पाचोरा – दि. १२ ऑक्टोबर २०२५, रविवार रोजी जयकिरण प्रभाजी शैक्षणिक व सामाजिक संस्था संचलित न्यू इंग्लिश मीडियम स्कूल, पाचोरा येथे प.पू. महासती साध्वीरत्न किरण प्रभाजी महाराज साहब यांच्या सहाव्या पुण्यस्मरण दिनानिमित्त भावपूर्ण श्रद्धांजली कार्यक्रमाचे आयोजन करण्यात आले. श्रद्धा, भक्ती आणि सामाजिक बांधिलकीने भरलेल्या या कार्यक्रमात संस्थेचे सर्व पदाधिकारी, शिक्षकवर्ग तसेच विद्यार्थी सहभागी झाले. कार्यक्रमाची सुरुवात प.पू. महासती साध्वीरत्न किरण प्रभाजी महाराज साहब यांच्या पवित्र प्रतिमेस पुष्पार्पण करून व नवकार मंत्राच्या उच्चाराने करण्यात आली. सर्व उपस्थितांनी डोळे मिटून साध्वीजींना विनम्र अभिवादन केले आणि त्यांच्या अध्यात्मिक कार्याचे स्मरण करत त्यांच्याप्रती आपली कृतज्ञता व्यक्त केली. या वेळी वातावरणात एक अद्भुत शांतता आणि अध्यात्मिकतेची अनुभूती सर्वांना झाली. संस्थेचे अध्यक्ष दिनेश बोथरा यांनी आपल्या भाषणात प.पू. महासती साध्वीरत्न किरण प्रभाजी महाराज साहब यांच्या समाजातील योगदानाचा आढावा घेतला. त्यांनी सांगितले की, “साध्वीजींनी आपले संपूर्ण जीवन समाजसेवा, शैक्षणिक प्रसार आणि अहिंसा, करुणा यांचा संदेश देण्यात व्यतीत केले. त्यांच्या प्रेरणेतूनच आज संस्था सामाजिक व शैक्षणिक क्षेत्रात प्रगतीपथावर आहे.” सचिव जीवन जैन यांनी साध्वीजींच्या आदर्श जीवनशैलीचा उल्लेख करत सांगितले की, “किरण प्रभाजी महाराज साहब यांनी स्त्रीशक्तीला जागविण्याचे कार्य केले. त्यांनी धर्म, शिक्षण आणि संस्कार या तिन्ही गोष्टींचा संगम साधला. त्यांच्या स्मृती कायम आमच्या मनामध्ये जिवंत राहतील.” कार्यक्रमाचे सुयोग्य नियोजन सहसचिव संजय बडोला, खजिनदार जगदीश खिलोशिया, स्कूल कमिटी चेअरमन लालचंद केसवाणी, स्कूल कमिटी सचिव रितेश ललवाणी तसेच मुख्याध्यापिका पुष्पलता पाटील आणि सीईओ अतुल चित्ते यांच्या मार्गदर्शनाखाली करण्यात आले. कार्यक्रमादरम्यान सर्वांनी एकजुटीने साध्वीजींच्या कार्याचा आढावा घेतला आणि त्यांच्या शिकवणींवर आधारित मूल्यांचा विद्यार्थ्यांमध्ये प्रसार करण्याचा संकल्प केला. संस्थेचे संचालक संजय चोरडीया, गुलाब राठोड, जगदिशशेठ खिलोशिया गोपाल पटवारी, प्रिती जैन, महेंद्रकुमार हिरण, अशोककुमार मोर, शेखरकुमार धाडीवाल यांनीही या कार्यक्रमाच्या आयोजनात आपले मोलाचे योगदान दिले. सर्वांनी मिळून साध्वीजींच्या कार्याची प्रेरणा पुढील पिढीपर्यंत पोहोचविण्याचा निर्धार व्यक्त केला. मुख्याध्यापिका पुष्पलता पाटील यांनी विद्यार्थ्यांना साध्वीजींच्या जीवनचरित्राविषयी माहिती देत त्यांच्या शिस्त, साधेपणा आणि करुणामय जीवनशैलीचा आदर्श घेण्याचे आवाहन केले. सीईओ अतुल चित्ते सर यांनी संस्थेच्या प्रगतीसाठी सर्व शिक्षक व कर्मचाऱ्यांचे योगदान कौतुकास्पद असल्याचे सांगितले आणि प.पू. साध्वीजींच्या आशीर्वादाने शाळा उत्तरोत्तर प्रगत होईल असा विश्वास व्यक्त केला. या कार्यक्रमाच्या यशस्वी आयोजनात निर्मला पाटील, प्रतिभा मोरे, रुपाली जाधव, प्रिती शर्मा, योगिता शेंडे, पुजा पाटील, ज्योती बडगुजर, कविता जोशी, साविता माळी, चेतना पाटील, अश्विनी पाटील, भाग्यश्री ब्राम्हणकर, विद्या थेपडे, राधा शर्मा, शितल महाजन, स्मिता देशमुख, हरिप्रिया नम्र, किशोरी साळुंखे, वाल्मिक शिंदे, किरण बोरसे, पुजा अहिरे, शालिनी महाजन, रुक्मिणी कासार, पुजा देसले, निवृत्ती तांदळे, कृष्णा शिरसाठ, आनंद दायमा, मनोज बडगुजर, शिवाजी ब्राम्हणे, अलका बडगुजर, अश्विनी पाटील, सुनिता शिंपी, मनिषा पाटील, शितल पाटील, शिवाजी पाटील आणि विकास मोरे या सर्वांनी आपापली जबाबदारी उत्साहाने पार पाडली. सर्व शिक्षक व कर्मचाऱ्यांनी आपापल्या विभागात शिस्त, सजावट, उपस्थित व्यवस्था, तसेच विद्यार्थ्यांच्या सहभागाचे सुंदर नियोजन केले. विद्यार्थ्यांनी साध्वीजींना अर्पण म्हणून नवकार मंत्राचे सामूहिक पठण केले, ज्यामुळे संपूर्ण परिसरात भक्तीभाव आणि शांतीचे वातावरण निर्माण झाले. कार्यक्रमाच्या शेवटी उपस्थितांनी साध्वीजींच्या प्रेरणेने समाजकार्य, शिक्षण आणि नैतिक मूल्यांच्या संवर्धनासाठी कार्य करण्याचा संकल्प केला. संस्थेचे अध्यक्ष दिनेश बोथरा यांनी सर्व शिक्षकवर्ग, विद्यार्थी आणि पालकांचे आभार मानले व कार्यक्रम यशस्वीरीत्या पार पडल्याबद्दल समाधान व्यक्त केले. प.पू. महासती साध्वीरत्न किरण प्रभाजी महाराज साहब यांच्या सहाव्या पुण्यस्मरण दिनाचा हा कार्यक्रम भक्तीभाव, शिस्त आणि सामाजिक एकतेचे उत्कृष्ट उदाहरण ठरला. त्यांच्या शिकवणींनी प्रेरित संस्था पुढील काळातही समाजकल्याणाच्या दिशेने वाटचाल करत राहील, असा विश्वास सर्वांनी व्यक्त केला.

