्याच्या निर्मितीत क्लिष्टता येऊ शकतात.
शुभ अंक: ८ • शुभ रंग: निळा

कुंभ
सामाजिक प्रतिष्ठा वाढीसाठी अनुकूल काळ. ध्यान-धारणा तुमच्या मानसिक शांतीला मदत करतील.
शुभ अंक: ४ • शुभ रंग: जांभळा

मीन
राजयोगामुळे आर्थिक आणि करिअरमध्ये चांगली उन्नती होईल. परंतु शून्य खर्च आणि भावना नियंत्रित ठेवा.
शुभ अंक: ७ • शुभ रंग: पांढरा

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

पाचोरा – शहरातील चवप्रेमींसाठी आनंदाची बातमी आहे. गेली पाच वर्षे पाचोऱ्यातील नागरिकांच्या प्रेमावर, विश्वासावर आणि आशीर्वादावर यशस्वीपणे कार्यरत असलेले “साईप्रसाद चाट – I Love पाणीपुरी” आता नव्या स्वरूपात ग्राहकांच्या सेवेत दाखल होत आहे. या विश्वासाचाच पुढचा टप्पा म्हणून “हॉटेल साईप्रसाद चायनीज (Pure Veg)” या नावाने व्यवसायाचा नवा अध्याय सुरू होत असून, याचा उद्घाटन समारंभ लवकरच पाचोरा शहरात पार पडणार आहे. पाचोऱ्यात चाट आणि पाणीपुरीसाठी “साईप्रसाद” हे नाव गेल्या पाच वर्षांत एक विश्वासार्ह ओळख बनले असून सातत्यपूर्ण चव, स्वच्छता, प्रामाणिकपणा आणि ग्राहकांशी जपलेले आपुलकीचे नाते यामुळे या व्यवसायाला मोठा प्रतिसाद मिळाला आहे. “तुमच्या प्रेमावर, विश्वासावर आणि आशीर्वादावर चालत राहिले” हे शब्द केवळ घोषवाक्य न राहता ग्राहकांच्या अनुभवातून सिद्ध झाले आहेत. याच विश्वासाच्या पायावर उभा राहत “आज त्या विश्वासाचं नवीन स्वरूपात रूपांतर होत आहे” या भावनेतून हॉटेल साईप्रसाद चायनीज (Pure Veg) ची सुरुवात करण्यात येत आहे. बदलत्या काळातील ग्राहकांची आवड, शाकाहारी चायनीज पदार्थांची वाढती मागणी आणि दर्जेदार जेवणाची गरज लक्षात घेऊन हा निर्णय घेण्यात आला आहे. “तोच मालक, तोच प्रामाणिकपणा, तोच दर्जा… फक्त चवीत नवीन अध्याय” ही भूमिका या नव्या उपक्रमामागे ठळकपणे दिसून येते. हॉटेल साईप्रसाद चायनीज (Pure Veg) हे संपूर्णपणे शाकाहारी असून येथे विविध चायनीज व व्हेज पदार्थ ग्राहकांसाठी उपलब्ध असतील. स्वच्छता, दर्जेदार कच्चा माल, संतुलित मसाले आणि सातत्यपूर्ण चव यावर विशेष भर देण्यात येणार आहे. गेल्या पाच वर्षांत ग्राहकांनी ज्या विश्वासाने “साईप्रसाद” ला स्वीकारले, तोच विश्वास या नव्या स्वरूपातही कायम ठेवण्याचा संकल्प व्यवस्थापनाने केला आहे. या नव्या व्यवसायाचा उद्घाटन समारंभ गुरुवार, दिनांक २५ डिसेंबर २०२५ रोजी सायंकाळी ६ वाजता इंदिरा नगर, एचपी पेट्रोल पंपासमोर, भडगाव रोड, पाचोरा येथे होणार आहे. या प्रसंगी शहरातील मान्यवर, हितचिंतक, ग्राहक व नागरिकांनी उपस्थित राहावे, असे आवाहन करण्यात आले आहे. या उद्घाटन समारंभाचे निमंत्रक विठ्ठल यशवंत दुंदले, शोभा विठ्ठल दुंदले, श्रीकृष्ण विठ्ठल दुंदले आणि मिनाक्षी श्रीकृष्ण दुंदले यांनी पाचोरा शहरातील नागरिकांना आपुलकीचे आमंत्रण दिले आहे. पाचोऱ्याच्या खाद्यसंस्कृतीत दर्जेदार, स्वच्छ आणि विश्वासार्ह शाकाहारी हॉटेल म्हणून हॉटेल साईप्रसाद चायनीज (Pure Veg) नवी ओळख निर्माण करेल, असा विश्वास व्यक्त करण्यात येत असून नागरिकांनी या नव्या उपक्रमाला शुभेच्छा द्याव्यात, असे निमंत्रण सह आवाहन करण्यात आले आहे