पाचोरा – एखाद्या मुलाने आपल्या परिश्रम, कष्ट आणि गुणवत्तेच्या जोरावर जेव्हा पुरस्कार प्राप्त केला जातो, तेव्हा त्या क्षणी त्याच्या पालकांच्या चेहऱ्यावर उमटणारा अभिमान आणि समाधान अवर्णनीय असतो. पण जेव्हा तोच मुलगा काळाच्या ओघात शिक्षण, कौशल्य आणि जिद्दीच्या जोरावर गुणवंत किर्तीवंत बनतो आणि त्याच व्यासपीठावर उभा राहून स्वतःच्या हाताने इतरांना बक्षीस देतो, तेव्हा त्या क्षणी पालकांच्या आनंदाला पारावर नसतो.
समाज म्हटला की त्यामध्ये राजकारण, मतभेद आणि एकमेकांचे पाय ओढण्याची प्रवृत्ती सहज दिसते. अनेकदा एखाद्याने समाजाच्या हितासाठी चांगला उपक्रम राबवण्याचा प्रयत्न केला, तरी त्याच्या यशात अडथळे निर्माण करण्यासाठी काहीजण षडयंत्र रचतात. परंतु या नकारात्मक प्रवृत्तीच्या पार्श्वभूमीवर पाचोर्‍याचा सोनार समाज हा सकारात्मकता, एकता आणि प्रगतीचे उदाहरण ठरला आहे. सोनार समाजाने अनेक वर्षांपासून सातत्याने शिक्षण, संस्कार ,व्यवसाय प्रगती आणि सामाजिक प्रबोधन यासाठी जे उपक्रम राबवले आहेत, ते खरोखरच कौतुकास्पद आहेत. व्यक्तिगत स्वार्थ बाजूला ठेवून समाजहिताला प्राधान्य देणाऱ्या या समाजाच्या कार्याला त्रिवार अभिवादन करावे लागेल. या सोनार समाजाने दाखवून दिले आहे की एकता आणि सद्भावनेच्या बळावर कोणताही समाज आत्मविकास आणि प्रगतीचा दीपस्तंभ बनू शकतो. पाचोर्‍यातील सोनार समाजाने नुकताच अशाच एका अभिमानास्पद क्षणाचा साक्षीदार होऊन समाजाच्या इतिहासात सुवर्णाक्षरांनी नोंदवण्याजोगा सोहळा साजरा केला. सोनार समाजतर्फे आयोजित “गुणवंत विद्यार्थी गौरव सोहळा” या कार्यक्रमात समाजातील दोन तेजस्वी तरुण — इंडियन ऑइल कॉर्पोरेशन लिमिटेड, मुंबई येथे असिस्टंट मॅनेजर म्हणून कार्यरत असलेले सौरभ मनीष बाविस्कर आणि ‘कौन बनेगा करोडपती’ या लोकप्रिय दूरचित्रवाणी कार्यक्रमातून देशभरात ओळख निर्माण करणारे साकेत नंदकुमार सोनार — हे प्रमुख पाहुणे म्हणून उपस्थित होते. विशेष म्हणजे हे दोघेही काही वर्षांपूर्वी या समाजाच्या व्यासपीठावर विद्यार्थी म्हणून उभे राहून पुरस्कार घेत होते, आणि आज त्याच मंचावर उभे राहून त्यांनी पुढच्या पिढीला गौरवाने सन्मानित केले. हा प्रवास म्हणजेच — “बक्षीस घेणाऱ्यापासून बक्षीस देणाऱ्यापर्यंतचा प्रेरणादायी प्रवास” — या विचाराचा जिवंत पुरावा ठरला. तलाठी कॉलनी, पाचोरा येथील रहिवासी सौरभ मनीष बाविस्कर हा बालपणापासूनच कुशाग्र बुद्धीचा, शिस्तप्रिय आणि अभ्यासू विद्यार्थी होता. शिक्षणाविषयी प्रखर ओढ आणि आत्मविश्वासाच्या बळावर त्याने दहावी आणि बारावी परीक्षेत उल्लेखनीय यश संपादन केले. पुढे पुण्यातील नामांकित एमआयटी कॉलेजमधून मेकॅनिकल इंजिनिअरिंगची पदवी संपादन करताना त्याने तांत्रिक स्पर्धा, प्रकल्प आणि कार्यशाळांमध्ये सहभाग घेत आपले व्यक्तिमत्व सर्वांगीण विकसित केले. देशातील सर्वाधिक कठीण मानली जाणारी GATE परीक्षा उत्तीर्ण होऊन देशभरात 471वा क्रमांक मिळवत त्याने आपली गुणवत्ता सिद्ध केली. या गुणवत्तेच्या बळावर त्याला IIT दिल्लीमध्ये M.Tech साठी प्रवेश मिळाला आणि तिथून शिक्षण पूर्ण केल्यानंतर ONGC, IOCL, SAIL, BHEL अशा प्रतिष्ठित संस्थांच्या मुलाखती यशस्वीरीत्या उत्तीर्ण करून अखेर त्याची निवड Indian Oil Corporation Limited (IOCL) मध्ये बिझनेस डेव्हलपमेंट ऑफिसर म्हणून झाली. सुरत येथून कारकीर्द सुरू करत केवळ तीन वर्षांतच त्याने असिस्टंट मॅनेजर पदावर बढती मिळवली आणि आज तो मुंबई मुख्यालयात कार्यरत आहे. सौरभ म्हणतो, “समाजाने वेळोवेळी दिलेले प्रोत्साहन, कौतुकाची थाप आणि आत्मीय पाठबळ यामुळेच मी आज या स्थानी पोहोचलो.” त्याची ही नम्रता आणि कृतज्ञता समाजातील प्रत्येक तरुणासाठी प्रेरणादायी ठरते. याच मंचावर सौरभसोबत उपस्थित होते साकेत नंदकुमार सोनार — पाचोर्‍याचा आणखी एक तेजस्वी तारा. नवोदय विद्यालयातून शिक्षण घेताना साकेतने नेहमीच शैक्षणिक क्षेत्रात आघाडी राखली. पुढे त्याने देशातील प्रतिष्ठित जवाहरलाल नेहरू विद्यापीठ (JNU), दिल्ली येथे प्रवेश मिळवून जर्मन भाषेत पदव्युत्तर शिक्षण पूर्ण केले. भाषाशिक्षणावरील आवड आणि परिश्रमामुळे त्याने स्पेनमध्ये जाऊन तेथील विद्यार्थ्यांना जर्मन भाषा शिकवली, अशा प्रकारे जागतिक पातळीवर भारताचा शैक्षणिक झेंडा फडकवला. त्याच्या आयुष्यातील सर्वात मोठा टप्पा म्हणजे देशातील लोकप्रिय ज्ञानस्पर्धात्मक कार्यक्रम “कौन बनेगा करोडपती” मध्ये सहभाग. महानायक अमिताभ बच्चन यांच्या समोर शांत आत्मविश्वासाने प्रश्नांची उत्तरे देत त्याने देशभरातील प्रेक्षकांची मने जिंकली. आपल्या ज्ञान आणि संयमाच्या बळावर त्याने तब्बल ₹12.5 लाख रुपयांची रक्कम जिंकली. साकेत म्हणतो, “माझ्या प्रवासात माझ्या पालकांचा पाठिंबा, घरातील शैक्षणिक वातावरण आणि समाजाने दिलेला आत्मविश्वास हेच माझ्या यशामागील खरे कारण आहे.” या दोन्ही तरुणांचा प्रवास म्हणजे यश, जिद्द, संयम आणि संस्कार यांचा सुंदर संगम आहे. त्यांनी सिद्ध केले की परिस्थिती कोणतीही असो, प्रयत्नांची पराकाष्ठा आणि शिस्तबद्धता यामुळेच आयुष्य उजळते. सोनार समाजाने त्यांना प्रमुख पाहुणे म्हणून सन्मानित करून समाजातील इतर विद्यार्थ्यांना नव्या उर्जेची प्रेरणा दिली आहे. या कार्यक्रमात समाजाने आणखी एक अभिमानास्पद निर्णय घेतला — आर्थिकदृष्ट्या दुर्बल कुटुंबातील विद्यार्थ्यांच्या शिक्षणाचा संपूर्ण खर्च समाज उचलणार असल्याची घोषणा करण्यात आली. या निर्णयाने अनेक विद्यार्थ्यांना शिक्षणाचे नवे दार उघडले आहे. सौरभ बाविस्कर आणि साकेत सोनार यांचा प्रवास केवळ व्यक्तिगत यशकथा नाही, तर समाजासाठी दीपस्तंभ आहे. त्यांच्या हातून जेव्हा नवीन विद्यार्थ्यांना बक्षीस मिळाले, तेव्हा तो क्षण प्रत्येक पालकाच्या डोळ्यात अभिमानाचे अश्रू घेऊन आला. त्यांनी दाखवून दिले — “जेव्हा बक्षीस घेणारे हात बक्षीस देणारे हात बनतात, तेव्हा तीच समाजाच्या व कुटूंबाची प्रगतीची खरी निशाणी ठरते.” हा प्रवास यशाचा आहे, पण त्याहून महत्त्वाचा म्हणजे तो प्रेरणेचा प्रवास आहे — जो उद्याच्या पिढीला दिशा, धैर्य आणि ध्येय देणारा ठरणार आहे.

पाचोरा – हिंदू धर्मातील देवी उपासनेतील एक प्रमुख शक्तिस्थान म्हणून ओळखले जाणारे कालिकामाता मंदिर हे पाचोरा शहरातील श्रद्धेचे प्रतीक बनले आहे. भडगाव रोडवरील एमआयडीसी कॉलनीलगत वसलेल्या कालिकामाता कॉलनीमध्ये हे मंदिर स्थित असून, शहरातील एकमेव कालिकामातेचे हे मंदिर आजही भक्तांना आस्था, श्रद्धा आणि अध्यात्माचा साक्षात्कार घडवते. या मंदिराचे बांधकाम पूर्ण होऊन १९८७ साली भव्य आणि आकर्षक स्वरूपात त्याची स्थापना करण्यात आली. कालिकामाता गुह निर्माण सोसायटीच्या वतीने मंदिराची उभारणी करण्यात आली असून, या सोसायटीच्या सदस्यांनी अथक परिश्रम घेत हे धार्मिक स्थळ उभे केले. सुमारे चाळीस वर्षांपूर्वी कराष्ठमी तिथीनुसार देवी कालिकामातेच्या मूर्तीची प्राणप्रतिष्ठा मोठ्या विधीवत पद्धतीने करण्यात आली होती. जयपूर येथून खास या मूर्तीची निर्मिती करून ती पाचोऱ्यात आणण्यात आली. मूर्तीच्या डोळ्यातील तेज आणि मुखमुद्रेतून देवीची अद्भुत शक्ती व मातृत्वाची भावना आजही अनुभवास येते. दरवर्षी कराष्ठमीच्या दिवशी भक्तगण मोठ्या श्रद्धेने येथे एकत्र येऊन देवीचे पूजन करतात. यंदाही नित्य परंपरेनुसार धार्मिक विधी, पूजन, अर्चा आणि आरतीचे आयोजन करण्यात आले. पाचोरा-भडगाव विधानसभा मतदारसंघाचे आमदार किशोर आप्पा पाटील यांच्या हस्ते यावर्षी विधीवत पूजा-अर्चा करण्यात आली. आमदार पाटील यांनी देवीसमोर दीप प्रज्वलित करून आरती केली व पाचोरा शहरासह संपूर्ण मतदारसंघाच्या सुख-समृद्धीची कामना केली. पूजेनंतर महाप्रसादाचे आयोजन करण्यात आले होते, ज्याचा लाभ पंचक्रोशीतील भक्तांनी मोठ्या भक्तिभावाने घेतला. मंदिर परिसर त्या दिवशी भक्तांच्या गर्दीने आणि भक्तिगीतांच्या स्वरांनी दुमदुमून गेला होता. कालिकामाता कॉलनीतील रहिवासी तसेच परिसरातील नागरिक, महिला मंडळे, तरुणाई, आणि श्रद्धाळू मंडळी मोठ्या संख्येने दर्शनासाठी आले होते. मंदिराच्या सभोवताल फुलांची सजावट, दीपमाळा आणि रांगोळ्यांनी वातावरण अधिक मंगलमय बनवले होते. देवीच्या आरतीवेळी शंखनाद आणि घंटानादाने संपूर्ण परिसर भक्तिमय झाला.
मंदिराच्या स्थापनेपासूनच कालिकामाता गुह निर्माण सोसायटीने समाजभावनेने कार्य करत या स्थळाचा धार्मिक विकास साधला आहे. वर्षभर विविध सण, उत्सव आणि धार्मिक कार्यक्रम येथे होत असतात. विशेषतः नवरात्री, कराष्ठमी आणि चैत्र महोत्सवाच्या काळात मंदिरात होणाऱ्या आरत्या, देवीभक्तांच्या जागरण्या, भजन-कीर्तन आणि दंडवत परिक्रमा हे येथील वैशिष्ट्य ठरले आहे. कालिकामाता मंदिर केवळ पूजेचे स्थान नसून समाजातील एकात्मता, एकोपा आणि भक्तीचा केंद्रबिंदू बनले आहे. पाचोरा शहरात असंख्य मंदिरे असली तरी कालिकामाता मंदिराचे स्थान वेगळे आणि विशेष आहे. देवीच्या दर्शनासाठी शहरासह ग्रामीण भागातूनही मोठ्या संख्येने भाविक येतात. मंदिराच्या व्यवस्थापन समितीने स्वच्छता, प्रकाशयोजना आणि भक्तांना सोयीसुविधा यावर विशेष लक्ष केंद्रित केले आहे. दरवर्षीप्रमाणे यंदाही मंदिरात सजावट करण्यासाठी स्थानिक महिलांनी फुलांचे तोरण, रांगोळ्या आणि दीपमाळांनी मंदिर उजळून टाकले. पूजेनंतर झालेल्या महाप्रसादात हजारो भक्तांनी सहभागी होऊन भक्तिभावाने प्रसाद ग्रहण केला. कार्यक्रमानंतर मंदिरात सामूहिक आरती आणि देवीच्या जयघोषाने वातावरण दुमदुमले.
आमदार किशोर आप्पा पाटील यांनी आपल्या भाषणात म्हटले की, “कालिकामाता मंदिर हे केवळ श्रद्धेचे प्रतीक नसून पाचोऱ्याच्या लोकांच्या धार्मिक आणि सांस्कृतिक जीवनाचा अविभाज्य भाग आहे. येथे येताना नेहमीच मनाला शांतता आणि आत्मिक समाधान लाभते. अशा ठिकाणांच्या जतन आणि विकासासाठी प्रत्येक नागरिकाने योगदान द्यावे.” त्यांच्या या संदेशाने उपस्थित भक्तांनी उत्स्फूर्त टाळ्यांच्या गजरात स्वागत केले.
कालिकामाता मंदिराचा इतिहास पाहिला तर १९८० च्या दशकात काही धर्मप्रेमी नागरिकांनी एकत्र येऊन देवीच्या मंदिराच्या स्थापनेचा संकल्प केला. आर्थिक अडचणींवर मात करत समाजातील दानशूर व्यक्तींनी योगदान दिले आणि मंदिराचे बांधकाम पूर्ण करण्यात आले. त्या काळात झालेला हा उपक्रम आजही शहरातील आदर्श धार्मिक उपक्रम म्हणून ओळखला जातो. मंदिर परिसरात आजही जुन्या परंपरेनुसार कालीपूजन, होम, हवन आणि सामूहिक जप केला जातो. याशिवाय महिलांसाठी विशेष भजनी मंडळ, लहान मुलांसाठी कथा-संकीर्तन कार्यक्रम आयोजित केले जातात. देवीच्या कृपेने या परिसरात अनेक भक्तांना मानसिक शांती आणि जीवनातील सकारात्मक बदल अनुभवायला मिळाले आहेत.
देवी कालिकामाता ही शक्तीची प्रतीक मानली जाते. तिच्या कृपेने वाईट शक्तींचा नाश होतो आणि धर्म, न्याय, सत्य आणि सद्गुणांचा विजय होतो, अशी श्रद्धा भक्तांमध्ये दृढ आहे. पाचोरा शहरातील हे मंदिर त्या श्रद्धेचे सजीव उदाहरण आहे. मंदिराच्या स्थापनेला जवळपास चार दशके उलटून गेली असली तरी आजही येथील भक्तिभाव, परंपरा आणि उत्साह कमी झालेला नाही. प्रत्येक कराष्ठमीला मंदिरात येणाऱ्या भक्तांच्या गर्दीतून या स्थळाची वाढती लोकप्रियता स्पष्टपणे जाणवते.
अशा पवित्र स्थळाच्या माध्यमातून शहरात धार्मिकतेसोबतच सामाजिक बांधिलकी वाढावी, लोकांमध्ये एकोप्याची भावना दृढ व्हावी, हा या मंदिराचा मूळ उद्देश आहे. आजही कालिकामाता कॉलनीतील नागरिक हा उद्देश जपण्याचा प्रयत्न करत आहेत. या श्रद्धास्थानामुळे पाचोरा शहराचे धार्मिक सौंदर्य अधिक उजळले असून भाविकांसाठी हे मंदिर नित्य प्रेरणास्थान ठरले आहे.