पाचोरा या तालुक्यात सामाजिक बांधिलकीचे जिवंत उदाहरण म्हणून ओळखल्या जाणाऱ्या एका उपक्रमाने गेली सोळा वर्षे हजारो भाविकांची तहान भागवण्याचे पुण्यकार्य अखंड सुरू ठेवले आहे. मराठा सेवा संघ आणि संभाजी ब्रिगेड यांच्या वतीने तसेच दीपक हरी पाटील यांच्या आर्थिक मदतीने राबविण्यात येणारी जल सेवा – शुद्ध पिण्याचे पाणी (Aquwa) वाटपाची ही परंपरा आज पाचोरा तालुक्यातील विविध यात्रा आणि धार्मिक सोहळ्यांचा अविभाज्य भाग बनली आहे. सालाबादप्रमाणे पौष महिन्यात पाचोरा तालुक्यातील सावखेडा येथील काळभैरव मंदिराच्या भव्य-दिव्य परिसरात मोठ्या प्रमाणावर यात्रा भरते. जळगाव, धुळे, संभाजी नगर, बुलढाणा तसेच आजूबाजूच्या अनेक जिल्ह्यांतून लाखो भाविक भक्त श्रद्धेने या यात्रेसाठी दाखल होतात. काळभैरवाच्या दर्शनाने मनातील प्रश्न, चिंता व अडचणी दूर होतात अशी भाविकांची दृढ श्रद्धा असून दर्शनानंतर भाविक वरण-भात, बट्टी, वांग्याची भाजी आणि कबूल केलेल्या वजनाइतका गूळ मंदिरात चढवतात. हा गूळ नंतर प्रसाद म्हणून भक्तांमध्ये वाटप केला जातो. श्रद्धा, परंपरा आणि भक्तीने ओतप्रोत असलेल्या या यात्रेत मात्र पिण्याच्या पाण्याची कोणतीही ठोस सोय नसल्याने दरवर्षी भाविकांना अडचणींना सामोरे जावे लागत होते. याच पार्श्वभूमीवर दीपक हरी पाटील यांच्या आर्थिक मदतीतून सुरू असलेली पाणपोळी व जलसेवा यात्रेमध्ये आगळे-वेगळे महत्त्व प्राप्त करून गेली आहे. संपूर्ण यात्रेच्या परिसरात शुद्ध, थंड आणि सहज उपलब्ध पिण्याचे पाणी देणारा हा एकमेव मंडप निस्वार्थ भावनेने उभारलेला दिसून येतो. कडाक्याच्या उन्हात, प्रचंड गर्दीत आणि सतत चालणाऱ्या दर्शन रांगेत ही जलसेवा भाविकांसाठी खऱ्या अर्थाने जीवनदायी ठरत आहे. “पाणी हीच खरी सेवा” या भावनेतून उभारलेला हा उपक्रम कोणत्याही प्रसिद्धीपासून दूर राहून शांतपणे आणि सातत्याने आपले कार्य करीत आहे. या मंडपात येणाऱ्या प्रत्येक भाविकाच्या चेहऱ्यावर समाधान स्पष्ट दिसते. विशेषतः वयोवृद्ध भाविक, लहान मुले आणि महिला या जलसेवेचा मोठ्या प्रमाणावर लाभ घेताना दिसतात. अनेक वृद्ध भक्त सेवा संघाच्या उपस्थित कार्यकर्त्यांना मनापासून शुभाशीर्वाद देताना दिसून येतात. कुणी डोक्यावर हात ठेवून आशीर्वाद देतो तर कुणी “देव तुमचं भलं करो” असे शब्द उच्चारतो आणि या शब्दांतूनच या उपक्रमाचे सामाजिक महत्त्व अधोरेखित होते. मराठा सेवा संघाचे माजी तालुकाध्यक्ष शिवश्री दीपक हरी पाटील हे या संपूर्ण उपक्रमामागील प्रेरणास्थान मानले जातात. त्यांच्या मार्गदर्शनाखाली आणि आर्थिक सहकार्यामुळे ही जलसेवा गेली सोळा वर्षे अखंड सुरू असून समाजकार्य केवळ भाषणातून नव्हे तर अशा प्रत्यक्ष कृतीतूनच प्रभावी ठरते हे या उपक्रमातून पुन्हा एकदा सिद्ध झाले आहे. या सेवेत भैरवनाथ मंदिर व्यवस्थापन समितीचे अध्यक्ष नितीन पाटील, सचिव सुनील परदेशी, ट्रस्ट सदस्य प्रकाश परदेशी, पदम परदेशी, प्रकाश पाटील, संजय सोनवणे, देवीलाल परदेशी यांचे मोलाचे सहकार्य लाभत आहे. तसेच संभाजी ब्रिगेडचे राजेंद्र सुखदेव पाटील, पोलिस नाईक दीपक पाटील, पोलिस कर्मचारी शाम हटकर, व्यापारी नितीन चौधरी, माणिक पाटील, संतोष पाटील, उद्योजक समर्थ दीपक पाटील, राका जी यांच्यासह अनेक कार्यकर्ते या सेवेसाठी अहोरात्र मेहनत घेत आहेत. यात्रेच्या संपूर्ण कालावधीत हे कार्यकर्ते स्वतःहून पाणी वाटप करतात, गर्दीतून वाट काढून तहानलेल्या भाविकांपर्यंत पाणी पोहोचवतात आणि कुठेही गैरसोय होऊ देत नाहीत. ही जलसेवा केवळ एक धार्मिक किंवा औपचारिक उपक्रम न राहता समाजातील माणुसकीचे दर्शन घडवते. लाखो भाविकांच्या गर्दीत कुणीही ओळखीचा नसताना, कोणताही स्वार्थ न ठेवता केलेली सेवा समाजासाठी प्रेरणादायी ठरते. पाण्याच्या एका घोटातून मिळणारा दिलासा, थकलेल्या देहाला मिळणारी ऊर्जा आणि मनाला मिळणारे समाधान हे या उपक्रमाचे खरे यश असून सावखेडा काळभैरव यात्रेत उभारलेली ही जलसेवा आज संपूर्ण पाचोरा तालुक्यासाठी अभिमानास्पद ठरत आहे.

मेष
आज तुमचा आत्मविश्वास आणि उर्जा दोन्ही शिखरावर राहतील. कामात पुढाकार घेऊन निर्णयात स्पष्टता मिळेल; परंतु अचानक आलेल्या संधीमध्ये खर्चिक परिणाम होऊ शकतो, ते विचारपूर्वक निवडा.
शुभ अंक: १ • शुभ रंग: लाल

वृषभ
मालव्य राजयोगाचा चांगला प्रभाव तुम्हाला दिसेल. आर्थिक स्थिरता आणि कुटुंबातील सौहार्द या दोन्ही दिशांनी दिवस फायद्याचा.
शुभ अंक: ६ • शुभ रंग: गुलाबी 

मिथुन
आज बुद्धिमत्ता आणि संवाद कौशल्य तुमच्यासाठी उपयुक्त ठरतील. परंतु कार्यभार आपल्या कल्पेक्षा जास्त असेल—तणाव खुले. संयम पण आवश्यक आहे.
शुभ अंक: ५ • शुभ रंग: पिवळा

कर्क
करिअरमध्ये लोकांशी संवादातून व प्रवासातून सकारात्मक लाभ दिसतोय. सर्जनशीलता वाढेल, पण आरोग्याची थोडी काळजी घ्या.
शुभ अंक: ३ • शुभ रंग: निळा 

सिंह
राजयोगामुळे नेतृत्वगुणांचा विकास होईल. पण शारीरिक ताण जाणवू शकतो, त्यामुळे स्वास्थ्याकडे लक्ष द्या.
शुभ अंक: ९ • शुभ रंग: सोनेरी 