मेष – आज कार्यक्षेत्रात चांगली प्रगती होईल. नवीन संधी प्राप्त होतील. कुटुंबातील वातावरण आनंददायी राहील.
शुभ अंक : 3 | शुभ रंग : लाल

वृषभ – आर्थिक लाभ मिळेल. मित्रांचा आधार मिळेल. प्रवास फायदेशीर ठरेल. नातेवाईकांशी सौहार्द ठेवा.
शुभ अंक : 6 | शुभ रंग : हिरवा

मिथुन – शिक्षण व करिअरमध्ये संधी वाढतील. जुनी प्रलंबित कामे पूर्ण होतील. संवादातून फायदा होईल.
शुभ अंक : 5 | शुभ रंग : पिवळा

कर्क – घरगुती जबाबदाऱ्या पार पाडाल. खर्चावर नियंत्रण ठेवा. आरोग्याकडे लक्ष ठेवा.
शुभ अंक : 2 | शुभ रंग : पांढरा

सिंह – आत्मविश्वासाने काम यशस्वी होईल. समाजात मान–सन्मान वाढेल. प्रेमसंबंध दृढ होतील.
शुभ अंक : 9 | शुभ रंग : केशरी

कन्या – आर्थिक स्थिती सुधारेल. महत्वाची कामे पूर्ण होतील. आरोग्य उत्तम राहील.
शुभ अंक : 7 | शुभ रंग : निळा

तुळ – नवे करार व ओळखी लाभदायक ठरतील. कुटुंबातील वातावरण आनंदी राहील. महत्वाच्या कामात यश मिळेल.
शुभ अंक : 4 | शुभ रंग : गुलाबी

वृश्चिक – अनावश्यक खर्च टाळा. नोकरीत ताण जाणवेल. संयम ठेवा.
शुभ अंक : 8 | शुभ रंग : काळा

धनु – धार्मिक व सामाजिक कार्यात सहभाग लाभेल. प्रवासातून लाभ मिळेल. आर्थिक दृष्ट्या दिवस अनुकूल आहे.
शुभ अंक : 1 | शुभ रंग : जांभळा

मकर – वरिष्ठांचे मार्गदर्शन लाभेल. प्रलंबित कामे पूर्ण होतील. आरोग्याची काळजी घ्या.
शुभ अंक : 5 | शुभ रंग : राखाडी

कुंभ – आर्थिक स्थैर्य राहील. नवीन ओळखी फायदेशीर ठरतील. कौटुंबिक वातावरण सुखावह राहील.
शुभ अंक : 6 | शुभ रंग : आकाशी

मीन – मनातील इच्छा पूर्ण होईल. नोकरीत प्रगती होईल. वैयक्तिक आयुष्यात आनंदाचे क्षण लाभतील.
शुभ अंक : 2 | शुभ रंग : गुलाबी