कन्या
आज निर्णय किंवा कामात विरोधात्मक अडचणी येऊ शकतात. विश्लेषणातून पुढे जा आणि खर्चावर नियंत्रण ठेवा.
शुभ अंक: ५ • शुभ रंग: हिरवा 

तुला
भावनिक स्थिरता लाभेल, नात्यांमध्ये सौहार्द राहील. पण व्यवहारात सावधगिरी बाळगा—शत्रू किंवा विरोधकांचा धोका कमी नाही.
शुभ अंक: २ • शुभ रंग: गुलाबी

वृश्चिक
मालव्य राजयोगामुळे आज व्यवसायात आर्थिक फायदा होण्याची शक्यता आहे. खर्च थोड्या जास्त होतील, पण नफ्याने तो शमकतो.
शुभ अंक: ७ • शुभ रंग: काळा

धनु
प्रवास आणि नवकल्पनांमध्ये यश येऊ शकते. परंतु शनि वक्रीपेक्षा खर्चावर संयम ठेवणं अत्यंत आवश्यक आहे.
शुभ अंक: ३ • शुभ रंग: नारिंगी

मकर
शनि वक्रीमुळे तुम्हाला कठीण निर्णय घ्यावे लागू शकतील. परंतु दीर्घकालीन दृष्टीने आजचा दिवस फायद्याचा आहे.
शुभ अंक: ८ • शुभ रंग: निळा

कुंभ
आज सामाजिक प्रतिष्ठा वाढीसारखी वाटतेय. जुने प्रकल्प व गुंतवणूक फळदायी ठरू शकतात.
शुभ अंक: ४ • शुभ रंग: जांभळा

मीन
शनि वक्री आणि महालक्ष्मी राजयोगामुळे आर्थिक लाभ व करिअर प्रगती होईल. तरीही खर्च व भावना नियंत्रित ठेवा.
शुभ अंक: ७ • शुभ रंग: पांढरा

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

जळगाव : महाराष्ट्र शासनाच्या आरोग्य विभागाच्या वतीने ११ डिसेंबरपासून सिकलसेल सप्ताह साजरा केला जात असून, या उपक्रमाच्या अनुषंगाने जळगाव जिल्हा परिषद येथे रक्तदान शिबिराचे यशस्वी आयोजन करण्यात आले. मुख्य कार्यकारी अधिकारी मीनल करणवाल तसेच जळगाव जिल्हा आरोग्य अधिकारी डॉ. सचिन भायेकर यांच्या मार्गदर्शनाखाली हे शिबिर पार पडले असून, सिकलसेल व थॅलेसेमिया यांसारख्या रक्ताशी संबंधित आजारांनी बाधित रुग्णांना नियमित रक्तपुरवठा व्हावा, या सामाजिक हेतूने या शिबिराचे आयोजन करण्यात आले होते. या रक्तदान शिबिरामध्ये तालुका सर्व आरोग्य अधिकारी, आरोग्य सेवा कर्मचारी, समुदाय आरोग्य अधिकारी, तसेच जिल्हा परिषद व इतर विभागांतील अधिकारी व कर्मचारी यांनी उत्स्फूर्त सहभाग नोंदवला. शासकीय सेवेत कार्यरत असतानाच सामाजिक बांधिलकी जपत अधिकारी व कर्मचाऱ्यांनी रक्तदानासाठी पुढाकार घेतल्याने या उपक्रमाला विशेष महत्त्व प्राप्त झाले. यावेळी अधिक माहिती देताना जिल्हा आरोग्य अधिकारी डॉ. सचिन भायेकर यांनी सांगितले की, सिकलसेल, थॅलेसेमिया तसेच इतर रक्ताशी निगडित आजारांनी बाधित रुग्णांना आयुष्यभर नियमित रक्ताची गरज भासत असते. अनेक वेळा रक्ताच्या कमतरतेमुळे या रुग्णांच्या उपचारात अडथळे निर्माण होतात. अशा परिस्थितीत रक्तसाठा पुरेशा प्रमाणात उपलब्ध राहावा, यासाठी रक्तदान शिबिरे आयोजित करणे अत्यंत आवश्यक आहे. रक्तदान हे सर्वश्रेष्ठ दान असून प्रत्येक सक्षम नागरिकाने वर्षातून किमान दोन वेळा तरी रक्तदान करावे, असे आवाहनही डॉ. भायेकर यांनी यावेळी केले. विशेष म्हणजे स्वतः डॉ. सचिन भायेकर यांनीही रक्तदान करून या उपक्रमात सहभाग नोंदवला आणि उपस्थितांना प्रेरणा दिली. या शिबिराच्या प्रसंगी जिल्हा परिषद आरोग्य विभागाचे सर्व अधिकारी उपस्थित होते. जिल्हा माता व बाल संगोपन अधिकारी डॉ. रमेश धापते, डॉ. प्रमोद पांढरे, डॉ. बाळासाहेब वाबळे, डॉ. सुपे यांच्यासह अनेक वैद्यकीय अधिकारी, आरोग्य कर्मचारी तसेच इतर विभागांतील अधिकारी व कर्मचाऱ्यांनी रक्तदान करून सामाजिक जबाबदारीचे भान जपले. अधिकारी व कर्मचाऱ्यांचा हा उत्साह पाहता रक्तदानाबाबत जनजागृतीसाठी शासकीय यंत्रणा किती संवेदनशीलपणे काम करत आहे, हे अधोरेखित झाले. सदर रक्तदान शिबिर यशस्वी होण्यासाठी शासकीय वैद्यकीय महाविद्यालय, जळगाव येथील रक्तपेढीच्या संपूर्ण टीमने विशेष परिश्रम घेतले. रक्तसंकलन, तपासणी व सुरक्षिततेच्या सर्व निकषांचे काटेकोर पालन करत रक्तपेढीच्या टीमने जबाबदारी पार पाडली. यासोबतच आरोग्य विभागातील सर्व अधिकारी व कर्मचारी तसेच जळगाव जिल्हा सिकलसेल समन्वयक टीमनेही नियोजन, समन्वय व अंमलबजावणीमध्ये मोलाची भूमिका बजावली. आज पार पडलेल्या या रक्तदान शिबिरामध्ये एकूण ४० रक्तदात्यांनी रक्तदान केले असून, या रक्तामुळे सिकलसेल, थॅलेसेमिया व इतर गंभीर आजारांनी ग्रस्त रुग्णांना दिलासा मिळणार आहे तसेच त्यांच्या उपचार प्रक्रियेला गती मिळणार आहे. सिकलसेल सप्ताहाच्या माध्यमातून केवळ आजाराविषयी जनजागृतीच नव्हे तर प्रत्यक्ष कृतीतून समाजोपयोगी संदेश देण्याचा हा उपक्रम जिल्ह्यासाठी आदर्श ठरला असल्याची भावना यावेळी व्यक्त करण्यात आली.