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

पाचोरा–भडगाव विधानसभा मतदारसंघात स्थानिक स्वराज्य संस्थांच्या म्हणजेच नगर परिषद, जिल्हा परिषद आणि पंचायत समिती निवडणुकांची रणधुमाळी सुरू झाली आहे. गावोगाव चर्चा रंगू लागली असून प्रत्येक प्रभागात उमेदवारांनी आपले पाय रोवायला सुरुवात केली आहे. राजकीय दृष्टीने पाहता, ही निवडणूक आगामी विधानसभा निवडणुकीची दिशा ठरवणारी ठरणार आहे, असा सर्वसाधारण कयास व्यक्त होत आहे. विशेष म्हणजे, या निवडणुकीच्या प्राथमिक स्थितीकडे पाहता विद्यमान आमदार किशोरआप्पा पाटील यांचे पारडे सध्या जड दिसत आहे. यामागचे कारणही ठोस आहे — आमदार किशोरआप्पा पाटील यांचे कार्य आणि संघटनशक्ती गेल्या काही वर्षांत अत्यंत बळकट झाली आहे. त्यांनी मतदारसंघातील सर्व स्तरांवरील जनतेशी घट्ट नाते जोडले असून त्यांच्या व मुलगा सुमीत किशोरआप्पा पाटील यांच्या संपर्कक्षमता आणि कार्यशैलीमुळे त्यांचा प्रभाव पाचोऱ्यापुरता मर्यादित न राहता भडगावच नाही तर पारीसरातील संलग्ध भागांपर्यंत पोहोचला आहे. तथापि, राजकारणात कार्य जितके महत्त्वाचे तितकाच पैसा हा निवडणुकीतील निर्णायक घटक ठरतो. “आमदार किशोरआप्पांना निवडणुकीत पैसा खर्च करायला कलेजा नाही,” अशी चर्चा सर्वसामान्य जनता व कार्यकर्त्यां पासून मतदारांपर्यंत आहे, आणि त्यात काही अंशी सत्यता असल्याचे मान्य करावे लागेलच. पाचोरा नगरपालिकेच्या निवडणुकीचा विचार केला तर अनेक इच्छुक उमेदवार तयारीला लागले आहेत. काहींनी आपापले प्रभाग निश्चित केले आहेत, तर काहींनी गटबाजीच्या माध्यमातून राजकीय बळ मिळवण्याचे प्रयत्न सुरू केले आहेत. परंतु काही असेही आहेत, जे प्रत्यक्ष निवडणुकीत उभे राहणार नाहीत, तरीही आमदार किशोरआप्पांच्या नावावर आणि त्यांच्या जवळीकतेवरून वर्षानुवर्षे ठेके – आर्थिक लाभ घेत आले आहेत. कोटयाधिश झाले तरी पुरग्रस्तांसाठी स्वतःच्या खिशात हात घालुन पैसे वाटप केले नाही स्वतः दौरे केले नाही अशा व्यक्तींना देखील आता या निवडणुकीत स्वतःसाठी व इतरांसाठी खर्च करावा लागणार आहे, हे स्पष्ट झाले आहे. कारण जनतेसमोर आता केवळ कार्य नव्हे, तर आर्थिक योगदान आणि निवडणूक यंत्रणा उभारणेही महत्त्वाचे ठरले आहे. अनेकांच्या मते जर उमेदवार हा थेट आमदार किशोरआप्पांच्या घरातीलच असला, तर इतर उमेदवारांचे आर्थिक ओझे हलके होते. हे सुर्य प्रकाशा एवढे सत्य व स्पष्ट आहे म्हणुन विशिष्ठ फळी प्रमुख उमेदवार आप्पांच्या घरातीलच पाहिजे यासाठी प्रयत्नशील आहे कारण अशावेळी अनेकांचा असा समज असतो की “आप्पांच्या घरातील उमेदवाराने निवडणूक लढवली, की खर्चाचा ताण आपोआप मिटून जाईल.” या चर्चांना सध्या स्थानिक पातळीवर चांगलाच ऊत आला आहे. हे पण सत्य आहे प्रत्येक निवडणुकीत उमेदवार सुरुवातीला ज्या प्रमाणात खर्च सांगतो, त्याच्या एकपट रक्कम जरी मागितली की विविध कारणे सांगून वेळ मारून नेणारी वृत्ती देखील दिसून येते. परिणामी, शेवटी संपूर्ण आर्थिक भार पॅनलप्रमुख किंवा पक्षप्रमुखावरच पडतो. हे दृश्य आता पुन्हा पाचोऱ्यात दिसत आहे.किंवा नेत्यांसाठी नवीन नाही नेत्याची स्वतःची निवडणूक असली की कार्यकर्त्यांच्या हाती पैसा द्यावा लागतो, पण जेव्हा कार्यकर्त्यांची निवडणूक येते, तेव्हा त्याच नेत्याला घरातून पण पैसा द्यावा लागतो नंतर निवडून आल्यावर ती कमाई पुन्हा कार्यकर्ता घरातच जमा करतो. हे आता पाचोरा–भडगाव परिसरातील नित्याचे वास्तव सत्य आहे, नव्हेतर हे “सूर्यप्रकाशाएवढे स्पष्ट” आहे. त्यामुळे ही परिस्थिती केवळ आमदार किशोरआप्पा पाटील यांच्यापुरती मर्यादित नाही, तर सर्वच राजकीय पक्षांत दिसणारी आहे. अशा स्थितीत या निवडणुकीत नेत्यांना अष्टपैलू कस लावून स्पष्ट आर्थिक भूमिका घेणे अत्यंत आवश्यक आहे. कारण या निवडणुकीत नगराध्यक्ष पदासाठी किमान २५ कोटी रुपये आणि डिपॉझिट टिकवण्यासाठी एका नगरसेवकास किमान २५ लाख रुपये लागतील, असा अंदाज आहे. तर प्रत्यक्ष विजयी होण्यासाठी नगरसेवकाला ३५ ते ५० लाख रुपये खर्च अपेक्षित आहेत. हे वास्तव सर्व पक्षांना माहीत असून, त्यामुळे आता प्रत्येक पक्ष आपल्या आर्थिकदृष्ट्या सक्षम उमेदवारांनाच प्राधान्य देत आहे. या पार्श्वभूमीवर भारतीय जनता पक्षाला दुर्लक्षित करून चालणार नाही. कारण पाचोरा–भडगाव मतदारसंघात माजी आमदार दिलीपभाऊ वाघ, माजी विधानसभा उमेदवार अमोलभाऊ शिंदे आणि सौ. वैशालीताई सूर्यवंशी हे तीनही प्रभावी नेते सध्या भाजपात एकत्र आले आहेत. प्रारंभी त्यांच्या मध्ये थोडे मतभेद असल्याची चर्चा होती, मात्र जळगाव विमानतळावर नामदार गिरीशभाऊ महाजन यांच्या पुढाकाराने झालेल्या ‘संकटमोचक’ बैठकीत त्यांचे मनोमिलन साधले गेले, असे विश्वसनीय सूत्रांचे म्हणणे आहे. यानंतर नामदार गिरीशभाऊ महाजन, खासदार स्मिताताई वाघ आणि आमदार मंगेशदादा चव्हाण यांनी पाचोरा–भडगाव मतदारसंघातील स्थानिक स्वराज्य संस्थांच्या निवडणुकीत भाजपाला एकतर्फी विजय मिळवून देण्याची जबाबदारी स्वीकारली आहे अर्थात पक्षाने दिली आहे. विशेष म्हणजे, या सर्व नेत्यांचे पाचोरा येथे सतत रात्री उशिरापर्यंत सुरू असलेले गोपनीय दौरे आणि स्थानीक तीघंही नेत्यासोबत गोपतीय बैठकांचे वेळापत्रक आता चर्चेचा विषय ठरले आहे. रात्री दहा नंतर दिलीपभाऊ वाघ, अमोलभाऊ शिंदे, वैशालीताई सूर्यवंशी यांच्या सोबत नामदार गिरीशभाऊ महाजन आणि आमदार मंगेशदादा चव्हाण यांच्या उपस्थितीत होणाऱ्या गुप्त बैठका हे दाखवतात की भाजपने या निवडणुकीत गंभीर तयारी सुरू केली आहे. गिरीशभाऊ महाजन यांच्या राजकीय इतिहासावर नजर टाकली, तर त्यांनी घेतलेला प्रत्येक निर्णय निवडणुकीत यशस्वी ठरला आहे. त्यांनी ज्या जागा जिंकता येतील असे म्हटले, त्या जागा प्रत्यक्षात विजय मिळवतात, हे वारंवार सिद्ध झाले आहे. त्यामुळे पाचोरा–भडगाव नगरपरिषदेच्या निवडणुकीत त्यांनी उमेदवार कोणताही दिला, तरी तो निवडून येईल, असा विश्वास कार्यकर्त्यांमध्ये दृढ आहे. महाजन यांची राजकीय रणनीती म्हणजे उमेदवाराला निवडून आणण्याची कला — आणि हीच कला आता भाजपासाठी निर्णायक ठरणार आहे. दुसरीकडे, शिंदे गटाच्या शिवसेनेचाही या निवडणुकीत तगडा सहभाग राहणार आहे. त्यामुळे ही निवडणूक “शिंदे गट विरुद्ध भाजप” अशा थेट लढतीत रूपांतरित होण्याची चिन्हे स्पष्टपणे दिसत आहेत. या दोन्ही गटांमधील संघर्ष जितका तीव्र होईल, तितका पैसा आणि प्रचार यांचा प्रवाह वाढणार आहे. काही अनुभवी कार्यकर्त्यांच्या मते, “या वेळी अतिवृष्टीत जसे पाणी वाहीले, तसा पैसा वाहील,” ही म्हण यंदा प्रत्यक्षात उतरणार आहे. फरक एवढाच की हा पैसा मध्यातच अडकू नये — तो थेट मतदारांपर्यंत, जनतेपर्यंत पोहोचावा, हाच खरा प्रश्न असेल. कारण आता मतदारही अधिक जागरूक आणि व्यवहारिक झाला आहे. त्याच्यासाठी आश्वासनांपेक्षा प्रत्यक्ष मदत, विकास आणि प्रामाणिकता हाच मोजमापाचा निकष झाला आहे. अशा परिस्थितीत पाचोरा–भडगाव परिसरातील राजकीय समीकरणे अतिशय गुंतागुंतीची आणि तितकीच रोचक बनली आहेत. एका बाजूला आमदार किशोरआप्पा पाटील यांची संघटनशक्ती आणि कार्यकर्त्यांवरील पकड, तर दुसऱ्या बाजूला भाजपचे संकटमोचक नामदार गिरीशभाऊ महाजन यांची अचूक रणनीती — या दोघांपैकी कोणाचे पारडे जड ठरणार, हे येत्या काही दिवसांत स्पष्ट होईल. मात्र इतके निश्चित आहे की, या निवडणुकीत पैसा, परिश्रम, प्रचार आणि पक्षीय एकजूट हे चार घटकच अंतिम विजय ठरवतील. या निवडणुकीत प्रभागनिहाय मतदारांचा कल कोणत्या दिशेने झुकतो, कोणत्या पॅनेलचा चढा हुकूम लागतो, हे पाहण्यासाठी आता सर्वांच्या नजरा पाचोरा–भडगाव नगरपालिकेकडे खिळल्या आहेत. कारण ही निवडणूक फक्त स्थानिक स्वराज्य संस्थेची नाही, तर आगामी विधानसभेच्या राजकीय भवितव्याची कसोटी ठरणार आहे. अर्थात स्थानिक स्वराज्य संस्था व महापालिका निवडणुकी नंतर मे न्यायालयाच्या निर्णया नंतर शिंदे शिवसेने जवळ पक्ष व धनुष्यबाण चिंन्ह राहिले तर ?