पाचोरा – शहरातील निर्मल इंटरनॅशनल स्कूलच्या प्रशस्त प्रांगणात दरवर्षीप्रमाणे यंदाही आनंद, उत्साह, संस्कार आणि विद्यार्थ्यांच्या सुप्त कलागुणांचा भव्य आविष्कार पाहायला मिळाला. शाळेचे १५ वे वार्षिक स्नेहसंमेलन अतिशय दिमाखात, नियोजनबद्ध पद्धतीने आणि सांस्कृतिक सोहळ्याच्या मंगल वातावरणात मोठ्या जल्लोषात संपन्न झाले. विद्यार्थ्यांची कला, शिक्षकांचे मार्गदर्शन आणि पालकांचा उत्स्फूर्त सहभाग यामुळे हे स्नेहसंमेलन संस्मरणीय ठरले. या कार्यक्रमासाठी विशेष अतिथी म्हणून शाळेच्या अध्यक्षा वैशालीताई नरेंद्रसिंग सुर्यवंशी, निर्मल सीड्सचे संचालक डॉ. सुरेश पाटील, जे. सी. राजपूत, डॉ. डी. आर. देशमुख, निर्मल सीड्सचे महाव्यवस्थापक सुरेश पाटील तसेच पोलीस निरीक्षक राहुलकुमार पवार हे मान्यवर प्रमुख अतिथी म्हणून उपस्थित होते. सर्व मान्यवरांचे स्वागत विद्यार्थ्यांनी सुसंस्कृत पद्धतीने केले. कार्यक्रमाची सुरुवात दीपप्रज्वलन व सरस्वती पूजनाने झाली. दीपप्रज्वलनानंतर गणेश वंदनाच्या मंगल सुरांनी संपूर्ण परिसर भक्तिमय आणि पावन झाला. ज्ञानाच्या ज्योतीतून संस्कारांचा प्रकाश पसरविणाऱ्या दीपोत्सवाने स्नेहसंमेलनाचा शुभारंभ झाला अशी भावना उपस्थितांच्या चेहऱ्यावर स्पष्टपणे दिसून येत होती. दरवर्षी विद्यार्थ्यांना नृत्याविष्कारासाठी वेगवेगळे विषय दिले जातात आणि यंदाही सामाजिक संदेश, देशभक्ती, पर्यावरण संरक्षण, सांस्कृतिक परंपरा, एकता आणि आधुनिक जीवनशैली अशा विविध विषयांवर सादर केलेल्या नृत्याविष्कारांनी उपस्थित पालक आणि प्रेक्षकांना अक्षरशः मंत्रमुग्ध केले. प्रत्येक सादरीकरणात विद्यार्थ्यांची मेहनत, ताल-लयबद्धता, भावभावना आणि सर्जनशीलतेचा सुंदर संगम पाहायला मिळाला. रंगीत वेशभूषा, सुसंगत संगीत आणि अचूक हालचालींमुळे कार्यक्रमाची शोभा अधिकच वाढली. या स्नेहसंमेलनाचे विशेष आकर्षण म्हणजे विद्यार्थ्यांनी स्वतःच वेगवेगळ्या भाषांमध्ये केलेले सूत्रसंचालन. लहान वयातच आत्मविश्वासाने, स्पष्ट उच्चारात आणि प्रभावी शैलीत सूत्रसंचालन करत विद्यार्थ्यांनी सर्वांनाच आश्चर्यचकित केले. त्यांच्या वाणीतील गोडी आणि सहज संवाद कौशल्यामुळे संपूर्ण परिसर भारावून गेला. या प्रसंगी पालकांची मोठ्या संख्येने उपस्थिती होती. कार्यक्रमातील नृत्याविष्कार व सूत्रसंचालनाचे मूल्यमापन करण्यासाठी बाह्य परीक्षक म्हणून किरण रायकवार, शितल पटवारी, प्रा. सुनीता गुंजाळ आणि प्रा. पी. आर. पाटील यांनी उपस्थित राहून विद्यार्थ्यांच्या कलागुणांचे सखोल मूल्यमापन केले व त्यांना प्रोत्साहनपर मार्गदर्शन केले. या वेळी संस्थेच्या उपाध्यक्षा कमलताई पाटील, सचिव नरेंद्रसिंग सुर्यवंशी, प्राचार्य गणेश राजपूत, जनसंपर्क अधिकारी आय. बी. सिंग, उपप्राचार्य प्रदिप सोनवणे, समन्वयक स्नेहल पाटील तसेच अनेक मान्यवर उपस्थित होते. मान्यवरांनी आपल्या भाषणातून शाळेच्या शैक्षणिक व सांस्कृतिक कार्याचे कौतुक केले. कार्यक्रमाच्या यशस्वीतेसाठी शाळेतील सर्व शिक्षकवर्ग आणि शिक्षकेतर कर्मचाऱ्यांनी एकदिलाने अथक परिश्रम घेतले. या १५ व्या वार्षिक स्नेहसंमेलनाने विद्यार्थ्यांच्या सुप्त गुणांना व्यासपीठ मिळवून देत निर्मल परिवाराची एकजूट आणि विद्यार्थ्यांच्या प्रतिभेचा झगमगता दीप सर्वांसमोर उजळवला.

पिंपळगाव हरेश्वर – (ता. पाचोरा) येथील ग्राम विकास विद्यालयात दि. 21 डिसेंबर 2025 रोजी एक आगळावेगळा, भावनिक आणि आठवणींनी भरलेला प्रसंग अनुभवायला मिळाला. तब्बल ३७ वर्षांनंतर सन १९८८ च्या एसएससी बॅचचे माजी विद्यार्थी पुन्हा एकत्र आले आणि शाळेच्या प्रांगणात जुन्या आठवणींना नव्याने उजाळा मिळाला. काळाच्या ओघात वेगवेगळ्या वाटांवर गेलेली ही सगळी माणसं एकाच छत्राखाली जमली तेव्हा जणू वेळच काही क्षणांसाठी थांबला होता. या स्नेहसंमेलनामुळे शाळेचे वर्ग, प्रांगण आणि सभागृह पुन्हा एकदा गप्पा, हास्य, टाळ्यांचा कडकडाट आणि भावनिक क्षणांनी गजबजून गेले. विद्यार्थी जीवनातील खोड्या, शाळेतील शिस्त, शिक्षकांची कडक पण प्रेमळ शिकवण, वर्गातील शेवटच्या बाकावरच्या आठवणी, परीक्षा, निकालाचे क्षण आणि जिवलग मैत्रीची नाती यांची मनापासून उजळणी झाली. अनेकांच्या डोळ्यांत आनंदाश्रू तर अनेकांच्या चेहऱ्यावर लहान मुलासारखे हसू दिसत होते. कार्यक्रमात SSC 1988 बॅचच्या वतीने उपस्थित गुरुवर्य शिक्षकांचा यथोचित सन्मान करण्यात आला. यावेळी शरद पाटील, भारती येवले, संजय पाटील, पी ओ चौधरी, चंद्रकांत देसले, सुरेश नैनाव, विरपाल देशमुख, अरुण गरुड, विजय पवार, सुजाता निकम यांच्यासह अनेक माजी विद्यार्थ्यांनी आपली मनोगते व्यक्त केली. आज आम्ही जे काही आहोत ते या शाळेच्या संस्कारांमुळेच आहोत अशी भावना अनेकांच्या शब्दांतून व्यक्त झाली. शिक्षकांच्या मार्गदर्शनामुळेच विविध क्षेत्रांत यशस्वी वाटचाल करता आल्याचे त्यांनी नमूद केले. यावेळी शिक्षक अर्जुन आबा सर, एस एस पाटील सर, इमाम शेख सर, सुमनबाई बडगुजर, मधुकर गरुड सर व बी आर महाजन यांनी आपल्या मार्गदर्शनपर मनोगतातून विद्यार्थ्यांना शुभेच्छा दिल्या आणि विद्यार्थ्यांनी आयुष्यात कितीही मोठी पदे मिळवली तरी शाळेची नाळ कधीही तुटू देऊ नये असा मोलाचा संदेश दिला. कार्यक्रमाच्या अध्यक्षस्थानी मधुकर भिकनराव गरुड सर होते तर प्रमुख पाहुणे म्हणून ग्राम विकास मंडळाचे अध्यक्ष पी बी पाटील साहेब उपस्थित होते. यावेळी पी बी पाटील यांनी शाळेच्या नूतन वास्तू बांधकामासाठी मदतीचे आवाहन केले असता SSC 1988 च्या माजी विद्यार्थ्यांनी तात्काळ ₹111111/- इतकी रक्कम जाहीर केली. यासोबतच भविष्यातही शाळेच्या विकासासाठी सहकार्य करण्याचा ठाम संकल्प माजी विद्यार्थ्यांनी व्यक्त केला. तसेच शाळेत SSC परीक्षेत दरवर्षी प्रथम येणाऱ्या विद्यार्थ्यांना प्रोत्साहन मिळावे यासाठी ₹10000/- ची देणगी देऊन त्याची बँकेतील मुदत ठेव करण्यात येणार असून त्या व्याजातून विद्यार्थ्यांना बक्षीस देण्याचा निर्णय यावेळी घेण्यात आला. या निर्णयामुळे सध्याच्या विद्यार्थ्यांमध्ये अभ्यासाची प्रेरणा निर्माण होणार असल्याचे मत व्यक्त करण्यात आले. या संपूर्ण कार्यक्रमातून शाळा म्हणजे केवळ शिक्षण देणारी जागा नसून आयुष्य घडवणारी संस्कारशाळा आहे हे पुन्हा एकदा अधोरेखित झाले. ३७ वर्षांनंतर पुन्हा एकत्र आलेल्या माजी विद्यार्थ्यांच्या या भेटीने ग्राम विकास विद्यालयाचा इतिहास जणू नव्याने जिवंत झाला. कार्यक्रमाच्या शेवटी हरेश्वर मंदिर परिसरात स्नेहभोजनाचा आस्वाद घेत सर्वांनी एकमेकांशी मनमोकळ्या गप्पा मारत कार्यक्रमाचा समारोप केला. या यशस्वी आयोजनासाठी शरद पाटील, पी ओ चौधरी, संजय पाटील, भारती येवले, श्रीराम पाटील व त्यांच्या सहकाऱ्यांनी विशेष परिश्रम घेतले.