मेष – आज नवीन संधी प्राप्त होतील. कार्यात गती येईल. कुटुंबीयांशी संबंध आनंददायी राहतील. आरोग्य उत्तम राहील.
शुभ अंक : 3 | शुभ रंग : लाल

वृषभ – आर्थिक लाभ मिळण्याची शक्यता आहे. मित्रांचा आधार मिळेल. प्रवास फायदेशीर ठरेल.
शुभ अंक : 6 | शुभ रंग : हिरवा

मिथुन – शिक्षण व करिअरच्या संधी वाढतील. जुनी प्रलंबित कामे पूर्ण होतील. संवादातून फायदा होईल.
शुभ अंक : 5 | शुभ रंग : पिवळा

कर्क – घरगुती कामात व्यस्त राहाल. खर्चावर नियंत्रण ठेवा. आरोग्याकडे लक्ष द्या.
शुभ अंक : 2 | शुभ रंग : पांढरा

सिंह – नोकरी व व्यवसायात प्रगती होईल. समाजात मान–सन्मान मिळेल. आत्मविश्वास वाढेल.
शुभ अंक : 9 | शुभ रंग : केशरी

कन्या – आर्थिक स्थिती सुधारेल. महत्वाची कामे पूर्ण होतील. आरोग्य चांगले राहील.
शुभ अंक : 7 | शुभ रंग : निळा

तुळ – नवे करार व ओळखी फायदेशीर ठरतील. कुटुंबात आनंदाचे वातावरण राहील. महत्वाच्या कामात यश मिळेल.
शुभ अंक : 4 | शुभ रंग : गुलाबी

वृश्चिक – अनावश्यक खर्च टाळा. नोकरीत ताण जाणवेल. संयम राखणे गरजेचे आहे.
शुभ अंक : 8 | शुभ रंग : काळा

धनु – धार्मिक व सामाजिक कार्यात सहभाग लाभेल. प्रवासातून चांगला अनुभव मिळेल. आर्थिक लाभ होईल.
शुभ अंक : 1 | शुभ रंग : जांभळा

मकर – वरिष्ठांचे मार्गदर्शन मिळेल. प्रलंबित कामे पूर्ण होतील. आरोग्याची काळजी घ्या.
शुभ अंक : 5 | शुभ रंग : राखाडी

कुंभ – आर्थिक स्थैर्य राहील. नवीन ओळखी लाभदायक ठरतील. कौटुंबिक वातावरण आनंददायी राहील.
शुभ अंक : 6 | शुभ रंग : आकाशी

मीन – मनातील इच्छा पूर्ण होईल. नोकरीत प्रगती होईल. वैयक्तिक आयुष्यात आनंदाचे क्षण लाभतील.
शुभ अंक : 2 | शुभ रंग : गुलाबी

वाचकांनी वरील भविष्यवाणीचा अर्थ अचूक भविष्यवाणी म्हणून न लावता केवळ आत्मपरीक्षण आणि सकारात्मक प्रेरणा म्हणून घ्यावा.

जळगाव : श्री लेवा गुर्जर सेवा प्रतिष्ठान, जळगाव यांच्या वतीने लेवा गुर्जर समाज युवक- युवती परिचय मेळावा २०२५ चे आयोजन दि. १९ ऑक्टोबर २०२५ रोजी सकाळी १० वाजता करण्यात आले आहे. हा भव्य सोहळा सरदार वल्लभभाई पटेल लेवा भवन, मुख्य टेलिफोन ऑफिस मागे, जळगाव येथे पार पडणार आहे. समाजातील सुशिक्षित, सुसंस्कारित व गुणवंत युवक-युवतींना विवाहासाठी एकमेकांना जाणून घेण्याची आणि योग्य जोडीदार निवड करण्याची सुवर्णसंधी या मेळाव्याद्वारे उपलब्ध होणार आहे. लेवा गुर्जर समाजाच्या प्रगत परंपरेचा व सामाजिक ऐक्याचा हा उपक्रम मानला जात असून, अनेक पालक व युवक-युवती या कार्यक्रमाची आतुरतेने वाट पाहत आहेत. या मेळाव्याचे उद्दिष्ट समाजातील तरुणांना आपापसात सुसंवादाची व आत्मीयतेची संधी उपलब्ध करून देणे, तसेच समाजातील नातेसंबंध अधिक घट्ट करणे हे आहे. आकर्षक वातावरणात, पारंपरिक संस्कारांची ओळख जपणारा आणि आधुनिकतेचा स्वीकार करणारा हा मेळावा समाजातील सर्व स्तरातील लोकांना एकत्र आणणार आहे. आयोजक मंडळाने सर्व लेवा गुर्जर बांधवांना या मेळाव्यात सहभागी होऊन कार्यक्रम यशस्वी करण्याचे आवाहन केले आहे. समाजातील सर्व नागरिकांनी या “सस्नेह निमंत्रण” स्वीकारून उपस्थित राहून युवक-युवतींच्या उज्ज्वल भविष्याच्या वाटचालीस साक्षी राहावे, असे आवाहन आयोजकांनी केले आहे.

पाचोरा, दि. 8 ऑक्टोबर 2025 — “जिथे सर्व अमर्थ, तिने फक्त स्वामी समर्थ” या प्रेरणादायी घोषवाक्याखाली श्री स्वामी समर्थ सेवा मार्गाच्या सेवेकऱ्यांनी पुन्हा एकदा मानवीतेचे उदात्त उदाहरण घालून दिले. पाचोरा शहरातील स्वामी लॉन्स येथे आयोजित भव्य पूरग्रस्त मदत वितरण सोहळा, रक्तदान शिबिर, आरोग्य तपासणी शिबिर आणि मोफत औषध वाटप कार्यक्रम मोठ्या उत्साहात आणि शिस्तबद्ध वातावरणात पार पडला. या उपक्रमाचे प्रमुख आकर्षण म्हणजे गुरुपुत्र आदरणीय श्री. चंद्रकांत दादा मोरे यांच्या शुभहस्ते पूरग्रस्तांना मदत वाटपाचे आयोजन करण्यात आले होते. पाचोरा तालुका आणि शहरासह कडेवडगाव, गहूले, पिंपरी, सार्वे, शिंदाड या गावांतील एकूण 477 पूरग्रस्त परिवारांना स्वामी समर्थ सेवा मार्गातर्फे आवश्यक जीवनावश्यक वस्तूंचे वाटप करण्यात आले. या सेवाभावी कार्यामागे दादांच्या प्रेरणेने झपाटलेल्या सेवेकऱ्यांचा अथक प्रयत्न जाणवत होता. पूराच्या भीषण परिणामांनंतर जनतेच्या पुनर्वसनासाठी सेवा मार्गाने केलेले हे योगदान निःसंशयपणे सामाजिक संवेदनशीलतेचे उत्तम उदाहरण ठरले. या उपक्रमादरम्यान शासकीय रक्तपेढीच्या सहकार्याने आयोजित रक्तदान शिबिराला भाविक सेवेकऱ्यांचा उत्स्फूर्त प्रतिसाद लाभला. एकूण 35 सेवेकऱ्यांनी रक्तदान करून समाजाप्रती आपली बांधिलकी व्यक्त केली. विशेष म्हणजे या शिबिरात महिलांनी उत्साहाने सहभाग नोंदवून पुरुषांपेक्षा जास्त रक्तदान करून समाजात प्रेरणादायी संदेश दिला. कार्यक्रमाच्या निमित्ताने मोफत आरोग्य तपासणी व औषध वाटप शिबिर देखील घेण्यात आले, ज्याचा लाभ 500 हून अधिक नागरिकांनी घेतला. कार्यक्रमाचे उद्घाटन आदरणीय चंद्रकांतदादा मोरे, जगदीश बापू सोनार, केंद्र प्रतिनिधी सौ. रेखाताई पाटील, आणि श्री. दत्ताभाऊ सोनार यांच्या शुभहस्ते दीपप्रज्वलनाने झाले. कार्यक्रमाच्या प्रारंभी पाचोरा विभागात सुरू असलेल्या विविध सामाजिक उपक्रमांचा — रक्तदान शिबिरे, मोफत आरोग्य तपासणी, पूरग्रस्तांना मदतकार्य, शाळा व गाव स्वच्छता अभियान, बालसंस्कार व कृषी मेळावे, नदी स्वच्छता अभियान, दिवाळी फराळ व ब्लॅंकेट वाटप — सविस्तर आढावा प्रा. मनीष बाविस्कर यांनी उपस्थितांना दिला. त्यांच्या माहितीमुळे स्वामी समर्थ सेवा मार्गाची सर्वसमावेशक सामाजिक कार्यसंस्कृती अधोरेखित झाली. कार्यक्रमाचे सूत्रसंचालन अत्यंत प्रभावीपणे श्री. सुवर्णसिंग राजपूत सर यांनी केले. वातावरणात भक्तिभाव आणि सेवाभावाचा संगम जाणवत होता. या प्रसंगी श्री. जगदीश बापू सोनार यांच्या सोन्या-चांदीच्या भव्य शोरूमचे उद्घाटन देखील आदरणीय दादासाहेब मोरे यांच्या हस्ते करण्यात आले, ज्यामुळे कार्यक्रमास एक वेगळे औचित्य प्राप्त झाले. यावेळी श्री. राजेंद्र पंडित पाटील यांचा कोरोना काळातील उल्लेखनीय रुग्णसेवा कार्याबद्दल दादांच्या हस्ते विशेष सन्मान करण्यात आला. तसेच रक्तदान करणाऱ्या सर्व रक्तदात्यांचा सुद्धा सत्कार करून त्यांना प्रोत्साहन देण्यात आले. सेवा मार्गाच्या प्रत्येक उपक्रमात दिसणारी संघटित कार्यपद्धती, शिस्त आणि नि:स्वार्थ सेवा भाव यामुळे उपस्थित नागरिक भारावून गेले. पूरग्रस्तांना मदत वितरण आणि रक्तदान शिबिर यशस्वी करण्यासाठी राहुल बावचे सर, गजेंद्र चौधरी सर, संकेत बोरसे सर, अंबालाल पवार सर, सुभाष दादा पाटील, किरण वाणी, तेजस देव, चेतन पवार, जितेंद्र देवरे, अक्षय सिनकर, बबलू वाणी, विश्वजीत सर, ज्ञानेश्वर चौधरी, विष्णू भाऊ, दुष्यंत सर, लक्ष्मण सिनकर सर, ठाकरे सर आणि विकास पाटील यांनी विशेष परिश्रम घेतले. त्यांच्या प्रयत्नांमुळे प्रत्येक घटक वेळेत आणि सुरळीत पार पडला. पाचोरा मेळावा यशस्वी व्हावा म्हणून गिरीश दुसाने, हर्षल चित्ते, अविष्कार वाणी, सुधीर महाजन सर, गणेश कापुरे दादा, ललित चित्ते, वेदांत पवार, रवींद्र पाटील (मामा), मयूर सोनवणे, सार्थक देव, गौरव, उज्वल पाटील सर यांनी सक्रिय सहभाग नोंदवला. त्यांच्यासह कुमारी योगिता, कुमारी अंकिता, कुमारी जानवी, कुमारी टिना सिनकर, तसेच महिला सेवेकऱ्यांमध्ये सौ. विद्या पाटील, सौ. ज्योती पाटील, सौ. जयश्रीताई ढवळे, सौ. कीर्ती ताई येवले, सौ. भोसले ताई, सौ. रुपाली ताई पाटील, सौ. आशाताई पाटील, सौ. सविता धस ताई, सौ. जयश्री पाटील, सौं. कल्पनाताई परदेशी, सौ. लताताई सिनकर, सौ. वंदना चित्ते, सौ. कविता चित्ते, सौ. हर्षदा चित्ते, अवीता ताई पाटील यांच्या योगदानामुळे हा उपक्रम अधिक भव्य आणि यशस्वी झाला. महिलांच्या सहभागामुळे या सेवेचे स्वरूप अधिक प्रभावी आणि सर्वसमावेशक झाले. या दिवशी जळगाव, चाळीसगाव, भडगाव, शेंदुर्णी, कडेवडगाव, खडकदेवळा, तारखेडा, गाळण, बिल्दी, जारगाव, वाडी, शेवाळे, कुऱ्हाड, पाहाण, परधाडे, कासोदा, शिंदाड, साजगाव, गिरड ओझर, मांडकी, भातखंडे, नगरदेवळा, पिंपळगाव थडीचे, गोंदेगाव, पळाशी, बनोटी अशा अनेक सेवा केंद्रांतील सेवेकरी मोठ्या संख्येने उपस्थित होते. त्यांच्या उपस्थितीने कार्यक्रमाला जिल्हास्तरीय स्वरूप प्राप्त झाले. या उपक्रमात उपस्थित सर्व सेवेकऱ्यांनी ‘गाव तेथे केंद्र, घर तेथे सेवेकरी’ या ब्रीदवाक्याची प्रचीती दिली. पूरग्रस्तांना दिलासा देणे असो वा रक्तदानाद्वारे जीवदान देणे — स्वामी समर्थ सेवा मार्गाने प्रत्येक वेळेस ‘सेवा हीच साधना’ या तत्त्वाची प्रचिती दिली आहे. कार्यक्रमाच्या अखेरीस राष्ट्रगीताने सांगता झाली. वातावरणात स्वामी नामाचा गजर घुमत असताना प्रत्येक सेवेकऱ्याच्या डोळ्यांत समाधानाचे आणि भक्तिभावाचे अश्रू होते. “माळ कशी जपायची, नियम कसे पाळायचे” या गुरुवचनांचा अर्थ त्या क्षणी प्रत्येकाने अंतर्मनाने अनुभवला. जसे जळगावचे सोने देशभर प्रसिद्ध आहे, तसेच या भूमीवरील सोनेरी मनाचे सेवेकरी आजही मानवतेच्या सेवेची परंपरा जपत आहेत. हा उपक्रम म्हणजे केवळ सामाजिक मदत नव्हे, तर अध्यात्म आणि समाजसेवेचा अद्भुत संगम होता — जो प्रत्येक सेवेकऱ्याच्या कृतीतून प्रकट झाला