महाराष्ट्रातील अलीकडील नगरपालिका निवडणुकांमध्ये दणदणीत विजय मिळवत संपूर्ण राज्याचे लक्ष वेधून घेतलेले हॅट्रिक आमदार किशोरआप्पा पाटील हे सध्या पुन्हा एकदा राजकीय वर्तुळाच्या केंद्रस्थानी आले आहेत. माजी मुख्यमंत्री व विद्यमान उपमुख्यमंत्री एकनाथराव शिंदे यांचे मानसपुत्र म्हणून ओळखले जाणारे किशोरआप्पा पाटील यांनी पाचोरा–भडगावसह परिसरातील नगरपालिका निवडणुकांमध्ये शिंदे शिवसेनेचा झेंडा उंचावत निर्णायक भूमिका बजावली. या विजयामुळे केवळ स्थानिक राजकारणातच नव्हे तर राज्यपातळीवरील सत्ताकेंद्रातही त्यांच्या नेतृत्वाची दखल घेतली जात असल्याचे स्पष्ट संकेत मिळत आहेत. याच पार्श्वभूमीवर किशोरआप्पा पाटील यांना तातडीने काही तासांतच वरिष्ठ नेत्यांकडून बोलावणे आल्याची जोरदार चर्चा राजकीय वर्तुळात सुरू झाली आहे. नगरपालिका निवडणुकांचा निकाल जाहीर झाल्यानंतर अवघ्या काही तासात किशोरआप्पा पाटील यांच्या भोवती घडणाऱ्या हालचालींनी वेग घेतला आहे. पाचोरा आणि भडगाव या दोन्ही नगरपालिकांमध्ये शिंदे शिवसेनेला मिळालेले एकतर्फी वर्चस्व हे केवळ आकड्यांचे यश नसून संघटनात्मक ताकद, काटेकोर नियोजन, योग्य उमेदवारांची निवड आणि जनतेशी असलेला थेट संवाद यांचा परिणाम मानला जात आहे. या विजयामागे किशोरआप्पा पाटील यांची नेतृत्वशैली, कार्यकर्त्यांवरील पकड आणि विकासकेंद्रित राजकारण महत्त्वाचे ठरले आहे. त्यामुळेच या यशाची दखल थेट पक्षाच्या वरिष्ठ पातळीवर घेतली जात असून लवकरच आणखी एक मोठे स्वप्न साकार होण्याची शक्यता राजकीय वर्तुळात व्यक्त केली जात आहे. राजकीय विश्लेषकांच्या मते एकनाथराव शिंदे यांच्या नेतृत्वाखाली राज्यात सत्तेचा नवा चेहरा उभा राहत असताना किशोरआप्पा पाटील हे त्या नेतृत्वाचे विश्वासू आणि प्रभावी शिलेदार म्हणून पुढे येत आहेत. मानसपुत्र ही ओळख केवळ भावनिक नसून ती राजकीय विश्वास, जबाबदारी आणि सातत्यपूर्ण कामगिरीवर आधारित आहे. स्थानिक स्वराज्य संस्थांच्या निवडणुकांमध्ये मिळालेल्या घवघवीत यशानंतर किशोरआप्पा पाटील यांच्यावर आणखी मोठी जबाबदारी सोपवण्याच्या हालचाली सुरू झाल्याचे स्पष्ट संकेत मिळत आहेत. वरिष्ठांकडून आलेले तातडीचे बोलावणे हे याच दिशेने जाणारे महत्त्वाचे पाऊल मानले जात आहे. या संपूर्ण घडामोडीत आगामी महापालिका तसेच जिल्हा परिषद आणि पंचायत समिती निवडणुकांची पार्श्वभूमी अत्यंत महत्त्वाची मानली जात आहे. राज्यात लवकरच या निवडणुकांचे बिगुल वाजण्याची शक्यता असून त्या दृष्टीने शिंदे शिवसेना संघटनात्मक तयारीला लागल्याचे चित्र आहे. नगरपालिका निवडणुकांतील यश हा केवळ प्रारंभ असून खरी कसोटी आगामी महापालिका व जिल्हा परिषद–पंचायत समिती निवडणुकांमध्ये असणार आहे, हे पक्ष नेतृत्वाला चांगलेच माहीत आहे. त्यामुळे या निवडणुकांसाठी प्रभावी रणनीती आखण्याची जबाबदारी किशोरआप्पा पाटील यांच्यासारख्या अनुभवी आणि विजयी नेत्यांकडे सोपवली जाण्याची दाट शक्यता वर्तवली जात आहे. हॅट्रिक आमदार म्हणून किशोरआप्पा पाटील यांनी केवळ निवडणुका जिंकल्या नाहीत तर मतदारांचा विश्वासही सातत्याने टिकवून ठेवला आहे. विकासकामे, जनतेच्या प्रश्नांना तत्काळ प्रतिसाद, स्थानिक कार्यकर्त्यांना बळ देणे आणि पक्ष संघटन मजबूत करण्यावर दिलेला भर यामुळेच त्यांची प्रतिमा एका आक्रमक पण संयमी नेत्याची तयार झाली आहे. नगरपालिका निवडणुकांमध्ये विरोधकांना दणका देत त्यांनी दंड ठोठावत विजय मिळवला असेच चित्र या निकालातून दिसून आले असून हा अनुभव आगामी महापालिका तसेच जिल्हा परिषद–पंचायत समिती निवडणुकांमध्ये शिंदे शिवसेनेसाठी अत्यंत उपयुक्त ठरणार असल्याचे मानले जात आहे. पाचोरा–भडगावच्या निकालानंतर राज्यातील इतर भागांतील शिंदे शिवसेना गटातील कार्यकर्त्यांमध्येही उत्साहाचे वातावरण असून हा विजय संपूर्ण संघटनेसाठी प्रेरणादायी ठरत आहे. आगामी महापालिका, जिल्हा परिषद आणि पंचायत समिती निवडणुकांच्या तयारीसाठी हा निकाल कार्यकर्त्यांना नवसंजीवनी देणारा ठरला आहे. याच पार्श्वभूमीवर पक्षाच्या वरिष्ठ पातळीवर व्यापक रणनीती आखली जात असून त्या रणनीतीत किशोरआप्पा पाटील यांची भूमिका अधिक निर्णायक आणि व्यापक होण्याची शक्यता नाकारता येत नाही. राजकीय वर्तुळात सुरू असलेल्या चर्चेनुसार आगामी काळात किशोरआप्पा पाटील यांच्याकडे केवळ स्थानिक पातळीवरील नव्हे तर राज्यस्तरीय जबाबदारी सोपवली जाऊ शकते. संघटनात्मक बांधणी, निवडणूक व्यवस्थापन किंवा आगामी महापालिका व जिल्हा परिषद–पंचायत समिती निवडणुकांसाठी समन्वयकाची महत्त्वाची भूमिका त्यांच्यावर येण्याची शक्यता व्यक्त केली जात आहे. एकनाथराव शिंदे यांच्या नेतृत्वाखालील सरकारमध्ये विश्वासू आणि कार्यक्षम नेत्यांना पुढे आणण्याचा जो प्रयत्न सुरू आहे त्यात किशोरआप्पा पाटील हे अग्रक्रमावर असतील अशीच चर्चा आहे. एकूणच महाराष्ट्रातील नगरपालिका निवडणुकांमध्ये विजयी अभिमन्यू ठरलेले किशोरआप्पा पाटील हे सध्या नव्या राजकीय टप्प्यावर उभे असून वरिष्ठांकडून आलेले तातडीचे बोलावणे, वाढत्या जबाबदाऱ्यांच्या चर्चा आणि आगामी महापालिका व जिल्हा परिषद–पंचायत समिती निवडणुकांच्या पार्श्वभूमीवर त्यांच्या भूमिकेचे वाढते महत्त्व यामुळे लवकरच त्यांच्या राजकीय प्रवासात आणखी एक महत्त्वाचा अध्याय जोडला जाण्याची चिन्हे स्पष्ट दिसत आहेत.

पाचोरा–भडगाव नगरपालिका निवडणुकीचा निकाल जाहीर होताच स्थानिक राजकारणातील चित्र पूर्णपणे स्पष्ट झाले आहे. या निवडणुकीत मतदारांनी कोणत्याही अफवा, दबाव, पैशांच्या चर्चा किंवा राजकीय कुरघोड्यांना बळी न पडता थेट विकास, स्थिर नेतृत्व आणि विश्वासाला कौल दिला असल्याचे ठळकपणे समोर आले आहे. आमदार किशोरआप्पा पाटील यांच्या नेतृत्वाखाली शिंदे शिवसेनेने पाचोरा आणि भडगाव या दोन्ही नगरपालिकांवर एकतर्फी वर्चस्व प्रस्थापित करत आपली राजकीय ताकद पुन्हा एकदा सिद्ध केली आहे. गेल्या चार आठवड्यांपासून सुरू असलेल्या प्रचारकाळात अनेक दावे-प्रतिदावे झाले, पैशांच्या वाटपाच्या चर्चाही रंगल्या, मात्र

मतदानाच्या दिवशी मतदारांनी अत्यंत परिपक्व भूमिका घेत “पैसे घेतले असतील तर सर्वांकडून घेतले, पण मत दिले विकासालाच” हा संदेश मतपेटीतून स्पष्टपणे दिला. हा कौल केवळ शब्दांत नव्हे तर निकालाच्या आकड्यांतून ठामपणे दिसून आला आहे. भडगाव नगरपालिकेत २४ पैकी तब्बल १९ जागांवर शिंदे शिवसेनेने विजय मिळवत निर्विवाद बहुमत मिळवले असून भाजपाला चार जागांवर समाधान मानावे लागले तर एक जागा अपक्षाच्या वाट्याला गेली आहे. या निकालाने भडगावमधील जनतेचा कल कोणत्या दिशेने आहे हे स्पष्ट केले आहे. विशेष बाब म्हणजे शिवसेनेच्या रेखा प्रदीप मालचे यांनी नगराध्यक्ष पदासाठी दणदणीत विजय मिळवत भडगावच्या राजकारणात नवा अध्याय सुरू केला आहे. त्यांच्या विजयामागे केवळ निवडणूक गणित नसून नियोजनबद्ध रणनीती आणि कार्यकर्त्यांची एकजूट कारणीभूत ठरली. भडगाव नगरपालिका निवडणुकीचे मास्टरमाईंड म्हणून बापूजी युवा फाउंडेशनचे लखीचंद पाटील यांची खेळी अत्यंत महत्त्वपूर्ण ठरली. बूथनिहाय

नियोजन, मतदारांशी थेट संवाद आणि स्थानिक पातळीवर विश्वास निर्माण करण्याची रणनीती यामुळे शिंदे शिवसेनेचा विजय अधिक भक्कम झाला. पाचोरा नगरपालिकेचा निकाल तर आणखी ठळक आणि राजकीयदृष्ट्या महत्त्वाचा ठरला आहे. आमदार किशोरआप्पा पाटील यांच्या नेतृत्वाखाली शिवसेना शिंदे गटाला २८ पैकी तब्बल २२ जागांवर विजय मिळत एकतर्फी बहुमत प्राप्त झाले, तर भाजपाला केवळ सहा जागांवर समाधान मानावे लागले. हा निकाल पाचोऱ्यातील मतदारांनी कोणत्या नेतृत्वावर विश्वास टाकला आहे हे स्पष्ट करणारा आहे. या निवडणुकीत नगराध्यक्ष पदासाठी आमदार किशोरआप्पा पाटील यांच्या सौभाग्यवती सौ. सुनीताताई किशोरआप्पा पाटील यांनी विजय मिळवत जनतेचा विश्वास अधिक दृढ केला आहे. त्यांचा विजय हा केवळ नावाचा किंवा संबंधांचा नसून त्यांच्या सामाजिक कार्याचा, संयमी प्रतिमेचा आणि लोकांशी असलेल्या थेट संवादाचा कौल असल्याचे मतदारांमधून व्यक्त होत आहे. या दोन्ही नगरपालिकांतील यशामागे आणखी एक महत्त्वाचा घटक ठरला तो म्हणजे आमदार किशोरआप्पा पाटील यांचे सुपुत्र सुमित किशोरआप्पा पाटील यांची रणनीतिक भूमिका. युवकांशी संवाद, नव्या मतदारांपर्यंत पोहोचण्याची पद्धत, सोशल मीडियाचा प्रभावी वापर आणि प्रत्यक्ष प्रचारातील सक्रिय सहभाग यामुळे त्यांच्या खेळीचा थेट परिणाम निकालावर दिसून आला. हा विजय केवळ आजचा नसून भविष्यातील राजकारणाची दिशा दर्शवणारा असल्याचे अनेक राजकीय निरीक्षकांचे मत आहे. या निकालाने विरोधी पक्षांसाठी आत्मपरीक्षणाचा स्पष्ट इशारा दिला आहे. केवळ आरोप, टीका किंवा तात्कालिक राजकीय गणितांवर निवडणूक जिंकता येत नाही, तर स्थानिक प्रश्न, विकासकामे, लोकांशी असलेला थेट संपर्क आणि विश्वास हे घटक अधिक निर्णायक ठरत असल्याचे या निकालातून सिद्ध झाले आहे. पाचोरा–भडगाव नगरपालिका निवडणूक निकाल हा केवळ स्थानिक स्वराज्य संस्थांचा निकाल न राहता बदलत्या मतदार मानसिकतेचा आरसा ठरला आहे. आमदार किशोरआप्पा पाटील यांच्या नेतृत्वाखाली शिंदे शिवसेनेला मिळालेले एकतर्फी वर्चस्व हे जनतेच्या अपेक्षांचे प्रतिबिंब असून ‘पैसा नव्हे, विकास’ हा नारा यावेळी घोषणांपुरता मर्यादित न राहता प्रत्यक्ष मतपेटीतून उतरल्याचे स्पष्ट झाले आहे. आता या विश्वासाला न्याय देण्याची जबाबदारी नव्या नगराध्यक्षांवर, नगरसेवकांवर आणि नेतृत्वावर असून हा विश्वास टिकवण्यात यश आले तर पाचोरा–भडगावचे राजकारण आगामी काळातही हाच विकासाचा मार्ग दाखवत राहील, हे मात्र निश्चित आहे.