भुसावळ – मध्य रेल्वेच्या भुसावळ विभागातील विभागीय रेल्वे व्यवस्थापक पुनीत अग्रवाल यांनी मंगळवार, दि. ८ ऑक्टोबर २०२५ रोजी भुसावळ–धुळे रेल्वेमार्गाचे विंडो ट्रेलिंगद्वारे सखोल निरीक्षण केले. या दौऱ्याचा उद्देश रेल्वे पायाभूत सुविधांची योग्य देखभाल, प्रवासी सेवांची गुणवत्ता वाढविणे आणि प्रवाशांना दिल्या जाणाऱ्या सोयीसुविधांमध्ये अधिक सुधारणा घडवून आणणे हा होता. निरीक्षणादरम्यान धुळे, चाळीसगाव, कजगाव, पाचोरा आणि जळगाव या महत्त्वाच्या स्थानकांची सखोल तपासणी करण्यात आली. विभागीय व्यवस्थापकांसोबत विविध विभागांचे वरिष्ठ शाखाधिकारी, अभियंते तसेच पर्यवेक्षक उपस्थित होते. अग्रवाल यांनी रेल्वे ट्रॅकची स्थिती, सिग्नल व दूरसंचार (S&T) प्रणालीतील सुधारणांची गरज, स्थानक परिसराची स्वच्छता, प्रवाशांना उपलब्ध करून दिलेल्या मूलभूत सुविधा, बुकिंग कार्यालयांची स्थिती, सुरक्षा उपाययोजना, लहान पूल व लेव्हल क्रॉसिंगची तपासणी अशा विविध मुद्द्यांवर विशेष लक्ष केंद्रित केले. प्रवाशांचा अनुभव अधिक चांगला करण्यासाठी आवश्यक असलेल्या दुरुस्त्या व सुधारणा वेळेत पूर्ण करण्याच्या सूचना त्यांनी संबंधित अधिकाऱ्यांना दिल्या. विशेषत: चाळीसगाव व पाचोरा स्थानके सध्या अमृत भारत स्टेशन योजना अंतर्गत आधुनिकीकरणाच्या टप्प्यात आहेत. या दोन्ही स्थानकांवर सुरू असलेल्या पायाभूत सुविधा उभारणीच्या कामांचा श्री. अग्रवाल यांनी प्रत्यक्ष पाहणी करून आढावा घेतला. प्रवाशांना आधुनिक, स्वच्छ आणि सुरक्षित सुविधा पुरविण्याच्या दृष्टीने या प्रकल्पांना गती देण्याचे निर्देश त्यांनी दिले. तसेच, स्थानक परिसरातील स्वच्छता मोहिमा, प्रवासी निवाऱ्यांची सोय, स्वच्छतागृहे, पिण्याच्या पाण्याची उपलब्धता, गाड्यांच्या वेळापत्रकानुसार होणारी घोषणा व्यवस्था, तसेच दिव्यांग प्रवाशांसाठी उपलब्ध असलेल्या सुलभ सुविधा यांचीही तपासणी करण्यात आली. यावेळी प्रवासी तक्रारी व सूचना यावरही चर्चा होऊन आवश्यक ती पावले उचलण्याचा निर्णय घेण्यात आला. निरीक्षणादरम्यान विविध विभागांद्वारे चालू असलेल्या कामांचे सविस्तर सादरीकरण करण्यात आले. विभागीय व्यवस्थापकांनी संबंधित अधिकाऱ्यांना पायाभूत सुविधा आणि प्रवासी सेवांच्या उन्नतीसाठी ठोस पावले उचलण्याचे आदेश दिले. स्थानकांवरील चालू प्रकल्प वेळेत पूर्ण करण्यासाठी गती वाढविण्यावर भर देण्यात आला. या पाहणी दौऱ्यामुळे प्रवाशांच्या सुरक्षेत आणि सोयीसुविधांमध्ये मोठी सुधारणा अपेक्षित आहे. भुसावळ विभाग सतत आधुनिकीकरण व सेवेत सुधारणा करण्याच्या दिशेने कार्यरत असून, या तपासणीनंतर संबंधित कामांना वेग मिळेल, असा विश्वास व्यक्त केला जात आहे.

पाचोरा, दि. 10 ऑक्टोबर — भारतीय कृषी क्षेत्रातील शाश्वत शेतीसाठी उल्लेखनीय कार्य करणाऱ्या ‘निर्मल सिड्स’ संस्थेचे संचालक डॉ. जे. सी. राजपूत यांना ‘सॉईल हेल्थ गार्डियन अवॉर्ड’ प्रदान करण्यात आला आहे. हा सन्मान ‘नॅशनल जेविक फर्टिलायझर प्रोड्युसर असोसिएशन’, नाशिक आणि आसाम ॲग्रीकल्चर युनिव्हर्सिटी यांच्या संयुक्त विद्यमाने आयोजित कार्यक्रमात देण्यात आला. हा पुरस्कार वितरण सोहळा आसाम कृषी विद्यापीठाच्या सभागृहात पार पडला. डॉ. राजपूत यांना या प्रसंगी अनेक शैक्षणिक आणि कृषी क्षेत्रातील तज्ज्ञांच्या उपस्थितीत गौरविण्यात आले. त्यांच्या हस्ते भारतीय कृषी विज्ञान क्षेत्रात मातीचे आरोग्य, सेंद्रिय खतांचा वापर, आणि पर्यावरणपूरक शेती पद्धती या माध्यमातून शाश्वत विकास घडविण्याच्या दिशेने महत्त्वपूर्ण योगदान दिले आहे. डॉ. राजपूत यांनी शेतीसाठी नाविन्यपूर्ण तंत्रज्ञान, बी-बियाणे निर्मिती, तसेच शेतकऱ्यांना प्रशिक्षण देण्याच्या माध्यमातून सेंद्रिय आणि मातीस्नेही शेतीस प्रोत्साहन दिले आहे. त्यांच्या या कार्याची दखल घेत देशभरातील कृषी संस्था आणि संशोधन क्षेत्राने त्यांचा गौरव केला. डॉ. राजपूत यांनी पुरस्कार स्वीकारताना सांगितले की, “मातीचे आरोग्य हेच राष्ट्राचे खरे आरोग्य आहे. रासायनिक खतांवर अवलंबित्व कमी करून जैविक शेतीकडे वळणे ही काळाची गरज आहे.” त्यांच्या या विचारसरणी आणि सातत्यपूर्ण कार्यामुळे ते आज भारतीय कृषी क्षेत्रात प्रेरणास्थान ठरले आहेत. या पूर्वीही डॉ. जे. सी. राजपूत यांना नाईक मेमोरियल गोल्ड मेडल, इंटरनॅशनल हॉर्टिकल्चर सोसायटी ऑफ इंडिया पुरस्कार अशा अनेक मान्यवर सन्मानांनी गौरविण्यात आले आहे. ‘सॉईल हेल्थ गार्डियन अवॉर्ड’ हा त्यांच्या दीर्घकाळच्या कार्याचा योग्य सन्मान ठरला आहे.