पाचोरा–भडगाव विधानसभा मतदारसंघाच्या राजकीय इतिहासात पाचोरा नगरपालिका निवडणूक ही केवळ नगरसेवक निवडीपुरती मर्यादित राहिलेली नसून या निवडणुकीने स्थानिक राजकारणाला नवे दिशादर्शक संकेत दिले आहेत. या निवडणुकीच्या निमित्ताने जनतेचे प्रतिनिधी म्हणून प्रथमच

आमदार किशोर आप्पा पाटील यांचे सुपुत्र सुमित किशोर आप्पा पाटील आणि पाचोरा तालुका सहकारी शिक्षण संस्थेचे चेअरमन संजय नाना वाघ यांचे सुपुत्र सुरज संजय वाघ हे दोघे युवक पाचोरा नगरपालिका सभागृहात लोकप्रतिनिधी म्हणून दाखल झाले आहेत. ही घडामोड केवळ दोन नगरसेवकांच्या निवडीपुरती मर्यादित न राहता पाचोरा–भडगाव मतदारसंघाच्या भावी राजकारणाची नांदी मानली जात आहे. सुमित किशोर आप्पा पाटील आणि सुरज संजय वाघ हे दोघेही युवा नेतृत्व शांत, संयमी, निर्व्यसनी, निष्कलंक आणि मितभाषी अशी ओळख निर्माण करणारे आहेत. आजच्या आक्रमक आणि आरोप-प्रत्यारोपांनी भरलेल्या राजकीय वातावरणात अशी संयमी, समतोल आणि विचारपूर्वक वाटचाल करणारी नेतृत्वशैली जनतेला अधिक भावणारी ठरत आहे. सुरज संजय वाघ यांना आपले आजोबा स्वर्गीय आप्पासाहेब ओंकार नारायण वाघ यांच्याकडून राजकीय व सामाजिक वारसा लाभलेला आहे. स्वर्गीय आप्पासाहेब वाघ यांनी समाजकार्य आणि सार्वजनिक जीवनात दिलेले योगदान आजही पाचोरा तालुक्यात स्मरणात असून त्याच परंपरेतून सुरज वाघ यांनी राजकारणात प्रवेश केला आहे. दुसरीकडे सुमित किशोर आप्पा पाटील यांना आपले वडील, हॅट्रिक आमदार किशोर आप्पा पाटील यांच्याकडून राजकीय वारसा लाभलेला आहे. आमदार किशोर आप्पा पाटील यांनी पाचोरा–भडगाव विधानसभा

मतदारसंघात विकासाभिमुख, जनतेशी थेट संवाद साधणारे आणि कामावर विश्वास ठेवणारे नेतृत्व म्हणून स्वतःची भक्कम ओळख निर्माण केली असली तरी सुमित किशोरआप्पा पाटील हे वयाने जरी लहान असले तरी लोकप्रियता व लोकांच्या हृदयातल्या स्थानाच्या बाबतीत वडिलांपेक्षाही जास्त सर्वस्तरावरील जनतेच्या हृदयावर आतापासून राज्य करीत आहे अर्थात वडीलांच्या अनुभवाचा आणि मार्गदर्शनाचा लाभ सुमित पाटील यांना होत आहे हे निश्चित. पाचोरा नगरपालिका निवडणुकीच्या निमित्ताने या दोघांचे लोकप्रतिनिधी म्हणून, नगरसेवक म्हणून राजकीय ‘लॉन्चिंग’ झाले आहे. एक नगरसेवक शिवसेनेचा तर दुसरा भाजपचा असला तरी सध्याची महाराष्ट्राची राजकीय स्थिती लक्षात घेता हे दोघेही प्रत्यक्षात महायुतीचे नगरसेवक आहेत. राज्यात सध्या महायुतीचे राजकारण वरच्या पातळीपुरते मर्यादित न राहता स्थानिक स्वराज्य संस्थांपर्यंत पोहोचलेले असून पाचोरा नगरपालिका सभागृहातही त्याचे स्पष्ट प्रतिबिंब दिसून येत आहे. पाचोरा–भडगाव विधानसभा मतदारसंघात महायुतीला विरोधक शिल्लकच राहिलेले नाहीत अशी परिस्थिती निर्माण झालेली असून एकेकाळी चुरशीच्या लढतींसाठी ओळखल्या जाणाऱ्या या मतदारसंघात आता राजकीय समीकरणे पूर्णपणे बदललेली दिसून येत आहेत. भाजप विरोधात शिंदे शिवसेना गट असा निवडणुकीचा रंग जरी यावेळी पाहायला मिळाला असला तरी ही लढतही महायुतीच्या चौकटीतच फिरत असल्याचे वास्तव आहे. नगरपालिका ही स्थानिक स्वराज्य संस्था असली तरी महाराष्ट्रातील वरिष्ठ नेत्यांचा एकंदरीत सूर, भविष्यातील राजकीय दिशा आणि राज्यातील घडामोडी लक्षात घेता महायुतीतच विजयाचे गणित आखले जात असल्याचे स्पष्टपणे जाणवत आहे. आगामी महापालिका निवडणुकीनंतर कोर्टाचा निर्णय काय लागतो, धनुष्यबाण कोणाकडे जातो, शिवसेना शिंदे गट स्वतंत्र राहतो की भाजपमध्ये विलीन होतो, हे प्रश्न सध्या तात्कालीन राजकीय घडामोडींचा भाग असले तरी आजच्या घडीला पाचोरा–भडगाव विधानसभा मतदारसंघात विरोधक शिल्लक न राहिल्यामुळे महायुतीतच निवडणूक रंगणार असे चित्र केवळ दिसून येत नाही तर ते प्रत्यक्षात आकार घेत असल्याचेही स्पष्ट होत आहे. या पार्श्वभूमीवर सुमित किशोर आप्पा पाटील आणि सुरज संजय वाघ या दोघा युवा नगरसेवकांकडून जनतेच्या अपेक्षा मोठ्या असून स्थानिक प्रश्नांची जाण, विकासात्मक दृष्टीकोन आणि पारदर्शक कामकाजाच्या माध्यमातून ते आपली स्वतंत्र ओळख निर्माण करतात का, याकडे संपूर्ण पाचोरा–भडगाव मतदारसंघाचे लक्ष लागले आहे.